موضوعي في تعليف الطير

[المرسدس]

السلام عليكم
اسعد الله مساكم

انا مبتدي بصقاره وعندي طير شاهين بحري مثلوث
طرح جيزان

طبعن ناس تقول ما يحذف الريش بسهوله وناس تقول يحذف وتمدحه

تعليفي للطير سمان + صوص دجاج بلدي + حمام
طريقتي الصبح 7 اعطيه صوص لين اضهر الساعه 1 اعطيه سمان
لين بعد العشاء اساعه 9 حمام

ممتاز كيذا او وش الاحسن ابي نصيحتكم

هل يحذف الشاهين البحري ريشه او لا

طبعن في ناس انصحومي ببروتينات تحافض عريش ويحذفه نسيت اسمه واملاح

ياليت تعطوني رايكم ونصحكم

[(هزاع)]

وعليكم السلام ورحمة الله وبركاته

حياك الله

الطير يعلف مره واحده كل (24) ساعه

ويلجاء الصقار الى ان يزيد اذا لزم الامر شرط خلو العلفه من الريش ويكون الطير مصرف علفته السابقه

اما العلف فوق العلف ضار للطير جدا

بالنسبه لشياهين البحر نادر اللي يصفي منهن ويعطي البعض كورس للريش والناس مامدحوه كونه يضعف الريش الجديد

وبالنسبه لي قرنستهن عدة مرات واعطيتهن حبوب زيت الحوت ومابحر وتنويع علف جرذي وجربوع وفروخ حمام حي وسمان حي ودجاج وقلوب ولاصفن ابد عندي

موفق باذن الله

[راعي القراميش]

و عليكم السلام و رحمة الله و بركاته

ثلاث مرات في ال 24 ساعة كثير
بعض الصقاقير مرة و البعض مرتين في اليوم

و الافضل مرتين في اليوم للمحافظة على صحة الطير (نصفه الصبح غدا) و النصف الآخر معشى عقب العصر شرط ان الطير يكون مصرف علف الغدا كامل مثل ما قال اخونا هزاع

تقديريا دام الطير مثلوث نصف فرية الصبح او ما يعادلها و نصف فرية المسا او ما يعادلها

التنويع طيب من صيصان و حمام و فري و رجيل دجاج

(لا تنسى تقليم اظافر الطير قبل المقيض تجنبا للحفاة اثناء المقيض)

الله يوفقك

[المرسدس]

الله يعطيكم العافيه هزاع وراعي القراميش جزاكم الله خير عل معلومه

[أبوبدرالمطيري]

حسب ما شفت في بعض المرابط درجة حرارة المربط لها دور أساسي كبير في تنظيم القرنسة

وبإذن الله أهل الخبرة يفصلون في هالمسألة

أما العلف ف زي ما تفضل الأخوان العلف مرة 24 ساعة

أو مرتين ،،، الصبح بدري فقط ثم المرة الثانية قبل المغرب

بشرك وبشرط أكررها .. يصرف علفته زي ما تفضل مشرفنا ( هزاع )