تكفون فزعتكم يا أصيل حجازي وكل من له خبرة في الباترول

[شقن بقا]

أخواني جميعا بدون تخصيص السلام عليكم ورحمة الله وبركاته والله يسعدكم ويسعد أوقاتكم ومبارك عليكم مطر الوسم ياأهل الديار الممطورة وعساها متبوعة وعسى المولى يجعلها عامة وشاملة
يا أخوان أنا عندي مشكلة في جيبي الباترول 94 جابتلي الصمرقع في راسي عسى روسكم سالمة والمشكلة بإختصار ( رجة في السيارة من أسفل ) تحسها تهتز من تحت كأنك ماشي في بطانيج خفيفة وتحسها عند مواطي الأرجل تبدأ عند الممشى من 85 إلى 90 وبعدين تختفي وترجع إذا وصلت السرعة 100 / 110 وبصراحة تعبت منها وكل مهندس يفتي من راسة وكرياسه وكلهم الظاهر تعلموا في سيارتي غيرت الكفرات وغيرت جنوطها ورصصتها - غيرت جلود أعمدة التوازن والمقصات - ركبت عمود كردان وعمود الدبل - غيرت كراسي المكينة والجيربوكس لكن أعوذ بالله ما نفع شي ولا زالت هالمشكلة شاغلتني ومشغلتني والله كرهتني في السيارة مدري عين ناضلتها ولا قرادة حظ
وأنا الحين مثل ما يقولون أخوانا المصارية ( غلب حماري ) أكرمكم الله فتكفون يالربع بصفة عامة ويا أخ أصيل بصفة خاصة تكفون دلوني إللي مرت عليه المشكلة ويعرف لها حل لا يبخل علي إنتم تقدرون وأنا أستاهل وأعذروني عن متابعة ردودكم أول بأول لأني ما عندي وقت للنت إلا بالليل فقط ومتأخر وإن شاء الله أشوف ردودكم وأرد عليكم وأستفيد منها وللمعلومية السيارة كان مركب عليها فرارات وفكيتها منها يعني رجعتها كما كانت والله يحفظكم

[م س س]

جلد البودي وش وضعها ؟

[ابوراكان تبوك]

فعلا جلد بودي 99.99%

لكن مثل ماسالك اخي هل فحصتها

[اليوسف2012]

اخوي تاكد اولا من 3 اشياء اول شي ذراع الدركسون لايكون فيه فضاوة ثاني شي مساعد الدركسون ممكن يكون ضعيف اذا ما استفدت شي حاول تشيل الوردات حقات الركب

[ateeq7]

خلينا نجرب مرة ثانية فك العمود الامامي للدبل و مش في السيارة هل هناك فرق و تاكد من المفاصل و شحمها في اماكن المخصص تسمى النبل او الحلمات كترجمة هههه
رجع العمود الامامي و فك الخلفي ومش على السيارة مع تعشيق الدبل هل تغيرة الرجه او خفت مع تشحيم المفاصل مثل الاول
اذا اكتشفت الرجه من العمود الامامي او الخلفي لازم تفحصة عند المخرطة اذا قدرو يعدلونه كان بها او غيرة بمستعمل او جديد
و تاكد من الركب او ميزانيت الرود التي تتحكم بميلان الاطارات الى الداخل او الخارج
و مافي مانع اذا حسيت الربل قاسي تحت رش السيارة بزيت تحت كامل و جرب اذا بدات تضبط فالربل ناشف لازم تشيك تحت السيارة واهذا والله اعلم

[شقن بقا]

جلد البودي وش وضعها ؟

أخوي م س س مشكور ع المداخلة بالنسبة لجلد البودي شيكت عليها مابها شي أبدا ولا عليها ملاحظات

[شقن بقا]

فعلا جلد بودي 99.99%

لكن مثل ماسالك اخي هل فحصتها

أخوي أبو راكان مشكور على مداخلتك ومثلك كنت اظن من جلد البودي ولكنها نظيفة جدا ولا عليها إشكال

[ابوطارش]

تأكد من العمود وتركيبه بعضهم يعكسه مايدري
وايضا الدفع الرباعي اي صدمة على الكفرات الامامية تدمره

[ابوطارش]

وايضا عندنا مالها حل وهي
النفس
واحد نشبت نفسة بموترك

[شقن بقا]

اخوي تاكد اولا من 3 اشياء اول شي ذراع الدركسون لايكون فيه فضاوة ثاني شي مساعد الدركسون ممكن يكون ضعيف اذا ما استفدت شي حاول تشيل الوردات حقات الركب

