افزعو لي يالاجاويد بخبراتكم ، صوت حرة مزعج ب سيكويا على سرعة 120

[gmc92]

السلام عليكم ورحمة الله وبركاته
يااخوان انا اشتريت
سيكويا 2010
مستعمله
دبل
ماشي حوالي 160
فحصتها قبل الشراء
ولا وجدت فيها الا رجة بسيطه مع صوت حرة
مع رجة خفيفة بالسيارة بعد سرعة 120 تقريبا
وقلت بنفسي الموضوع بسيط يمكن ترصيص
او ماشابه وتوكلت على الله واشتريتها
بعدها بدأ معي المسلسل

المشكله هي :
صوت حرة وليس ونه يطلع مع سرعة 120 تقريبا واحس فيه انتفاض خفيف بالسيارة
ومع زيادة السرعة عن 140 تخف الحرة لكن ما فيه نعومة بالسيارة
مع العلم انها تبقى حتى لو رفعت رجلي عن الدعسة خصوصا على سرعة 120 بالظبط ،
لكن مع الدعسة لو خفيفة تظهر الحرة بزيادة

محاولاتي لاصلاح المشكلة :
اولا ركبت كفرات جديدة مع الترصيص ولا راحت
ثم رحت للعضيب قال هذا الصليب محتاج تشحيم ، وشحمنا ولا تغير شي
بعدها رحت لاكثر من ورشة قالو غير الصليب وغيرنا ولا راحت
قالو يمكن من العمود ، نزلت العمود وفحصته عند مخرطة وطلع سليم
فكيت عمود الدبل وفحصته ، وطلع سليم
شيكت على كراسي المكينه والدبل ، كله سليم
واحد قال يمكن من الكرونه ، لكن الكرونه بالعادة صوت ونه ويزيد مع السرعه

ياخوان وش الحل الصوت هذا ازعجني واحسه يدخل بالدماغ وعفت السيارة بسببه
من خبراتكم هل يمكن يكون الكارونه العكس
المهم ما استغني عن خبراتكم وفزعتكم
وش تقترحون علي ،

[يالبى الهلا]

اذا فية رجة مع الفرامل فهذا من الهوبات وهوعيب في السكويا
تخرط وتركب لها اقمشة سيراميك سكويا تروح الرجة

[يالبى الهلا]

والربل البلاستيك اللي فوق الكفر تطيح كلبسات فيضرب مع الهواء تحت ويحك في الكفر

[ابوراكان تبوك]

مالي خبره بالسكويا لكن شدني موضوعك

هل استخرجت تقرير الكارفكس اذا كانت وارد امريكا ارسلي رقم الشاص

اول ماقرأت موضوعك رحت للكفرات مباشره وقرأت أنك غيرتها ( بعض الكفرات تكون دعستها له اتجاه للامام مرسوم ع الكفر اذا الطقم اللي عندك له اتجاهات او اسهم تدل على اتجاه الكفر افحصا بنفسك وشوف لازم تكون في اتجاهها الصحيح ولا تسبب صوت ) او صورها لي بصور واضحه الكتابه عليها

النعومه التي لاتشعر بها بسبب اهتزاز او فضاوة
بالعاده يسويها رمان الفلنجه او الفلنجه نفسها هل لاحظت وانت على سرعه يظهر فيها الصوت عند اللفات هل يزيد الصوت او يختفي
العمود اوكي انت تقول سليم هل فحصت فضاوة البنيون او وزن البنيون ( لانه مشابه تماما للرجه اللي تقولها ) البنيون طبعا هو القطعه اللي يركب عليها العمود من الخلف وداخلة في الكارونه
هل تفقدت جلد الشكمان عن النقص او القطع ؟؟؟
هل فكيت عمود الدوران ومشيت بالدبل الخفيف كـ تجربه

ابدا بالاسهل
تفحص اتجاهات الكفرات
تفقد جلد الشكمان
اذا كانت السيارة فيها rpm ادعس بنزين وانت واقف لين يصل ال rpm لنفس الضغط ع سرعه 140 هل يظهر الصوت
فضي القير وانت مسرع اذا ظهر الصوت وركز هل يختفي الصوت ( اذا راح الموضوع يسهل شوي )
تأكد ان الصدامات مربطه جيدا لانها تحدث صوت كذلك بطانه الرفرف الداخليه البلاستيك
بعد ذلك افحص وزن البنيون عند الميكانيكي وان لايكون به فضاوة
تأكد من تركيب العمود لانه له طريقة واشارات الميكانيكي مايعرفها فني المخرطه هو المتخصص فيه

ردي اجتهاد شخصي واتمنى ان يساعدك في ايجاد المشكلة

[gmc92]

اشكركم على التفاعل
بالنسبه للكفرات ركبت دنلوب نفس كفرات الباترول الجدد ، تختلف عن مقاس
كفرات شد البلد ، واعتقد ماله تأثير الاختلاف لانه الرجه حتى مع الكفرات الاولى
الرجة او الحرة احسها من كثر ما ركزت من قبل تاصل السيارة سرعة 100 لكن
تكون واضحه بعد 120
انا فضيت السياره على 130واحس بالرجه موجوده واذا عشقت d وزدت
السرعة يظهر الصوت اكثر ( حرة مع رجة ) ولا يوجد صوت ونه
وشيكت على ربلات الشكمان لقيت وحدة مقطوعها وبدلتها لكن ما تغير شي
الصدامات ما اشوف بهن شي مو ثابت ولا الربلات
كيف افحص البنيون ، او الكارونه ،او العكوس ورمانهن
ابغا اتأكد انا بنفسي من العطل ، من كثر ما خسروني الورش
اخاف ابدل الكارونه ويكون السبب غيرها

