انا لله وأنا اليه راجعون ((مات المعروف بين الناس ))

[هاوي خلا]

بسم الله الرحمن الرحيم
أخوتي الأعزاء تحية طيبة وبعد :
هذه قصة عجيبه جداً ومؤثره جداً حدثت لي ليلة البارحة و والله أني انصدمت منها صدمة كبيرة جداً لدرجة أني إلى حد كتابة هذا الموضوع أجد في نفسي غصة وضيقه و مع أني أجد الكثير من الأسباب لردة الفعل هذي ، المهم مالكم بالطويل القصه بالكامل مع المؤثرات الصوتية وبدون مقاطع دعائية :
قدر الله علي وغسلت سيارتي يوم الأثنين بعد رحلة اربعاء وخميس وجمعة تخللها بعض الطين في شمال المملكة ، المهم دخلت السيارة للبيت ونزلت جميع الأغراض منها مثل شنطة العدة وشنطة الاشتراك وماطور الهواء والسيور ومفك العجل ويد العفريته وجميع ما في داخل السيارة لغرض غسيلها في المغسلة .
بعد ذلك ذهبت للمغسلة وغسلت السيارة يوم الأثنين مساءً ولم ينتهي غسيلها الا الساعة الثانية عشر ليلاً ، نمت بليلة خير يوم صار الثلاثاء داومت والعصر رحت للبيت وكل شيء طبيعي ولما صليت العشاء أردت الخروج للزملاء في استراحة لنا شرق الرياض في منطقة السلي سمرنا كلنا وشاهدنا شاعر المليون وسرو الشباب وتأخرت أنا لأني كنت أتابع برنامج في قناة رياضية عن دورة الخليج ((لاعادت)) قمت يمكن الساعة 1,15 وسريت ولما طلعت للسيارة وجدت كفر قدام ناقص هواه شوي قلت يا ولد أروح أزوده هواء وأروح للبيت المهم رحت للمحطة الأولى وهي قريبة من الأستراحة ولم أجد لي ((هوز)) الهواء كان البنشر مسكر ومدخل اللي من داخل ، رحت لمحطة أخرى قريبة من المحطة الأولى وتعرفون لما تمشي على كفر ناقص هواء يزيد نقصه مع المشي ، وصلت المحطة الثانية ولقيت اللي من خارج البنشر قمت وفحطت الهواء اللي باللي ((بالهوز)) لقيته خفيف قلت يمكن يعبرني للمحطة الثانية قمت حطيت اللي بالبلف حق الكفر ولكن بدل ما ينفخ الكفر نسمه زود وأنا خلي لا ما طور ولا يد عفريته ولا مفك عجل ((وهنا بدأت المعانات)) استفزعت بالعمال ولا عطوني وجه وكانوا من الجنسية اليمانية والبنغلاديشية والهنود على ما أظن ولا يردون علي المهم قلت مالك غير النشامى اللي يوقفون يعبون بانزين يمكن القى أحد معه ماطور هواء يفزع لي وبداء بتجديع الوجه على اللي يسوى واللي ما يسوى واللي حز في خاطري ما هو البنشر والله ولا السيارة اللي حز في خاطري هو أن المعروف انقطع بين الناس نسأل الله العافية ،فقد سألت ما بين 25 سيارة إلى 30 سيارة بعض الشباب يفتح الدريشة ويرد على السلام وتسأله عن الماطور يقول ما معي فهذا جزاه الله خير ، والبعض الأخر وما أقول يقال لي شيء شفته بعيني واحد أقبلت عليه وكان معه جيب والله حسافه عليه الله يهديه ويصلحه سلمت وهو مقفل القزازة اشرت له بيدي افتح القزازة ابي اكلمك فتح القزازة يمكن 2 سم فقط يوم شفته كذا قمت وخليته والوضع ما كان يخوف هو واقف عند مطعم وقدامه دورية واقفه عند المطعم يعني وش يخاف منه , و فيه ثلاثة شباب معهم موتر صغير أشرت لهم وكانوا مقفلين القزاز وردوا السلام علي ولم يفتحوا القزاز وأنا اشر عليهم افتحوا القزاز ابي اكلمكم وهم ثلاثه وأنا واحد ، ما أفتحوا القزازة قمت ومشيت وخليتهم الله يخلف على أهلهم أو يهديهم لهم وبعد شوي نزل واحد منهم للبقاله الله يهديهم ، وكثرة الناس وأنا أسأل عن ماطور هواء ولا من مجيب بعضهم يتفاعل معك والأخر لا يرد والبعض الأخر يقول ما معي والله ما طور هواء وجاء شايب معه ليموزين عاركته الدنيا وقال أفزعلك بس ما معي ماطور هواء وراح لم البنشر ودور محبس الهواء وأي شيء يفيد قلت له رح لعيالك لا تشيل همي جزاك الله خير ، هناك نقطة نسيت ذكرها وهي أنه هناك شابين كان معهم داتسون غمارتين كانوا واقفين عند صراف وسألتهم وقالوا والله ما معنا ما طور والله اني من شفتهم وانا راجي فيهم الخير لأنه يبين الشقردي وولد الذيب ذيب ، شوي راحوا ورجعوا لي قالوا تبي نوصلك لبيتك والصباح رباح قلت كثر الله من أمثالكم ، هذا أول عرض مغري يجي لي من ساعة بس رفضت لأن موتري كان موقف غلط بالمحطة واحتاجة بكرى للدوام ، أستمر سؤالي للأجاويد وتذكرت أهل الحاجات بهذا الموقف البسيط من لهم حاجات أكبر من ذلك ويلاقون بأنفس شينه ووجيه تكره أن تناظرها .
استمريت واستمرت المعاناة ، وبعد ساعة ونصف ظهر أصحاب الداتسون اللي فزعوا لي والله وإلى معهم ماطور هواء صغير حق الكامري والهايلكس اللي يجي شد بلد ، شكرتهم ودعيت لهم على نبلهم وفزعتهم قمت وركبت الماطور وتخبرون الجيب كفره كبير أحتمى الماطور ولا نفخ شي يذكر يوم فكينا اللي((الهوز)) نسم مرة ثانية قلت ما معكم عفريته قال واحد منهم اروح اجيب عفريته راح عشر دقايق وجاب عفريته ومفك عجر ويد للأستبنه للكفر اللي تنزل الاستبنه وقلت لهم ارتاحوا وخلوا الشغل علي ورفضوا الا ان يعاونوني ]((الله يرحم والديهم عن النار)) [/color] غيرنا الكفر ولله الحمد والمنه وشكرتهم شكراً جزيلاً وطلبت منهم أي خدمة أقدمها لهم وتشكروا مني وقالوا أدع لنا بالتوفيق بهالساعة المتأخرة من الليل ودعيت لهم وخليت العجز يدعون لهم بعد ((يستاهلون))والساعة كانت تشير إلى الرابعة صباحاً وهم طلاب ثانوي أخر سنه ويدرسون ويقولون كنا نذاكر ملينا قلنا نتمشى شوي وطيحهم الله بي ((وربي جابهم لي نجده )) وأنا هنا أشكرهم جزيل الشكر