أخوي اليوسف مشكور على المداخلة وبالنسبة لذراع الدركسون مغيره جديد أما المساعد فمافيه فضاوة مع إني مغير الربلات حقته كاملة أما بالنسبة لوردات الركب فبصراحة ما أدري وش إللي تقصده بها إنت تقول تشيل الوردات وما أدري هل إنت تقصد تقول شيّك على الوردات وهذا إللي فهمته لأني توقعت يكون خطأ غير مقصود في الكتابة
عموما مشكورين كلكم ومنتظر المزيد من أراء الإخوان وبخاصة الأخ أصيل حجازي لا هانوا البقية

[شقن بقا]

خلينا نجرب مرة ثانية فك العمود الامامي للدبل و مش في السيارة هل هناك فرق و تاكد من المفاصل و شحمها في اماكن المخصص تسمى النبل او الحلمات كترجمة هههه
رجع العمود الامامي و فك الخلفي ومش على السيارة مع تعشيق الدبل هل تغيرة الرجه او خفت مع تشحيم المفاصل مثل الاول
اذا اكتشفت الرجه من العمود الامامي او الخلفي لازم تفحصة عند المخرطة اذا قدرو يعدلونه كان بها او غيرة بمستعمل او جديد
و تاكد من الركب او ميزانيت الرود التي تتحكم بميلان الاطارات الى الداخل او الخارج
و مافي مانع اذا حسيت الربل قاسي تحت رش السيارة بزيت تحت كامل و جرب اذا بدات تضبط فالربل ناشف لازم تشيك تحت السيارة واهذا والله اعلم

أخوي عتيق مشكور ع المداخلة وراح أشيك مرة ثانية وأعمل مثل ماقلت وأكيد أفيدكم بالنتيجة بعد التجربة لكن إللي ودي أعرفه ( إذا فكيت عمود الكردان الخلفي كيف أقدر أجرب السيارة على سرعة 90 وما فوق ع الأقل لسرعة 120 بدون عمود كردان وأنا أدري إن العمود الأمامي _ عمود الدبل أقدر أجرب ممشى السيارة بعد ما أعشق الدبل لكن بدون سرعة عالية ) أرجو الإفادة

[شقن بقا]

تأكد من العمود وتركيبه بعضهم يعكسه مايدري
وايضا الدفع الرباعي اي صدمة على الكفرات الامامية تدمره

وايضا عندنا مالها حل وهي
النفس
واحد نشبت نفسة بموترك

أخوي أبوطارش الله يطرّش لك الخير ههههه أعتقد إن تركيبة العمود وحدة ما يركب عكس حسب خبرتي وخبري أما بالنسبة للنفس فوالله لها حل لكن المصيبة شلون تعرف الناضل راعي النفس الخبيثة ومستعد والله أعطيه إللي يبي بس يفكني من عينه

[أحمد محمد1429]

السلام عليكم شف يالحبيب انسدح تحت السياره من خلف الكفر الامامي الايسر ودقق في الكنداسه هي تحك في الشاصي ولا لا اذا كانت تحك في الشاصي تتلاحظ اثر الاحتكاك في الشاصي وهذا امرها سهل رح لحقين الكناديس وخله يلين لك الكنداسه بالاكسجين ويوبعدها عن الشاصي

[ابوسند9]

وعليكم السلام
زي ما ذكر لك اخونا عتيق امش بالدبل الخفيف ما عندك مشكله, ولا تقول اني مغير الاعمده لان اللي انت مغير ربما فيها برضو مشكله
والمشكلة عندك اللي فهمنا انه مو رجة دركسون ! رجة بدي
الشي الاخر حاول تشوف ورشة ويرفع السيارة وتجرب

[هملول السحاب]

جرب تغير الجنوط ممكن الرجة منها اذا كانت هلل وتجاري .

