مشكله في قدر سب

[خليل909]

السلام عليكم ورحمة الله
ياخوان لدي مشكله في قدر ضغط السب كان فيه تنسيم من الربل ورحت بدلته ولاكن اول مره طبخت فيه مالاحظت تنسيم ولاكن بعدها بداء يظهر مع الجنب وديته لكذا محل يقولي كل شي سليم احد مرت عليه المشكله هذي يفيدني جزاه الله خير وفكرت اوديه المخرطه بزينون حواف القدر بس مادري تضبط معي اولا الي عنده حل جزاه الله خير يفيدنا

[ابو وليد999]

وانا اخوك وفر على نفسك وانطله واشتر قدر السيف ب٨٠ ريال وبتدعي لنا

[خليل909]

http://im31.gulfup.com/3qe3q.jpg
صوره للقدر

[خليل909]

وانا اخوك وفر على نفسك وانطله واشتر قدر السيف ب80 ريال وبتدعي لنا

الله يوفقنا وياك ويجزاك خير على النصيحه وقدر السيف موجود وكل طلعة بر حاظر وبالخدمه ولاكن هذا والله متحسف عليه ومقاسه ١٤لتر كويس ودي اخليه للبيت

[ناصح]

السلام عليكم ورحمة الله
ياخوان لدي مشكله في قدر ضغط السب كان فيه تنسيم من الربل ورحت بدلته ولاكن اول مره طبخت فيه مالاحظت تنسيم ولاكن بعدها بداء يظهر مع الجنب وديته لكذا محل يقولي كل شي سليم احد مرت عليه المشكله هذي يفيدني جزاه الله خير وفكرت اوديه المخرطه بزينون حواف القدر بس مادري تضبط معي اولا الي عنده حل جزاه الله خير يفيدنا

وعليكم السلام ورحمة الله وبركاته

هل انت متأكد أنه ما سقط منك
لأنه ربما يكون مطعوج بشكل غير ملاحظ

فحاول أنك تحدد مكان التنسيم هل هو في جهة معينة..؟؟

[خليل909]

وعليكم السلام ورحمة الله وبركاته

هل انت متأكد أنه ما سقط منك
لأنه ربما يكون مطعوج بشكل غير ملاحظ

فحاول أنك تحدد مكان التنسيم هل هو في جهة معينة..؟؟

هلا اخوي ناصح وبالنسبه الطيحه ماذكر انه طاح مني والطعوج تفحصه صاحب محل يقولي سليم والتنسيم تقريبا من جهة مشبك القدر الي يمسك الغطاء

[ركان]

السلام عليكم أخوي

سؤال هل أنت تسخدم الملعقة الحديد في الطبخ أذا كان جوابك نعم - هل انت تقوم بضرب الملعقة عند التكشين على الخافة العلوية للقدر أذا كان جوابك نعم - فقم بالآتي
حاول تقوم بصنفرة الحواف بشكل كامل تأكد ان الوجه الذي قمت بتركيبة أصلي وأحرص على أستخدام الملعقة الخشبية عند الطبخ وطقطق على راحتك عند التقليب .

[خليل909]

[QUOTE=ركان;10383740]السلام عليكم أخوي

سؤال هل أنت تسخدم الملعقة الحديد في الطبخ أذا كان جوابك نعم - هل انت تقوم بضرب الملعقة عند التكشين على الخافة العلوية للقدر أذا كان جوابك نعم - فقم بالآتي
حاول تقوم بصنفرة الحواف بشكل كامل تأكد ان الوجه الذي قمت بتركيبة أصلي وأحرص على أستخدام الملعقة الخشبية عند الطبخ وطقطق على راحتك عند التقليب .[/QUOTE
بالنسبه لسؤالك نعم وفكرت الصنفره قالها لي احد العاملين في المحل وابي اجربها لاهنت على المعلومه بيض الله وجهك

[الشيخ الظريف]

هنالك عدة اسباب ذكر بعضها الاخوان ولكن اليد مثبته بمسامير ربما يكون قد تحرك المسمار ويجب تحديد مكان خروج البخار بأن تنفخ القدر بماطور هواء السياره وتضعه في ماء ويتحددخروج البخار عندئذ وتسهل المعالجه

[خليل909]

التنسيم حددته من حواف القدر وليس من اليد حطيت فيه ماء وشبيت عليه النار وبعد ماقام يغلي الماء ظهر معي التنسيم وطريقت نفخ القدر بالهواء ماعرفها

[عبار درب]

اعط الخبز خبازة
على ما اذكر ورشة سب في شارع الستين بالملز بعد تقاطع شارع جرير مع شارع الستين الي هو طريق صلاح الدين باتجاه الشمال ثاني او ثالث شارع يمين ولا تاخذه منهم الا مصلح و مفحوص

[خليل909]

شكراً لك على المعلومه ولاكن ماني من اهل الرياض بعيد عنها . الله يوفقنا وياك

[خالد الخطير]

اكثر ماينسم هي قدور المعدن الله يعينك

تاكد انه مركب الربله وطابقها صح

حاول تتاكد من كذا محل صيانه في منطقتك لا تعتمد على محل واحد

[نديم القيض]

فيه راي ..............................

