احب اطلع البر لوحدي .

[ابو البر]

مساء الخير ياشباب
الموضوع ماطرحته الا للنقاش.
تبي تطلع البر وتستانس ولا حصلت رفقه
وش السواه
ورسولنا عليه افضل الصلاة والسلام قال بما معناه الركب شيطان.

[ابو ما بغى]

مساء النور اخوي ابو البر

حياك الله - وبغض النظر عن صحة موقع موضوعك من عدمه
الا ان هناك خطأ يجب تداركه
فالرسول صلى الله عليه وسلم لم يقل ما كتبته انت والذي ورد
حدثنا ‏ ‏إسحق بن موسى الأنصاري ‏ ‏حدثنا ‏ ‏معن ‏ ‏حدثنا ‏ ‏مالك ‏ ‏عن ‏ ‏عبد الرحمن بن حرملة ‏ ‏عن ‏ ‏عمرو بن شعيب ‏ ‏عن ‏ ‏أبيه ‏ ‏عن ‏ ‏جده ‏
‏أن رسول الله ‏ ‏صلى الله عليه وسلم ‏ ‏قال ‏ ‏الراكب ‏ ‏شيطان والراكبان شيطانان والثلاثة ‏ ‏ركب ‏
‏قال ‏ ‏أبو عيسى ‏ ‏حديث ‏ ‏ابن عمر ‏ ‏حديث حسن صحيح ‏ ‏لا نعرفه إلا من هذا الوجه من حديث ‏ ‏عاصم ‏ ‏وهو ‏ ‏ابن محمد بن زيد بن عبد الله بن عمر ‏ ‏قال ‏ ‏محمد ‏ ‏هو ثقة صدوق ‏ ‏وعاصم بن عمر العمري ‏ ‏ضعيف في الحديث لا ‏ ‏أروي عنه شيئا ‏ ‏

قال الشيخ عبد الكريم الخضير حفظه الله :
قال: ((الراكب شيطان)) يعني الواحد المنفرد بمفرده يسافر شيطان ((والراكبان شيطانان، والثلاثة ركب)) لأن الواحد إذا رآه من يريد بسوء يطمع فيه، سواء كان من شياطين الإنس أو من شياطين الجن، والاثنين كذلك قد يهم بهما الشيطان من الإنس أو الجن؛ لأن الاثنين يعني القدرة عليهم ممكنة، لكن الثلاثة، الثلاثة ركب، ولذا قال: ((فإن كانوا ثلاثة لم يهم بهم)) الراكب شيطان، قد يحتاج الإنسان السفر في مثل هذه الأيام وما يجد أحد يصحبه، فيركب سيارته ويمشي، هل نقول: هذا راكب شيطان، لا بد أن يأخذ معه اثنين، أو نقول: إن المراد به السير في الطريق لا بد أن يكون فيه أكثر من واحد، يعني هل المراد في مركبة واحدة لا بد أن يكونوا ثلاثة، أو في الطريق الواحد ولو كان كل واحد على مركبته لا بد أن يكونوا ثلاثة؟ يعني إذا نظرنا إلى حال الناس فيما قبل هل يتجمل الثلاثة على بعير واحد؟ ما يمكن، نعم؟ إذاً المقصود في الطريق، لا يكون في طريق لا يسلكه الناس، طريق مهجور، يسافر فيه وحده، لكن في الطرق المعروفة التي مأهولة، الطرق المأهولة التي يسير فيها الناس بكثرة ذهاباً وإياباً لو سافر وحده هذا ما هو منفرد هذا، هذا معه ناس كثر، يعني كما لو ركب دابته بمفرده، وركب فلان دابته، وركب فلان دابته، هذا ما فيه إشكال، ولا يلزم أنه إذا أراد السفر قال: اركب يا فلان، اركب يا فلان، أنا ما أقدر أسافر لوحدي، نعم لا تسلك طريقاً مهجوراً بمفردك، أما الطرق المأهولة هذه لا تدخل في مثل هذا.
منقول
واظن والله اعلم انك قصدت ان تكتب الراكب شيطان وسقطت الألف (خطأ املائي)
موفق

[ابو البر]

جزاك الله خير
الألف غيرت المعنى
اكرر شكري لك

[faisal 506]

السوات اقعد ببيتك الله لايهينك وتعوذ من بليس
وش المتعه وانت طالع بلحالك بالله
اذا مامعك رفقه فوق ثنين ماتسواء عليك الطلعه

[ابو البر]

السوات اقعد ببيتك الله لايهينك وتعوذ من بليس
وش المتعه وانت طالع بلحالك بالله
اذا مامعك رفقه فوق ثنين ماتسواء عليك الطلعه

صباح الخير والسرور.
انت ما اعطيتني حل
بس اجلس في بيتك وبس

الظاهر انت ما تحب البر مثلي
انت تحب تطلع مع الناس وبس ههههه.

