المساعد الشخصي الرقمي

مشاهدة النسخة كاملة : اقصر كشته لابو ذيب مع اصحابه القصمان في الشرقيه19 /12/2006


ابوذيب
19/12/2006, 02:57 AM
اننا مجموعه من ابناء نجد بالشرقيه

من عنيزه ورياض الخبرا والرس والبدايع وبقعاء،

نقوم بطلعات بريه قصيرة الزمن بحكم ان الغالبيه موظفين والنزر اليسير منا لديهم اعمال حره

وبعد هطول الامطار الاخير على المنطقه الشرقيه، حسب العاده وصلتنا رساله الجوال تحدد مكان الطلعه البريه لهذا اليوم

في منطقه بها شجر الحمض والمرخ وكثبان رمليه تحولت الى لون احمر قريب من لون تراب النفود ...ياقلبي يالنفود



عموما وصل البعض عصرا والبعض بعد المغرب، وكان ابو علي يستقبلنا بالمصابيب ذات الخلطه السريه وهي لذيذة

الطعم مرنة الملمس مهما استوت على الصاج .



والمنافسه كالعاده محتدمه بين ابو عبدالله وابو رامي في اشعال النار ووضع الحطب باستمرار من كبار خشب السمر

لدرجة ان كل واحد يخبيء بسيارته حطب رتبه وجلبه مسبقا ، فكل منهما يذهب الى سيارته ويجلب غمرا ويضعه ونحن نتباعد

عن اماكننا وكانت منافسه طريفه واعتدنا عليهما .



كنا نتجاذب اطراف السوالف والمواضيع اثناء تناولنا القهوه واكلنا من المصابيب، والقشد ، وبعض الاكلات الاخرى المجلوبه من المنازل،

الى ان صلينا صلاة العشاء ورجعنا الى ماكنا عليه من تعاليل على تلك النار والدلال ، اما ابو عبدالله فقد رمى بفروته وشمر عن ساعديه الله يعطيه العافيه وتبعه ابو علي

ليقوما بتجهيز عشائنا والمقرر في اغلب الاحيان ان يكون من لحم الحاشي البري ، وزملائنا ماشاء الله عليهم اهل ذوق بالطبخ واساليب التفنن فيه (( طبعا قصمان ))



وبعد مدة قضيناها بالضحك والجد والهزل اعلنوا المعازيب في تجهيز السفره والسلطات وخلافه وقلطوا العشا وتعشينا عشاء 5 نجوم قصيميه ، وحمدنا الله على العفو والعافيه

والامن والامان ورخاء العيش في وطننا الغالي في عهد ملكنا المحبوب والمبروك حيث وافقت طلعتنا طلوع اخبار الميزانيه التي تبهج النفس .



وقد سمرنا الى وقت متاخر من الليل ثم ركبنا مطايانا الحديديه وقفلنا راجعين الى المدينه الصناعيه.

ولكم بعض الصور وقد نسيت ان اصور عشانا لكنه مغري ويسيل له اللعاب،

فهذا الموضوع تسخين لمواضيع قادمه والارشيف موجود به صور لعدة رحلات مكشاتيه بصحبة بعض الاعضاء منذ بداية موسم امطار هذه السنه.


http://www.mekshat.com/pix/upload/images24/mk14676_pict7129.jpg


http://www.mekshat.com/pix/upload/images24/mk14676_pict7131.jpg


http://www.mekshat.com/pix/upload/images24/mk14676_pict7134.jpg


http://www.mekshat.com/pix/upload/images24/mk14676_pict7137.jpg


http://www.mekshat.com/pix/upload/images24/mk14676_pict7140.jpg


http://www.mekshat.com/pix/upload/images24/mk14676_pict7147.jpg
مشعل_1001
19/12/2006, 03:29 AM
تقرير رائع يابو ذيب الله يعطيكم العافيه انت وربعك الي معك ويجعل كل طالعاتكم وناسه في وناسه يابو ذيب .
ابوذيب
19/12/2006, 04:31 AM
تقرير رائع يابو ذيب الله يعطيكم العافيه انت وربعك الي معك ويجعل كل طالعاتكم وناسه في وناسه يابو ذيب .

