ابشتري فراش رشحولي واحد حق القاضي ولا الدريويش

[هاوي البر]

الاخوه في هذا المنتدى الطيب
السلام عليكم ورحمة الله وبركاته
ناوي اشتري لي فراش بر ومحتار بين اثنين فراش اسمه (( الصمان من مصنع القاضي )) و الثاني فراش من (( مصنع الدريويش )) وفيه فرو وبلستر و مموه وش الافضل
وجزاكم الله خير

[نواف 100]

الدريويش بلامنازع ولاتاخذ الفرو لانه يمسك الشوك والرمل وانت في الخيار وكل عام والجميع بالف خير

[بن نويشر]

القاضي وبس ولاشي غير الفاضي عندهم فراش سعره أعتقد بـ350 ريال شي مسكت مر وشفه عندهم ..

[طير شلوا]

اخوى اذا تسمح فيه غير هالنوعين الى هو السنيدى (فراش الخليج) وان مجربه ممتاز وسعره معقول عند السنيدى 295 ريال

[ابونايف الروقي]

السلام عليكم
كل عام وانتم بخير
انا جربت فراش الدريويش مخمل بصراحه مسكت ودافئ ولا يدخله الماء.. سعره 290 ريال من معرض الدريويش في الرياض بمخرج 16 وواحد من الشباب اشترى فراش السنيدي من برق الحيا سعره 310 ريال الحشوه اوكي والفراش ناعم ومريح واريح من الدريويش لاكن يدخله الماء ....
واذا تبي نصيحة خذ فراش الدريويش وخذ لك خيمة المبيت من القاضي للخيام الفراش 290 + الخيمه 145 = 435 ريال واحلى نومه
خيمة المبيت صغيره كبر الفراش وتحميك من الهواء ومن الرطوبه ومن الثلج والصقيع وشكرا ..

[طربق طربق]

يا هلا ومرحبا في اخوي P52 اول شي انا راح افيدكم في الاثنين

الدرويش فراش ممتاز بنسبه للشكل والطربال التنزااني الى مفصل عليه وجيد في البرررد الطبيعي بس في البرررد القوي لا ماينفع لازم تحط فراش داخل على شان الديباج الى فيه يبرد


والقاضي الى هو من النوع فصول الاربعه فراش ينفع للبرد القوي جد ولاتفرك انك تحط فراش داخل بس لازم تحط له طربال تنزاني من عند القاضي نفسه يفصله على المقاسم الفراش على شان الطلوووله وانسى شي اسمه برد ثلج مطرررر ولاتفكررر في الضيق لانه مقاسه 120على 240 طوول يعني عيش في احلام بريه جميله ههههههه

انصحك في القاضي الفصول الاربعه ولك تحياتي

[هاوي البر]

الله يجزاكم خير كفيتم ووفيتم
شكلي اباخذ فراش الفصول الاربعة من القاضي والله يكتب الي فيه الخير
شاكرا لكم جميعا هذه الردود الطيبه

[جذاب2005]

اقول اشتر من الغرابي اذا كنت في الرياض زي مصنع الدريويش

150 ريال مع كيس له

[آل علي]

من المخازن بعد وخرج 17 وسعره /75ريال ودافي

وحتدعيلي

[السبع الازرق]

اخوي هاوي البر
واضح ان الجماعة حيروك لكن خذ فراش يكون البلوستر حقه سميك والشراع تنزاني ونوم العافية ان شاء الله

[ابوتركي 540]

الدريويش بلا منازع معي له حول ثلاث سنوات مامثله خاصه الفرو
مره ممطره علينا وانا نايم فيه مادخله الماء ممتازجدا

[بيرق العزة]

اسال مجرب للدريويش من 13 سنه منتازالمناتيز ولا عليه كلام 360 ريال والان 290 ريال ضد الماء والبرد وعريض جداااا بس ما يمديك تصك على نفسك فيه ابد تنكتم فيه >>>> فصل عندهم احسن لك رح للمستودع حقهم وفصل بمواصفات (خليجيه ) بولستر وقماش منتاز وغطاء تنزاني نبر واحد

[الرسن]

