الربع الخالي منطقة الرمله الي راح لها يفزعلي الله يعافيه

[عبقري91]

السلام عليكم الاسبوع القادم ان شاء الله امطار وخير وبركه وناوين نقنص ارانب بالرمله
ابي طريقها من الرياض ووصفها ومفرقها من وين بالظبط
وكم يلزمنا من لتر بنزين الرحله بناخذ هناك من خمس ايام لربع ايام
وين المناطق الخطره ووين تواجد الصيد
الحمدلله سيارتنا مجهزه من كل شي يطري علا بالك او مايطري
والمنطقه الوحيده الي مارحنا لها هي الربع الخالي
نصائكم لنا
الله يوفقكم
الي موجود معنا كل سياره مزوده بتانكي ماء 100 لتر وزياده جركل ازرق الكبير للماء وكل سياره مخصص لها جركل ازرق كبير وقود
وابي الوطايات او الدعسات الي يحطونها لربضات وين احصلها
ومن ناحيت الامور الاخرا الحمدلله كلها متواجده ولكم مني حديل الشكر

[وين الصيد]

انصحك بالقارمن حتى لو كنت تعرف المكان
الوطايات تحصلها عند اهل تجهيز الرحلات مثل السنيدي وكشته

[عبقري91]

الله يجزاك خير الحمدلله القارمن موجود ثنين الديره والله ماعمري طبيتها ولا ادري كيف ارضها ولاكد عسيتها
حتى مفرقها مدري وينه

[شرق المغيب]

على طريق الخرج واذا تبي تقنص ورى يبرين يبدأ الربع الخالي
واذا تبي تبتل على طريق البطحاء يكون افضل
قبل البطحاء يجيك مفرق يمين مفرق شيبا .
خذ معه حول المية كيلو تجيك محطة الحصان بينها وبين الخط بيب وتراها نصف مهجوره خذ كل شي لاتعتمد عليها
من محطة الحصان وبعد ترى فيه الامارة وحرس الحدود مشدد هالايام يعني خذ حذرك
طبعا مقناصك ارانب اكيد ..
تبي تحصل الاثر حول هالاماكن وكل ماتوغلت داخل الربع الخالي يزود الصيد
ولكن خذ حذرك من الطرد ؟؟ ترى فيه خفوس .. يعني الارض منشقه على شكل بئر وبعضها عملاق وخطيرة
انا ماانصحك بالقنص هالوقت حتى لومعك ماجلان وكل شي
بغض النظر ...
الوضع مايسمح هالايام انت عارف الاوضاع والحدود مشدده جدا جدا
يعني مافيه تفاهم
انصحك تستخير الله وتخلي مقناصك لابرد الوقت بالرمله افضل للصيد والصياد
والله يوفقك ..

[عبقري91]

الله يعطيك العافيه

[4200]

يالعبقري الله يعافيك مقناص الرمله قد فات ما تنفع الحين هبايب وسوافي مقناصها اول المربعانيه تطيح الهواء
والطرق انصحك من عند ندقان

[خالد الشمري20]

أستودعك الله الذي لا تضيع ودائعه دنيا وأخره

[الانسيابي]

السلام عليك الرحمن الرحيم

خير ماعملته انك استشرتنا

للمعلومه انت متئخر جدا جدا جدا بلذهاب للربع الخالي:eek::eek::eek:

واخطر وقت من الان الى سهيل القادم

الرمال متحركه وعج وكذلك في هذا الوقت ازدياد الحراره :sبشكل قوي

ليل:f ونهار

انصحك نصيحه اخويه اقلبوها رحله بحريه:D واستاجروا لنش وغوص وصيد سمك

والربع الخالي السنه الجايه

وان كانك من النوع اللي ماله الا رايه:p:p:p خذ معك جوال الثريا لاتدخل البر الا هو معك :mad::eek:الا هو معك سمعت العلم:mad:

[ع المبيريك]

نعم أنصحك باقرمن والحذر ولاتمشو ورا بعض يجب عليكم المشى واحد في الوسط وعلى اليمين وعلى اليسار
وأتمنى لكم رحلة موفقة

[عااشق نفود]

الله يوفقكم
بس
الرمله مايبي لها خذني جيتك يبي لها دليله وواحد قصاص وعدتك وشغلك ولاتروح الا في عز المربعانيه وترا الديره قشرا سيوف ورباضات وصيد معد فيه الا علا الحدود اقل شي 600 كيلو من المزفلت يعني مايكفيك جركل ازرق،بنزين لذلك استخر افضل ودور لك ربع قد راحو للديره وروح معهم ابرك لك والله اني ناصح لك وان كانك صامل لايردك الا الخاص من اللي تبي،

[شرق المغيب]

