يا أهل الخبرة والفزعة من يفيدني: ألغيت الدفع الرباعي من لاندكروزر فخرج عندي صوت قوي

[سعد مستفيد]

السلام عليكم
أسعد الله مساءكم
أيها الكرام النبلاء أهل الرأي والخبرة والنصح
سيارتي لاندكروزر vxr 2003
ألغيت التفاضلي (الدفع الرباعي المستمر) بعدها طلع صوت إذا وصلت السرعة فوق 120 أسمعها من عند عصا الدبل.. اغغغغغغغغـ صوت قوي.. ومستمر حتى عند رفع الرجل عن الدعسة، وحتى إذا فضيت السيارة.. ويستمر حتى تنزل السرعة لأقل من 80

رجعت للمكنيكي، فقال: هذا من العمود.. رح لفلان خله يرصصه،
رحت له، قال: العامود ما له دخل ولا يطلع مثل الصوت لو فيه خلل سيحدث رجة، وسيارتك ما فيها رجه.
رجعت للمكنيكي، فلم يقتنع، فقال: رح لفلان، رحت له فقال لي مثل الأول، ورحت لثالث وقال مثلهم!

رجعت له قال شغلي ما فيه إشكال كل يوم أصلح سيارتين ثلاث! تبغى أرجعه رجعته..
قلت أبغى الصوت يروح وبس!
فك الرجال العامود والدبل.. وركب ترس آخر غير الأول .. وأنا عنده..
وكان على نهاية الدوام حقهم، ثم جربت السيارة وللأسف الصوت موجود..
لكن من الغد صباحا لم يخرج الصوت إلا بعد سرعة 140
فلم أرجع له وقلت لعله يذهب..
وبدأت أجرب وآخر تجربة لم يخرج الصوت إلا بعد 160.. لكن المشكلة لما يخرج الصوت يستمر حتى تنزل السرعة ل 80، ثم بعدها يخرج على سرعة 120 و110!

فمن يسعفنا ببيان المشكلة، ويرشدنا للحل مشكورا مأجورا، هل هي من ترسه اللي ركب فيه خلل في التلحيم أو يمكن تكون المشكلة من العامود! مع أن هذا الصوت لم يخرج إلا بعد شغله!
وعند سفر غدا هل هناك خطورة من الصوت!
أخاف أرجع أقول له رجعه أكون ظلمته ويكون الخلل في موتري!

[ابوطارش]

رمان الدفرنس الامامي افصل عامود الدبل وجرب

[ابوراكان تبوك]

اذا مابه رجه الشغله تنحصر
حول رخاوة في عصى القير اذا سمعت الصوت دف عصى الدبل للامام شوف يروح الصوت او لا
او عمود الدبل مركب مقلوب ( لازم الجزء اللي فيه مسنن خارجي يكون جهه القير والجزء المسنن الداخلي يكون امام )
http://www.toyota4arab.com/upload/i/00006/odzlzqrrbl70.jpg

حتى اختصر عليك من الاخر وانت بتسافر فك عمود الدبل
وياليت تسجل الصوت

[سعد مستفيد]

شكرا لكم.. ما قصرتوا
العامود مركب تمام.. ودفيت العصا يوم طلع الصوت وما فيه فايدة..
تركته السيارة وسافرت على غيرها

[الحربي 591]

شكرا لكم.. ما قصرتوا
العامود مركب تمام.. ودفيت العصا يوم طلع الصوت وما فيه فايدة..
تركته السيارة وسافرت على غيرها


اجل رجع الدبل عشان تتاكد انه ماهو من الدبل... او من الاشياء اللي الغيتها..
.. اذا راح الصوت الحمد لله... وان ماراح الصوت فالمشكله ردائه شغل العامل....

موفق خير

[dossnf0e]

السلام عليكم

ياخوي المشكله هذي حصلت لي والحمدلله افتكيت منها ونفس ماعملت عندي فكس ار 2000 وفكيت التفاضل وذبحني بالرجه وقبل لو تحط قلاص ماء مليان على الطبلون وتمشي 160 ما ينتثر منه شي

على العموم بقول لك ان ما كل واحد يظبط الشغله ولو ان هالقراج متخصص فيها لان الدعوى لحيم للترس وعلى حسب كمية وكبر اللحيم
زبدة الهرج ظبط موتري معي بعد ثالث مره من فكه ولحيمه وتركيبه وان كنت بالشرقيه ارسلتك لكراج يظبطه لك انشالله

وشكرا

[سعد مستفيد]

جزاكم الله خيرا.. ما قصرتوا..
فكيت العامود الأمامي، وجربت، ولا فائدة!
الظاهر أني أرجعه مثل ما كان.