تسلم والله
وجزاك الله خير

وعساك من اهل الطلعات والوناسه وعساك تتهنا بهالربيع وانت في صحه وعافيه

تحياتي لك
مسافر1
19/12/2006, 06:05 AM
ماشاء الله ..
طلعة جميلة ..
لكن نسيان تصور العشاء ربما يكون بسبب الجوع .
يسلم أخي الكريم .
أبوكلبشة
19/12/2006, 06:28 AM
مشاءالله عليكم وعيني عليكم باردة
على الطلعة والتقرير الزين
والمصابيب يوم شفتهن قوطرت سعابيلي
ياجعلهن بالعافيه
الكونترولCONTROL
19/12/2006, 06:51 AM
جوعتنا !!!!!!!! ابو علي حقكم مدلعكم و تستاهلون !!!!!!!!!
============
حنا ابو علي حقنا ذبحنا بشحوم الحاشي و كبساته .....
==================================
تكفى ادع لنا يرزقنا الله طباخ شقردي مثلكم
نبي مصابيب و نبي مطازيز
===========================================
أبو فراس
19/12/2006, 07:26 AM
السلام عليكم ورحمة الله وبركاته

الحبيب ابو ذيب اللي كلك صنوبر على زبيب

توي ادري انك يا اهل الجبيل تكشتون

اثر عندكم وقت فراغ تطلعون به للبر

اجل ورا ربعنا اللي بالجبيل يشتكون من كثر الشغل ويقولون من العمل للفراش

او كلكم متقاعدين وبالجبيل ساكنين
رسلان
19/12/2006, 07:40 AM
الغالي : أبا ذيب ...
عافاكم الله على الموضوع والسرد الجميلين والصور المتنوعة ....
بورك فيكم ...
وبانتظار جديدكم ...
BASSAM
19/12/2006, 07:48 AM
ماشاء الله تبارك الله

طلعه ممتازه والحمدالله على السلامه

شكل البرد اكلكم ياابوذيب،،، الله يعينكم

شكرا على التقرير والصور الرائعه




اخوك بسام
قناص الحبارى
19/12/2006, 07:57 AM
ماشاء الله عليكم يا بوذيب

متى كان الترتيب والطلعه ..؟؟

الله يهنيكم والله ويبارك فيكم جميع ...


بس لا تنسونا المره الجايه ..

أخوك/ ابو عبد العزيز
فنجال
19/12/2006, 08:18 AM
وعليكم السلام
هلا بالبناخي الحمدلله على السلامه طول غيابك ماشالله الله يونسكم دوم يابو ذيب.
تحياتي
ابو سالم
أبو شعلان
19/12/2006, 08:31 AM
بسم الله الرحمن الرحيم

أخوي ابو ذيب .. الف شكر لك على التقرير المتكامل ... اللي بصراحه مجهود تشكر عليه ... كيف وهو في كشته تجمع ( أولاد علي )...

الله يجمعنا وإياكم في فردوسه

أما المصابيب بلحالها تكفي عن العشاء هذا وحنا ماشفناه ...

أخوي أبو ذيب ... ننتظر المزديد ... من الجديد ...

,,,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,,,,
:j
ابوذيب
19/12/2006, 11:58 AM
ماشاء الله ..
طلعة جميلة ..
لكن نسيان تصور العشاء ربما يكون بسبب الجوع .
يسلم أخي الكريم .


تسلم والله
اللي نساني تصوير العشى ماهو بس الجوع انا كنت ارتب ملحقات العشا
والكاميرا بالسياره،يمكن لو انا معلقها معي لانتبهت

تحياتي لك
كشات
19/12/2006, 12:00 PM
ماشاء الله تبارك الله

الله يهنيكم بالعافيه ويبارك لكم بهالكشتات الحلوه

بس تعال يابو ذيب
منين طعوس حمر حول الجبيل
الا كانها حمرا من رماد مصنع الحديد ومن عقب المطر طغا عليه الصدأ ;)

الله يهنيكم ويسعدكم
بس مهيب تسنه برد:confused:
ابوذيب
19/12/2006, 12:06 PM
مشاءالله عليكم وعيني عليكم باردة
على الطلعة والتقرير الزين
والمصابيب يوم شفتهن قوطرت سعابيلي
ياجعلهن بالعافيه

