حقيقة سعة خزان الوطني؟؟

[واطي الجمرة]

السلام عليكم

قبل كم يوم جا في بالي استغني عن الجيكه23 لتر الي عندي من برق الحيا وماقصرت قامت بالواجب واكثر واستبدالها بخزان ولي وبزبوز واخترت خزان الوطني40لتر بقيمة170 ريال وهو اصغر حجم لديهم...اخذت الخزان و نظفته وركبت اللي وكلش تمام ...استخدمت في التعبئه الجيك الاول حقي23 لتر اعبيه واصبه بالخزان توقعت انه بياخذ جيكتين الا ربع بحكم انه40 لتر وهذي23 المهم صبيت الاولى وعبيتها ثانيه ما امداني اصب الا وهو فاايض؟؟؟؟؟؟شكيت فالسعه
رحت للمطبخ واخذت مكيال لتر وفرغت الخزان وقمت اعبي واحسب لتر لتر؟؟؟طلع 29 لتر فقط يعني فرق11اتر عن المكتوب؟؟؟؟؟؟يعني حول الجيكه مهنا فرق صراحه انقهرت ع الموضوع وقدمت بلاغ للتجاره واتوقع ان بقية الخزانات عندهم نفس الكلام فيها خطأ او لهم حسبه معينه؟
وهذي صورة مشابهه

http://store2.up-00.com/2015-04/1430082879551.jpg

[علي بوعبدالله]

أفااااااا
عندي نفس الخزان بالضبط توني شاريه

[ناصح]

علمنا بعدين وش صار..؟

[عبدالله980]

صدقت
انا عندي 70 لتر وفرغته في جالون البرادة ال15 لتر
تقريبا عبى اربعة جوالين فقط 60 لتر

[أبوصالح9]

الله المستعان من زمان السعة غير صحيحه -

لي 6 سنين استخدم الخزان اللي عندي وسعته 115 لتر مسدوح لكنه ياخذ 104 لتر فقط - والامور سهالات - على الكرف اللي جاه والمراجد والصبخ والمطامر والله انهم بألف حل -

[منتعش]

ياليت أخوي الغالي توافينا بما تم من قبل التجارة
حتى يكون الجميع على بينه واضحة
وكنت أتمنى أنك تتواصل مع المورد أو المصنع .
وجزاك الله خير .

[موتر بر]

تواصل مع الوزارة مباشرة. والله ان هالشركات ما ينفع معه الا الشكاوي.

[واطي الجمرة]

التجاره استقبلو البلاغ بس ما ادري وش بيسوون
لكن اذا كثرت البلاغات افضل لوقف التضليل في السعه

[تركي السعيد]

انا نفس الطريقة عندي شريت الصغير 40 لتر وطلع غير صحيح باللترات ورجعت للمصنع وكلمتهم بالموضوع وقال مدير الفرع واللع ماعندي علم على الموضوع المهم رميته بالبيت وشريت 80 لتر لموتري الفورتشنر والحمد لله
بس يااخوان بصراحة سعر خزاناتهم معقوله وعليها ضمان فعشان كذا لو رميته وشريت ثاني غير مكلف

[هاوي البر]

انا من اربع سنوات تقريبا احتجت خزان ماء مريت مصنع الوطني واخذت مقاس 40 لتر عبيته فل وطلعت كشته خفيفه ما امداني استخدمه الا خلص رجعت للبيت وشيكت عليه جبت وصرت اعبيه بالتر وما كمل تقريبا 30 لتر او اقل الا صار فل رجعت لهم وقلت لهم الموضوع ان الخزان سعته غير صحيحه قال مهوب معقول قلت له الان اعبيه قدامك ونقيس انا وياك اذا طلع كلامي غير صحيح فالحق معكم واذا طلع كلامي صحيح لي الخيار ترجعون فلوسي او اخذ حجم اكبر وادفع الفرق قال ما يحتاج نقيس ولا شي خذ الحجم الي تبي و ادفع الفرق خذت مقاس 70 لتر

[هواوي صيد]

عندي شك باللي عندي 95 لتر

[الحربي حاتم]

سمعنا الكلام هذا وصرنا متأكدين من صحته

[الوانيت1]

عندي شك باللي عندي 95 لتر

يمكن سعته خمسة وثمانين لتر او اقل انا صار عندي شك لان اللي عندي نفس المقاس اللي عندك واشوف معدل النقصان بصفة عامة حول العشره لتر يمكن تزيد وانا والله ما قيست بالضبط بس احساس و لكن يشفع لهم ان اسعارهم رخيصة مقارنة بغيرهم وجودة المنتج .....////.

[واطي الجمرة]

قبل البارح تواصل معي موظف التجاره وشكله يبي يلملم تاموضوع ويقول كانك تبي ترجعه رجعه عادي
قلت انا ماشكيت عشان نفسي انا شاكي للصالح العام لان هذا تضليل للمستهلك انك تكتب 40وهو29

[عاشق دياري]

قبل البارح تواصل معي موظف التجاره وشكله يبي يلملم تاموضوع ويقول كانك تبي ترجعه رجعه عادي
قلت انا ماشكيت عشان نفسي انا شاكي للصالح العام لان هذا تضليل للمستهلك انك تكتب 40وهو29


الله يجزاك خير ، وأزين ما سويت ملينا من التلاعب وعدم المصداقية .