[ateeq7]

أخوي عتيق مشكور ع المداخلة وراح أشيك مرة ثانية وأعمل مثل ماقلت وأكيد أفيدكم بالنتيجة بعد التجربة لكن إللي ودي أعرفه ( إذا فكيت عمود الكردان الخلفي كيف أقدر أجرب السيارة على سرعة 90 وما فوق ع الأقل لسرعة 120 بدون عمود كردان وأنا أدري إن العمود الأمامي _ عمود الدبل أقدر أجرب ممشى السيارة بعد ما أعشق الدبل لكن بدون سرعة عالية ) أرجو الإفادة
ما هنالك مشكلة مع الدبل مش عليه زي ما تريد امورك طيبة بس لم تروح المغسلة السيارات ويرفعها خلة يجيب مسدس الشحم او الجريز و قف جنبة وقوله شحم جميع النبلات لا تخلي مكان مخصص للتشحيم تحت السيارة الا تعطيه ضربه او ضربتين شحم وخصوصا داخلين موسم امطار و التشحيم ضروري

[شقن بقا]

السلام عليكم شف يالحبيب انسدح تحت السياره من خلف الكفر الامامي الايسر ودقق في الكنداسه هي تحك في الشاصي ولا لا اذا كانت تحك في الشاصي تتلاحظ اثر الاحتكاك في الشاصي وهذا امرها سهل رح لحقين الكناديس وخله يلين لك الكنداسه بالاكسجين ويوبعدها عن الشاصي

مشكور أخوي أحمد ع المشاركة معنا في إيجاد الحل لكن أخوي الحبيب وش دخل الكنداسة في رجة السيارة ؟ أنا أشتكي من رجة أسفل السيارة يحسها الركاب تحت رجولهم أكرم الله الجميع وكأنك ماشي على بطناااااج سريع حتى الدركسون مافيه رجة ما أشتكي من صوت مسموع أو مزعج يعني شي يحك بشي لا يخوي وهالرجة أو الإهتزازة إللي عندي مثل كذا ( ررررررررررررررررررررررررر ) ما تجي إلا إذا وصلت السرعة 90 وفوق أما قبل ال90 مافي أي مشكلة عموما مشكور ع المشاركة والمداخلة

[شقن بقا]

وعليكم السلام
زي ما ذكر لك اخونا عتيق امش بالدبل الخفيف ما عندك مشكله, ولا تقول اني مغير الاعمده لان اللي انت مغير ربما فيها برضو مشكله
والمشكلة عندك اللي فهمنا انه مو رجة دركسون ! رجة بدي
الشي الاخر حاول تشوف ورشة ويرفع السيارة وتجرب

أخوي أبو سند حياك الله وبارك الله فيك والإخوة على مداخلاتكم قد يكون رأيك من ناحية العمدان صحيحا وقد يكون خاطئا لكن للمعلومية أنا قبل لا أركبها رحت للمهندس إللي قال لي فيه فراغ في العمودين القديمين( الدبل - الكردان يعني الأمامي والخلفي ) ووريته العمودين إللي جبتهم بدل القديمات وقال إنها زينات ولا فيها فضاوة ولا طقات وركبهن على السيارة وهذا شي أما الشي الثاني إن المشكلة عندي هو رجة من أسفل السيارة إلى وصلت السرعة 90 وفوق تحسها تحت الرجلين الله يكرمك والقارين أما البدي فما فيه رجة وثابت ماعليه كلام حتى إني تأكدت من جلود البدي كلها ولا لقيت عليها أي ملاحظة ولاّ كان قد غيّرتها
عموما وعلاوة على شرحي السابق للمشكلة لاحظت ملاحظة جديدة أعتقد إنها مهمة لتشخيص المشكلة وهي (إني لاحظت على السيارة إنه إذا عشقت الدبل الخفيف ومشيت عليها شوي شوي ترتفع السيارة من قدام وأصير أشوف الياي يرتفع والسيارة ماشية وكذلك يصير الكفر الأمامي ماسك كإن الفرامل مزرقنة يعني ثقيل جدا وتسمع صوت خشونة في الكفر ) وهذي المعلومة أنتبهت لها أمس وأنا أحاول أركز وأبحث عن سبب المشكلة
أخيرا أتمنى من إخوتي في المنتدى أن لا يهملوني وإنهم يتداخلون معي في هالمشكلة وخصوصا أخونا أصيل حجازي أقول له تكفى ياخوك لا تحرمني من تجاربك وخبرتك وللجميع مني دعوات خيّرة بظهر الغيب وإن شاء الله تكون الملاحظة الأخيرة إللي ذكرتها تساعدكم جميع في تشخيص المشكلة وإيجاد الحل

[شقن بقا]

جرب تغير الجنوط ممكن الرجة منها اذا كانت هلل وتجاري .

