السلام عليكم يارجال شوركم تكفون باترول 98

[ابوساره..]

السلام عليكم ورحمة الله وبركاته لاهنتوا ابي رايكم بالباترول بابين موديل 98 مكينة 4500 بخاخ ابيه للعايله يعني استخدام يومي وطلعات بر خفيفه تكفون يالي جربتوا الموتر تنصحون فيه او حق خرابات وصناعيه مع العلم الموتر قير عادي وجزاكم الله خير

[وطن العزة]

عليكم السلام و رحمة الله وبركاته

معي نفس الموديل صالون بخاخ قير عايدي

بعطيك علومه من إلى بحكم إن له معي 10 سنوات وأنت احكم يصلح لك أو لا

شريته على ممشى 120 والحين 500 و عليها كسور

غيرت فيه
جنزير الدبل مره وحده اول ما شريته
الدينمو مره وحده
مراوح الكهرب اللي ورى الشبك كل وحدة مره مستعمل

الرديتر مرتين
الذراع اللي قدام الدفرنس مع ربلات البنهارد مره وحده و المساعد حقه تقريبا مرتين أو ثلاث بس الحين شلت الوردات و زانت أموره من ناحية الرجه

القماشات مرتين
حساس قربة الهواء مره وحده بسبب غسيل المكينه بالماء و عقبها توبه الماء يقرب الكبوت

طرمبة بنزين حقت فتك

الباقي من محركات و مساعدات و عضلات الموتر
شد بلده لا صيانه و لا تغيير ولا شيء

الموتر مريح و راسي نوعا ما بحكم إنه دفرنسات....

عيبوبه

لهط البنزين داخل البلد التانكي الأساسي 60-70 لتر 91 يمشيه حول 300 كيلو فقط مع الخط حدود ال 500 تانكيين

نظام تبريد المكينه مع الوقوف بالصيف والزحمه يعتبر فاشل، من تاصل الحراره أو اتعدى الشرطه الثانية يدج عزمه و يضعف مكيفه أما بالممشى أموره تمام


هذا اللي عندي و الله يكتب لك اللي فيه خير

ولا تنسى الإستخارة

[ابوراكان تبوك]

98 حتى عمره الافتراضي شبه منتهي وانا اعتبر عمر السياره 20 سنه مع المحافظ ومعروف الباترول بالخرابات وبالذات شفط البنزين

انت بتأخذ موتر مكدود

تبي تريح راسك شوف الفورشنر الجديد حتى الشكل الجديد 16 حلو وسياره تصلح للدوام او غيره
كذلك الميستوبيشي الجديد حليل لكن الفورشنر ازين
عموما سياره البر لابد ان تكون 6 سرندل مهما كان

الجديد ترتاح نفسيا اي مشوار في خاطرك شغل وعب بنزين وزيت وتمشي وانت متطمن بأمر الله

السيارات الاخرى المستخدمه وتكد ونفسها طويل
اللاندكروزر من 98 الى 2007 لكن في كلا الموديلات ركز ع النظيف
التويوتا مهما كان موديله حط قطع اصليه وارتاح 8 سنوات ع الاقل ومتوفره القطع لكن الباترول يشتكون من قطعه اغلبها طلبيه واللي طيح سوقه كثرة الخرابات وارتفاع القطع الاصلية وعدم توفرها

البعض بيرد الان على اني متعصب لتويوتا وهذا والله بعيد كل البعد عن المقصود
لكن باترول و98 صدقني مايريح بالك كل شوي تلاحظ عليه شيء يزعجك
لو الموديل حديث ايدك عليه
وهذا رايي بكل امانه واستخير

[يالبى الهلا]

صراحة حكيم ومقال جميل من إنسان خبير ماخليت لنا شئ نقولة ��������

[سفاري سوبر]

معي نفس هالموتر
ماعليه كلام وخاصة لاصار فل كامل قير عايدي
مريح وطيب ومناسب وينشد فيه بالنسبه للبنزين يمشيني ظ¦ظ×ظ×
والبنسبه للعزم غيرت له طرمبة bm وصار طيب بالحيل