خيمة مؤقتة في الحوش.. ما هي مقترحاتكم

[Oryx]

السلام عليكم ورحمة الله

ودي أسمع من الإخوان عن مقترحاتهم لخيمة مؤقتة (للشتاء) في حوش المنزل.
لا أرغب بملحق او خيمة دائمة نظرا لصغر مساحة الحوش وأيضا للإستفادة منه في غير الشتاء

فكرت بخيمة مؤقتة مع وجار.. لكن الحقيقة ما عندي أي خلفية عن الخيارات المتاحة في السوق
فقلت لعل وعسى نجد حلول او مقترحات منكم.

[الصيادالمليح]

ما ذكرت لنا المساحة المرغوبة للخيمة و اللي تناسب مساحة حوشك .. ولا ذكرت لنا وين ساكن عشان نفيدك باقرب محلات الخيام بالنسبة لك

[أبو شيري]

ممكن تقصد بيت شعر على شكل خيمه

لأنه لايوجد أحد يشب النار داخل خيمه


أعرف المساحه لديك بالحوش وبعدها قم بزيارة محلات الخيام وبيوت الشعر
وأطلع على النماذج المبنيه لديهم وشاهدها بجميع تفاصيلها
وقرر ما يناسبك من حيث الشكل والحجم والخامه والسعر

أما الوجار من الأفضل يكون منقل متحرك يخدمك داخل الخيمه وخارجها بالحوش في حال الجو ملائم

وسلامتك

[arabboy]

اقترح عليك
اي خيمة او بيت شعر حسب رغبتك
يركب بمسامير تثبت بالارض او الجدار
تجيب رماية (قضيم حديد 3*6 أو 4*8) وتثبتها دار مادار من داخل الخيمة وتعبي سليكون بين الارض والرماية
وتحاول تربط اعواد الذريات بالرمايه عشان ماتتحرك
وبالنسبة للوجار اي منقد (منقل) بكفرات افضل وبدون عادي وشب النار برا ودخله او شبها داخل الخيمة مع فتح الباب وبالجهة المقابله تنسيم
وبس استمتع فيها واذا انتهى الشتاء صفطها وعلقها بمكان بعيد عن الارض وبعيد عن الحرارة العالية

[Oryx]

مشكورين وماقصرتوا

ما تفرق خيمة او بيت شعر.. المهم مكان يكون فيه جلسة وشبة نار للمتعة
والمقاس أيضا ما يفرق.. يعني بيكون خاص بي ويمكن ضيفين او ثلاثة

والله ما رحت للمحلات لعدم وجود الوقت الكافي، وأيضا فكرت قبل ما اروح لهم اسأل لعل احدا منكم يكون له رأي سديد قبل ما اقرر.
أهم شي عندي انه تكون فيها سهولة للفك والتخزين للشتاء الذي يليه اذا الله أعطانا عمر.

شاكر للجميع مرورهم وتعليقاتهم.

[Anwar abdulla]

تحصل خيام عمودين داخلها سدو ارخص من بيوت الشعر انا اقول انها ممتازه وتأدي الغرض

[الصيادالمليح]

عندك مظلات الحدائق موجودة في عالم ساكو باحجام و اسعار مختلفة تناسب حجم حديقتك وهي سهلة الفك و التركيب ويوجد عندهم مشبات خاصة للجلسات .. و ادخل على صور غوغل و اكتب مظلات حدائق ساكو

https://pbs.twimg.com/media/B5Cf7d0IYAEkjTL.jpg (https://www.google.com.sa/url?sa=i&rct=j&q=&esrc=s&source=images&cd=&cad=rja&uact=8&ved=0ahUKEwjar6_div7JAhXJBBoKHZX0BUIQjRwIBw&url=https%3A%2F%2Ftwitter.com%2Fsaco_ksa%2Fstatus% 2F545111399324987392&psig=AFQjCNFzYUjrylg2Xd-AFqC2Adkop372Vw&ust=1451375904480744)

[الدوسري2010]

مثل ماقال انور عبدالله خذلك خيمه عامودين وانبسط واذا خلص الشتا سفطها وحطها بالمستودع

[أبو شيري]

هذي خيمتك التي تبحث عنها

خيمة قرقيزية (https://www.youtube.com/watch?v=FkOV6ETYZM0)

الصراحه أنها أبداع ومن شكلها تحس أنها دافيه بجد
واذا تذكرت وين موطنها الأصلي وكيف ديارهم بفصل الشتاء
عرفت أنها دافيه بلا شك

[Anwar abdulla]

حتى الوجار فيه شي جاهز بمدخنته يجي صاج
تقدر تشيله بعد اذا سفطت الخيمه

[Oryx]

مشكورين. لا خلا ولا عدم

وين تقترحون علي اروح بالرياض؟ أقصد وين المحلات اللي عندهم خبرة جيدة يجون يركبون الخيمة، ولديهم الحلول للأرضية (يعني لازم تكون مرتفعة عن الأرض عشان الأمطار مثلا).
الصراحة ابي ولد يقرأ :)

[Obu-Nasser]

أهم نقطة اعزل الخيمة من تحت عن الماء، لانه في حال هطول مطر بيدخل عليك الماء من تحت بسبب البلاط، احرص على هالنقطة ودبر لك حل لها عشان ماتنعفس اغراضك اذا جاء المطر.

[عاشق دياري]

طل عمرك في طريقة بالنسبة لي جميلة .


هي انك تشتري خيمة عامود من الغرابي او اي محل .

ووتحدد المكان الي تبي تبنيها فيه بالبلك على الحوايف وتسكر المسامات .

وتجيب لك رمل احمر وتحطه في المكان وفوقه شوي بحص .

وابن خيمتك وارتاح .

وطريقة الرمل هي على شان ما يدخل عليك الماء في حال المطر .

[Oryx]

طل عمرك في طريقة بالنسبة لي جميلة .


هي انك تشتري خيمة عامود من الغرابي او اي محل .

ووتحدد المكان الي تبي تبنيها فيه بالبلك على الحوايف وتسكر المسامات .

وتجيب لك رمل احمر وتحطه في المكان وفوقه شوي بحص .

وابن خيمتك وارتاح .

وطريقة الرمل هي على شان ما يدخل عليك الماء في حال المطر .

مشكور اخوي ع الإقتراح.. بس هذا لخيمة ثابته
انا أبي أشيلها اول ما يخلص الشتاء

يبدو انه لازم أروح لمحلات الخيام واشوف وش عندهم من خيارات.

[أبو هشام راشد]

فيه واحد ركب خيمة الفرسان من القاضي ب 850 ريال جاء عليها عرض وأخذها منهم من قبل سنتين
سوى بلك على مقاس الخيمة
وجاب رمل أحمر
ومشب بوجار يمكن ما يكلف 2000
وصارت مجلس بالشتاء والصيف