[awadh8874]

سج القدم واستانس وماعليك


ان حصلت لك خويا عز الطلب

وإلا سجتك وحداني اطيب

[faisal 506]

صباح الخير والسرور.
انت ما اعطيتني حل
بس اجلس في بيتك وبس

الظاهر انت ما تحب البر مثلي
انت تحب تطلع مع الناس وبس ههههه.

انا فعلا ماحب اطلع وحداني ابد
احب الجمعه وسعه الصدر
والبر بالعكس احبه ومايمر اسبوعين الا لازم كشته هذا اذا مهيب اسبوعيه
اما وحداني صعبه جدا ياصاحبي

[ابو البر]

سج القدم واستانس وماعليك


ان حصلت لك خويا عز الطلب

وإلا سجتك وحداني اطيب
الله يسلمك والحاظرين
ودنا بالطيب لاكن الدهر جحاد جيب
كلما تخلص مع الناس كنك تغشها
ويدك لا مدت وفا لاتحرى وش تجيب
كان جاتك سالمه حب يدك وخشها

والله ياخوك ان سجتي بلحالي ان فيها تغيير جو وهدؤؤؤ ما مثله
وانا اتكل على الله في كل شي والمقدر مكتوب للأنسان مهما حرص .
شكرا لمشاركتك .

[ابو البر]

انا فعلا ماحب اطلع وحداني ابد
احب الجمعه وسعه الصدر
والبر بالعكس احبه ومايمر اسبوعين الا لازم كشته هذا اذا مهيب اسبوعيه
اما وحداني صعبه جدا ياصاحبي
ترى وانا خوك حب البر ماهي قاليه
تراه حب مخشخش في عروق الهاوي

وش يسوي الواحد في حالة انه مضطر
اجل تبيه يناظر في سيارته عند باب البيت والجو غيوم .

يتكل على الله
ثم يحط العجرا هي ورصاصها تحت المخده ويبحر على رب العباد.

شاكر لك حضورك ورأئيك .

[ابو محمد 276]

تراني مثلك بعض الأحيان لوحدي

[ابو البر]

نصف الشعب مثلي ومثلك
ولاكن يجون ناس مدري وش اقول عنهم

عقدو العالم من الدين والدنيا

استغفر الله العظيم

فيصل ذا ودي انفرد به في شعيب واذبحه واشويه واكله هههه

[E Teacher]

لا تقولون عني نفسيه او موسوس ههههههههههههههه
يعلم الله اني احب الوحده اهوجس مره واشيلها شيله مره واذكر الله مرات واصلي على خير البشر لا ازعل احد ولا احد يزعلني لا اغتاب احد وان احد اغتابني اخذت حسناته متوكل على الله الواحد الاحد وذاكر اذكار الصباح والمساء ثم بندقي معي وموتري الحر الاشقر معي وان خاواني احد وطلب خوتي يا هلا ويامرحبا به محفول مكفول . اما اني اطلب خوة احد معصي
العذر والسموحه طولت عليكم وفي امان الله

[غريب من يوم]

شوف انا لا اعرف وضعك الشخصي ولاكن خذها مني

اذا انت موظف شوف معك كم واحد وسو لك عزبه محترمه مجلس واعزك الله دورة مياه وماطور وعامل بنقالي راتبه 800ريال ، والله اشوف هذا احلى شي لأهل البر بس يكون معك في المخيم اقل شي ثنين غيرك عشان تقل عليك التكلفة وكل يوم اطلع وانبسط البر شرحة صدر ، وبعدين طور في مخيمك حط فيه حلال بسيط او تسمين اغنام لبيتك .
اما اذا كنت عزابي دوس المخاطر ولا تخشى عواقبها ، لاكن تجلس 24 ساعة لحالك غلط اكبر غلط خذها مني يهجبك شي والعياذ بالله الوحده شينه ، اطلع البر وحدد لك مكان يكون حولك بدو وسير عليهم اشرب حليب تعلل على قولتهم واذا جيت تنام شب ضوك وانبسط ونام تكون قضيت بعض يومك مع اوادم اما لحالك فلا.

