طفيت السيارة فجاءه

[remz]

السلام عليكم ورحمة الله وبركاته
صبحكم الله بالخير يااخوان
وش سبب طفيه السياره فجاءه وهي تمشي او واقفه مع ان الطفيه تجي مرات وبعد كم دقة تشتغل السياره ددسن مع العلم اني مغير الدعسه كامله وصفاي بنزين ومكينتها ماهي صافيه ووزنت الديلكو على مسدس الوزن وجربت فكيت هوز طرمبه البنزين برا وتدفع الطرمبه بنزين

2. سبب نزول دعسه البريك من تحت الرجل اثناء مسك الفرامل مع العلم اني نسمت الكفرات وقطعه المطبات الي بالدفرنس
مادري وش يدل عليه مع اني مستبعد الباكم
انا شاك بالتنسيم او العلبه
والله جننت هالددسن. الله يكفيكم شر العطالات مع ان عندي خبرة ميكانيكا مع هالسيارة احس نفسي ماعرف شي
انتظر ردودكم وتفاعلكم الله يوفقنا وياكم
والسلام خير ختااام

[ابوراكان تبوك]

واضح ان موترك كربريتر

سبب عدم صفاوة السياره بأعطيك من الاسهل
1- البويبينه
2- فضاوة شاكوش
3- فضاوة ترس الديلكو الداخلي ونادرا احد يكشفها الابتبديل الديلكو بواحد مستعمل واذا طلعت فضاوة في ترس الديلكو ينخرط وبسيط
4- احتمال انه البليتين ماهو موزون صح او نوعيته مش ولا بد ان بغيت تغيره انصحك بحق المازدا
5- الكربريتر وخصوصا العوامه
6- تنسيم الباكم
7- الكويل

[hassan-55]

سبب نزول دعسه البريك من تحت الرجل اثناء مسك الفرامل مع العلم اني نسمت الكفرات وقطعه المطبات الي بالدفرنس
مادري وش يدل عليه مع اني مستبعد الباكم

ج/ من علبة الفرامل

[YUKON_GMC]

الطفيه احتمال بليتين او ديلكو واحتمال الطرمبه الدعسه سببها ضعف في علبة الفرامل وتحتاج اصلاح او تغيير

[SGL]

أول مايطفي أبيك تشيك على الطرمبة تدفع بنزين أو تسمع صوتها بتانكي السبب الثاني يكون الكويل يسخن أو الكربريتر يشرق وياليت توضح موديل موترك والمكينة بخاخ أو كربريتر
مشكلة الفرامل سلندر الفرامل الخلفي غيرتها؟
أو فكيتها ونظفتها؟
الأقمشة الخلفية أوزنها خلها تمسك يوم تدعس فرامل

[remz]

يعطيكم العافيه علئ الاهتمااام والردود موديل السيارة 2001. بخاخ والفرامل وزنتها. بعد تركيب الدفرنس ولي يدل على ان الوزن مضبوط الجلنط يمسك من اول سنه له تماام

[remz]

اخوي ابو راكان الشكوش جديد مركبه وفكيته ماعليه للحين جديد وبالنسبه للديلكو وديته لورشه وصقطوة من جديد وعلى مسدس وزن مااطرو لي فضاوه ولا شي وهل بيبينه الديلكو للبخاخ تغير ولاحظت شي مرات مع طفيتها لما ادوس بنزين لها تضرب صوت مع الشكمان حسب خبرتي وعرفي انه مشكلة كهرب والله اعلم

[ابوراكان تبوك]

بالنسبة لفضاوة ترس الديلكو حتى الوكاله توزن الديلكو من سابع المستحيلات يضبط
الفضاوة ما احد ينتبه لها وانا اعرف شخص قريب لي غير طقم بلوف بسبب الترتره ونفس القضية بالاخير فك ديلكو موتر ثاني وركبه على موتره وضبط 200% وطلع الديلكوات الاثنين وفحصها الميكانيكي ولقى بالاول فضاوة في ترس الديلكو وصلحه بالمخرطه

ياسلام عليك نعم مشكلة الكهرباء تسبب رمي

نعم البوبينه لسيارات البخاخ تسبب مشاكل
الا اذا كان الديلكو اكتروني بدون بليتين هنا مافيه بوبينه

لفت نظري موترك 2001 وبخاخ يكون الديلكو هنا الكتروني مافيه شاكوش