يامرحبا والله
بس يبغالك تكلبش سعابيلك لاتسيل على الصور
وانما على الواقع فقط ، ليتك حولنا ابشر والله بالمصابيب والحنيني والكبسات وفلة الحجاج
ابوذيب
19/12/2006, 12:10 PM
جوعتنا !!!!!!!! ابو علي حقكم مدلعكم و تستاهلون !!!!!!!!!
============
حنا ابو علي حقنا ذبحنا بشحوم الحاشي و كبساته .....
==================================
تكفى ادع لنا يرزقنا الله طباخ شقردي مثلكم
نبي مصابيب و نبي مطازيز
===========================================
هههههههههههههههههههههههههههه
يامرحبا يالغالي
وش رايكم نتبادل الخبرات نرسل لكم ابو علي حقنا انتداب اسبوع
وانتم كذالك،، وسمننا في دقيقنا


لك تحياتي
طحنون
19/12/2006, 12:10 PM
تسلم يابوذيب انت وربعك القصمان اللي ينشرون بالذهب
ولي ربع شروه من يقراء من الرس عزيزين علي بالحيل احسن من الاخوان ولي صولات وجولات معهم
ابوذيب ألا الشايب اللي معكم ممكن نستعيره منك الاسبوع الجاي في كشتتنا لان الشياب القصمان عليهم طلعات فكاهيه توسع الصدر
الجيب الربع
19/12/2006, 12:15 PM
ياهلا وغلا ابو ذيب





مهيب العاده تنسى شي ما تصوره يا ابو حسام



سعدنا بشوفتك وشوفة ربعك الذيابه وننتظر الباقي



تحياتي
ابوذيب
19/12/2006, 12:17 PM
السلام عليكم ورحمة الله وبركاته

الحبيب ابو ذيب اللي كلك صنوبر على زبيب

توي ادري انك يا اهل الجبيل تكشتون

اثر عندكم وقت فراغ تطلعون به للبر

اجل ورا ربعنا اللي بالجبيل يشتكون من كثر الشغل ويقولون من العمل للفراش

او كلكم متقاعدين وبالجبيل ساكنين

هلا والله بعمدتنا
حنا مجموعه نجادا لازم نكشت بالشهر من 3 الى 4 مرات
وكلنا مدمنين بر وشبت نار ودلال وعلوم رجال

بس ربعك اللي يتعذرون بالعمل ماتكيفو ا مع بر الجبيل والا 50كلم تحطهم بوسط البر اوا 20كلم تحطهم بوسط الطعوس
ولو عرفت منهم احد كان عزمناهم وننقل عدوى البر لهم .
والى لقاء مع تقريري عن رحلتنا بام رقيبه وصورر الطيور اللي انت خابر
تحياتي لك
الكشاتي
19/12/2006, 12:22 PM
ابو ذيب....

لا اقول الا كلمة واحدة فقط.....مبدع دائماً .....(( يالاطرم ))...ههههه.

تحياتي الخالصة لك
ابوذيب
19/12/2006, 12:29 PM
الغالي : أبا ذيب ...
عافاكم الله على الموضوع والسرد الجميلين والصور المتنوعة ....
بورك فيكم ...
وبانتظار جديدكم ...

هلا وغلا برسلان

والله انكم ياهل الرس مانتم بسهلين

تحياتي لك ولاهل الرس مخصوص
ابوذيب
19/12/2006, 12:32 PM
ماشاء الله تبارك الله


طلعه ممتازه والحمدالله على السلامه

شكل البرد اكلكم ياابوذيب،،، الله يعينكم

شكرا على التقرير والصور الرائعه




اخوك بسام



هلا والله بخطيبنا
اما البرد برد حيل (( مبكي الحصني ))

والى لقاء بام المصران
تحياتي لك
ابوذيب
19/12/2006, 12:36 PM
ماشاء الله عليكم يا بوذيب


متى كان الترتيب والطلعه ..؟؟

الله يهنيكم والله ويبارك فيكم جميع ...


بس لا تنسونا المره الجايه ..

أخوك/ ابو عبد العزيز



هلا وغلا بابو عبد العزيز

خلاص المره القادمه اعطيك خبر
بس تلفونك وتلفونات الشباب انمسحت من الجوال ومن جهاز الكمبيوتر
وهالحين اجمع الارقام بالقطاره

تحياتي لك
ابوذيب
19/12/2006, 12:39 PM
وعليكم السلام
هلا بالبناخي الحمدلله على السلامه طول غيابك ماشالله الله يونسكم دوم يابو ذيب.
تحياتي
ابو سالم
ياهلا والله بفنجال

وعسى نلاقيك بها الفياض ها السنه انشاء الله

تحياتي لك
الكونترولCONTROL
19/12/2006, 12:40 PM
هههههههههههههههههههههههههههه
يامرحبا يالغالي
وش رايكم نتبادل الخبرات نرسل لكم ابو علي حقنا انتداب اسبوع
وانتم كذالك،، وسمننا في دقيقنا


لك تحياتي
=======================
هاه ..!!!!!
لا ... لا ........ اخاف منك يا ابو ذيب .....
ثم اصير مثل الغراب اللي يبي يقلد الحمامة ... لا مشى مشيها و لا رجع لمشيته !!!!
==============================================
ابو علي حقنا ما نفرط به ..... ما صدقنا نلقى مثله !!!!!