وفي الختام :
انا ما ضيق صدري الا أننا في هذا البلد الحبيب اللي أهله أهل خير ومعروف ، ويصير لي هالموقف يعني لو أنا بفرانكفورت أو لندن أو مدريد أو واشنطن ما أستغرب أبد .
أعرف أن بعض الشباب يبي يقول الناس خايفين ومسألة أمنية و أولاد الحرام ما خلو لعيال الحلال شيء وأنا أقول حتى تتضح الصورة الشارع منور سيدين وفي محلات ومحطة بانزين ومطعم كبير عليه زبائن كثيرون .
المهم لي نصيحه مهمة لأخواني أخواتي وهي صناعة المعروف بين الناس فحتى لا يموت بيننا المعروف يجب أن نبادر بكل جهد لمساعدة المحتاجين للمساعدة ، ووالله لولا أنني من الناس اللي يساعد بكل ما أعطي من قوة وجهد ويسمونني الزملاء المتهور لما سخر الله لي هذين الشابين بل الشبلين لأنهم أشبال وابائهم أسود ونعم التربيه ، فالله الله بالفزعه حتى لا تموت عادة حض عليها الدين وصقلتها عاداتنا وتقاليدنا والله يديم المعروف بين الناس ولا يقطعه أبد ابد .
ادري طولت عليكم ولكن من هول الصدمة واستغرابي من برد لحم الناس .
أخوكم المبنشر / هاوي خلا .