أخوي هملول السحاب عسى الله لا يحرمنا من هماليل السحب في هالوسم وإن الله يبارك فيك وفي جميع الأخوان في هالمنتدى إللي يجمعنا بخير إن شاء الله أخوي الكريم مشكور على مداخلتك ونصيحتك لكن يالغالي تراني قد رصّصت الكفرات إللي كانت راكبة عندي ووزنت الدركسون والأذرعة ولا فيه فايدة ثم رجعت لسيارة واحد من خويانا معه باترول مثل إللي عندي وكفراته سليمات ما شاء الله عليها الله لا يضرّه وفكيت منها الكفرات الأربعة بجنوطها وركبتها ومشيت عليها لكن للأسف ما تزال المشكلة باقية ونفسي إن هالمشكلة ماتكون سبب في بيعي للجيب لأني والله ملّيت من الروحات والجيّات على الورش والخساير وأنا أملي بالله أولا وأخيرا إنه يسهّل لي الحل عن طريق أحد أخواننا في منتدانا وبخاصة أخونا الأصيل ( أصيل حجازي ) ولا يهونون البقيّة - فزعتكم يارجاااااال أخوكو مزنوووووووء

[SGL]

أخوي إنت مركب فرار؟
إذا منت مركب
أبيك تركب فرار لو واحد جهة اليسار وخليه مفصول يعني الدفرنس الأمامي مايدور وجرب وردلنا خبر مع التشيك على زيت الدبل والقير والدفرنسات

[م س س]

اخونا عتيق كلامه صحيح انك تفك عامود الدبل وتجرب وش يسير معك

[شقن بقا]

أخوي إنت مركب فرار؟
إذا منت مركب
أبيك تركب فرار لو واحد جهة اليسار وخليه مفصول يعني الدفرنس الأمامي مايدور وجرب وردلنا خبر مع التشيك على زيت الدبل والقير والدفرنسات

حياك أخوي sgl أساسا أنا كنت مركب فرارات وفكيتها لأنه كان عندي مشكلة في الكفرات الأمامية كل ما أشبك الدبل يمشي شوي ثم يثقل الكفر ويطلع صوت شبيه بصوت القماشات إذا صارت تحك في الهوب وشار علي المهندس إني أفكها وبعدها جتني المشكلة وقد شيكت على زيوت الدبل والقير والدفرنسات عموما أخي الكريم اليوم جربت وفكيت عمود الدبل ( الأمامي طبعا ) وأبشرك الرجة راحت ومشيت فيه مية وستين ولا فيه رجة لكن باقي علي صوت الكلبشة أو الزرقنة إللي يظهر عند تعشيق الدبل والشي الثاني إرتفاع الموتر من الأمام عند تعشيق الدبل أيضا وطبعا ما أقدر أجربها ألين ألقى لي عمود دبل صاحي ونظيف أو أروح لم المخرطة المختصة بأعمدة الدبل وأشوف وش يقدرون يسوون وأركبه

[شقن بقا]

اخونا عتيق كلامه صحيح انك تفك عامود الدبل وتجرب وش يسير معك

[SIZE="5"][B][COLOR="Navy"]أخوي م س س مشكور على مداخلتك يالغالي وفعلا أخذت من كلام أخونا عتيق وجربت فكيت عمود الدبل ومشيت على السيارة وأبشركم الرجة أو الإهتزازة إللي كانت في الموتر راحت وقد مشيت مية وستين والحمد لله مافي رجة أبدا لكن باقي عندي مشكلتين المشكلة الأولى وهي إللي لاحظتها من أول وهي كلبشة الكفر أو زرقنته مثل مايقولون والصوت إللي يشابه صوت إحتكاك القماشات بالهوبات إذا كانت القماشات منتهية أما المشكلة الثانية فهي إللي لاحظتها مؤخرا وهي إرتفاع السيارة من الأمام بعد تعشيق الدبل وبقاءها على الإرتفاع مع ظهور الصوت وخشونة الكفر أو زرقنته إلين أفصل الدبل وأرجع ريوس وطبعا هذي ما يمكن تجربتها ألين أركب عمود الدبل غير إللي فكيته وراح أدور شي نظيف أو إني أروح المخرطة وأشوف وش يقدرون يسوون وأكيد راح أعطيكم خبر بعد ما أنتهي وشكرا لكم جميعا على مشاركتي والتفاعل مع مشكلتي وهو ما تعودناه من إخوتنا الأفاضل في منتدانا الغالي

[SGL]

أخوي إذا غير مستعد للخساير في الوقت الحالي ركب فرار مثل ماقلتلك
ﻻتدور عمود ولاتفك عمود مشكلتك الدفرنس الأمامي مغير وماهو مطابق مع الدفرنس الخلفي أو الدفرنس الخلفي مغير