...!!!!!! و ابو علي حقكم نشريه بالذهب يا ذهب !!!!!
6air_brr
19/12/2006, 12:41 PM
مشاء الله خوش طلعه

والحمد الله على السلامه

الصراحه اشتهيت المصابيب بس الحين قصمان ولا معكم حنيني مايصير .

بس شكل النومه كانت بالسيارة ومشغلين المكيف الحار بعد .

وتقبل تحياتي
ابوذيب
19/12/2006, 12:45 PM
بسم الله الرحمن الرحيم


أخوي ابو ذيب .. الف شكر لك على التقرير المتكامل ... اللي بصراحه مجهود تشكر عليه ... كيف وهو في كشته تجمع ( أولاد علي )...

الله يجمعنا وإياكم في فردوسه

أما المصابيب بلحالها تكفي عن العشاء هذا وحنا ماشفناه ...

أخوي أبو ذيب ... ننتظر المزديد ... من الجديد ...

,,,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,,,,
:j



هلا وغلا بابو شعلان
انشهد ان ( اولاد علي ) الواحد منهم عن الف
وعزالله انه ماتطفي نارك وهم معك وكل يبي يشتغل وينهب منك
الصحن يغسله وهذا ينهب منك الدله وهذا يسبقك على تقطيع البصل
واللله ان شهادتي فيهم مجروحه

لكن اقول انهم هم للبر والبر لهم
فلك ولهم صادق الحب والتقدير

وتحياتي لك وليتك تسير علينا بالجبيل

اكرر تحياتي لك
حجلان
19/12/2006, 12:53 PM
الله يوفقك يابوذيب انت واللي معك


انا من المنطقه الشرقيه/الاحساء حنا مثل بعض لنا طلعات كثيره وبالاخص في هذه الايام الممطره الجميله ابد مانترك البر اقلها في الاسبوع يوم
ولاكن تقريرك عن رحلتكم بصراحه اعجبتني جميله والاجمل انت مع هالرجال النشامى شروى من يقرأ رسالتي


اسعد الله ايامكم وجمعتكم بكل خير


(ابوعبدالله)
ابوذيب
19/12/2006, 12:53 PM
ماشاء الله تبارك الله

الله يهنيكم بالعافيه ويبارك لكم بهالكشتات الحلوه

بس تعال يابو ذيب
منين طعوس حمر حول الجبيل
الا كانها حمرا من رماد مصنع الحديد ومن عقب المطر طغا عليه الصدأ ;)

الله يهنيكم ويسعدكم
بس مهيب تسنه برد:confused:

هلا والله بابو علي

الطعوس شكلها ابيض طبعا بس عقب المطر احمرت خجلا من البرد
وصارت وجنة الطعس كانها وجنة شاميه::ههههههههههههه
والله يابو علي يافيه طعوس على كيف كيفك بجو سمين

بس كلمني علشان اخزن تلفونك لان الارقام مسحت حتى نلكلمك المره القادمه

تحياتي لك ولــ( خبيزه ) اي الخبر وعنيزه للي مايعرف خبيزه
ابوذيب
19/12/2006, 01:02 PM
تسلم يابوذيب انت وربعك القصمان اللي ينشرون بالذهب
ولي ربع شروه من يقراء من الرس عزيزين علي بالحيل احسن من الاخوان ولي صولات وجولات معهم
ابوذيب ألا الشايب اللي معكم ممكن نستعيره منك الاسبوع الجاي في كشتتنا لان الشياب القصمان عليهم طلعات فكاهيه توسع الصدر
هلا والله ويامرحبا بطحنون
شرواك الطيب انت وربعك الاكارم

وشيباننا تر مانبيعه بالزهيد=بالمربعانيه تشعل نارها
البرد عنهم يحايد من بعيد =ونسمع سوالفهم مع اشعارها
قصمان به كل شغموم فريد=بالبر وبالمدن تسرك اخبارها
طحنون تر جاك العلم الاكيد=طيور الحرار فوق اوكارها
نلقاك برحله وانت فيها سعيد=والا تسير للحرار بدارها