[منزلي الصمان]

ياهاوي خلا

الحمدلله على العقلان هذا أولا .

ثانيا/ أبشر الدنيا بخير ومن الاجواد ماتخلا، والحمدلله انك بالديرة منتب بخط ولا كاشت .

هونها وتهون .


اما عني انا فااخذت لي موقف مره من مثل ماقلت ( المعروف ) ولن اكررها ابدا اول كل ماشفت واحد يشر على الكتف ظبطت التلبيقه اما الحين لويصير الي يصير ما اوقف ابدا.

الحاصل على شان ماتقول وش السالفة / مره وقفت وشلت هاك الأدمي ويوم مشيت لي مسافه قدر الله علي وحصل لي حادث والحمدلله اولا واخرا .
هو جاه الي مكتوب ومقدر وانا عندي راس والفقرات بس شوفو وشلون وش سووبي ×××× علشانه وسين وجيم ولذلك اخذت موقف وانتهيت أ عويذا.

[هاوي خلا]

الأخ العزيز منزلي الصمان :
كثر الله من أمثالك وأتمنى لك الشفاء ، وأنا يا أخوي بالعكس هذه القصة تزيدني أصرار أن افزع للناس كل ما لقيت أحد متعطل ويحتاج مساعده واللي صار لك مقدر ومكتوب والحمد لله على سلامتك ويمكن لو ما سويت هالمعروف بالرجال يمكن صار الحادث أكبر وأشنع واضرارة لا تحمد عقباها ، فلله الحمد والمنه و قدر الله وماشاء فعل وترى البذرة الصالحة فيك وفي أمثالك تجبر على فعل هذه الأشاء غصب عنك لو رفضته مبدئياً سوف يأنبك ضميرك ثم ترجع وتساعد باللي تقدر عليه .
شكراً على مرورك والله يكثر من أمثالك والله يشفيك ويعافيك وتصير مثل الحصان .
أخوك / هاوي خلا .

[خااالد]

هااوي خلاا


بالبدايه الحمد لله على سلامتك
وياجعلها آخر مواقفك المحرجه والمزعجه

يالغالي بس حبيت انبّهك على شغله وهي مهمه جدّا
ونبّهنا عليها رسولنا حبيبنا ابن عبدالله
هي البحث لاخواننا المسلمين عن اعذار
حتى لو كانوا مخطئين
يعني يالغالي اللي مافتحوا الدريشه لك حط لهم عذر بأنهم كانوا مثلاً خايفين منك
او انهم مثلاً يحسبونك سكران بحكم الوقت المتأخر
او مثلاً يحسبونك شحّاذ وجايهم تطرّ منهم
وهكذا
يعني حط الف عذر وعذر
والا ابيك تعطيني سبب واحد يخليهم ما يفزعون معكم ؟؟
ياخي حتى الردي وهو ردي فيه مواقف يصير فيها نشمي

ثاني شي المعروف لن يموووت بين الناس الى قيااام الساااعه
فكن مطمئن ومرتاح
انت الحين عقب هالتجربه عرفت وش قيمة الفزعه وبتصير تفزع وتحرص على الفزعه عقب ما ذقت مرارة الحاجه
فحط في بالك ان فيه ناس سبقوك واحتاجوا لمن هبّ ودبّ على قولتك واللي يسوى واللي ما يسوى وما وقف معهم سوى النشاما
وشي طبيعي انك منهم عقب هذا المحك اللي يضيق الصدر


ثالث شي وهو اهم شي

ياخوك لاتحاول تسهر لاكثر من 12 وتكون خارج المنزل في ايام الدوام
بحكم ان الشوارع تعتبر فاضيه 100% مافيها سوى الدشير والجحلّط والمسؤولين اللي وراهم دوامات ومسؤولين عن بيوت تلقاهم ناييمن يعني من تبي يفزع معك ؟.؟؟
تبي يفزع معك واحد رايح يدوّر بيّاع يشتري منه بنصف الليل ؟؟
والا شباب طالعين يصمخون حشيش بذالليل ؟؟


