السواكني هل طعمه حلو

[سامي الششريف]

السلام عليكم
مريت حلقت الغنم ولقيت طليان سواكني لونها احمر وفي لون ابيض صغيره لبنيه سمينه وسعرها مناسب بحدود 400 الي 500 ريال عمر 3شهور ولاكن حبيت اعرف طعمها جيد ولون لحمها وتستوي بسرعه انا راعي كبسه يعني لا بشوي ولا شي بس كبسات او مندي وحنيذ ولا عندي سيوله اشري حري او غيره بي 1000 وطالع

[* ابو باسل *]

بالنسبه للسواكني اذا كان معلف هنا لمدة لاتقل عن ثلاثة اشهر يطلع ممتاز جدا ولا تفرق في لحمته عن اي لحم بلدي ويمكن اطعم بس ان كان توه جاي من التريلات او البواخر فيكون لايطاق نظرا لتعرضه للتجويع وايضا لارداءة التعليف وغيره لفتره تنهكه وتغير نكهة لحمه انت تاكد هو سمين او معلف لمدة هنا فتوكل على الله ارخص واحسن ولا فيه فرق .

[سامي الششريف]

بالنسبه للسواكني اذا كان معلف هنا لمدة لاتقل عن ثلاثة اشهر يطلع ممتاز جدا ولا تفرق في لحمته عن اي لحم بلدي ويمكن اطعم بس ان كان توه جاي من التريلات او البواخر فيكون لايطاق نظرا لتعرضه للتجويع وايضا لارداءة التعليف وغيره لفتره تنهكه وتغير نكهة لحمه انت تاكد هو سمين او معلف لمدة هنا فتوكل على الله ارخص واحسن ولا فيه فرق .







وانا اخووك تسلم والله قلي له اسبوع من جا من السودان ما هو معلف هنا
يعني ببعد عنهم بس

[الشيخ الظريف]

لازم تقدم له البرسيم وتعطيه الأملاح ويرعى لمدة شهرين ويكون لحمه لذيذ اما الآن فطعمه لا يختلف عن المستورد مثل البربري والاسترالي الجدد

[ابن فهدالشمري]

اقل شي وانا اخوك علفه شهرين وبعدها توكل على الله

وللمعلوميه يموت عدد كبير خلال الفتره الاولى من وصوله هنا ولا اعلم السبب

لكن دام له اسبوع واحد فما انصحك ابد

ولو تدور تيس ب ٦٠٠-٦٥٠ افضل لك

[web]

مثل مافدوك الاخوان لازم يتربى هنا اقل شي شهرين
لحمه طيب بالحيل اذا له اكثر من ثلاث شهور وكميه اللحم مثل الطليان النجديه
واسعاره بدت ترتفع بشكل ملحوض للي مربا هنا

[Bds]

عليك بالجذع المربا اما البنية الصغيرة بالعادة تكون توها جديدة جايه من السودان

[شايب حرب]

لاتدور غير السواكني للكبسة



من الجذع للثني

[بازار شريف]

اذا سمين خذ وانا اللي غشيتك طعم لحمها خيالي ايش البلدي ولا غيره الهرافى السواكني بس

[وسيع البنايد]

السواكن السمين مرابي طعمه لا يعلى عليه

[صقار شياهين]

انحش عنه لحمه اسود عليك بالنعيمي اولا والنجدي ثانيا والحري ثالثا

[الصيادالمليح]

إذا كان استخدام شخصي بالبيت فخذه و طعمه طيب في الكبسات بس ما انصحك فيه كمندي او مشوي

و ما انصحك تقدمه للضيوف لأن لحمته تغمق و تصير شبه سوداء وما يستساغ شكله لإللي ما يعرفه

و طعمه طيب مثله مثل غيره و المربى المحلي يعطيك كمية لحم لا بأس فيه

عيبه الوحيد لون اللحم بعد الطبخ و اهل الغربية يقبلون عليه اكثر لكثرة لحمه و رخص ثمنه

و اللي توه جاي بالبواخر يكون مضروب إبر مضادات حيوية تؤثر في جودة لحمته

[ناصر]

مثل ماذكر الاخوان ..مشكورين .. وكنت بقول نفس كلامهم
حبيت اضيف
لو قدمته لضيف ... غير ان لون اللحم أسود ... هناك ريحه لاتطاق
انتبه هذا محرج

[المضلي]

مثل ماذكر الاخوان ..مشكورين .. وكنت بقول نفس كلامهم
حبيت اضيف
لو قدمته لضيف ... غير ان لون اللحم أسود ... هناك ريحه لاتطاق
انتبه هذا محرج

بعد كل هذي العذاريب الخبل اللي يشتريه
اللحم لازم يكون زاكي والا وش نبي فيه