ولك تحياتي
ابوطعيمه
19/12/2006, 01:06 PM
شكراً على التقرير وقد اعجبني انك صورت زملائك
وطلعت صورهم وهذا احب ان اشاهده في التقرير

الى لون احمر قريب من لون تراب النفود ...ياقلبي يالنفود
هذه الكلمة كم حركت بي من ذكريات جميله ( الله يعيدها علينا .. ويسعدك ويمتعك بالصحة والعافية )
ولكم اطيب تحياتي،،،
ابوطعيمه
ابوذيب
19/12/2006, 01:07 PM
ياهلا وغلا ابو ذيب


مهيب العاده تنسى شي ما تصوره يا ابو حسام

سعدنا بشوفتك وشوفة ربعك الذيابه وننتظر الباقي



تحياتي



هلا والله بالبناخي ابو عبدالله
يامرحبا
الله يسعدك اليوم ودوم، والله مشتاقين لكم ولاهل الدوادمي العزيزين

تحياتي لك يالغالي
ابوذيب
19/12/2006, 01:15 PM
ابو ذيب....

لا اقول الا كلمة واحدة فقط.....مبدع دائماً .....(( يالاطرم ))...ههههه.

تحياتي الخالصة لك

هلا ومرحبا والله
شكلي عرفتك انت اللي جيتنا بام رقيبه مع عمك !؟ هاه
الجواب صح والا

تحياتي لك
أبو عابد1
19/12/2006, 01:42 PM
أبو ذيب ما شاء الله عليك والله إنك ذيب

وش هالعلوم وش هالزين الظاهر البرد شديد عليكم

وشهويتنا بالمصابيب أخوي أبو ذيب


وتقرير مميز وكافي وتستاهل كل الخير


إلى الأمام
الكشاتي
19/12/2006, 01:43 PM
ما لك لو...يابوذيب.....أنا اكلت مقلب منك ...يوم انك اطرم....يعني انا أحد ضحاياك!!

تحياتي لك
ابوذيب
19/12/2006, 04:13 PM
=======================
هاه ..!!!!!
لا ... لا ........ اخاف منك يا ابو ذيب .....
ثم اصير مثل الغراب اللي يبي يقلد الحمامة ... لا مشى مشيها و لا رجع لمشيته !!!!
==============================================
ابو علي حقنا ما نفرط به ..... ما صدقنا نلقى مثله !!!!!

...!!!!!! و ابو علي حقكم نشريه بالذهب يا ذهب !!!!!



هههههههههههههههه اللله يونسك بالعافيه
تسلم والله ياكنترول لابد ماتجمعنا المكاشيت

تحياتي لك .... واطلع دقتين فوق هالموجه عليه مداخلات
ابوذيب
19/12/2006, 04:17 PM
مشاء الله خوش طلعه

والحمد الله على السلامه

الصراحه اشتهيت المصابيب بس الحين قصمان ولا معكم حنيني مايصير .

بس شكل النومه كانت بالسيارة ومشغلين المكيف الحار بعد .

وتقبل تحياتي
هلا وغلا
الرحله ترها قصيره من العصر الى نص الليل ورجوع
خويانا موظفين ، اما الحنيني مانخلا منه لكن فطور يابعدي بس ذيك الليله
كان معنا قشد على فنجال قهوه شماليه سواه ابو ذيب .

تحياتي لك
ابوذيب
19/12/2006, 04:20 PM
الله يوفقك يابوذيب انت واللي معك


انا من المنطقه الشرقيه/الاحساء حنا مثل بعض لنا طلعات كثيره وبالاخص في هذه الايام الممطره الجميله ابد مانترك البر اقلها في الاسبوع يوم
ولاكن تقريرك عن رحلتكم بصراحه اعجبتني جميله والاجمل انت مع هالرجال النشامى شروى من يقرأ رسالتي


اسعد الله ايامكم وجمعتكم بكل خير


(ابوعبدالله)

تسلم والله ياعجلان
وعساكم على القوه لابد للانسان هاوي البر وغيره
انه يجد اصدقاء بنفس الهوايه والطباع لكي يكيف نفسه بالغربه