ابعقب على الموضوع ثاني مرة بعد اذنكم
انا عملت بالربع الخالي اربع سنوات وخذ الكلام من مجرب وناصح لك اخوي
الارنب بالربع الخالي والله ماتسوى تعبها .. ولايزين طعم لحمها الا اذا زهر شجر الحاذ اوربعة ارضها .
وهالايام عواصف ماتوقف الا بالليل . يعني طول اليوم عج
راح تندفن كل حاجاتك واغراضك وتعاف المقناص وجو اقشر هناك
ماهو وقت مقناص ابد مثل ماقالوا الاخوان
تعوذ من الشيطان والقميري على الابواب جاي وانت شايلن عفشك للرمله ههههههه
نسيت اقولك شي بعد الضاهر هالايام وقت ولادة الارانب
تصيد وحده وتحصل عيالها في بطنها تعاف الصيد وتحسف
طع الشور ترى الي مايطيع يضيع وانااخوك

احذفها على القمري ياذيبان

[ريف النشاما]

من خلال آراء الاخوان


ومن خلال المتابعات السابقة


خطط للرحلة في بداية المربعانية العام القادم إن شاء الله


هالحين بتنحدي تربان وتجي

[4200]

ابعقب على الموضوع ثاني مرة بعد اذنكم
انا عملت بالربع الخالي اربع سنوات وخذ الكلام من مجرب وناصح لك اخوي
الارنب بالربع الخالي والله ماتسوى تعبها .. ولايزين طعم لحمها الا اذا زهر شجر الحاذ اوربعة ارضها .
وهالايام عواصف ماتوقف الا بالليل . يعني طول اليوم عج
راح تندفن كل حاجاتك واغراضك وتعاف المقناص وجو اقشر هناك
ماهو وقت مقناص ابد مثل ماقالوا الاخوان
تعوذ من الشيطان والقميري على الابواب جاي وانت شايلن عفشك للرمله ههههههه
نسيت اقولك شي بعد الضاهر هالايام وقت ولادة الارانب
تصيد وحده وتحصل عيالها في بطنها تعاف الصيد وتحسف
طع الشور ترى الي مايطيع يضيع وانااخوك

احذفها على القمري ياذيبان



:good2::good2::good2:عداك العيب عز الله انك اعطيت جواب وراين كافي
ولا يهون باقي الاخوان

[Al3rands]

اعتقد الاخوان افادوك وغير الجو والسوافي الوضع الامني يخوف

[الطياااار]

اخوي انا من أهل الربع الخالي
وانصحك من المقناص في هاذي الايام لانها حر وغبار
واجواء ماتسمح للقنص لاكن اذا حل الشتاء تعال وانا اروح معك لأَنِّي اعرف اماكن الارانب
واعرف الأماكن الخطرة والأماكن السهله وإنشاء الله تستانس

[؛ابوطلال؛]

وعليكم السلام
ماقصرو الرجال وكلامهم سليم
الوقت هذا مهو وقت مقناص
والله يلحقنا السنه الجايه على خير
الله يحييك من دخول سهيل بشهر المواتر جاهزه
ونتشرف بخوة الرجال شرواكم

وان كانك مصمل على المقناص اليومين
كلمني رقمي عندك بالخاص

[عبقري91]

الله يبيض وجيهكم وماقصرتم والله انا مجهزين امورنا واخذت رخصه من العمل ورحت نزلت عيالي عند اهلهم بسدير وعلا اني برجع لرياض ونمشي مع الشباب هو شي بالخاطر لو ما ندخل غير بدايتها عن قولت انا رحنا
واراد الله والشباب جاهم مرابطه عشان الحرب وبنيتي تعبت /
وانا من المتابعين لطقس وطلع الجو عج قلت يربع لعلها خيره لاتكرهو شيء وهو خيرآ لكم
ان الله عطانا عمر بدايت الشتا بنزل موضوع ونشوفنا كم شقردي من الرجال الي بلمنتدا مكشات ونتخاوا لم الربع الخالي ونشيخ علينا شخص اعقلنا واكبرنا واركدنا
وانا والله اني احب الاماره مير راي دايم اعوج ولا احب ارد بخاطري شي ولا به احد يروح هلوقت والله يوفق الجميع لما يحب ويرضى اخوكم ابو ماجد

[أبوصالح9]

الحمد لله على كل حال - عساها الخيره ان شاء الله - ماتدري يمكن الله رادك عن شي يضرك والشور زين والركادة زينه- وعسى الله يحفظ اخوياك ويشفي بنيتك ويحفظ كل غايب ومرابط وينعم علينا بنعمة الامن والايمان

[suleeman]

مساء الخير علي جميع الاعضاء
الطايف جوه ممتاز خاصة في بعد المغرب
سؤال واكيد احصل اجابه لديكم
ابغا اسال عن ارانب الرمله كيف احصل عليها وكم سعر الجوز
لانني اريد ان اعمل محمية عندي في البيت
وتقبلو فايق تحياتي

اخوكم / ابو وائل

[ابو شكاع]

الشباب شاروا عليك ماقصروا بارك الله فيهم
وتكتك أمورك من هالحين والجميع بصحة وعافية
انا مثلك لي شف برحلة لأطراف الربع الخالي
ليست رحلة مقناص بقدر ماهي رحلة استكشاف واستمتاع بالربع الخالي
والله يكتبها لي

[الحربي حاتم]

الله ييسر أمركم ، ولا خاب من إستشار