بعض المشاكل واتمنى من الخبراء افادتنا

[الاحمددي]

السلام عليكم ورحمة الله وبركاته ..
كيفكم وشخباركم عساكم بخير ،
عندي كم مشكله ف موتري جيب باترول 2006 سفاري قير توماتيك 4 ابواب نص فل .
المشاكل وهي :
1- لمبة البريك تولع وتطفي مع اي رجه للسياره
2- الفرامل فيها طقه يوم ارفع رجلي عنها
3- لمبه ال sup tank هل لها حل غير بالقصيم او الرياض << من سكان المنطقه الغربيه :')
4-حاب استسفر عن سعر المقاعد الخلفيه الصف الاخير .
5- الموتر توي شاريه وابي اعرف مسامير الثلاجه انفكت او لا كيف الطريقه او هل تسبب مشكله لان الموتر ماشي 280 الف ولله الحمد مايشتكي من شيء ، ماعندي علم انفكت او لا
6-ايش اهم القطع الاستهلاكيه الي مهم اني اشيك عليها واغيرها
7- عند تشغيل السياره يون من 3 ل 5 ثواني لين تشتغل واحيان على طول تشتغل ايش الحل !

[الاحمددي]

79 مشاهده ولا رد ، افزعوا لنا لو تعرف حل مشكله واحد لاتبخل علينا

[hassan-55]

بالنسبه للفرامل نفس مشكلتي واتضح لي ان الخلل ميه بالميه من الكليبر (مسمار الكليبر) فيه فضاوه عشان كذا يطلع طقه مع مسك الفرامل او تركها
تقدر تختبره فك الكفر وامسك الكليبر وحركه بيدينك وشوف
وممكن عندك الفحمات اذا قديمه او الهوب يحتاج خرط
اذكر كان عندي لاند كروزر في قربعه عند الهوب طلع من الحديده اللي تمسك الفحمات
رح لكذا ورشه وخذ برأي الاغلبيه
والاخوان مايقصرون معك ان شاء الله بباقي استفساراتك

[ms662]

لمبه البريك تشتغل وتطفى لان زيت الفرامل ناقص والنقص اما تهريب او تحتاج تغيير الفحمات لان الفحمات كل مانقصت ينفص زيت الفرامل فاذا غيرت الفحمات ودبلت للفرامل عب العلبه زيت حتى حد الماكس واذا ماكان عندك تهريب اذا بعد فتره ولعت لمبه البريك معناته الفحمات باقي فيها ربع عمر
مسامير الثلاجه لازم تفك الثلاجه وتشوفها خلها مع تغيير البواجي لانك بتفك الثلاجه
القطع الاستهلاكيه بواجي فلتر هوا صفاية بنزين سيور

[ابوسند9]

وعليكم السلام
طيب بخصوص موضع لمبة التانكي بموضوعك السابق , سئلتك هل التانكي الاحتياطي يحول للاساسي؟جاوب من شان نجاوبك , لان الجواب على حسب الاجابه ,
الشي الاخر افتح الكبوت وركز بدينمو السيارة هل له صوت ام لا؟
صوت طقة الفرامل , اتوقع ان الصوت عندك من عمود الدبل وهذا شي طبيعي با الفتك ,لذا جرب شحم العمود
القطع الاستهلاكية
فلتر هواء , صفاية بنزين , سيور اذا تحتاج تغيير, بلف حراره , اديتر ب 1100 ريال ,تغيير زيت القير مع تنظيف الفلتر , كراسي مكينه , التشييك على ربلات السيارة تقريبا 26 ربله
اما مسمار الثلاجة فك الثلاجة لتغيير البواجي ومنها شيك على المسامير
اما لمبة sup tank انتهاء الاحتكار واقرب محل الكترونيات ب 60 ريال يحل المشكله
اما سؤالك الاخير يون , ما فهمت عليك , اذا تقصد صوت اثناء التشغيل فعندك السلف يحتاج فك وتفليش وتنظيف ببنزين ومن ثم تشحيم ,اما اذا تقصد تاخر با التشغيل , فا احرص انك تفتح السوتش وتنتظر ثواني حتى تطفى لمبات الطبلون ومن ثم تشغل
اما قطع الغيار للعلم
قطع غيار نيسان نازله في الرياض عند كذا محل ,اما بالقصيم وباقي المناطق ما زال على الاسعار القديمه , وكا مثال الاديتر كان سعره ب 1600 ريال ونزل ل 1100 ريال وقس على ذلك باقي القطع
واذا تبغى محل بالرياض اسعاره ممتازه , محل بخيت بن شبيب الدوسري في الصناعيه القديمه عند دوارة الخرج

[الاحمددي]

الله يسسعدك ياخوي ابوسند ، وللمعلوميه التانكي م يحول من الاساسي للاحتياطي واللمبه والعه على طول ، ومقصدي زي م قلت اثناء تشغيل السياره تتاخر في التشغيل فقط ، وابيك تفصل لي مشكله الطبلون وش هي عشان الواحد تكون المشكله واضحه امامه وماينغش فيها وايش بالضبط اسوي لارحت لمبرمج الكترونيات .
وللاسف ماني بحول الرياض من اهل ينبع

[ateeq7]

اخوي هل تقصد بخزان الاحتياط مب شغال او تقصد المؤشر مايشتغل حيث اذا كانت المشكله من لوحة العدادات امرها بسيط هل تعرف اي محل تصليح اجهزه إلكترونيه مثل التيلفزيونات او كومبيوترات فك لوحة العدادات وديها عنده بيفحص المقاومات و الذي فاصل بيلحمه بدون تبديل اي شي فقط لحام مناطق متاكله

[الاحمددي]

المشكله اللمبه والعه على طول ومايحول التانكي من الاساسي للاحتياطي ، مريت على كهربائي وصبح السبت ان شاء الله يضبط الشغله .