انا اول ما شريت السيارة كانت مرفوعة من الخلف ( مركب لها كعكات ) ونزلتهم اول ما شريت السياره
هل تعتقدون ان رفع السيارة يمكن سبب مشكله بالكارونه او الصليب او غيرها
علما بأني الميكانيكي يوم نزلنا العمود قال غير الصليب الخلفي لانه ماسك شوي وغيرته
اما الصليب اللي جهة القير ما غيرته ، يقول سليم لان ما كان ليه صعوبة بتحريكه

[ابوراكان تبوك]

العكوس ماتنفحص الا بالفك

البنيون طريقتي افك عمود الدوران واجرب بدونه واذا راح الصوت اوكي اعرف انه وزنه بنيون

بالنسبه للميكاني يعرفه بطريقته وبدون ساعه يوزنوه شوف لك ميكانيكي ثقه خله يشيك على وزنة البنيون

[خشم الرثمه]

السلام عليكم
مشكلك هذي صارت معي بسيارة جمس حوض 97 دبل...
ودخت أشهر بين الورش والصناعيه وكل شي سليم أهل الورش صارو اصدقائي كل يوم مطيح عندهم...
ورحمة رب العالمين دلتني على سبب ماكنت أتوقعه أبدا أبدا...
كان عندي \افلانش 2002 وكنت أغيرله زيت 5w30
وكان زيت الجمس 97 سوبر شل الاحمر ماغيره..قلت ياولد ليش ماتجرب تحطله نفس زيت الأفلانش الي هو 5w30 ومع السيفون ويوم جربته ماتتخيل فرحتي يوم راحت الحره .. ودوس له من الفرحه وجيب طبلونه .. معقول من الزيت وجرب ماراح تندم...
الزيت عند المشاحم غالي .. خذ بالكرتون من محلات الجمله بالصناعيه القديمه ان كنت بالرياض

[يالبى الهلا]

انا من رأي ترجع الكعكات القديمة لان الموتر في الخلف عكوس ومع الاستخدام تعود علي الرفعة الموتر وضبط نفسة علي هالوزنية
فأنت لما فكيت الكعكات اختلفت وزنية الموتر وصارت حنة ورجة

[أبوصالح9]

اتوقع مشكلتك بالقير والله اعلم

[ابوراكان تبوك]

اقرب شي هو السبب الكعكات مثل ماقال اخي لبى الهلا لانها احتمال تسببت بفضاوه والموتر تعود عليها

بالنسبة للقير انا استبعده لانه من خلال الفحص اثناء المشي وتفضية القير لازال الصوت

[gmc92]

السلام عليكم ورحمة الله وبركاته
ابشركم تم حل المشكلة
فبعد الخسائر ما بين ترصيص وتبديل صليب وفك وتركيب الاعمده وفحصهن عند المخرطة وانهم سليمات ، واكثر من ورشه قالو ان الصوت احتمال يكون رجه بالعكس او عمود العكس او الكارونه ،
قلبتها يمين ويسار ،
ثم رحت لورشه وقلت فك العمود الخلفي
واخذته ورحت لمخرطه غير الاولى ومتخصصه بالاعمده
وقل افحص العمود ، وتم فحصه وفحص الصليب الذي لم يتم تغييره بالمرة الاولى وافحصوه قدام عيوني وبرضه قالو سليم ،
واخذته ورجعت للورشة ، وانا صايق الضدر
قلت خل العمود عندك ،وانا اشغل السياره واشبك الدبل وامشي بدون العمود الخلفي حتى سرعه ظ،ظ¤ظ× ، وما شالله تمشي السياره بدون اي صوت او رجه .
والله وانا اكمل المشوار للتشليح ، واخذ عمود ، وارجع للورشه واركبه وامشي عليها بالعمود ( بتاع التشليح ) ويالله لك الحمد زي الفل ،
من ملاحظتي للعمود اللي مسبب الرجه وطريقة فحصهم له وانه سليم من منظورهم ،ومقارنته بالعمود الجديد حسيت ان المشكله بالبستم او المساعد حق العمود ( ما ادري وش اسمه ، لكن هو جزء من العمود من جهة القير يدخل بباقي العمود ، مثل المساعد ، تظغطه ويرجع ) لاني لاحظت كأنه اخف شوي بالظغط والرجوع ، بينما العمود الجديد حسيت البستم هذا اقوى ومليان اكثر ، يمكن الخلل هذا جاء بعد ترفيع السياره من المالك الاول ،
وان اغلب هالورش يتعلمون بسياراتنا ، والله دخلت اكثر من ظ¨ ورش لحل هالمشكله وكلهن مشهوات بهالمجال ، وكلن يعطيني سبب واحتمال ، وكلش بثمنه
وشاكر لكم تفاعلهم ،

[ابوراكان تبوك]

مالي خبره بالسكويا لكن شدني موضوعك

هل فكيت عمود الدوران ومشيت بالدبل الخفيف كـ تجربه

ابدا بالاسهل

ممتاز وفقك الله والحمد لله ع انتهاء المشكله
هذا ردي عليك من البداية بالاشاره الى فك عمود الدوران


لو اعتمدت على الورش في الفحص خسروووك هذا انت اكتشفته بنفسك والحمد لله

[gmc92]

ممتاز وفقك الله والحمد لله ع انتهاء المشكله
هذا ردي عليك من البداية بالاشاره الى فك عمود الدوران


لو اعتمدت على الورش في الفحص خسروووك هذا انت اكتشفته بنفسك والحمد لله


جزيت خيرا يابو راكان
انت وكل من يشارك في هذا المنتدى
المتميز بكم ، وهذا القسم اعتبره مرجع
لحل الكثير من مشاكل السيارات
اللي احيانا تعجز الورش عنها حلها
الا بخساير مالها لزوم