ارجو الدخول للأهمية / صوت في اللاند كروزر

[كاسترول]

السلام عليكم ورحمة الله وبركاته
إخوانيالكرام عندي لاند كروزر 2002 GXR فيه صوت في بطن السيارة وماخليت شي ماشيكت عليه ماطلع معي شي
مريت كم ورشه وقالوا مافيه شي ابد الصوت طق طق طق طق باستمرار كأنه شيء محلول او شبه مفكوك الصوت في جهة الكفر اليمين شكيت في العكوس بس مافيها صوت مع اللفات وفكيتها وشحمتها من جهة الكفروشكيت في عمود الدبل لكن الورش يقولون سليم.
الصوت مستمر واشغلني .
شيكت على كراسي الدفرنس بس ماظهر شي ارجو من الشباب اللي لهم خبرة يفيدوني . وسلامتكم جميعا

[ابو ملوك]

أعانك الله .. شيك ع المساعد وشحمه

[كاسترول]

المساعدات جديده ولاهو نفس صوتها

[ابوراكان تبوك]

اذا عشقت الدبل الخفيف يروح الصوت او لا

[ابوسند9]

وعليكم السلام
ركز معي شوي , وابغاك تفحص انت بنفسك والشغله ما يحتاج ورشة ,
فل فرشتك من عند الكفر الخلفي يمين , ومن الامام , راح تحصل عمود توازن ممتد من الكفر للكفر الاخر ,بنهاية العمود راح تحصل ,مسمار التوزان , هذا فيه من الاسفل ربله ومن الاعلى ربلتين
هنا اضرب بيدك مسمار التوزان من الاسفل , اذا اصدر صوت فا المشكله منه والسبب اهتراء الربله ,وبكذا تصدر صوت
وهنا طبعا تحتاج 6 ربلات ,3 يمين و3 يسار ,وسعرها كلها ب 40 ريال
لذا اتوقع 99% الصوت منها وخاصه الربله السفلى

[كاسترول]

اخواني ابو راكان وابو سند مساكم الله بالخير وجميع الأعضاء وشكر الله لكما تفاعلكم معي بالنسبة للدبل الخفيف مايروح الصوت معاه تو مجربه واصوت موجود وبالنسبة لجلد اعمدة التوازن كلها مغيره امامي خلفي بصيانة ال200الف قبل اسبوعين وغير الاذرعة الخلفية بعد لانها كانت تلعب شوي

[ابوسند9]

طيب
جرب وانت ماشي والصوت ظاهر , انك تشد الجلنط , واذا اختفى الصوت , فا المشكله من سبرنقات قماش الجلنط
وبرضو جرب انك تشحم العمود الخلفي , او تفكه وتمشي با الدبل ,واذا اختفى الصوت فا المشكله من احدى صليبات العمود
اخير هل الصوت يظهر وانت تمشي سيدا ؟ او يظهر مع الملفات؟
كذلك هل الصوت مستمر ويبداء من سرعة كم؟

[كاسترول]

أسعد الله صباحكم شيكت علي جميع الجلد والكراسي فيه كراسي الكرونه الأمامية واحد من قدام واحد من ورا دائرية كأنهاماهي ثابته صح وفي واحد من قدام مع عمود صغير مريت ورشه وسيك وقال ممكن هي لان كل شي تمام لكن يقول لازم افك الكرونه وتركته ورحت لاني شفت مواضيع لناس ما احتاجت فك الكرونه

[ابو عبدالحمن7]

اذا كان الصوت تحس به عند مكان الرجلين (كرمت) فشيك على كرسي البدي ومكانه ورى الكفر اللي قدام

[عبقري91]

الصوت مع المطاب وانت تمشي
ولا وانت تمشي فقط
امس به صوت هبل في له كم وانا عجزت احصله
بالاخير طلع من ربلت المساعد الي تحت. مع الضغط. انضغطت. واذا مسكت المساعد ماله سي ثابت واذا السياره بدت ترتفع يخف عنه الصغط والحمل ويصير يرقل. غيرت الربل. وزانت ولله الحمد
واو كان وانت تمشي. اذا ماتقدر تركب فرار. نزل عمود الدبل وشف
كان عندي بيوكن. زي ماذكرت طق طق طق وانا امشي
كنه فحمه تطقطق ماهو ماسكها شي بالاخير طلع من صليب العمود حق الدبل

[كاسترول]

بيض الله وجيهكم جميعا والله احترت معاه ولكن مالي حل الا اغير الصليب حق عمود الدبل ولعل في الأمر خيرة إن شاء الله علما أن الصوت مستمر مع المشي ومع المطبات يظهر أيضا

[ابوراكان تبوك]

توقعت ان الصوت في الامام

غالبا هوب الجكسار الخلفي يحدث اصوت
عمود الدبل امره هين لاتخسر صليب فكه وجرب بدونه
ابحث بشكل دقيق هذه حلول تستطيع ان تعملها بدون ورشة
افحص جلود الكنداسات الخلفية
ارفع الكفر الخلفي الايمن واضربه بيدك بقوة او بواسطة مطرقه على نفس الكفر فوق وتحت وامام وخلف
اشر ع الفرامل اذا سمعت الصوت لاحظه يختفي او لا
وايضا اسحب البريك ببطأ شديد وانت تمشي بسرعه 40 او اقل
في شي مهم ايضا اذا صواميل الكفر رخوة تسمع صوت طقطقه ياليت تتاكد منها

انا والاخوان معك في كل استفسار

اتمنى اذا اكتشفت المشكله تعطينا النتائج حتى يستفيد من يطلع على الموضوع

[كاسترول]

جمل الله حالك ولاهنت بإذن الله اليوم اشيك على كل شي واعطيكم خبر

[ابوراكان تبوك]

عفوا نسيت اذكر لك

انا حصلت معي صوت قرقشه مزعجه سابقا واتضح انه فلاتر الدبه الكبيرة التي عند الكفر الخلفي مكسره من الداخل
انزل تحت الموتر من عند باب الراكب الخلفي تجد الكنداسة امامك اضربها بكف يدك لاحظ بها قرقشه قويه او لا ترا غالبا فيها صوت خفيف لكن اذا سمعت بها اصوات قرقشه قوية روح لاقرب محل شكمانات يفحصها
من دلالات خرابها
1- القرقشة القوية
2- انتفاخ ملحوظ
وترا صوت القرقشه اذا خربت مزعج ومزعج
نفس اللي بالصوره انا غيرتها تشليح نظيفه وقيمتها 250/300 لانها سعرها جديده 1100 قبل الخصم

http://img1.haraj.com.sa/userfiles30/2015-11-17/564aff4608e65.jpg

اعتذر عن طول السرد لكن اللي ذكرته قد يكون حل لمشكلتك او حل لاي احد يطلع على الموضوع