شباب اللي جرب شاص رفرف ولا سلق يساعدني

[عاشق HW 80]

السلام عليكم ورحمة الله وبركاته
الحين الشاص السلق 11 ريشه
و الشاص الرفرف 8 ريش
والفرق 3 ريش
وانا مني حق حلال
بس انا احمل دباب ابو اربع كفرات يأثر على شاص الرفرف ولا لا
سمعت واحد يقول الشاص الرفرف ما يحمل شعير ولا برسيم ولا اشياء ثقيله
والشاص السلق يقولون افضل بكثير والفرق بس 3 ريش
انا شباب الحمدالله بصحة وعافيه
ايش تنصحوني اخذ
سؤال اخير ايش افضل الشاص الرفرف ولا السلق
في الطعوس
لان الرفرف كفراته عريضه اما السلق كفراته نحيفه
اسف على الاطاله

[عاشق HW 80]

40 مشاهد ولا احد رد ترا والله ازعل

[عابر الموج]

وعليكم السلام ورحمة الله وبركاته
من واقع تجربه اخي الكريم الشاص 8 ريش مريح وخفيف مطبه هذا اولا ثانيا بالنسبة لتحميل لو حسبناها كحسبة 11 ريشه يتفوق بالتحميل بفارق 30 في الميه اما تحميل الدباب لايوجد مشكله لكن الناس اذواق فيه من يرغب الجيب الرفارف وفيه من لايرغبه عند البيع الشاص بدون رفارف ابيع علما بانه يوجد شاص بدون رفارف يجي منه 8 ريش ويسمونه ياي مفتوح ونفس مواصفات الجيب الرفارف لك تحياتي

[عاشق HW 80]

تسلم والله في احد غيره

[عاشق HW 80]

وينكم يالمكشاتيه

[جنيفاوي 503]

السلام عليكم ورحمة الله وبركاته
اخوي الشاص رفرف يشيل دباب وانت مرتاح واريح
واكثر اللي يشترون شاص ١١ ريشة يسحبون ثلاث اواربع
سست ويطرقون الباقي علشان يخف مطبه
وترا نزل شاص ٨ ريش بدون رفرف ياي مفتوح

[راعي الجيوب 1]

من واقع تجربتي لجيب شاص ٢٠٠٣ خليجي رفرف ٨ ريش وعليه شد الفراشه وثلاجه وتانكي ماء ٢٥٠ لتر ومكاشيت هنا ورحلات قنص خارج السعوديه من ٨ سنوات والأغراض عليه !! ما شفت منه اي خلاف والله الحمد راحه وثبات علي الخط ! نصيحتي ٨ ريش افظل لك !!
تحياتي

[Abukhaled-503]

حياك الله يالغالي

خلك من يقولون

عندي شاص ٩ رفارف و١٥ سلق

ال٩ اطق به ٤٠ كيس شعير اللي هو رفرف
ال١٥ وصلت به ٦٠ وكان فيه مجال احمل زيادة

انا اشوف لاستعمالك ال٨ سست افضل

[أبو شيري]

يارجال توكل على الله وخذ رفرف 8 ريش وحمل خمسين دباب مو دباب واحد

[تميم2222]

والله يا الرفرف انه اطلق ولا الفرق شوي لامن شكل واريح

[عاشق HW 80]

حياك الله يالغالي

خلك من يقولون

عندي شاص 9 رفارف و15 سلق

ال9 اطق به 40 كيس شعير اللي هو رفرف
ال15 وصلت به 60 وكان فيه مجال احمل زيادة

انا اشوف لاستعمالك ال8 سست افضل

مشاء الله عندك 2009 و 2015
ممكن سؤال
ايش افضل في العزم هل 2015 تمام ولا 2009 افضل
كيف الدعسه الكهربة حقت 2015

[عاشق HW 80]

وينكم يالمكشاتيه

[Abukhaled-503]

مشاء الله عندك 2009 و 2015
ممكن سؤال
ايش افضل في العزم هل 2015 تمام ولا 2009 افضل
كيف الدعسه الكهربة حقت 2015

رديت على رسالتك بالخاص

[ثورة الشك]

رديت على رسالتك بالخاص


يابوخالد

ليتك رديت على استفسارة على العام لكي يستفيدالجميع

بارك الله فيك

[اليامي قطر]

رديت على رسالتك بالخاص

الله يسامحك

رد بالعام خلنا نستفيد

حتى انا متحير بين هالنوعين

[صميدعي]

السلام عليكم ورحمة الله وبركاتة
من واقع تجربه مع الشاصات من ١٩٩٢ لين ٢٠١٠ كلهن ١١ ريشه
واسحب منهن اربع ريش
واستعمال مقانيص ورحلات وكرف وكد صحراء ونفود وتحميل
ويبقى الشاص ثابت ويعجبك من الناحيه هذي
لكن استعماله كسياره اساسيه لايطاق ابداً لانه وعر وصعب ع الجسم لذلك
لا انصحك ب١١ ريشه .
استعملت شاص ٢٠١٢ خليجي ٨ ريش ابو رفرف عزالله انه قمة الراحه عن ١١ ريشه.
والشاص عموما للحمول الثقيله فقط من واقع تجربه ....