[اليوسف2012]

اخوي اللي اقصده ماهو ربلات مساعد الدركسون انا اقصد ان المساعد نفسه يكون ضعيف بمعنى انه لايستطيع امتصاص اهتزاز الكفرات وتثبيتها لان المساعد اذا كان ضعيف نعوض هذا الضعف بتدبيل مساعد دركسون اضافي وتركد الطارة بعد ذلك

الشي الثاني اللي انا اقصده ركب العكوس الامامية اربع ركب يمين اثنتان فوق وتحت وكذلك يسار فوق وتحت والمشكلة اللي تحصل فيهن انه ممكن تحصل فضاوة بنفس رمان الركبه مما يسبب اخلال عدم تماسك الدركسون واهتزازه لاصغر مطب وقد تصل احيانا الى اهتزاز السيارة والبودي بالكامل وبشكل قوي فاحنا عندما نريد ان نحل هذه المشكلة لازم انك تفك الركب وتحصل تحتهن وجه حديد قازقيت ثم تحذفه و تحط بداله عصار سيليكون عوضا عنه ثم تركب الركبه وهذه العملية تطبقها على الثلاث الباقيات

[ateeq7]

[SIZE="5"][B]أخوي م س س مشكور على مداخلتك يالغالي وفعلا أخذت من كلام أخونا عتيق وجربت فكيت عمود الدبل ومشيت على السيارة وأبشركم الرجة أو الإهتزازة إللي كانت في الموتر راحت وقد مشيت مية وستين والحمد لله مافي رجة أبدا لكن باقي عندي مشكلتين ا[COLOR="Magenta"]لمشكلة الأولى وهي إللي لاحظتها من أول وهي كلبشة الكفر أو زرقنته مثل مايقولون والصوت إللي يشابه صوت إحتكاك القماشات بالهوبات إذا كانت القماشات منتهية أما المشكلة الثانية فهي إللي لاحظتها مؤخرا وهي إرتفاع السيارة من الأمام بعد تعشيق الدبل وبقاءها على الإرتفاع مع ظهور الصوت وخشونة الكفر أو زرقنته إلين أفصل الدبل وأرجع ريوس وطبعا هذي ما يمكن تجربتها ألين أركب عمود الدبل غير إللي فكيته وراح أدور شي نظيف أو إني أروح المخرطة وأشوف وش يقدرون يسوون وأكيد راح أعطيكم خبر بعد ما أنتهي وشكرا لكم جميعا على مشاركتي والتفاعل مع مشكلتي وهو ما تعودناه من إخوتنا الأفاضل في منتدانا الغالي
هذة المشكلة بحلها لك اي محل ميزان رودات و عكوس وخصوصا اذا شفت عندك في الاطارات تاكل من الداخل لازم تعمل شد و ميزانية رود
سالة محل ميزان مرة عن مشكلة تاكل الاطارات قالي في اي وقت تغير عكوس او مساعدات لازم تعمل ميزان بعدها حيث بتخربط ميزانيه بعد الاصلاح

[شقن بقا]

أخوي إذا غير مستعد للخساير في الوقت الحالي ركب فرار مثل ماقلتلك
ﻻتدور عمود ولاتفك عمود مشكلتك الدفرنس الأمامي مغير وماهو مطابق مع الدفرنس الخلفي أو الدفرنس الخلفي مغير

حياك أخوي sgl
أعتقد إن كلامك فيه من الصحة أو القرب منها بنسبة كبيرة لكن ودي أفهم يخوي لو إفترضنا إن الدفرنس الأمامي مغيّر على قولتك وماهو مطابق مع الدفرنس الخلفي شلون أعرف أنا هالشي وكيف لازم يتطابق الدفرنس الأمامي والخلفي هل هناك طريقة أو أرقام وهل تختلف الدفرنسات من باترول لباترول هل تتبع الموديلات أرجو التوضيح الله لا يهينك

[شقن بقا]

هذة المشكلة بحلها لك اي محل ميزان رودات و عكوس وخصوصا اذا شفت عندك في الاطارات تاكل من الداخل لازم تعمل شد و ميزانية رود
سالة محل ميزان مرة عن مشكلة تاكل الاطارات قالي في اي وقت تغير عكوس او مساعدات لازم تعمل ميزان بعدها حيث بتخربط ميزانيه بعد الاصلاح