انا كنت انام في منطقة اقولك مره على قولتهم على سوالف الناس فلم رعب ، بس زي كذا اسمر عند عرب وبعدين اجنب الموتر واشب الضو واسوي لي حليب او شاي وانام لين الفجر وبعدها اكمل يومي اروح منا ومنا وعلى هذا الحال.

[البدراني-]

بعض الاحيان الخلوه مع النفس طيبة

[ابو البر]

شوف انا لا اعرف وضعك الشخصي ولاكن خذها مني

اذا انت موظف شوف معك كم واحد وسو لك عزبه محترمه مجلس واعزك الله دورة مياه وماطور وعامل بنقالي راتبه 800ريال ، والله اشوف هذا احلى شي لأهل البر بس يكون معك في المخيم اقل شي ثنين غيرك عشان تقل عليك التكلفة وكل يوم اطلع وانبسط البر شرحة صدر ، وبعدين طور في مخيمك حط فيه حلال بسيط او تسمين اغنام لبيتك .
اما اذا كنت عزابي دوس المخاطر ولا تخشى عواقبها ، لاكن تجلس 24 ساعة لحالك غلط اكبر غلط خذها مني يهجبك شي والعياذ بالله الوحده شينه ، اطلع البر وحدد لك مكان يكون حولك بدو وسير عليهم اشرب حليب تعلل على قولتهم واذا جيت تنام شب ضوك وانبسط ونام تكون قضيت بعض يومك مع اوادم اما لحالك فلا.

انا كنت انام في منطقة اقولك مره على قولتهم على سوالف الناس فلم رعب ، بس زي كذا اسمر عند عرب وبعدين اجنب الموتر واشب الضو واسوي لي حليب او شاي وانام لين الفجر وبعدها اكمل يومي اروح منا ومنا وعلى هذا الحال.
رغم ان كلامك وبكل صدق ما وافق طريقتي في حب البر والهدؤ
ولاكن حبيتك لأن بين ثنايا كلامك رجل في منتهى الطيبه القريبه من القلب .
شكرا لك عزيزي.

[ابو البر]

بعض الاحيان الخلوه مع النفس طيبة

انت تقولها صدق
والله يا اخي ان مع مرور الوقت ومع كثرة الطلعات لوحدي صرت مدمن (الوحده )
حتى جوالي اقفله
وتصدق ان بعض الطلعات اتعمد ما انام قبل طلعت البر علشان ابرمج نفسي انام بعد صلاة العشاء مباشره علشان اصحى لصلاة الفجر ثم استمتع بطلوع الشمس واشب ناري واشغل الرادي وافطر ثم اخذ عصاتي وامشي بالساعات الين اجهد نفسي ثم ارجع اسوي الغداء واتفرج على التلفزيون داخل الكرفان ثم ادخل على النت
ثم اسوي اتصالات يمين وشمال
ثم اجلس بجنب السياره اتفرج واونخ تقول عندي بيات شتوي هههه
كذا اجلس يومين ثلاثه ما عندي مشكله .
شاكر لك مشاركتك .

[الحربي حاتم]

الوحده زينه واللي مايتعودها

[ابو فهد 2222]

على حسب اذا عساس بفضل واحد
اذا كاشت وبلحالك الله من الوسوسه
اذا قانص أفضل بلحالي
والخوه قوه

مشكور على الموضوع

[خيال الغلبا]

انا اطلع لحالي لوحدي كل أسبوع

كل أسبوع يومين الى ثلاثة أيام ولااحلى منها ............لكن اشيل معي كتبي

[مهناعبدالله]

لوحدي مشكله
البر يبي ربع قروم
ما كل من شراء فراش تنزاني راعي بر ويبرد السبد في الشغل الطبخ والنفخ ونصب الخيمة
وعند العطال وبعضهم يقلب راسك وانت على يمه ويخليك تضيع الطريق

[ابو البر]

لوحدي مشكله
البر يبي ربع قروم
ما كل من شراء فراش تنزاني راعي بر ويبرد السبد في الشغل الطبخ والنفخ ونصب الخيمة
وعند العطال وبعضهم يقلب راسك وانت على يمه ويخليك تضيع الطريق
عشان كذا حبيت اطرح الموضوع
هل طلعت الشخص لوحده مفيده
اشكرك لمشاركتك.