حطه بالمتحف عندك

[مكشاتي مدني]

اخوي تبي نصيحة اخو قدر السب فرنسي لاتفرط فية وصناعة متينة وكل شي ومافية شي مايخرب لكن مشكلتة اتوقع بسيطة عبارة عن جلدة وانصحك تودية لوكيلة العيسائي في مخرج 6 طريق ابو بكر الصديق تدخل ووجهك شمال بعد البنك الفرنسي على يمين وفية فرع بالملز ماعرفة ذكرة احد الاعضاء الكرام والله يوفقك

[أبو سهيل]

قد يكون التنسيم بسبب خطأ في التخزين
تركه بعد الإستخدام والغطاء مشدود عليه
وهذا يؤدي لانكماش الربل وتيبسه
وبالتالي يحدث التنسيم حتى وإن كان في الاستخدام التالي للقدر بعد تغيير الربل

[خليل909]

اشكر كل من تفضل ورد على الموضوع . وبالنسبه القدر وديته امس للمخرطه وبعد فحصه من الفني تبين ان فيه طعج بحدود 3ملي وكان وقته ليل وقالي اتركه عندي وباكر الصبح أتاكد شكل مامنه فايده القدر

[راعي الداخلة]

ما شاء الله ممتاز

[الشيخ الظريف]

قدور السب يجري منها تنسيم ضعيف لا يؤثر وهذا من واقع تجربه خاصة مع الحواف

[خليل909]

قدور السب يجري منها تنسيم ضعيف لا يؤثر وهذا من واقع تجربه خاصة مع الحواف

مثل ماتفضلت اخي الكريم وانا قليل استخدام لقدر السب ماعرف عنه شي

[أبو راشد 33]

سلامتك و سلامة أهلك أغلى من القدر
و القدر غيره قدر .
اجدعه و اشتر سلامتك

[خليل909]

سلامتك و سلامة أهلك أغلى من القدر
و القدر غيره قدر .
اجدعه و اشتر سلامتك

الله يجزاك خير يابوراشد على النصيحه والله يبعد عننا وعنكم كل مكروه ومن يقرا بيض الله وجهك

[مكشاتي مدني]

بالنسبة اذا كان فية طعج هذا اكيد من ضربة في المستودع حتى السيارات الجديدة تتعرض لاحتكاك وضربات بسبب سوء التخزين او اساءة ركن السيارة في المعارض والمستودعات والقدر اكيد تعرض لضربة شديدة ادت لوجود طعج بسبب سوء التخزين وليس بسبب قلة الجودة لكن قدر سب الفرنسي لايعلى علية بشهادة الجميع والان اصبح شركة تيفال نصيحتي لاتفرط فية لانة ذو جودة عالية وسعرة لايقل عن 500 ريال والله يوفق الجميع

[النجم الهاوي]

نفس حالتك بالضبط . ونفس المشكله والقدر . اذا عرفت حلها عطني خبر

[خالد الخطير]

نصيحه

خذ لك تيفال ستيل ١٠ لتر بـ ٤٦٠ الى ٥٠٠ اذا طار

لك وللزمن وصحي وصناعته فرنسية

سب هي شركة ام و يسمونها (مجموعة سب)

اشترت تيفال و مولينكس وكذا شركة

لذلك حتى تلاقي على كرتون تيفال مكتوب

Tefal By Seb

اي معناها تيفال بواسطة سب

والستيل هو الستيل القديم مافي فرق

اللهم بلف الامان سابقاً كان حديد

والبلف حالياً عبارة عن مطاط عالي التحمل للحراره

وسبب تغيير البلف هو ان البلف الحديد مع الوقت يتسدد من كثرة الزيوت وممكن مايفتح اذا انسدت البلبله او بلف الدوران

لكن للاسف مازال فيه ناس تؤمن بالقديم ويباع بقيمة غير طبيعية بحجة انه عالي الامان واصلي ومن الكلام الي لا صحة له ، بالعكس هذا غير صحي

اجل كواتم مستعملة تباع باغلى من جديد ؟!

بحكم انه اقدم او منقطع او توقف ؟! :D

يكون بعلمك سب للان تنتج تحت خطين تيفال وسب والصنع للان مازال قائم

لكن الثقافه للحين ماسكه غلط مع القدور المستعمله الي بعضهن تقل وجه اجرب متحفره من الكرف :)

ويكون بعلمك الحفر الي تشوفها ماتطلع منها بقايا الطعام الا كل يومين تبي تغسله وتنقعه بكلوروكس وهنا المعدن يخرب !!