اكسنت 13 مشكله مالها حل !

[صاحب الناتيفا]

السلام عليكم ورحمة الله وبركاته

يا اخوان انا معي اكسنت 2013 ماشيه 300 الف كم اتوماتيك ستيبترونيك
كانت زي اللوز لين سافرت من تبوك الى ابها وراه رجعت واقطعتني بالقنفذه كانها قطعة بطارية وغيرت البطارية وطلعت هالمشكله وسطحه على جده ولفيت الورش ماحد مرت عليه هالسالفه قبل

المشكلة :
السياره مافيها عزم نهائياً كانها مكتومه يوم احطها بD تمشي كاني ماني داعس بنزين يعني ماتاصل سرعتها 15كم واذا وصلت لو مطب ماتقدر تطلعه
وصوتها كانها مكينة ديزل وفيه ريحة مثل ريحة الكربون

وديتها لميكانيكيين وكهربائيين واللي قالوه غيرته ماصار شي
وتفلسفوا ناس ماعندهم خبره وغيرت اللي قالوه والا الان لاااا حل !!

الاشياء اللي غيرتها وسويتها
1- فحص كمبيوتر على المكينة والجربوكس كلهن سليمه مافيها اي شي
2- نظفت البخاخات .
3- غيرت بوابة الدعسه ( الثروتل ) .
4- غيرت بواجي وشيكت على اسلاك البواجي .
5- غيرت طرمبة وصفاية وعوامة البنزين
6- غيرت فلتر الهواء وحساسه
7- شيكت على دبة التلوث وفكيتها ماصار اي شي .
8- شيكت على كل الفيوز ( طلعت سليمه )
9- غيرت البطارية


الاشياء اللي شاك فيها الان
1- البنص
2- الكمبيوتر
3- سير التايمن

وهل الخرابات اللي انا شاك فيها يظهرها فحص الكمبيوتر اذا كانت متعطله ؟
اذا احد مر بهالمعاناه اتمنى يخبرني !
جزاكم الله خير

[أبـو زهـرهـ]

وعليك السلام ورحمة الله وبركاته
إذا غيرت بوابة الدعسه ترى لها برمجه سواء كمبيوتر أو عن طريق الدعسه مثل الجموس والفوردات

صارت لواحد من أخوياي معه فورد فيوجن كانت مشكلتها مكتوووومه جدا وبعض الاحيان تنطفي جربنا نظفنا البوابه مانفع شيكنا بالانترنت طلع لها برمجه عن طريق دعسة البنزين والله وسويناها وزبطت

الشى الثاني جرب تفصل البطاريه وأرجع اشبكها
إذا مانفع كل ذا الله يعينك جرب غير الكمبيوتر
ــــــــــ
البنص إذا تبي تعرف خربان هو أو شغال في الفاضي صوتها يزيد ولا لا

والله يكون بعونك

[الوقيدي]

السلام عليكم ممكن سير التيمن زلق على الترس بدون انقطاع مما يسبب برودعزم السياره رغم شغل المحرك . فك غطاء السدر وتأكد من تساوي العلامات للترس والسير على بعض .

[SGL]

تأكد من خرطوش قربة الفلتر ﻻيكون فيه قطع أو خرم ويسحب هواء

[ابوطارش]

وعليكم السلام

كيف انقطعت كانها قطعت بطاريه
تقصد طفيت السياره وعيت تشتغل او وقفت وانت تمشي

مافيها عزم تقصد القير او المكينه اذا دعست بنزين وانت ماعشقت القير تقبل او ماتقبل اذا كانت تقبل يعني المشكله بالقير

اذاكانت المشكله بالقير
1 - شيك على الزيت اذا كان ناقص اومحترق
2-شف عزم السياره بالريوس قوي او نفس الشي
3-اتوماتيك ستيبترونيك تقدر تحول من 1 الى 2 شف عزم السياره بالنمره 2 تقدر تحول
4- اذاكان عزم السياره في الريوس ضعيف حاول تشوف باقي النمر من 1 الى 5

وصعب احدد المشكلهم من الوصف مهما كان دقيق

والدقة في شرح المشكلة اساسية من البداية الي النهاية وقبل وبعد (ليش حكمت على البطارية وش حصل قبل القنفذه)
بطارية السياره للتشغيل فقط لتحرك السلف تحتاج لاكثر من 4000 واط

تصبيرة لين يرد الخبراء

[صاحب الناتيفا]

وعليك السلام ورحمة الله وبركاته
إذا غيرت بوابة الدعسه ترى لها برمجه سواء كمبيوتر أو عن طريق الدعسه مثل الجموس والفوردات

صارت لواحد من أخوياي معه فورد فيوجن كانت مشكلتها مكتوووومه جدا وبعض الاحيان تنطفي جربنا نظفنا البوابه مانفع شيكنا بالانترنت طلع لها برمجه عن طريق دعسة البنزين والله وسويناها وزبطت

الشى الثاني جرب تفصل البطاريه وأرجع اشبكها
إذا مانفع كل ذا الله يعينك جرب غير الكمبيوتر
ــــــــــ
البنص إذا تبي تعرف خربان هو أو شغال في الفاضي صوتها يزيد ولا لا

والله يكون بعونك

حياك الله اخوي ابوزهره
برمجتها حول 6 مرات باكثر من طريقه عند الميكانيكيه وبنفسي بعد وجربت فصل السالب
بعد تركيب كل قطعه وبرضك مثل ماهي
__
تاكدت من البنص مافيه مشاكل

اللهم امين
شاكر لك ردك يالغالي

[صاحب الناتيفا]

السلام عليكم ممكن سير التيمن زلق على الترس بدون انقطاع مما يسبب برودعزم السياره رغم شغل المحرك . فك غطاء السدر وتأكد من تساوي العلامات للترس والسير على بعض .