[الذيب الأبيض]

عادي اهم شي لاتبعد مره

حتى لاتلقى حتفك مثل كثير من الناس سواء عطل والا تغريزه والا عارض صحي والا قطع بنزين

http://www.almisnid.com/almisnid/upload/Desert%20survival-2.jpeg

[ابو البر]

عادي اهم شي لاتبعد مره



حتى لاتلقى حتفك مثل كثير من الناس سواء عطل والا تغريزه والا عارض صحي والا قطع بنزين


http://www.almisnid.com/almisnid/upload/Desert%20survival-2.jpeg

شفت كيف
يعني ما أحد مات وهو بوسط مستشفى
ترا الشغله مالها شغل بطلعة بر
المنية تجي للي بالبر واللي بالعناية المركزه بمستشفى.
الموت حق لاتأخير ولاتقديم
انا اتكلم بموضوعي
عن طلعت بر لوحدك
افتكو لحيك .

[الذيب الأبيض]

والله الشرهه مهب عليك على الي ينصح سفيه مثلك

[ابو البر]

والله الشرهه مهب عليك على الي ينصح سفيه مثلك

شرواك الطيب .

[النجم السراي]

شوف وانا اخوك عندي لك خطه وراها حسنات بعد

اذا رحت للبر حط لك دعثور اي مثل البركه تشرب منها الطيور وتعرف وقت الصيف الحر حط لك اثنين او ثلاثه وكل وحده في شعيب وسويلك طريق بالسياره وكل اسبوع مر عليها والناقص املاها ماء واخر وحده تكي جنبها وسوي براد الشاهي وتشغل نفسك بشيء احسن من التفكير

[متقاعد مبكر]

بعض الطلعات لوحدك افضل من بعض الرفقه اذا زانت الجلسه قال روحنا والا جالس معك وهو على اعصابه وتتمنا انك ما طلعت اصلا فالافضل اطلع لوحدك وخلك حول الحمى والا اطلع برفيق مفصول عنده الريوس وللاسف البعض يطلع معك ومن اول ما تجلس اخذ المركا وجلس يتفرج لك وانت تشتغل وهذا الرفيق لانقتيه والبعض الاخر جالس يوجهك سو كذا وسو كذا مسوي روحه مدير واخيرا تقبل مروري

[ابو البر]

بعض الطلعات لوحدك افضل من بعض الرفقه اذا زانت الجلسه قال روحنا والا جالس معك وهو على اعصابه وتتمنا انك ما طلعت اصلا فالافضل اطلع لوحدك وخلك حول الحمى والا اطلع برفيق مفصول عنده الريوس وللاسف البعض يطلع معك ومن اول ما تجلس اخذ المركا وجلس يتفرج لك وانت تشتغل وهذا الرفيق لانقتيه والبعض الاخر جالس يوجهك سو كذا وسو كذا مسوي روحه مدير واخيرا تقبل مروري

عز الله انك جبتها على الجرح
وعلشان كذا الواحد يطلع لوحده .
والله الحامي سبحانه .

[عاشق الددسن84]

السلام عليكم اول شي شكرا لك ع الموضوع الجميل والمفيد وثانيا انا من ناحيتي كشتاتي ومقناصي للضبان والدخل وحداني ياربي لك الحمد المؤتر تحت رجلي وسلاحي تحت يدي والي لاحضته نادرا تحصل خوي تحطه على يمناك

[Al3rands]

يازينها في بر خلي اسرح لحالي والخلق لله ............

[شرق المغيب]

مالها لذه تطلع لحالك
بس اذا طلعتك مقناص قميري ماتنلام ابد
للقميري لاصارقريب انااحب اطلع لحالي واجيب صيدي للبيت

[طلال مكشاتي]

اذا محد راح معي اروح الحالي صامل بس اخذ معي شي اتفيد منه كتاب اي شي .:f
والبر تمد النظر وتستانس فيه وعلى قولتهم (البر برير) :D
مشكور على الموضوع ،،

[Obu-Nasser]

هلا ومرحبا بـ ابو البر
الطلعة مع الخويا مافيه مثلها وناسة وسعة صدر، بس اذا خوياك مشغولين فما تنلام تطلع لحالك.
الطلعة وحداني ابرك مئة مرة من انك تطلع مع هالاشخاص:
-واحد اذا زان جوك وزانت الجلسة قال ودني!!
-واحد مشغول بجواله والانترنت(اذا حولكم نت)
-واحد زلابه لايشتغل ولا يفكك من غثاه
-واحد نكدي ينكد الجلسة ويغثك بهرج ماله سنع
-واحد يخرب الطلعة ويبي يرجع ولايبي يرجع لحاله يبيكم كلكم ترجعون!!! مشينا مشينا
-واحد غثيث لاقلت رحنا يمين قال رح يسار!!!