والله انا محتار زيهم ودي بالفصول الاربعه
لكن الدريويش يقول انا احسن من كل الاربعه
وذاك السنيدي يقول انا الخليجي انا الخليجي
وصرنا للبرد طعام جحوش..
اذكر واحد من الشباب المطفرين فصل فراش باعه
في عز البرد بخمسمية ريال ووين في الصمان
على باله كسبان ميتين ريال
وذا تنطبق عليه بياع الخبل عباته
بس تصدقون كان فراشه روعة.
معالسلامه

[هاوي الله]

وش رايكم ياشباب بفراش إذا كان درجة الحراره صفر مئوي وهابتن عليك الشمال ويشهد علي ربي إني معرق

فراااااااش السنيدي لا تخليه وانا اخوك عزالله إنه فراش بس يعيبه الثقل شوي

موجود عند العليان في الرياض على طريق خريص وسعره تقريباً قبل سنه = 300 ريال

[هاوي البر]

الله يجزاكم خير اي والله مع كثرتة الردود زادة الحيرة
ابستخير و ابشوف وش الله يكتب

[المموه]

البرد اللي جانا بالعيد ما ينفع له هالفرش . اللي كانوا معي بالصمان والجندليه وما معهم فرش امريكيه ورطوا ورطه حتى الفرشات حطيناهن عليهم ولا نفع . الفرش اللي تقولون معدل سعرها 300 ريال . زدها 300 ريال ورح لمحل الصقر والصقار بطريق خريص وخذ الفراش الامريكي ماتحط وسطه الا وساده بس والصبح تنفض الثلج من فوقه . يعلم الله انني لا اعمل شهره للمحل ولكن بعد ماجربت الفراش تأكدت انه يستأهل . وعموما عندهم نوعين خذ البيج اللي داخله بني وقيمته 600 ريال .

[الضب الصماني]

طيب يا أخينا المموه،،،ممكن وصف لمحل الصقر والصقار؟ وتحية للجميع على تفاعلهم.

[طير شلوا]

لا اجل ازيدكم من الشعر بيت طلع فراش بس مابعد وصلت للمعلومه عنه الاكيده درجة الحراره صيف وشتاء ثابته مادرى هم قالو27 او 37

[نواف 100]

شف يالهاوي اناعندي الدريويوش له اكثر من عشر سنين وذي ماقلتلك مسسسسسسكت وفراش الخليج مع خويي قبل شهر بالدهناء جمد من الصقوعه اذاتحط بطانيه يمكن صحيح اوذف بس هالصقوعه وسعره 280

[بيرق العزة]

البرد اللي جانا بالعيد ما ينفع له هالفرش . اللي كانوا معي بالصمان والجندليه وما معهم فرش امريكيه ورطوا ورطه حتى الفرشات حطيناهن عليهم ولا نفع . الفرش اللي تقولون معدل سعرها 300 ريال . زدها 300 ريال ورح لمحل الصقر والصقار بطريق خريص وخذ الفراش الامريكي ماتحط وسطه الا وساده بس والصبح تنفض الثلج من فوقه . يعلم الله انني لا اعمل شهره للمحل ولكن بعد ماجربت الفراش تأكدت انه يستأهل . وعموما عندهم نوعين خذ البيج اللي داخله بني وقيمته 600 ريال .


صحيح اخوي السموه هذا غاب عني مع الشباب الي يطلعون معي يمدحونه حيل وش حيل منتاز المناتيز يقولون امريكي وسعره ست اميه وهو يقولون عند الصقار والصقور عند محل بشارع سلمان الفارسي ونت جاي من خريص على اليمين ونا مادري المحل لمن هوله بس امدح الفراش منتاز

[المموه]

المحل لليحيي وما يهمنا هو الفراش وموقع المحل طريق خريص اتجاهك شرق قرب المعارض على اليمين شمال سوق العثيم هو بعد العثيم ويفتح المحل غرب شمال . وسمعت ان هذا الفراش بالقصيم يباع عند محل عروق الشمال بمبلغ 450 ريال .