تحياتي لك وللنشامى
ابوذيب
19/12/2006, 04:26 PM
شكراً على التقرير وقد اعجبني انك صورت زملائك
وطلعت صورهم وهذا احب ان اشاهده في التقرير

الى لون احمر قريب من لون تراب النفود ...ياقلبي يالنفود
هذه الكلمة كم حركت بي من ذكريات جميله ( الله يعيدها علينا .. ويسعدك ويمتعك بالصحة والعافية )
ولكم اطيب تحياتي،،،
ابوطعيمه

هلا بابو طعيمه
عسى حياتك كلها ذكريات جميله وسعيده ومتكرره بالسعاده والذكريات الطيبه

اتمنى ان تجمعنا الصدفه بالنفود على جال قعر موقدين من عجز الارطى والمعاميل حواليها ومثلك وشرواك
يحوفهن

تحياتي لك
ابوذيب
19/12/2006, 04:31 PM
أبو ذيب ما شاء الله عليك والله إنك ذيب

وش هالعلوم وش هالزين الظاهر البرد شديد عليكم

وشهويتنا بالمصابيب أخوي أبو ذيب


وتقرير مميز وكافي وتستاهل كل الخير


إلى الأمام


مرحبا والله بكعبول

اما البرد برد زمهرير لكن حنا لها
وياليت مثلك وشرواك معنا اللي يحبون البروالتحدي لعوامل الطقس
القاسيه

تحياتي لك
ابوذيب
19/12/2006, 04:37 PM
ما لك لو...يابوذيب.....أنا اكلت مقلب منك ...يوم انك اطرم....يعني انا أحد ضحاياك!!

تحياتي لك

هلا والله

كذا انت ضيعتني صحيح لانه ياكثرهم اللي كلوا مقالب خفيفه بلا كولسترول

تحياتي لك
مبطين ماشفناك
19/12/2006, 04:39 PM
وناااااااااسه يابوذيب

لكن صوركم مالها داعي خخخخخخخخخخ

امزح عليك
ابوذيب
19/12/2006, 04:53 PM
وناااااااااسه يابوذيب

لكن صوركم مالها داعي خخخخخخخخخخ

امزح عليك

يامرحبا

بها الليل وش اصور الا معاميلنا وجلستنا وصورنا تعكس قوة البرد

ولك تحياتي
شايب الصمان
19/12/2006, 04:53 PM
اقتباس:
المشاركة الأصلية بواسطة 6air_brr
مشاء الله خوش طلعه

والحمد الله على السلامه

الصراحه اشتهيت المصابيب بس الحين قصمان ولا معكم حنيني مايصير .

بس شكل النومه كانت بالسيارة ومشغلين المكيف الحار بعد .

وتقبل تحياتي


هلا وغلا
الرحله ترها قصيره من العصر الى نص الليل ورجوع
خويانا موظفين ، اما الحنيني مانخلا منه لكن فطور يابعدي بس ذيك الليله
كان معنا قشد على فنجال قهوه شماليه سواه ابو ذيب .

تحياتي لك
========================

هذا الي جانا مع عمه أبوعلي ... ياأبوحسام وترى جدته هي راعية الحنيني الي خبرك كل سنه نفطربه باالرحلات .

أما رحلتكم هذي الظاهر رحله ماتنسي ابد لانه ماشاء الله قصيره ومتكامله من ... وياأبوفراس تراهم يوميا يطلعون أهل الجبيل مثلكم :) ..

والوعد الرحله الجايه ودام الوانيت معنا مهنا خوف بأذن الله
الهلالي
19/12/2006, 04:56 PM
مبارك عليكم الحياء , يا مال العافية يبو حسام أنت وربعك القروم , شبة نار وعلوم طيبة وما من بعد حولكم .
قلب الداهيه
19/12/2006, 05:47 PM
ما شاء الله تبارك الله
طلعة موفقة وناسه وفلة حجاج
أول ما شفت المصابيب بغيت أكسر الجهاز واسحبلي كم وحده بس ربك ستر
شهيتن يابو ذيب الله يهديك على المصابيب
سللملي على خوياك

ننتظر جديدك يالغالي00
ابو سمر
19/12/2006, 06:07 PM
يعطيك العافية أنت ورفقاك اخوي أبو ذيب ..

عز الله إن البر حلو ببرده وحره ودخانخ وكلها وناسة في وناسة ..