فلتكن واقعي يالغالي


فلو كان موقفك هذا في وضح النهار لوجدت المعروف عايش بين الناس ولله الحمد





الحمد لله على سلامتك مره اخرى
واعتذر عن الاطاله


اخوووووووووووووووووك اللي ما بنشر والله لا يقوله

[الشبح2000]

هاوي خلا واحد من الربع بنشر موتره و معه عيلتة :looney:

حاول يفك الكفر و انكرر المسمار داخل الجنط :mad:

موتره كابرس يعني ماعاد يقدر يفك الكفر

و أول من وقف عنده شاب على هايلوكس :good2:

عرض عليه السيارة يودي اهله ولكن السياره غمارة وحدة

قام الذيب وشبك لي هوى كان معه في كفر سيارته وأخذ من كل كفر شوي لين عبئ كفر الكابرس

مشى صاحبنا 15 كيلو لين وصل البنشر و الشاب يمشي وراه ووقفعنده لين صلح الكفر ....

اخوي هاوي خلا (( الشرطة في خدمة الشعب )):director:

ليه ما طلبت الفزعة من الدورية الموجودة

تراهم أهل فزعة و واجبهم يحتم عليهم الفزعة ( النجدة )

من زمان نسمي سيارة الدورية نجدة:alarm:

ودمت سالم

[حجّر]

الحمد لله على السلامة اخوي هاوي خلا
قصتك فعلا ضيقت خاطري
ومداخلات الاخوان جميلة جدا
اسأل الله لنا ولكم جميعا السلامة ولن ينقطع المعروف ابدا ان شاء الله
ولكن قبل سنتين كنت خارج من من الخرج في طريق العودة الى الرياض وعند اخر اشارةعلى الطريق
السريع قابلت شايب جالس ومتكي راسة على مشعابة وبجنبة شنطة بطانية والشمس صافقتة ورافع يدة
يشر للاخوان الي عند الاشارة ما احد اعطاه وجة وقلت خلني اكسب من ورى هذا الشيخ الطاعن في السن
معروف وصدقة .
ناديتة وساعدتة على ركوب السيارة ويوم اخذت شنطة اللحاف ابغا احطها في المرتبة الخلفية بغى يفلخ جبهتي
بمشعابة ... دخل السيارة وطلب مني تنزيل ظهر المرتبة ونزلتها لهة وطلب ازود في المكيف وزوت علية
اخذ له عشر دقائق نائم وصحى يوم وقفت عنداحدى محلات القهوة السريعة على الطريق وطلبت اني اجيب له
قهوة عيا وقال انا معي لبن .
رجعت السيارة واول ما ركبت قالت له انت من اهل الخرج قال لا ولا هو من اهل الرياض وبعد ما انتهى
سؤالي طلب يعرف اسمي وقبيلتي فعلمتة وقال فيني قصيدة عصماء طووووويلة وانا مبسوط وحينما انتهى
من القصيدة وانا كنت ماشي تقريبا 140 كم وهو يسحب راسي عشان يسلم على خشمي وهو يقول خشمك
وبصوت مرتفع خشمك يا الاجودي خشمكوهو يسحب راسي وتعرف مع سحبته غطى على وجهي بشماغي
وما تسمع الا صوت عيون القطط طررررررر طرررررررر وانا اقول طيب اصبر وفي خضم المعركة
ما وصل خشمي انتهت بشفة الله يقرفة ... وبعد ما هديت صرت امشي اقل من 80 كم قال ابغى تعطيني
3000 ريال على القصيدة قمت ضحكت قال طيب خمس مية ويوم عييت قال هات تلفونك بأتصل وعطاني
ارقام من نوته تلفون معة الارقام كتوبة بشكل عشوائي في الصفحة واقولة اي رقم يقول ذا ارقام عمودية وافقية
وارقام ناقصة وشغلة ويوم ما لقى احد يرد علية من الاتصالات قام وقلب على وقال انت سربوت سرسري
ما تقدر الي اكبر منك وما زلت اذكر هذي الكلمة بعد ان تعدينا نقطة التفتيش وكانت اطول رحلة حيث استغرقت
اكثر من ساعة ونص ووصلنا الرياض ووالله عيى لا ينزل من السيارة الين اخذ 100 ريال وفوقها وقفت له لمزين
ودفعت له حق المشوار .

