طلب .ابغى وصف بدوي للروضات الزينه

[لاحووووول]

السلام عليكم
كيف حال الاخوان

ولاعليكم امر ابغى اهم الفياض او الروضات المشهوره مع ذكر مواقعها
ابغى وصف بدوي

اخوكم حجديد على الكشتات ويبي يصير شقردي

وجزاكم الله كل خير

[دغيم]

وعليكم السلام :
اخوي ماحددت اي منطقة .
عموما راح اعطيك اقرب روضات لمدينة الرياض .
1- أم القطا بالقرب من كبري سعد
الاحداثية
N 25 14 080
E 047 25 340

2- روضة المسعودي بالقرب من روضة ام القطا
الاحداثية
N 25 12 000
E 047 27 000
3- روضة خريم - طريق رماح - ويمكن الوصول لها عن طريق روضة ام القطا تبعد ( 15 ) كيلو غرب - شمال
الاحداثية
N 25 22 860
E 047 16 770
4- روضة الخفس : طريق الثمامة - بعد مفرق الطوقي شمال .
الاحداثية
N 25 27 500
E 046 27 300
5- روضة نورة : طريق القصيم مخرج الحسي .
الاحداثية
N 25 41 680
E 046 13 630

في حالة معرفة المزيد حدد المنطقة وابشر ياغالي
اخوك دغيم

[لاحووووول]

بيض الله وجهك يا ابو دغيم

نعم من الرياض
بس للأسف ما عندي جهاز كارمن
لكن على الوصف يمشي
اخوي لو سمحت
ام القطا اذا جيت من الرياض باتجاه كبري سعد متجه شرق وين تكون الروضه

ماعليش تحملني

[دغيم]

هلا وغلا اخوي ...
وش دعوى ياغالي ..... انت تامر أمر ..
المعذرة على التأخير لوجودي حاليا خارج المملكة ...
لكن ابشر .. كل اهل مكشات على العين والراس ويستاهلون ..
روضة ام القطا ...... باعطيك وصف بدوي وان شاء الله توصل علية بكل سهولة
* وانت متجه الى الشرقية عندما تصل الى كبرى الوسيع ارجع الى الرياض مرة ثانية وخذ المسار الأيمن ( ادخل باتجاه الشمال ) اتجه الى مضخات مصفاة ارامكو .
* يجيك حرف تي T خذ يمين - استمر حتى تصل الى تقاطع + خذ يسار واتجه الى المصفاة .
* حرف تي ( T ) وامامك شبك المصفاة خذ يسار واسلك الطريق المسفلت واتجة معه اينما ذهب .
* بعد مسافة بسيطة سوف يتجة الاسفلت غرب بعيد عن الشبك - اتجه على الاسفلت مع ملاحظة انه غيرجيد ويوجد حفر كثيرة .
بعد مسافة بسيطة سوف ينتهي الأسفلت في شعيب . ( كما يوجد آثار كسارة )
* اسلك الطريق الممهد حتى تصل الى مفرق طريقين - خذ الايمن .
اتجه حتى تصل مفترق طريق خذ الايسر مع ملاحظة انك سوف ترتفع قليلا وسوف تشاهد على اليمين واليسار ( شحنة - او - زبارة - ترابية - اكرمك الله ( في وجه العدو ) اتبع الشحن الصغيره في حجم رد عربية دينا .
اسلك هذه العلامات سوف تصل بمشيئة الله الى الروضة .
* اتجة الى الجهه الغربية منها يوجد رمل واشجار بسيطة وهي اجمل مكان في الروضة .
* طبعا يوجد روضة صغيرة شمالي روضة ام القطا كذلك جيدة .
* روضة المسعودي . قبل روضة ام القطا باتجاه الشمال وانت على الطريق في المفرق الثاني لا تاخذ يمين خذ يسار سوف تشاهد اشجار الطلح اتجة اليها ومن شمالها تجد عروق الدهنا .
تقبل تحياتي ... وابدي اعتذاري مرة اخرى .
اخوك دغيم .

[لاحووووول]

يمال العافيه والله

الا رايتك بيضه ومع ها لوصف بيض الله وجهك

وان شاء الله ترجع لاهلك سالم غانم

ولاعليم امر شوفنا عللى دربك شعيب الشوكي ؟؟؟؟؟

[دغيم]

السلام عليكم ....
تسلم وتبقى يا غالي .
اذا قصدك تبي وصف شعيب الشوكي ؟
طريق الرياض القصيم وانت متجه الى القصيم - بعد محطة فيحاء العتش يجيك مفرق تمير
* اطلع معه وخذ يمين واتجة الى تمير وتعدها حتى تصل الى حرف ( T )
عند مبايض وبوضاء . اطلع يمين الى هجرة الشعب وتعدها تجيك طلعة الشعب بعدها تجيك محطة بنزين .
افرق معها يمين واتجه جنوب - هذا ظهرة الشوكي - وكلما اتجهت جنوب ينزل بك الى الشعيب .
* ملاحظة : اذا ظهر الفقع على خير ان شاء الله سوف تجد الفقع على مشاعيب التلال .
* اذا رغبت تطلع الى التنهات . لا تلف يمين للشوكي من عند المحطة . اطلع سيدة متجه الى ام رجوم يجيك ردمية الكهرباء اطلع معها يمين وسوف تشاهد ابراج الكهرباء . تتجه بك الى التنهات .
تقبل تحياتي .
( يوجد بعض المتنزهات القريبة من هجرة الشعب - مثل روضة الخشم - النظيم - الخفيسات - وبعض الشقوق الارضية )
اخوك دغيم .

[أبوناصر]

تسلم دغيم على الوصف الواضح


وترجع بالسلامة إن شاء الله

[لاحووووول]

اخوي دغيم
الله يجزاك كل خير صراحه افدتني كثير كثير بارك الله فيك

واذا ما عليك امر

سوف اراسلك على الخاص عند ما اريد اي معلومه .... ممكن يا غالي ..

[دغيم]

وعليكم السلام

هلا وغلا أخوي
ابرك الساعات وابشر باللي تبي





.

[ابو شلش]

مشكور يادغيم على الوصف

[دغيم]

السلام عليكم

هلا وغلا اخوي ابو شلش

تسلم والله ومشكور على المرور


.

[أبو_خالد]

تسلم يا دغيم وما قصرت مع الأخ (لا حوووول)

[دغيم]

السلام عليكم
هلا وغلا أخوي azzah
العفو وماسويت الا الواجب وخدمة الجميع اعتبرها شرف لي
هلا فيك ومشكور على المرور
تحياتي .

[* Storm *]

روضة خريم لدي صور لها 4 صور روعه





http://www.mekshat.com/pix/upload/images25/mk42127_46269333df.jpg

[ولـد الدوادمي]

والله ماقصرو الذيابه

بس اذا بغيت اروح للتنهات من الشرقيه كيف الوصف وكم كيلو

واذا بغيت اروح لساموده من الشرقيه كيف وصفها وكم كيلو