[كايد]

قواكم الله ايوالله هالتجار استغلو الناس

[yassaer]

الله يسعدك وبيض الله وجهك

توني ابشتري مثله :j

[أبومحمدالشهري]

كل خزانات الوطني كذا ، أخصم من 5 إلى 10 لتر على كل مقاس
كان معي مقاس 55 لتر وما أخذ إلا 50 فقط ولايفوتك مايشيل الخمسين إلا إذا رفعته جنب لفوق وعبيت ، إذا عبيت وهوه مسدوح مايشيل غير 40 تقريبا
ففصلت لي ألمنيوم عند السوافي 85 لتر داخل السيارة ممدوح وريحت راسي لأن 40 او 50 ماتساوي لي شي بطلعاتي ، وخزان الوطني اهديته لصاحب لي

[قنيفذا]

مساء الخير جميعا
انا شريت مقاس40 لتر واستخدمتة شهرين وشكيت في الوضع
التانكي يفضى بسرعه ورجعت للمصنع وبلغتهم وعلى طول وافقو اغيره واخذت 55 لتر ولادفعت ريال واحد

[x.ls1.x]

هذا غش من اصحاب المصانع اما لجهلهم بطريقة حساب المساحه او لاغراء الزبائن , طريقة حساب المساحه لمثل هالتوانك هي (الطول × العرض × الارتفاع )تقسيم 1000 يعطيك اللترات بالضبط , اهل المصانع يعطيك هالمعلومه بناء على القياسات الخارجيه للتانكي ويتناسى الاخ ان فيه مساحه للعازل بالقليل 2 سم وراح تنقص بالمساحه الداخليه الي هي الزبده في استيعاب الماء وحساب مساحته وايضا يتنسى ان فيه قواطع داخليه تاخذ حيز اكبر , مثل لو كان عندك تانكي ابعاده (90 طول و 40 عرض 60 ارتفاع ) فالمفروض يكون يستوعب 216 لتر لكن لو حذفنا مساحة العازل الي هي 2 سم من كل جهه يعني بينقص من كل قائم 4 سم (2 يمين و2 يسار, 2 فوق و2 تحت , 2 امام 2خلف ) بيصير (86 طول و 36 عرض و 56 ارتفاع ) بيصير استيعابه بيصير 173 لتر فرق 43 بسبب نقص 4 سم من كل جهه غير اني ماحسبت النقص الي بتسببه القواطع بعد , لازم يصير فيه شكوى لوزارة التجارة المفروض يحتسب على المساحه الحاليه ولنضمن حقنا في مثل هالامور . اهل التوانك الالمنيوم ماتحصل معهم لان سمك الالمنيوم بالغالب مايوصل 1سم ولا يحتوي قواطع .

[شلويح707]

السلام عليكم
مساء الخير للجميع
صحيح كلامكم والسبب خلل فني بحلق التعبئة يمكن تعديله وتروح المشكلة لانه مايفلل صح
افتحوا غطاء التعبئة وتجدون فيه زوائد صب على شكل ماصورة تدخل الخزان تقريبا 10 سانتي قصها بالسكين دائري بجانب سنت الغطاء وخلك ماسك القطعه لانطيح داخل وبكذا يعبي فل ولا يشغلك بالهواء

[خيال الغلبا]

نعم هذا غش

يااخوان بلغوا

وترى كلها اتصال بالتلفون ماياخذ ثلاث دقايق

[أبوصالح9]

السلام عليكم
مساء الخير للجميع
صحيح كلامكم والسبب خلل فني بحلق التعبئة يمكن تعديله وتروح المشكلة لانه مايفلل صح
افتحوا غطاء التعبئة وتجدون فيه زوائد صب على شكل ماصورة تدخل الخزان تقريبا 10 سانتي قصها بالسكين دائري بجانب سنت الغطاء وخلك ماسك القطعه لانطيح داخل وبكذا يعبي فل ولا يشغلك بالهواء

حياك ربي ياشلويح


هذا الاصدار الجديد وموجود عند اخوي الله يرفع باسه وقاصين الزايد مثل ماقلت - وانا عندي الاصدار القديم اللي سنة نحاس بدون تضييق ومع ذلك سعة الخزان غير صحيحة - مسجل عليه يوم اشريه 115 وما ياخذ الا 104 لتر بالضبط

[اصيل نجد]

افا افا ليش يسوون كذا انا اخذت ابو 85 لتر يعني يطلع 75 لتر عشره لتر بالهواء .

[الصخرة]

تمنيت أنكم مشاوريني قبل تشترونه ;)

جربته قبل ست سنوات 40 لتر وطلع أقل بكثير وفوق هذا ماينفع إلا لكشته وحدة وعدد الأشخاص لا يتجاوز 3 أشخاص ....

بالعربي شريته خسارة حتى لو هو رخيص . جيكة البرادة أرخص منه وتاخذ 2 وتبدلها بالبقالة 6 ريال للواحدة