[جهام القصيم]

السلام عليكم ورحمة الله وبركاتة

أقول لا تهمك كل هالفرش عليك بالكندي عند الرماية قيمة 500 ريال خفيف او وذف او حجم صغير يتحمل درجة حرارة 20 تحت الصفر
وفق الله الجميع لما يحب ويرضى

[ابوعلي7]

أقول إقضب العلم واقضب قروشك (600) و (500) مالها داعي، خذ فراش الدريويش( فرو) نعم فرو وبالنسبه للشوك والرمل اللي يقولون يمسك فهذا امر مبالغ فيه ( والله عندي الإثنين ، فرو ومخمل والفرو ادفا ولا يتأثر بالشوك والرمل بالطريقة التي يحذر منه البعض) اذا ماجاز لك الفراش خذ فيه مكسب من عندي

[هاوي البر]

الله يجزاك خير اخوي ابو علي على هذي النصيحة
هذا شي اكيد ان الفرو ادفى ما فيه شك بس الي خلاني اهون عنه كثر ما قريت من ردود الشباب الله يجزاك خير و اياهم
لكن ان شاء الله ابمرهم و اخذ فرو
لانه داخل مزاجي بس ابي واحد يحمسني شوي
و الشكر موصول لجميع اعضاء هذا المنتدى الطيب وخصوصا من شارك في هذا الموضوع

[راعي ساموده]

السلام عليكم ورحمة الله


هلا اخوي هاوي بر
اشتر اللي يناسبك من القاضي الدريويش السنيدي بس ............ اياني وياك تشتري فرش من شارع الغرابي ( سلق بيض )

[ضحية بيشة]

السلام عليكم ياشباب

والله فراش الصمان من القاضي مع خيمه بحجمه من عنده تخليك ماتدري عن الجو هو صيف ولا شتاء خاصة اذا كنت متعشي

مسلوق ولا فول وهذا العلم اللي يجمد على الشارب وازيدك من الشعر بيت تلاقيه عند العليان اللي على خريص بسعر249ونفس الفراش

عند برق الحيا بسعر 290ونفسه عند الوكيل المخيس القاضي بسعر 350وسوا خصم هاليومين بسعر 300والخيمه اللي بحجمه وتراها صغيره ووذفه وماتاخذمحل بالسياره ماتلاقيها الا عندالقاضي اللي جنب ذنيب على خط الميه وتعبت وسلامتكم والله يرزقكم دفاهن ويكفيكم صقوعتهن

[الرهدن]

المموه كلامه :good:

لأن الفرش الثانية الوطني كنه فراش عروس00
وفيه نوعيات كندي بمواصفات سعودية(سحاب بالكامل) عند الهدف ب 550 ريال و إلى ناقص 20 تحت الصفر 00
وجهة نظر00
.

[هاوي البر]

الله يجزاكم خير ما قصرتم

[المموه]

ياهاوي البر نصيحه لا تاخذ الا امريكي دريويش او قاضي فرو جربناهن ويشهد الله انه عندي من سنين دريويش فرو ويوم طلعت بالعيد حاطهن والامريكي سواء فوق تانكي الموتر وانا ماخذ الامريكي احتياط لأنه حار بزياده . بس درجة حراره 6 تحت الصفر خاصه يوم العيد باليل وانا بعرق الجندليه وشماليه اللهم يا كافي مانفع معها الدريويش خليناه لين رجعنا مربوط فوق التانكي وما نفع بعد الله الا الامريكي . وانت بالخيار الفرق بسيط والجوده تفرق . مع تمنياتي لك بالتوفيق

[هاوي البر]

الله يسلمك اخوي المموه ما قصرت
الامريكي الي معك وين ماخذه منه وكم سعره الله لا يهينك

[big boss]

عندي فراش الدريويش من داخليه زيتي ممتاز ومقتنع فيه اما القاضي ما ادري عنه

[المموه]

اسف جدا على التأخير . من الوصف اعلاه . الصقر والصقار طريق خريص شمال المعارض بجوار العثيم . وقيمته 650 ريال

[هاوي البر]

الله يجزاك خير اخوي و المموه و الشكر موصول لجميع الاخوه في هذا المنتدى المبارك