ومع هذا اقول لن يمنعني هذا الشيء من صنع المعروف حتى لو مع هذا الشايب مرة اخرى بالتحديد بركبة واذا
جى بيتكلم بقولة اسسسسسسسكت الين اوصلة مكان ما يبغى وابي اقولة قصيدة طبعا مو قصيدة صدقية بقولة
كلمات اغنية نانسي عجرم ( اطبطب ودلع ) الين اهبل به وبعدين اقولة ابغى 1000 ريال وبشت على القصيدة
على العموم الله سلمك ورجعت وبيض الله وجه من اسعفك وانا اقول آمين بما دعيت لهم فوالله انهم يستاهلون
بالذات الحين اختبارات والله يقويهم ويوفقهم .
اخوكم حجّر

[ندفرسان]

ابو محمد الله يهديك بس يعني ماتقدر تدق جوال على او على اللى انت خابر وحنا حولك لكن ماقول الا الله يهديك وسامحك ولاواحد مثلك يصير فى مثل هل الموقف ويدري انا جالسين ما عندنا شي لكن الحمدالله على السلامة .................
اخوك (ابومحمد) معني ادري وراهم ماوقفوا اكيد يبون (بندووووووووووول) علشان يساعدونك

[مريقب العيفار]

اهلين اخي هاوي خلا

انا معك ان نحافظ على صنائع المعروف بقدر استطاعتنا

لكن يجب ان لا ينسينا هذا الحذر

فالدنيا لم تعد كما كانت

الشباب الضائع من مدمنين ولصوص أصبحو كثر لا كثرهم الله

[بواسامه]

روى ابن عمرَ رضي الله عنهما أنّ رجلاً جاء إلى النبيّ فقال: يا رسولَ الله، أيُّ الناسِ أحبّ إلى الله؟ وأيّ الأعمالِ أحبُّ إلى الله؟ فقال رسولُ الله : ((أحبُّ الناسِ إلى الله تعالى أنفعُهم للنّاس، وأحبّ الأعمال إلى الله سرورٌ يدخِله إلى مسلمٍ أو يكشِف عنه كربةً أو تقضِي عنه دينًا أو تطرُد عنه جوعًا، ولأن أمشيَ مع أخٍ في حاجةٍ أحبّ إليّ مِن أن أعتكِفَ في هذا المسجد ـ يعني مسجدَ المدينة ـ شهرًا، ومن كفَّ غضبَه سترَ الله عورته، ومن كظمَ غيظَه ولو شاء أن يمضيَه أمضاه ملأَ الله قلبَه رجاءً يومَ القيامة، ومن مشى مع أخيه في حاجةٍ حتى تتهيّأ له أثبتَ الله قدمَه يوم تزول الأقدام، وإنَّ سوءَ الخلُق ليفسِد الدّين كما يفسِد الخلُّ العسل)) حديث رواه الطبرانيّ

[هاوي خلا]

الأخ العزي خالد :
اعتذر لكم عن عدم تمكني من الرد لعدم تواجدي على الجهاز لأيام الاربعاء والخميس والجمعة يعني من الأربعاء الساعة 11 إلى السبت الصبح لا احد يحاكيني هههههههههه على بالي مهم .
يشرفني مرورك ومشاركتك لي وفزعتك لي بالموضوع هذا أولاً :
ثانياً الله يسلك من كل شر يالغالي أنت ومن تحب وجميع اعضاء المنتدى .
ثالثاً وهو أني والله أحط لكل واحد من الناس عذرين أو ثلاثة أعذار ما هو واحد بس كله كوم واللي ما فتحوا الدرايش كوم وخيافين من ايش الشارع ((سري مري)) يعني رايح جاي السيارات وفيه محطة ومعطم كبيرين وفيه دورية وافقه بأخر الشارع عند المطعم تطلب عشا وش يخافون منه بعدين كذا واحد بسيارته ومع زملائة يعني يكفخونني وياخذون اللي بجيبي بعد .
رابعاً : والله أنك فرحتن يوم قلت انك تبي تفزع للناس من اليوم ورايح وهذا عاداتك يا أبو خلود ولا هي جديدة عليك يا بعدي وأنا ما كتبت الموضوع الا والله علشان أبث روح الحماسة ((حلوة العبارة هذي)) في نفسك وأنفس جميع اخوتي في المنتدى للفزعة للناس .
خامساً : والله ما حدن على السهر الا شاعر المليون تابعته وتعرف اللي توه طايح بالدشوش لو يجيبون مباراة تنس بين فنزولا والربع الخالي كان تابعتها ، وبعدين انا سهران على شان أناظر ((نبض الشارع) أخر الليل يسمع ببرنامج القناة الرياضية السعودية ههههههههههه.
سادساً : الله يجزاك خير ويسلمك ويخليك لعين ترجيك ونحن احد هذه العيون ((تأبرني))
أخوك اللي صلح البنشر / هاوي خلا .