مشكور أخوي عتيق لكن المشكلة ماهي في الوزنيات ولا العكوس وأقرب مالها تشخيص أخونا sgl لأني أيضا لاحظت إن هناك بروز لأحد جانبي الكفرات الأمامية يعني إذا ناظرت لمستوى الكفرات من الجهة اليمنى جهة الراكب أو المعاون ففيها قليلا من البروز إلى الخارج وليست في مستوى الكفر الخلفي لنفس الجهة أما الجهة اليسرى جهة لسائق فهي متساوية وليس هناك أي بروز عن مستوى الكفر الخلفي لنفس الجهة مما يوحي بزيادة بسيطة في طول الدفرنس الأمامي عن الخلفي ولو بسنتيمترات قليلة فلها تأثيرها وهذا يجعلني أميل أكثر إلى رأي أخونا sgl ودون قصور في الإخوة الأعضاء سواءا شاركوا برأيهم أم لم يشاركوا ولكن بصراحة لي عتب على أستاذنا وأخونا الكبير أصيل حجازي لعدم مشاركته أو مداخلته رغم أني خصصته بطلب الفزعة ورغم مايقال ( لعل له عذر وأنت تلوم ) إلا أن عتبي عليه وهو عتب الأخ على أخيه لا يرفع مالم أجد له عذر يعذر به

[شقن بقا]

اخوي اللي اقصده ماهو ربلات مساعد الدركسون انا اقصد ان المساعد نفسه يكون ضعيف بمعنى انه لايستطيع امتصاص اهتزاز الكفرات وتثبيتها لان المساعد اذا كان ضعيف نعوض هذا الضعف بتدبيل مساعد دركسون اضافي وتركد الطارة بعد ذلك

الشي الثاني اللي انا اقصده ركب العكوس الامامية اربع ركب يمين اثنتان فوق وتحت وكذلك يسار فوق وتحت والمشكلة اللي تحصل فيهن انه ممكن تحصل فضاوة بنفس رمان الركبه مما يسبب اخلال عدم تماسك الدركسون واهتزازه لاصغر مطب وقد تصل احيانا الى اهتزاز السيارة والبودي بالكامل وبشكل قوي فاحنا عندما نريد ان نحل هذه المشكلة لازم انك تفك الركب وتحصل تحتهن وجه حديد قازقيت ثم تحذفه و تحط بداله عصار سيليكون عوضا عنه ثم تركب الركبه وهذه العملية تطبقها على الثلاث الباقيات

مشكور أخوي اليوسف على مشاركتك وهذا تفضل منك أما بالنسبة لمساعد الدركسون فهو جديد توي مركبه والعكوس أبدا ما فيها شي والله حتى التهريبات مافيهن لكن شف رد أخونا sgl ومدى إمكانيته لحصول مثل هالشي عموما بارك الله في الجميع ومضطر أشوف لي دفرنس أمامي وأركبه والمثل يقول ( إللي يشيل القنطار ماتعجزه الوقية ) غيرنا كل شي وبنجرب نغير الدفرنس وحيل الله أقوى وأكيد راح أكون معكم إذا أنتهيت لكن ياليت لو فيه ملاحظات تنبهوني عنها إذا بغيت أشتري الدفرنس الأمامي

[الكدن1]

من قرائتي للموضوع أعتقد انحصرت المشكلة في شيئين:
/الكوارين في الدفرنسات غير متطابقة كما ذكر ذلك بعض الاخوان
/قماش الجلنط ماسك

[شقن بقا]

من قرائتي للموضوع أعتقد انحصرت المشكلة في شيئين:
/الكوارين في الدفرنسات غير متطابقة كما ذكر ذلك بعض الاخوان
/قماش الجلنط ماسك


أخوي الكدن1 مشكور على المداخلة لكني أبستفسر عن كلمة ( الكوارين ) مافهمتها وش إللي تقصده فيها وشهي الكوارين وهذا أول شي أما الشي الثاني فقماش الجلنط مو معقول ولاني معك في هالشي لأن السيارة تمشي ولا عليها مشاكل فبدون الدبل مشيت عليها لمية وستين ما فيها شي ولا عليها ملاحظات يعني لو قماش الجلنط فيه مشكلة كان ما مشت السيارة أساسا المشكلة عندي إذا عشقت الدبل والموضوع الظاهر ما يخرج عن إثنين إما الدفرنس الأمامي مثل ما قال أخونا sgl أو الدبل نفسه غير كذا ما ظنيت ولا أظن أبدا عموما مشكور ع المداخلة والمشاركة بالموضوع وهذا شي إيجابي ويفيد الجميع إن شاء الله

