نصيحه نصيحه غيرو الزيت العادي للطبخ بزيت السمسم طعم خيال وصحه

[ابولولو]

السلام عليكم

صباح الخير للجميع وجعل يومكم كله رزق وسعادة وفرح

لي فتره وانا أحط زيت السمسم بدل الزيت العادي اللي اعتبره بحق الأنسان جريمه

واحد يبي يقول كيف وليش

كيف لانه يطعم بالأكل ويخلي للرز خاصه نكه حلوه وجميله مثلكم :D

ليش لانه صحي ومفيد جدأ جدأ

يبي يقول واحد مايوجد الزيت الأصلي

أقول له مؤجود وبكثرة جدأ خاصه لأهل الرياض

بشارع غبيره العام فيه معاصر قدامك يعتصره وناس ثقه وقدمين جدأ جدأ وهم حضارم

اذا جيت من الدائري الشمالي ادخل لشارع البطحاء باتجاه الشمال وخل حراج ابن قاسم

القديم على يسارك امش الين يجيك شارع غبيره على يدك اليمين ادخل وامش شوي يجؤن على

يدك اليمين يفتحون شمال

واللي جاي من الصناعية والملز باتجاه الجنوب يجي كبري غبيره الكبير خلك من تحت ولف يمين

مع شارع غبيره ووجهك غرب امش الين تجي الاشاره بعد الاشاره بقليل على يدك اليسار

واضن قدّامه المحل مدرسه

وأهل جنوب المملكة الغاليه عندهم بكثرة زيت السمسم

الأفضل
1-اليماني والسعودي الكيلو ب 50 ريال

2-السوداني الكيلو ب 45 ريال

ملاحظه عامه / زيت السمسم مفيد جدأ جدأ للأطفال اللي عندهم كحه والكبار ايضآ يدهن الصدر ويكون الشخص بعيد عن الهواء والمكيف

ان أصبت فمن الله وان اخطأت فمني والشيطان

[خشكاري]

الله يعطيك العافيه وفعلا طعمه فرق السماء عن الأرض مقارنه بزيت الذرة او دوار الشمس لكنه غالي هذي المشكله ولا طعم وفوائد انا معك 100% ويوجد عبوات في السوبرماركت نوعين نوع بكر عصرة أولى ونوع مكرر

[متولع بالقنص]

يعطيك العافيه ..

وحطيناه بالقائمة من اجل التجربة ..

لاكن ماندري نحصلة بعرعر او لا ..

[قنا النفود]

اكيد والله انه فكره جديده

[قنا النفود]

جزاكم الله خير

[الوعب]

جزاك الله خير على النصيحة ،، ستتم التجربه باذن الله

[البرنت77]

يعطيك العافية
ولزم نجربه لاعدمناك ياغالي

[ابومشعل3]

بالنسبة لي اطبخ بزيت الزيتون في البر والبيت .........تحياتي . ولايهون زيت السمسم .

[ابولولو]

الله يحي الجميع

وكلن على كيفه ابو مشعل بس التجربة مهاب خساره

واهن شي الأصلي الأصلي

واللي خارج الرياض ممكن يعرف احد باالرياض وياخذ طازج من المعصرة

واللي يقول غالي مافيه شي يغلي على صحة الانسان والكيلو يكفي واجد

[ابومشعل3]

نعم التجربة مهمه وخاصة الي نفسة شينة يرجع للزيت المتعود علية ..........من زمان اشترية من الحلة ومن المعصرة الكيلو 40 ريال ............وقلبت علي زيت الزيتون .........تحياتي