[ابوسليمان12]

فيه الصمعاني بالقصيم يلغي الدفع الرباعي بظ،ظ¤ظ×ظ× ريال و ضمان خمس سنوات.

[عرب الشمال]

90% من اللي فصلو الرباعي طلع عندم اصوات في مجموعه تروس الدبل خاصه علي سرعات محدده ونا اولهم موتري جكسار 2006 نفس نظام الفكس وبعد جولات في الورش المعروفه اكتشفت ان مجموعه الدبل والتروس لو انفكت مثلها مثل الكرونا قليل احد يضبطها طبعا فيه شغله عملتها طبعا هي مكلفه وهي اني شريت دبل حق موديل 2005 كهرب لأنه من موديل98 اللي 2005 سواء تماتيك او عادي يجي دفع خلفي لان القير التماتيك يجي دبله كهرب وفي نفس الوقت دفع خلفي في الموديل المحدد

[سعد مستفيد]

جزاكم الله خيرا

رجعت للمكنيكي وقلت رجعه كما كان
وقبل شوي خلصت منه، رجع البيت وفي الطريق لما وصلت 120 طلع نفس الصوت وزيادة رجعه من العامود!
قدر الله وما شاء فعل، والحمد لله على كل حال..
وهو درس لي
ولعله عبرة لغيري!

[Obu-Nasser]

البعثرة بالسيارة ماتورد الا الندامه
واتركوا عنكم الفهلوية اللي مسوين افهم من الشركة المصنعه، الشركة جعلته دفع رباعي مستمر خله مثل ماهو لاتبعثر بالسيارة.
لو تبي تبيع السيارة يمكن يطيح منها مبلغ مهوب سهل مقارنة باسعار مثيلاتها بالسوق بسبب بعثرتك فيها

[R I V A L]

مع الاسف يا اخ سعد
شكلك وديت موترك عند شخص (( عليمي ))
قعد يتعلم في موترك
والشخص الفاهم والنزيه ما يقعد يقول انا اشتغل كل يوم سيارتين ثلاث مثل موترك
هذا ان دل فانما يدل على جهله وتعلمه على سيارات الغير

لذا

اتمنى ان تكشف على موترك عند شخص مشهود له بالعمل المتقن
وتخليه اولا يشوف لك سبب الصوت
وانا متأكد انه صاحبك الاولي اللي فصل الدفع الرباعي اول مرة
هو اللي حاس الدنيا وداسها

انا اذكر كانت عندي في اكس ار موديل 2001
فصلت الدفع الرباعي المستمر

وياسلام عليه من شغل
كان الموتر عندي ثقيل جدا وقومته بطيئة وحتى يوم اعشق القير من (( بي )) الى (( دي ))
اسمع صوت ونفضة قوية تقول انكسر القير !!!

وبعد ما فصلته رجع الموتر تقول وكاااااااااااله هدوء وسلاسه وخفة

انصحك تشوف كراج محترم وابتعد عن الكراجات الصغيرة اللي يتعلمون على سيارات الخلق,,,,,,,,,

[ساري الليل 44]

يا أخي وده للوكاله يصلحونه وتستفيد ضمان ولا تعودها

[يالبى الهلا]

في غلط في شغلة الكثير فاصل الدفع الرباعي ولاصار لاصوت ولا رجة ومتشية معهم بضعهم لة سنوات
تاكد من اسباب الرجة اولا ممكن من العمود او من الكفرات

[سعد مستفيد]

شكرا لكم على تفاعلكم ونصائحكم…..

من هو أحسن واحد يشتغلها في الرياض ويمكن أن يحل هذه المشكلة؟

[F34666]

احسن لك تجي للصمعاني في بريدة شغل تمام وانت مطمئن اذا حبيت ارسلك رقمه وخذ من راسه واترك عنك شغل الناس اللي ماتفهم

[سعد مستفيد]

احسن لك تجي للصمعاني في بريدة شغل تمام وانت مطمئن اذا حبيت ارسلك رقمه وخذ من راسه واترك عنك شغل الناس اللي ماتفهم
ليتك تكرم به. ولو على الخاص

[dossnf0e]

اخوي سعد

ان كان لك جيه للدمام بوديك لشخص هذي شغلته ويعطيك ظمان عليها بعدم الرجه واذا عزمت كلمني وانا اروح له واشرط عليه الظمان واخذ منه موعدلك

وشكرا

[Almana_M1]

ليتك تكرم به. ولو على الخاص

يااخوي سعد ابحث في الانترنت عن ابو ناصر ، عثمان المبارك ، متخصص في فصل الرباعي ممتاز جداً انصحك فيه وبقوة