[ابوطارش]

اذا عشقة الدبل تأكد من الجنزير دايم يسبب رجة قوية ويعيفك الدبل تحسه بيكسر التروس
طبعا اذا كنت مغرز اما اذا عشقتة وهو ماغرز طبيعي
وحصلت معي على شاص 2011 من الهزاز
هزاز الدفرنس مكانيكي تحصله يتحكم بزيت الفرامل الخلفي مثبت على شاص السيارة

[SGL]

الدفرنس يختلف في القير العادي عن التماتيك ويختلف عن الديزل
العادي على ماأذكر رقمها 9 ï»»كن كيف تعرف إنها كارونة 9 هذي مشكله حسب ماسمعت ï»»زم تنفك وتعد السنن في الكارونه والبنيو وشغله طويله ماأعطيتها إهتمام :( ï»»كن في رقم ثاني للكارونه تلقاه في الإستيكر داخل الكبوت تلقى مكتوب رقم المكينة ونوعها وتحت رقم الدفرنس مثال(FS5R50B HG41)ويعني رقم الدفرنس4，1

[SGL]

توني أشوف ردي زين وش ذي الطلاسم اللي أنا كاتبها:eek:
بخصوص رقم الكارونه اللي تلقاه باالإستيكر وسبق وكتبته لك ﻻكن مدري وش صاير في المنتدى:confused:
تلقاه مكتوب مثل4，1أو8，3ﻻكن كم عدد سنن الكارونه ماتوضح إلا بطريقة الفك ويفيدونك إن شاء الله الأعضاء بمقاس الكارونه ومثل ماقلتلك أكثر القير العادي من97وتحت تكون 9حسب ماسمعت

[cadillac911]

توني أشوف ردي زين وش ذي الطلاسم اللي أنا كاتبها:eek:

بخصوص رقم الكارونه اللي تلقاه باالإستيكر وسبق وكتبته لك ?كن مدري وش صاير في المنتدى:confused:

تلقاه مكتوب مثل4,1أو8,3?كن كم عدد سنن الكارونه ماتوضح إلا بطريقة الفك ويفيدونك إن شاء الله الأعضاء بمقاس الكارونه ومثل ماقلتلك أكثر القير العادي من97وتحت تكون 9حسب ماسمعت


الان تشوف الطلاسم بغيت اروح فيها ماني قادر أفكر من الطلاسم

الله يسعدك ويوفقك


اذكر الله تكسب حسنة

[ateeq7]

اعتقد والله اعلم سالة ميكانيكي عن الفرق قالي قبل لا تركب دفريشن مستعمل من السكراب في لون عملة المصنع تحصل مدهون مكان ربط العمود مع الدفريشن الالون اعتقد لون ازرق على الدفريشن و على العمود الدوران ازرق
والون اخرى على حسب الارقام يعني ما تركب لون ازرق مع لون اصفر مثلا بس نريد حد يتاكد من المعلومه
هل هذا ينطبق فقط على التويوتا ولا جميع السيارات

[شقن بقا]

والله يا أخوان تعبت وأتعبتكم معاي لكن ربي يوجركم على المساهمة والمشاركة آخر ما عملت عندي باترول ثاني مافيه إلا العافية ونقول ما شاء الله تبارك الله أضطريت أفك الدفرنس الأمامي كامل منه وأركبه على الجيب صاحب المشكلة وكنت أتوقع إني بأنتهي منها لكن للأسف نفس المشكلة لا تزال قائمة مثل مشكلتي مع العم أصيل حجازي إللي مو راضي إلى الآن يشاركنا برأيه ولا نقول إلا ( إللي يبينا عيّت النفس تبغيه ... وإللي نبيه عيّا البخت لا يجيبه ) الله يسامحك ياعم أصيل وأرجع لموضوعي وراح أفك الدفرنس الخلفي كامل أيضا وأشوف وأعطيكم خبر ويارب يكرمني ربي وينجح العملية وراها وراها لين أجيب خبرها بإذن الله وحوله وقوته

[سفاري 95]

اخوي عندي فتك 2002 وكان يرج على 100 الى 110 وكنت اذا ركبت حفره ولو صغيره يقوم الدركسون يرج

