مشكلة في كامري 2005 عجزت القى لها حل

[مراسل عنيزة]

السلام عليكم ورحمة الله وبركاته

الاخوان في قسم اعطال السيارات أسعد الله مسائكم .. مشكلتي يا أعزاء في الكامري

2005 4 سلندر هو ان فيها تقطيع + تكتيم + تفتفة في الشكمان + عزمها ثقيل

وما تقوم الا بعد ما ادعس بقوة على البنص كل الي في بالكم سويته تصفية مكينة

تغيير بواجي حساس الهواء حق الثروتل نظفته كذا مرة الى أن غيرته هو وحساس

الدعسة جميع ولا زالت المشكلة مستمرة وتزيد اذا احتمى الموتر يبدا العداد حق

المكينة ينزل تحت الـ 1 والسيارة ترتجف كأنها راح تطفي .. وكذا مرة تطفي

معي عند الإشارات .. قسم بالله أني مليت من هذا الوضع ومليت من الورش

الي ما همها الا الفلوس والله أني مرات أفكر ابيعها لأني زهقت من

هالسالفة .. فياليت اذا احد عنده خبرة في ميكانيكا السيارات أو احد سبق وواجه

المشكلة ذي وانحلت معه أنه يفيدني أو يتواصل معي عن طريق الجوال او عن

طريق الواتس اب وراح ادعي له ليل نهار اذا حل لي المشكلة

وجزاكم الله خيراااا ....

[ابوعبدالله172]

اخي الغالي حسب وصفك لحالة سيارتك المشكله عندك من طرمبة البنزين ضعيفه عيرها بجديده وتضبط امورك ان شاءالله

[ك و ح]

وأيضاً افحص دبة البيئه

[1824]

مشكلتك يا من دبة التلوث او طرمبة البنزين والله اعلم بالتوفيق لك

[ابوراكان تبوك]

مر على اقرب محل شكمانات وخليه يفصل الشكمان من الامام بعد الكزوز وجرررررب

[عميد آسيا]

على كلامك ما غيرت أسلاك البواجي

إذا ما غيرتها افصل السلك لكل بوجي واحد واحد و بعد ما تفكه شوف إذا السيارة زادت رجفتها معناته السلك سليم و إذا الوضع ما تغير معناته العلة من السلك اللي فكيته و اشبكه و افصل اللي بعده

و تأكد من إن البواجي هي نفسها الأصلية لإنها تجيك تويوتا و درجات و لا تنسى تجرب الأسلاك قبل ما تشتريها

[بامالك]

اذا كانت السيارة تشتغل من اول نقرة فأعتقد ان نسبة تعطل طرمبة البنزين أقل , بالتالي تأكد من دبة التلوث مثل ماقالوا الاخوان لـأن مريت بنفس المشكلة مع كامري 2003 .. تم تغيير بواجي وكويلات وتنظيف بخاخات وتنظيف بوابة ولافاد وتكبدنا خساير فيها .
وفي النهاية وجدنا المشكلة من الشكمان كان (مخرم ) او فيه شقوق صغيره جدا ودبة التلوث مسدودة , وتم اصلاح المشكلة بـ 100 ريال .

[مراسل عنيزة]

مشكورين اخواني على التفاعل بالموضوع بخصوص طرمبة البنزين ظنتي ان مالها ددخل بالمشكلة
ويمكن الشكمان له يد بالموضوع زي ما قال بامالك على العموم الله يعطيكم العافية جميعا واليوم راح
اوديها لورشة المنصور بعنيزة ونشوف وش تاليتها ..

[اابو مياس]

اخوي انصحك اول شيك علئ طرمبه البنزين وافحص كم ضغطها عند الكهربائي. ابد بالاسهل لان لو رحت لحقين الشكمانات معروف الي عندهم علئ طول يقولك فرغ دبه البئيه من معدن البلاتينيوم الي فيها عشان يبيعه. افحص وبعد ماتتاكد اشتغل

[اابواحمد]

فك دبة التلوث وغسلها وان شاء الله تزبط

[abo aryam]

السلام عليكم
اذا السيارة ماشية اكثر من 100 الف كيلو فالمشكلة عندك من سير التايمن . لأنه مع الاستهلاك يرتخي ويلخبط توقيت المكينة ويصيرالعزم ميت واحيانا تشد بدون مقدمات , نصيحتي انك تشتري القطع من الوكالة وتغيره في اسرع وقت لأنه ممكن ينقطع ويخرب اشياء ثانية انت في غنى عنها. وعلمنا وش يصير معك .تحياتي