فزعتكم ي راعين اللاند كروزر

[AL-H-A-R-B-I]

السلام عليكم ورحمة الله وبركاته
فزعتكم ي راعين اللاند كروزر

موتري جكسار 2001
طلعت علية للبر مشوار نص ساعه فقط
ويوم مسكت الخط اشتغلن عندي ثلاث لمبات
مع بعض
لمبة البطارية
لمبة القير اللي هي كذا A/T oil
ولمبة صفراء بحثت عنها طلعت اسمها لمبة فلتر او كذا

انا مصورها بس عيا تنزل الصورة

اللي قد حصلت لة ولا اشتغلن معه وعنده خلفية عنها
يبلغنا جزاكم الله خير تكفون.

[ابوراكان تبوك]

الظاهر انه التماس

تبغى تعرف العلم الاكيد

طبعا والسياره طافيه
جيب اي لمبه تشتغل ع البطارية

طفي اي جهاز بالسياره وسكر الابواب وافتح الكبوت

افصل اصبع البطارية الموجب +

اللحين ركزززز معي

طرف سلك اللمبه اللي معك اشبكه في اصبع - على طول
طرف سلك اللمبه الموجب+ اشبكه في الاصبع اللي انت فصلته وليس في البطارية

اذا ولعت اللمبه قويه وكانها ع البطارية مباشره معناه في التماس بالموتر
اذا ولعت اللمبه ضعيفه معناه موترك مابه اي التماس


قبل الاختبار هذا
لازم تحفظ شكل قوة اللمبة وهي مشبوكه ع البطارية طبيعي حتى تعرف فرق قوتها اذا كانت ع البطارية او ع الاصبع المفكوك

هذا الاختبار شغلته يبين لك الماس الراجع او الداخل لخطوط الكهرب

جرب وعطنا النتائج واذا فيه ماس اعلمك كيف تحدده اي خط

[ateeq7]

افحص كومبيوتر و ان شاء الله تبين المشكلة بالضبط لان الاشارات في الطبلون تحتلف من سيارة لسيارة اخرى الكومبيوتر يقراءه و يجيبلك كود الخطاء و ما هي القطعه التي فيها المشكلة

[AL-H-A-R-B-I]

اخوي ابو راكان تبوك جزاك الله خير
جربت نفس ماقلت لي ماشتغلت اللمبة ابد



اخوي اللي تقول فحص كمبيوتر فحص الكمبيوتر مايطلع مثل المشاكل هذي

[AL-H-A-R-B-I]

راكان تبوك
اللمبة تشتغل بسيطة ماتقدر تميزة الا اذا دققت فيها زين وانت مثبت السلك زين

[ابوراكان تبوك]

راكان تبوك
اللمبة تشتغل بسيطة ماتقدر تميزة الا اذا دققت فيها زين وانت مثبت السلك زين

:good2: صحيح تشتغل خفيفه مره وانت في ضوء الشمس يالله تشوفها ومعناه مافي التماس بإذن الله

وهذا المهم
فيه طريقه أخرى لفحص الماس والسياره شغاله تعتمد ع الفلوميتر لكن ليس لدي علم كم تكون الارقام وانا اعتمد ع طريقة الفحص اللي شرحتها لك
عموما
اكيد فيه شي منحل مع المطبات يا من نفس السويتش من داخل او في الطبلون او برمجه ملخبطه جرب كـ حل اخير افصل اصابع البطارية الاثنين واشبكهم مع بعض وهي بعيده عن البطارية ودق سلف مارايح يدق معك بس حتى تفرغ الكهربا وتسوي رست للكمبيوتر في اسرع وقت
بعده اشبك الاصابع وشغل موترك لعل وعسى تكون الشغله برمجه
بس ترا بيتصفر عداد الزيت اذا كنت تعتمد عليه سجله في ورقه
بعد اعادة برمجة السياره تلاحظ ان صوتها مرتفع يومين ويتبرمج الحاله

اذا مانفعت معك الطرق هاذي شوف لك كهربائي تثق فيه وانتظر اراء الاخوان ممكن يفيدوك اكثر

[AL-H-A-R-B-I]

كلامك من ذهب طال عمرك
بس وش اللي اخلية بعيد عن البطارية اذا فصلت الاصابع

[AL-H-A-R-B-I]

وللمعلومية امس تعمدت اخلي الانوار شغالة علشان تفضى البطارية
وشركت للموتر واشتغل من احسن شي
لاني كنت ابغى اختبر الدينمو يشحن ولا لا

[ابوراكان تبوك]

صحيح اقصد الاصابع فكهم من البطاريه واشبكهم مع بعض وهن مفصولات ودق سلف مرتين ماراح يدق مافيه كهرباء حتى تصفر الكمبيوتر 100%
بالنسبه لفحص الدينمو في طريقتين
لكن الاسرع
والسياره شغاله تفصل اصبع الكهرب اذا طفى الموتر معناه الدينمو مايشحن واذا بقي شغال معناه الدينمو 200%
وللمعلوميه للاخوان جميعا قيمة الدينمو 2000 ريال وفي التشاليح لايتجاوز 400 ريال انا اخذته بـ300

[AL-H-A-R-B-I]

صادق كلامك
ومريت اكثر من محل كهربائي قالو عندك كتاوت الدينمو
هل كلامهم صحيح ولا لا
لان الكتاوت غالي واخاف اشترية واركبة وتطله المشكلة مو منة

[ابوراكان تبوك]