هذي المعلومه جديده علي كنت اظن انه اذا فيه مشكله بسير التيمن ماتشتغل السياره نهائياً
برجع اشيك والله ييسرها يارب
مشكور يابعدي على المعلومه وجزاك الله خير :heart:

[صاحب الناتيفا]

تأكد من خرطوش قربة الفلتر ﻻيكون فيه قطع أو خرم ويسحب هواء

غيرت الفلتر كامل مع لياته كلها
ونفس الشي ماتغير نهائياً

شكراً لتواجدك وردك يالغالي 3>

[صاحب الناتيفا]

وعليكم السلام

كيف انقطعت كانها قطعت بطاريه
تقصد طفيت السياره وعيت تشتغل او وقفت وانت تمشي

مافيها عزم تقصد القير او المكينه اذا دعست بنزين وانت ماعشقت القير تقبل او ماتقبل اذا كانت تقبل يعني المشكله بالقير

اذاكانت المشكله بالقير
1 - شيك على الزيت اذا كان ناقص اومحترق
2-شف عزم السياره بالريوس قوي او نفس الشي
3-اتوماتيك ستيبترونيك تقدر تحول من 1 الى 2 شف عزم السياره بالنمره 2 تقدر تحول
4- اذاكان عزم السياره في الريوس ضعيف حاول تشوف باقي النمر من 1 الى 5

وصعب احدد المشكلهم من الوصف مهما كان دقيق

والدقة في شرح المشكلة اساسية من البداية الي النهاية وقبل وبعد (ليش حكمت على البطارية وش حصل قبل القنفذه)
بطارية السياره للتشغيل فقط لتحرك السلف تحتاج لاكثر من 4000 واط

تصبيرة لين يرد الخبراء

هلا بابوطارش
حياك الله
هديت عند مطب وطفت كان الاصبع انفصل او شي كذا المهم اول ماطفت من العلامات حسيت انها بطاريه , بعد ماغيرت البطاريه اشتغلت لكن السياره متغيره نهائياً وطلعت هالمشكله العويصه
___
القير سليم ميه بالميه على فحص الكمبيوتر
ولو فيه بلاء كان السياره تفضي ماهو ماتقبل الدعسه وتكتم لما ادعس مثل ماهي الان
____
خلها على الله ياخوك ميكانيكيين وكهربائيين بجده وتبوك شافوا المشكله بعيونهم عجزوا عنها فكيف بشرحها
___
الان مافيه اي مشكله بالبطاريه بعد تغييرها
لكن المشكله مثل ماذكرت بالموضوع
يوم احطها بغيار D تمشي دحدره واذا دعست تكتم وتجي تطفى لكن ماتدعس ابد
يعني سرعتها ماتتعدى 15 وصوت المكينه مثل الديزل فيها تكتكه ابد كنك مشغل دينا
__
مشكور ع اهتمامك يالغالي وجزاك الله خير
والله ييسرها ع الجميع يارب

[وجعين]

المشكله عندك كهرب صارت لي بلفورد وطلع احد الكويلات خربان عاد مادري انت عندك اسلاك بواجي ولا كويلات

[LesSMore]

الله العالم وحده من ثنتين
يا احد البلوف عندك قافل يا فلتر القير لازم تغيره ولو ان زيته مانقص

[ابوراكان تبوك]

مشكلتك كلها بعد تغيير البطارية

احتمال كبير برمجة دعسة البنزين او برمجة كامله للموتر
حدد منطقتك حتى نفيدك بالورش المظبوطه

[أحمد محمد1429]

اشك في سير التيمن زي ماقلت

[خالد الفووزان]

افحص ضغط البساتم

[عااشق البر]

تاكد من البطاريه الي ركبت جديده
لاتكون من البطاريات المضروبه
اذكر واحد نفسك معه ازيرا طلع
ضعف بالبطاريه
وغيرها ومشت اموره حاول تجرب
بطاريه ثانيه واتكد قبل تخسر بطاريه
جديده واذا نفس المشكله فتكون مشكلتك
الله واعلم داخل المكينه اذا على الصوة الي قلت

[SNIPER07]

اسعد الله صباحك بكل خير

الله يكون في عونك على هالمشكله ،

أنت غيرت اللي ذكرته على اي فحص لو تجارب

اخي حسب و صوفك للمشكلة تراها بسيطة ، خذ حساس كرنك يركب تحت الكرنك و سعره حول 100 ريال في فحص الكمبيوتر يطلع انه يعمل يوصل كهرباء لكن هو اللي يعمل لك نفس المشكلة من واقع تجربة مع سوناتا 2000م نفس وضعك و عساك على القوة