وسؤال وش افضل منظم هوائي للسياره حق الوكاله العادي او اتوماتيك حق الباث ، للعلم ماني راعي طعوس

[ابوسند9]

اذا
عندك اما طبلون يحتاج لحام
او طرمبة التانكي الاحتياط عطلان
ولكي تختصر الموضوع ,ارفع المرتبه الوسطى اللي خلف الراكب الامامي , وارفع الفرش وراح تشوف الطرمبة , واقرب كهربائي وخليه يفحص الطرمبة ,هل هي شغاله ام الا
اذا هي شغاله , اذا المشكله من الطبلون ,والعكس صحيح , واحينا عطل الطرمبة يسبب عطل للطبلون ,
وهذا رابط حل مشكلة الطبلون http://www.mekshat.com/vb/showthread.php?626819-%E3%D4%DF%E1%C9-%C7%E1-sup-tank-%DD%ED-%C7%E1%DD%CA%DF-(-%D5%E6%D1-)-%E6%C7%E1%CD%E1-%E3%E6%CC%E6%CF
اما منظم الهواء عندك سليم ,ليش تبغى تغيره ,؟ وماله دخل با الطعوس او ما شابه او بتأخير التشغيل

[الاحمددي]

مافيه عطل ولا فيه اي حراره، شاري الموتر قريب وراعيه شاري منظم هواء حق الباث وموجود عندي ، قريت عن منظم هواء الاوتوماتيك افضل لانه سرعه وحده وماله صوت ، اما العادي على حاجة السياره يشد ويرتخي وصوته تقدر تقول مزعج .

[يالبى الهلا]

بالنسبة لتأخير التشغيل اكتب من واقع تجربة في اللاند فية حساسين بالقرب من كوع الحرارة او البلف برأس المكينة حساس لقراءة العداد في الطبلون وحساس مرتبط بالكمبيوتر

اذا خرب الحساس الصغير المرتبط في الكمبيوتر يتاخر التشغيل اكثر من مرة خاصة الصباح او تكون السيارة لها فترة طويلة واقفة
بالنسبة الأعطال الآخري تتضح الصورة بالتشييك عليها عند كهربائي مختص

[الاحمددي]

ي شباب حبيت استفسر عن بديل ل رديتر الباترول سفاري 2006 يكون اصلي،
وش الي يركب بداله لانه حيل غالي ب 1400 تقريبا عند الوكاله

[الحربي 591]

ي شباب حبيت استفسر عن بديل ل رديتر الباترول سفاري 2006 يكون اصلي،
وش الي يركب بداله لانه حيل غالي ب 1400 تقريبا عند الوكاله


والله انه رخيص:)

فيه 3800 تبيه :D

[SGL]

ي شباب حبيت استفسر عن بديل ل رديتر الباترول سفاري 2006 يكون اصلي،
وش الي يركب بداله لانه حيل غالي ب 1400 تقريبا عند الوكاله

أتوقع عند الموزعين أرخص الرديتر الأصلي خذلك لفه عليهم وشف

[ابوسند9]

بالرياض عند الموزعين ب 1100 ريال

[abutalal200]

.
.
.
,
,.
.
.
.
.
.
.

[abutalal200]

بالنسبه للفرامل نفس مشكلتي واتضح لي ان الخلل ميه بالميه من الكليبر (مسمار الكليبر) فيه فضاوه عشان كذا يطلع طقه مع مسك الفرامل او تركها
تقدر تختبره فك الكفر وامسك الكليبر وحركه بيدينك وشوف
وممكن عندك الفحمات اذا قديمه او الهوب يحتاج خرط
اذكر كان عندي لاند كروزر في قربعه عند الهوب طلع من الحديده اللي تمسك الفحمات
رح لكذا ورشه وخذ برأي الاغلبيه
والاخوان مايقصرون معك ان شاء الله بباقي استفساراتك




الله يوفقك .. والله افدتني بهالشغلة عندي طقه بسيطة ولاهي طقه لمن أوقف عن إشارة او شيء وافك رجلي من الفرامل يعطيك نتعه بسيطه هذي كانت تصلحها معي في سيارة قبل وطلعت من الصليبات يبي لها تشحيم وشحمتها وانحلت المشكلة ولكن في الفتك مختلف الوضع اعتقد ولاني متأكد لذلك الله يسعدك افدتني بهالشغله يمكن فعلا تكون هالتكة من الفحمات ( الأقمشه ) منتهيات فعلا عندي تصر يبي لها تغيير يمكن تكون منها لاني شحمت العمود والصليبات في الفتك مو مثل سيارتي السابقه ما راحت من الفتك فاعتقد انها الفحمات بأغيرها وأتأكد مثل ما قلت من الكليبر يمكن يكون فيه فضاوه :good2:

[الاحمددي]

ابوطلال اكتشفت ان الطقه من عامود الدبل ولا لها حل وعلى كلام كم خبير يقول تشوف الطقه لو تاخذ 2016 ولا فيها ضرر

[abutalal200]

وأنا اللي فرحان اللحين ان الشغله بسيطة من الباكمات أو الصليبات

فعلاً كثير قالوا لي ان الطقة ما منها ضرر وانها من عمود الدبل .. مو مشكل الموتر يمشي واموره طيبه ولله الحمد ما في اشكال
واذا لقيتوا حل منا والا منا خبرونا بس

مشكور أخوي الأحمدي

[الاحمددي]

العفو ولو ياخوي ابوطلال نفيد ونستفيد