وشكرا لك على الصور والتعليقات الحلوة ..
grdan
19/12/2006, 06:24 PM
يا ملح مواضيعك وقفشات وتعليقاتك الجميلة
ننتظر بقية مواضيعك الله يوفقك ويعطيك العافيه
مهراس
20/12/2006, 12:14 AM
السلام عليكم ورحمة الله وبركاته

ماشاء الله على الطلعه الحلوه والمصابيب اللي تشبه الـ (country pan cake) زمان على طلعاتكم ياهل الشرقيه، وين قناص الحبارى، المربد، شايب الصمان، رحال الخبر، محب البر، عروان......الخ عنكم، اكيد كل مشغول بروحه، الله يجمعنا وياكم على خير، صور روعه للسمره الشتويه، ولا تنسى تصور العشا المره الجايه يابو ذيب، تشكر وتقبل تحياتي.

أبو فهد
ابوذيب
20/12/2006, 01:04 AM
اقتباس:
المشاركة الأصلية بواسطة 6air_brr
مشاء الله خوش طلعه

والحمد الله على السلامه

الصراحه اشتهيت المصابيب بس الحين قصمان ولا معكم حنيني مايصير .

بس شكل النومه كانت بالسيارة ومشغلين المكيف الحار بعد .

وتقبل تحياتي


هلا وغلا
الرحله ترها قصيره من العصر الى نص الليل ورجوع
خويانا موظفين ، اما الحنيني مانخلا منه لكن فطور يابعدي بس ذيك الليله
كان معنا قشد على فنجال قهوه شماليه سواه ابو ذيب .

تحياتي لك
========================

هذا الي جانا مع عمه أبوعلي ... ياأبوحسام وترى جدته هي راعية الحنيني الي خبرك كل سنه نفطربه باالرحلات .

أما رحلتكم هذي الظاهر رحله ماتنسي ابد لانه ماشاء الله قصيره ومتكامله من ... وياأبوفراس تراهم يوميا يطلعون أهل الجبيل مثلكم :) ..

والوعد الرحله الجايه ودام الوانيت معنا مهنا خوف بأذن الله
هلا والله بابو عبدالله
هلا باذويبان راعي البران ولا هان االونيت لاهان

واشكرك على التوضيحات خصوصا اللي جانا مع عمه بام ارقيبه
بس الحنيني توي عرفت سر طعمه وانه مريء على المعده واثري مصدره بيت الاصاله والكرم
وانت ماشاء الله عروقك من يمين ومن يسير مع الطيبين الاخيار، ماشاء الله ، ولاهل عنيزه كل حبي وتقديري اللي من اعماق سراجيف قلبي
وشهادتي بكم يا اهل عنيزه مجروحه

الله يسلمك يا شايب الصمان اسما ويا شاب الصمان مضمونا

تحياتي لك
رحال الخبر
20/12/2006, 09:26 AM
الله اكبر رحلة خصوصية للقصمان واكيد تلميع :alarm: ودعاية :director: واعلان :type: ...هكذا انتم يالقصمان رحلة عادية وكبرتوها الى ان خليتوها رحلة الرحلات :hot: (( عيني عليكم باردة ان شاء الله ))
شتدعوة تبينا نصور كل كشتة يابو ذيب علشان تعرف ربعنا ترانا نغطي مكشات بكشتاتنا :redcar: بس هين اوريك انت وربعك ونطلع لكم كشتات غير شكل ومنوعة مهو بس قصمان:j لكن من كل مكان

والله عاد تدري ودي وياكم وهالصبيب والشبة الطيبة تنشرى الله يمتعكم بالصحة والعافية
ابوذيب
20/12/2006, 01:54 PM
مبارك عليكم الحياء , يا مال العافية يبو حسام أنت وربعك القروم , شبة نار وعلوم طيبة وما من بعد حولكم .


ياهلا وغلا وغلا وغلا بالهلالي
الله يعافيك ويطيب فالك

تحياتي لك
ابوذيب
20/12/2006, 01:58 PM
ما شاء الله تبارك الله
طلعة موفقة وناسه وفلة حجاج
أول ما شفت المصابيب بغيت أكسر الجهاز واسحبلي كم وحده بس ربك ستر
شهيتن يابو ذيب الله يهديك على المصابيب
سللملي على خوياك

ننتظر جديدك يالغالي00

مرحبا والله بقلب الداهيه
اجل ستر الله ماكسرت الجهاز
وعساك سالم وغانم
ولك تحياتي
ابوذيب
20/12/2006, 02:03 PM
يعطيك العافية أنت ورفقاك اخوي أبو ذيب ..