رحت لمحل ترصيص ارضي وشاف الدركسون فيه فضاوه شوي وقالي رح لمكنيكي وخليه يشد الفضاوه هذه وجرب السياره
المهم اني رحت لمكنيكي وشد صاموله تجي بعلبه الدركسون السفليه وزبط الموتر معي بنسبه 90%

جرب هالشي منت خسران شي
والله يكون بعونك

[شقن بقا]

اخوي عندي فتك 2002 وكان يرج على 100 الى 110 وكنت اذا ركبت حفره ولو صغيره يقوم الدركسون يرج

رحت لمحل ترصيص ارضي وشاف الدركسون فيه فضاوه شوي وقالي رح لمكنيكي وخليه يشد الفضاوه هذه وجرب السياره
المهم اني رحت لمكنيكي وشد صاموله تجي بعلبه الدركسون السفليه وزبط الموتر معي بنسبه 90%

جرب هالشي منت خسران شي
والله يكون بعونك


أخي الكريم سفاري 95 أشكر لك كريم مداخلتك والمشكلة عندي بالنسبة للرجة طلعت من العمود وأنتهيت منها بحمد الله لكن المشكلة الثانية وهي إللي أعتبرها الأساسية والمعضلة وهي ( عند شبكة الدبل الخفيف تمشي مسافة لا تزيد عن ثلاثة إلى أربعة أمتار ثم يصير فيه نوع من مسكة الكفرات أو مثل الكلبشة وترتفع السيارة من الأمام غيرت جميع الجلد السفلية وما فاد ركبت دفرنس أمامي مية في المية ولا عليه أي ملاحظات لأني فاكه من سيارة أختها شغاله مابها أي مشاكل وأيضا ما نفع فكينا الدفرنس الخلفي وشيكنا عليه ما لقينا عليه أي ملاحظة وما باقي إلا إني أفك الدبل وأجرب واحد غير إللي راكب يمكن ينفع وإذا مانفع هالشي ماعاد يبقى إلا ولاعة بريال وبريال بنزين وأشب في السيارة وأتفرج عليها ولا راح أكلم لا مطافي ولا دفاع مدني بلغة اليوم لكن أقول أعوذ بالله ماني قاطع أملي بالله وسيبقى الأمل

[SGL]

كمل جميلك وركب الدفرنس الخلفي وجرب وبعدها إن شاء الله بتنتهي المشكلة إنت تقول فكيناه وشيكنا ماينفع ركبه بشرط يكون الدفرنس الأمامي والخلفي كلهن حقات الموتر الثاني

[اليوسف2012]

يالغالي تاكد من مقاس الكفرات
اذا اختلف المقاس يصير مشكلة عند شبك الدبل

[اليوسف2012]

يعني لازم الكفرات مقاسهن واحد

[شقن بقا]

كمل جميلك وركب الدفرنس الخلفي وجرب وبعدها إن شاء الله بتنتهي المشكلة إنت تقول فكيناه وشيكنا ماينفع ركبه بشرط يكون الدفرنس الأمامي والخلفي كلهن حقات الموتر الثاني

أخوي sgl مشكور على مداخلاتك الجيدة وإن شاء الله راح أكمل جميلتي على الجيب وأركب الدفرنس حق الموتر الثاني إللي أنا متأكد إنه ممتاز ولا فيه أي عيب فإن نفع ونقول إن شاء الله إنه ينفع وإلا كملت الجميلة لنهايتها وفكيت الدبل كامل ونقلته وبعدها نشوف ونعتبر هالمشكلة تجربة مرينا فيها ونكون قفلنا الطريق على كل إحتمال ( الكفرات متأكدين من مقاساتها - الأعمدة غيرناها - الدفرنسات ألأمامي والخلفي غيرناها - الدبل غيرناه والمقصات وجلود مساعد الدركسون غيرناها - سحب شاص وسحبنا لأن الكفر الأمامي الأيمن كان فيه بروز بسيط للخارج وعدلناه - وش يبقى بعد إلا نقول حسبي الله على من باعنا إياه وغشنا فيه وعساه يلقاها في حاله وماله وعياله والله يكفينا فيه هو نعم المولى ونعم النصير

[شقن بقا]

يالغالي تاكد من مقاس الكفرات
اذا اختلف المقاس يصير مشكلة عند شبك الدبل

مشكور أخوي اليوسف على المشاركة لكن أحب أفيدك بأن الكفرات والجنوط نفس المقاسات ولا فيهن إختلاف وشف ردي للأخ sgl فيه كل شي موضح