الطلعة وحداني مابها شي، بس احرص على سلاحك و صيانة سيارتك وخذ احتياطك بالماء والزاد. ويازينها لا صار الشور براسك تروح وين ماتبي وترجع متى مابغيت.

[ابو البر]

هلا ومرحبا بـ ابو البر
الطلعة مع الخويا مافيه مثلها وناسة وسعة صدر، بس اذا خوياك مشغولين فما تنلام تطلع لحالك.
الطلعة وحداني ابرك مئة مرة من انك تطلع مع هالاشخاص:
-واحد اذا زان جوك وزانت الجلسة قال ودني!!
-واحد مشغول بجواله والانترنت(اذا حولكم نت)
-واحد زلابه لايشتغل ولا يفكك من غثاه
-واحد نكدي ينكد الجلسة ويغثك بهرج ماله سنع
-واحد يخرب الطلعة ويبي يرجع ولايبي يرجع لحاله يبيكم كلكم ترجعون!!! مشينا مشينا
-واحد غثيث لاقلت رحنا يمين قال رح يسار!!!

الطلعة وحداني مابها شي، بس احرص على سلاحك و صيانة سيارتك وخذ احتياطك بالماء والزاد. ويازينها لا صار الشور براسك تروح وين ماتبي وترجع متى مابغيت.
حياك الله ابو ناصر
وخصوصا اذا صار معك كرفان :D

[الحربي حاتم]

ماشاء الله عليك معك كرافان ، مانت لحالك أجل ، وتدري دام هذا حالك أطلع لحالك تونس ولا تشيل هم أحد .

[صياد الخبر]

السلام عليكم

اطلع لحالي من سنين ومكيف عمري انهو بحر او بر

النفوس ما تنجبر على بعض .. ولا ودك تاخذ ثقال طينة تندبل كبدك ولا خفاف يطيرونك بالعجة

والناس ماهي على الكيف .. حتا ان لقيت راعي الريوس المفصول .. فهذا يعتبر نادر ..

كل ما عليك .. ادوات السلامة .. ماء كافي لثلاث ايام لو رحلتك ساعات ( ما تدري وش يصير )

اكل زايد وان زاد وانت راجع تصدق به على الرعيان او الضعوف بالبر احيان تلاقي ناس منقطعة او شخص مقطوع

في مثل كان يقولونه اجدادنا في البحر

اهل الغوص والسفر

الشيص في الغبة حلو.

(الشيص) هو بسر النخيل غير الناضج ..
(الغبة) هي البحر الغزير ..
أي أن التمر الرديء يكون جيدا عندما لايوجد سواه.

---

لا تنسى الاجهزة المتاحة

الثريا

ال GPS

وقبل تدخل اي محل وعند اخر نقطة يصل اليها ارسال الجوال ( اتصل في اهلك او زميل واخبره في اخر نقطة انت فيها او ارسل رسالة جوال ... من الرسالة راح يتحدد مكان تواجدك )


أسف للإطالة

بالتوفيق

[ابو حسان الجنوبي]

الطلعة للبر حلاتها الجمعة والسمر والسوالف بحضور القروم الي ماتعاف مسايرتهم

اما التمشي عصير يوم لوحدك فمافيه باس

أنا اشوف ان المبيت في البر لوحدك فيه مجازفة فهناك اسباب من أبسطها ممكن الواحد يشرق بقطرة موية وتكون هلاك له

أنا اتفق مع من يفضل المبيت برفقة شخص وأكثر

تقبلوا تحياتي ودمتم في حفظ الله في حلكم وترحالكم

[يكفيني نظرة]

ماشاء الله تبارك الله دام معك كارفان سج يامال الغنيمه ولو تحط به مكيتبه صغنونه وبها قصص مهيب شينه ( انا احب القراءه)، انا ما اخفيك ما اطلع لحالي اغلب طلعاتي معي واحد واللي يبي يجي يدل الدرب وهالواحد يونسني ويصير من خفيفين الظل وونيس بالسوالف .