انت مع الأول والا مع الثاني !

[حزم الجلاميد]

الاول: ينفع العيد بدون حنا ؟

الثاني: ينفع .

الأول:طيب والاكل بدون حبحر ؟

الثاني: لااااااااااااااااء ما ينفع .

الأول: لكن فلان فيه بواسير وأبو فلان عند قرحة في المعدة .

الثاني: مهوب لازم يتعشون ..والا سو نفسك ما دريتا !

هذه قضية تبدو سهلة وتافهة لكنها يمكن تكبر وتنتهي بتفرق الرفاق وتشتت الشلة

لان أبو بواسير وأبو معدة متقرحة بياخذ الموضوع على انه استهانة بمشاعره اكثر من كونه حبة مظبي بعشرين ريال تفوته

والطباخ اللي شهق بصورة تمثيلية: واي والله ما دريت انك ما تحب الحبحر

ــ أبو بواسير: المشكلة اني احبه ولا اقدر اقاوم ريحته وحمار لونه الذي اصطبغت به حبيبات الرز وجوانب الصحن الغضار .



ــــــــــــــــــــــــــــــــــــــــــــــــــ ـ



"هذا اللي في الظاهر اما اللي في الخواطر "

فابو بواسير يقول في نفسه: الله يقطع هالاشكال اللي ما عندها استعداد تتنازل عن متعتها الكمالية والثانوية ويراعون ربعهم وخوياهم ..اجل لو احتجتهم في تضحية اكبر وش بيسوون

وأبو حبحر يقول في نفسه: الله لا يكثر هاللي يشوفون انفسهم محور الكون ويبون يمشون العالم على ذوقهم ومزاجهم

يا حبيبي رح طلع عقدك وتشرط على مرتك وعيالك

[ابولولو]

كلامك جميل وواقعي وحصل كثير وخاصة اللي يحبون أنفسهم وطز بالغير

صارت معي مره وكرة البر

لي صديق وخوي مره جاء عليه مرض خفيف وصار كل طبخه او أكله باالبر يدقق علينا ويقول بلاش تَحُطُّون كذا وكذا

قلنا سم وأبشر والواحد ماوده يحب نفسه بزيادة واحنا طالعين نبي نبسط ونبي الصديق يرتاح ويكف

المهم مالك بالطويلة

مرة مدة وخف خوينا وصار مثل الحصان ماشاء الله ههههه

صار واحد من الشباب عندة مرض أجاركم الله وابعد عنكم كل شر صار عندة ظغط المهم خوينا اللي خُف وشفاه الله

صار مايقدر للصديق مرضه ولا يققل الملح ولا يهتم فيه ابدآ وصارت اكثر الرحلات محل هواش وزعل

المهم اكثر الشباب بداوء ينسحبون كله علشان حب النفس والذات والأنانية

الخلاصه

حب لغيرك ماتحب لنفسك

والدنياء قصيره ودواره

قدم الطيب تلقاه قدامك

قدر ظرف غيرك يجي من يقدر ظرفك

قوم تعاونوا ماذلوا

الشكر لك اخوي الفاضل هيج الخواطر بموضوعك الطيب

والمثل هذا عندنا بالقصيم متداول بكثرة وخاصه الكبار بالسن (يجوز العيد بلاء حنا )

[الذيب الأبيض]

الحبحر يهون عند الي يقولك لاتحط سكر بالشاهي عشان عندي سكر !!

حطو بفناجيلكم ههههههههههههههه جاملته مرتين الثالثه قلت له جب معك زمزميه

كان ودي استمر بالمجامله بس مايستاهل

يبي كل شي يسوى له ومايعرف يسوي شي حتى تلحيق النار متعيجز

بس يعرف ياكل ويشرب

الحي يحييك

[حزم الجلاميد]

أبو لولو والذيب الأبيض وبقية الاخوان

شكرا على تفاعلكم

وكما يقال رضا الجميع غاية لا تدرك صعب ترضي كل الأطراف وكل الاذواق وتراعي كل ظروف من حولك بدقة لا بد من شوي تقصير يطول هذا وتنازل يقدمه هذاك وقصور يلحق الثاني والثالث والأيام مثل ما ذكرت ( اخوي ) سلف ودين وقدم الطيب تلقاه قدامك ..

المسألة يمكن تضبطها بميزان التقدير والتجمل والميانة ولا بد من التضحية

فيه أمور أساسية مثل ملح الطعام, صعب تتنازل عنه واصعب منها ان تطبخ قدرين واحد بملح والأخر بدون لكن السكر في الشاهي ممكن تصلح بريقين بريق حالي وبريق مر

وفيه أمور ثانوية مهمة ومطلوبة ولذيذة لكن بشرط ما يترتب عليها اذية احد او جرح مشاعره مثل الحبحر او التدخين في مكان مغلق مثل خيمة او داخل السيارة اثناء المشوار وقس على هالقاعدة

اذا تعارضت الاذواق والرغبات يرتكب اخف الضررين

وأخيرا ما باقي لك الا جمالتك مع ربعك وخوياك وذكرك الطيب لانه بيجي يوم وكل يروح في طريق من غير شر

[الحربي حاتم]

فيه أمور ممكن تتنازل وتغير عاداتك فيها لأنها في صالح الجميع مثل تخفيف الملح والسكر دوا للمريض ووقاية للمتعافي وقيس عليها مايشبهها ، ولكن فيه أمور ماتتنازل عنها أبد مثل خويك مايشتغل ولا يقدر خوياه ويبي رايه هو اللي يمشي ولا هو الحر اللي يعجبك ولا هو الرجل اللي تحطه على يمناك .