كتاوت الدينمو يولع لمبة الكهرب فقط غريبه ولعت اكثر من لمبه
اذا انه فعلا من كتاوت الدينمو وضمنه لك الكهربائي غيره على طول لايعدم عليك الظفيره لانه اذا خرب يا يزود ياينقص كهرب
حتى لو قلت لك اختبره الحاله يعني تلغي الدينمو وتشغل بدونه الكتاوت هو بوابه الكهرب لكل السياره لابد من المغامره بتغييره
المحلات ترى يردوه لو ما طلع منه الوكاله انا مرجع لهم سلف وقبلوه لانهم يخافو من وزارة التجاره
الكهربائي اشرط عليه اذا ما طلع منه ماله شغل يد حتى يشغل مخه

[أبو صاروخ]

اولً : انصحك بتبديل الزيوت
ثانيً : الدنمو يا اخوان مايتبدل الا اذا احترق
في داخل الدنمو في فحمات(كربون)هو الي يتبدل بجديد
فقط بدله وبيرجع الدنمو 10على10

[AL-H-A-R-B-I]

عز الله ماقصرتو
راكان تبوك بسوي نفس ماقلت بشرط على الكهربائي اذا ماصار منه مالة شغل يد

ابو صاروخ كلامك صحيح
بس هل سبق لك ان صارت معك لان الفحمات بالعادة ماتطلع اللمبات هذي

[ابوراكان تبوك]

اولً : انصحك بتبديل الزيوت
ثانيً : الدنمو يا اخوان مايتبدل الا اذا احترق
في داخل الدنمو في فحمات(كربون)هو الي يتبدل بجديد
فقط بدله وبيرجع الدنمو 10على10

صحيح لكن الخربان الكتاوت ويتغير الحاله وكانه نفس مشبك الفيش تحت الغطاء الخلفي للدينمو

فحمات الدينمو اذا خربت مايشحن الدينمو وماتولع اي لمبه

اللي يحرق الدينمو الاشتراك لما تشبكه بطريقه خاطئة لازم اول تشبك الماس في البطارية الفارغه ثم للبطارية المعبأة
وتشبك الكهرب في البطارية المعبأة ثم تشبك الطرف الثاني لكهرب البطارية الفارغه
والماء يحرقه على طول

هاذي صوره لقطعة الكتاوت مقتبسه من ردود المهندس أصيل شبيهه لكتاوت اللاندكروزر
http://image.made-in-china.com/2f0j00FeatQbHPCmks/Automatic-DC-Alternator-Voltage-Regulators-IH738-.jpg

[ابوراكان تبوك]

عز الله ماقصرتو
راكان تبوك بسوي نفس ماقلت بشرط على الكهربائي اذا ماصار منه مالة شغل يد

ابو صاروخ كلامك صحيح
بس هل سبق لك ان صارت معك لان الفحمات بالعادة ماتطلع اللمبات هذي

اخوي الحربي اذا مالقيت الكتاوت الحاله كلمني ارسل كتاوت عندي بدينمو فاكه ولا ابي منك الا دعوة في ظهر الغيب

[AL-H-A-R-B-I]

مم تقصر ي ابو راكان بس انا موصي لي واحد يدور اذا انه مالقى تواصلت معك وانا بالشرقية تراني بس
بشوف اذا ماحصلت كلمتك

[AL-H-A-R-B-I]

ماتقصر يابو راكان عز الله ماقصرت انت والاعضاء الباقين
انا موصي واحد يدور لي اذا ماحصل تواصلت معك لاني من اهل الشرقية

[AL-H-A-R-B-I]

ابو راكان ياليت تعطيني رقمك بتواصل معك

[ابوراكان تبوك]

شيك ع الخاص

[ateeq7]

اخوي ابو راكان تبوك جزاك الله خير
جربت نفس ماقلت لي ماشتغلت اللمبة ابد



اخوي اللي تقول فحص كمبيوتر فحص الكمبيوتر مايطلع مثل المشاكل هذي
يا هلين وسهلين
بشر يا خوك عرفت المشكلة ولا بعدك
اتمنى لك التوفيق
يقول المثل اخر الدواء الكي
واذا ما حصلة المشكلة عليك بفحص الكومبيوتر عند واحد مختص :good:

[AL-H-A-R-B-I]

والله فحصت كمبيوتر قالو عندك التماس بالدينمو والكتاوت

[ابوسند9]

اقرب شي لمشكلتك الدينمو

[ateeq7]

والله فحصت كمبيوتر قالو عندك التماس بالدينمو والكتاوت
انا عندي جيب لاكسز 2003 من سنه رحت مع الربع رحلة بريه وفجاء حسيت البطاريه كانت ضعيفة واحساسي ان السيارة عزم ضعيف ولم رجعة ثاني يوم نفس المشكلة كان الاشتغال ضعيف طلعة فيها و مسافه عن البيت ولعة لمبة البطاريه و الحمدلله رجعة البيت على طول شحنت البطاريه من السيارة الثانيه بالمشترك الاسلاك على طول طفت اشارة البطاريه بعد 10 دقائق فصلة الاسلاك رجعة الاشارة فكيت البطاريه الثانيه وركبتها شحنها فول و على طول الصناعية عن اول كهربائي قلتله المشكله ركب جهاز فحص الفولت قالي السيارة شغاله على قوة البطاريه و المشكلة في الدينمو لازم افكة و اتاكد ممكن الفحمات ضعيفه بعد الفك و جد الاسلاك الخارجه من الدينمو مرتخيه وعاملة كربون اسود حتا لم اراد فك البرغي فكه بالحرارة الاكسجين و نظف و بدل سلك جديد وقالي انته محضوض الدينمو ما احترق و الحمدلله السيارة تشحن من احسن ما يمكن