وش أفضل سكين لذبح الأضاحي

[معشي الذيابة]

شباب العيد قرب جعلكم من عوادة وأنا كل سنة اشتري سكين والى الحين ما طحت في سكين تسوى
فا الله لايهينكم إلي خابرله سكين تسوى يعطينا علومها

[كحيلانه]

يمممممممممممممممه

شوف مالك الا السيف خذلك سكين كبيرة وحدها الين يطلع منها شرارة وتصير مثل حد السيف الصآآآآآآآآآآآآآآحي

وكل عام وانتم بخير

[أبوكلبشة]

ياخوي لاتكلف على حالك وتاخذ سكين غاليه
شف السكاكين الهندية ممتازة ورخيصة
وعندك التركيه الي مسكته خشب اصفر والمسكه حقته دائرية
وعندك السكين البرازيلية
هذي السكاكين انا اذبح بهن لي خمس سنين
ولاتنسى تاخذ مسن من عند الرماية
تراة حلووووووو مرررررررررررة يخلي السكين تقل موس

[طلحة]

يوجد لدى الرماية سكاكين ذبح وسلخ ومسنات ممتازة، أنا شريت منهم العام الماضي وإلى الآن أستخدمها، سنها سهل وتطول معاك قبل ما تسنها مرة ثانية، لكن عيبها غالية شوي يعني سكين الذبح بـ 60 ريال والسلخ بـ 45ريال. لكنها لك وللزمن.
بس انتبه لازم تطلب من البائع يعلمك كيف تسنها بالطريقة الصحيحة والا تراها تخرب.

[متيم البر]

وين نلقا السكين التركية اللي مسكتها خشب؟؟ لي فترة أدورها وما لقيتها؟

[المستوي 1]

الله يسلمك عندك افضل سكين دون اي منافسة و اسمها ابو طير و هي سكين لها معي الان اكثر من اربع سنوات و عليها صورة نسر رافع جنحانة و سعرها ما بين ال 50 الى 90 ريال و هي متوفره عند محلات الاواني المنزلية.

و احرص على مسن الرماية المعروف عند محلات الرحلات حتى تحافظ عليها

و دمت سالم

[المموه]

صبحكم بالخير
كنت اول اذا رحت لمكه للعمره مريت محل (خوجه) للسكاكين والسواطير وغيرها . واشتري السكين بـ 50 و 60 وسواطير على 200 وسكاكين سويسريه على 70 ريال اللي يشوفهن يقول هذا باليوم يذبح 20 حاشي و50 نعيمي وهن بالملحق من السنه للسنه . الحقيقه انا ما امسك نفسي عند السكاكين والسواطير الله يكفينا واياكم شرهن . المهم طحت بسكين للسيف تباع بالحراج قيمتها 10 ريال ستيل يابانيه وشريت معها مسن (تيربو) اللي تدخل فيه السكين قيمته 30 ريال . يوم جربته واثري ضايع سكين على مستوى رحت وشريت منها 10سكاكين ووزعتهن بالاستراحه والبيت وعدة البر وصرت ما استخدم الا هالسكين . الممسك حقها خشب عودي وتجي مقاسات انصح بها لرخصها وجودتها وقوتها . واذا سنيتها بمسن الرمايه انتبه منها موس . ولا تنسون ان السكين مهما كانت قوتها وجودتها ما تنفع اذا اليد اللي ماسكتها وتذبح وتسلخ ايضا على مستوى عالي من الحرافه . واظنكم تشوفون اذا رحتوا للمسلخ وش ماسك القصاب من سكين اردى سكين بس الذبيحه ما تاخذ معه 5 دقايق لأن الذبح فن وله بدايه ونهايه لازم نتبعها .

[أبوكلبشة]

ياخوي متيم البر انا شاري السكاكين من تركيا
وشفتهن بمحلات الاواني بالخبر
وخاصة عند ابو10
وقبل لانسى ترا فيه ساطور زين بالحيل بالحيل وهو البرازيلي الي مسكته خشب اصفر
وطويل وقيمته من 30 الى40 وهو ممتاز مررررررررررررة بس عيبه انه مب موجود بالشرقيه

[الشاقي]

مثل ماقال لك اخوي طلحت الرماية عندهم سكين لون مقبضها برتقالي تلاعب الهوى لا تفوتك بس انتبة ليدك وفيه اكثر من مقاس

[نعمان الفهمان]

انا مع الشاقي

لالالالا تفوتك تراة بلاستك او فيبر لونة برتقالي لالالالالالالا تدور غيرة وبرضة عندهم مسن الرماية ما فية مثلة ابدااا

[معشي الذيابة]

رغم أنكم زوتو حيرتي لاكن
الله لا يهينكم ولا يحرمكم الأجرأجمعين
ومن العيدين مقدمن

[الهائم]

خذالسكين التى يستعملها أغلب القصابين وأهل مكة ادرى بشعابها ، سكين سوسرية مقاس 14 ذبح وسلخ ، تجدها عند محلات الأوانى المنزلية ، سعرها تقريبا 65 ريال ، وهى من افضل السكاكيين التى جربت ، وانتبة ليدك تراها ماترحم ، تحياتى ،،،،،،،،،،،،،،،،

[الحوطة 2007]

انا مع المستوي1وانتبة ليدك

[سفير الحزن]

خذالسكين التى يستعملها أغلب القصابين وأهل مكة ادرى بشعابها ، سكين سوسرية مقاس 14 ذبح وسلخ ، تجدها عند محلات الأوانى المنزلية ، سعرها تقريبا 65 ريال ، وهى من افضل السكاكيين التى جربت ، وانتبة ليدك تراها ماترحم ، تحياتى ،،،،،،،،،،،،،،،،

انا مع اخوي الهائم السكين استعملها من 7 سنوات مافية زيها بس يوجد بسوق منها تقليد احذر وفيه نوع بالسوق موجود قيمته تتراوح من 10 الى 15 بس فيها عيب انها خفيفه شوي بس سكين تريحك في السلخ تراها برتتغالية الصنع وممسكها خشب تقريناً برتقالي