عز الله إن البر حلو ببرده وحره ودخانخ وكلها وناسة في وناسة ..

وشكرا لك على الصور والتعليقات الحلوة ..
هلا بابو سمر ويامرحبا
الله يعافيك
ومثل ماقلت البرر بحره وببرده وبدخانه وناسه ماهي هينه
وعسانا واياك والقراء دائما بسعاده ووناسه
وعسى الله يجيب الربيع اللي اطيب من الطيب

ولك تحياتي
ابوذيب
20/12/2006, 02:07 PM
يا ملح مواضيعك وقفشات وتعليقاتك الجميلة
ننتظر بقية مواضيعك الله يوفقك ويعطيك العافيه

يامرحبا والله

اشكرك جزيل الشكر على هذا الاطراء
عاد ترني انزجرت شوي ورفعت صدري هههههه

تسلم والله هذا من طيبك

ولك تحياتي
ابوذيب
20/12/2006, 02:15 PM
السلام عليكم ورحمة الله وبركاته

ماشاء الله على الطلعه الحلوه والمصابيب اللي تشبه الـ (country pan cake) زمان على طلعاتكم ياهل الشرقيه، وين قناص الحبارى، المربد، شايب الصمان، رحال الخبر، محب البر، عروان......الخ عنكم، اكيد كل مشغول بروحه، الله يجمعنا وياكم على خير، صور روعه للسمره الشتويه، ولا تنسى تصور العشا المره الجايه يابو ذيب، تشكر وتقبل تحياتي.

أبو فهد
ياهلا والله بمهراس اللي على دعسة البانزين دواس
وبالبر على الونيت خذاله مرواس::وعسى نوار الربيع يحتاس

والله اجتمعنا مره بالشرقيه ووكلوني على كتابة التقرير وانشغلت
واجتمعنا بام رقيبه وانتظرت احد يتنزل الموضوع ولا شفت احد وشكلي ابي انزله
والشباب نجتمع بهم دائما بس طبعا المواعيد على المنتدى تم منعها ولا نقدر نعلن الطلعات والاجتماعات

اما ربعي اللي صورهم في هالموضوع فهم نخبه من الشقرديه، ومستمرين بالطلعات المتواصله وشبه المبرمجه

ولك تحياتي
ابوذيب
20/12/2006, 02:21 PM
الله اكبر رحلة خصوصية للقصمان واكيد تلميع :alarm: ودعاية :director: واعلان :type: ...هكذا انتم يالقصمان رحلة عادية وكبرتوها الى ان خليتوها رحلة الرحلات :hot: (( عيني عليكم باردة ان شاء الله ))


شتدعوة تبينا نصور كل كشتة يابو ذيب علشان تعرف ربعنا ترانا نغطي مكشات بكشتاتنا :redcar: بس هين اوريك انت وربعك ونطلع لكم كشتات غير شكل ومنوعة مهو بس قصمان:j لكن من كل مكان

والله عاد تدري ودي وياكم وهالصبيب والشبة الطيبة تنشرى الله يمتعكم بالصحة والعافية







هـــــــــــــــــــــــــــــــــــــــــــــــلا
في
هـــــــــــــــــــــــــــــــــــــــــــلا
ومليون مسهلا برحال الخبر

والله انك يارحال الخبر لك معزه وتقدير ،بس الظروف ما جمعتنا ماغير اجتماع الشرقيه المبسط
الللي انت خابر
ونتمنى ان ننسق معك في رحلاتنا القادمه الصمانيه
ولنا الشرف في مخاواة مثلك وشرواك
فانت رحالة المنتدى بلا منازع

اما طلعتنا هذي تراها تتكرر دائما فان رغبت نحن الكسبانين ارسل لي تلفونك على بريدي ومايكون خاطرك الا طيب
وتحياتي لك
قرم البر
16/04/2008, 02:40 PM
الله يعطيك العافيه على هالصور

والصراحه ان الصور مره زينه
اول 111
16/04/2008, 04:59 PM
مشكووووووووووووووووووووووووووووووووووووووووووور
وحيد قلاسكو
16/04/2008, 05:53 PM
يعطيكم الف عافيه........احلى الرحلات تكون دايما الشتويه...دمت بود
مرسال1
16/04/2008, 05:54 PM
ماشاء الله تبارك الله ...

لكن ماتلاحظون إن الموضوع له حوالي سنتين:D :D :D :D