[هاوي خلا]

أخوي العزيز الشبخ 2000 :
يا هلا وغلا والله بالغالي والله أن كلامك صحيح وجميل وشيء يفرح ويشرح الصدر في قصتك يالغالي و الله أني أعرف أن الناس فيهم خير وكتابتي للموضوع لكي نفعل هذه العادة الطيبة و التي حظ عليها ديننا الحنيف ورسولنا الكريم صلى الله عليه وسلم .
وبعدين اللي معه عايلة تراه يرحم من الناس بعض الناس يفزع علشان يترزز عند النسوان ، والله لو أنا داري معي بالطو ((كوت طويل ، يستخدمة افراد المباحث كثيراً للتمويه)) كان ملبسه المرتبه كنه مرة كان يا كثر الفزاعه .
وبالنسبة للنجدة يوم أقبلت عليهم ابي فزعتهم أخذو عشاهم ودكوها وابعدوا واصوت لهم واذن من طين واذن من عجين وشلون يسمعون بالاثنين يا حلوين .
أدري أني بثر ولا أعرف اتصرف بس لو مويطيري معي كان ما أحتجت الا لوجهه الكريم عز وجل .
وكما قال المثل الشرطة في اعطاء قسايم للشعب . الله يسلمك من كل شر ولا يحيجك الا لوجه الله تعالى .
أخوك / هاوي خلا .

[هاوي خلا]

العزيز حجّر :
الله يحييك ويشرفني كالعادة مرورك على الموضوع ، وبعدين الله يجزاك خير على توصيل العود ((الشايب)) بس كان يوم طولها عليك كان خليت الموتر يناتع وقله خل ننزل ندف السيارة تبي نتع وبعدها عشق وخل شكمانك يشويه اللي ما يستحي على باله ابو الطيب البحتري ((سمي أبو الطيب المتنبي)) وبعدين اجرك على الله ويمكن تشيل لك واحد يوسع صدرك بالخط ويعطيك معلومات جديدة وقصص مفيدة تفيدك في حياتك العلمية والعملية ، والشايب اللي ركبته يمكن الشمس مأثرتن عليه وقلبت راسه وبعدين صكك بقصيدة رد عليه واعرف قبيلته وولف لك قصيدة لو بدون قافية به وقله هذا شعر لبناني لأن أمي من ساحل العاج واقلب راسه لين يدوخ وينام وعطه من القصص وخاصة قصص العرس والحريم واوصافهم تلقاك وصلت الرياض وهو يسولف ومع أول ملف أرخ الباب وديور به لين يطيح ، بس يا ترى وش معه بالشنطة أكيد حاجة خطيرة هههههههه .
الله يسلمك أخوي حجّر من كل شر ولا يضيع المعروف بيننا ولا يحيجك الا لوجه الله تعالى .
أخوك / هاوي خلا .

[الرسن]

هاوي خلا
يقول المثل اولاد الحرام ماخلو لاولاد الحلال حاجه.
اسمح لي الرياض اصبحت مثل شيكاغو رياض اليوم ليست رياض الامس ياعزيزي
لاتلوم الناس من كثر مانقرا في الجرايد اصبحنا نخشى على مافي جيوبنا وايدينا
الا تقرء الا تشاهد انواع مختلفة من الجرائم والهدف واحد.
ياخي ارفق على اخوانك وترى الناس مهم واحد يمكن المحطة اللي انت فيها مشبوهه
يمكن العمالة مشبوهين يمكن المحطة ذي تحت المراقبة ضع الف احتمال والف توقع
لاتحسب المعروف انعدم بين الناس بالعكس فيه ناس يقومون بالمعروف ولايرجون الا الله
فخل ايمانك بالله قوي وقديما قيل من مأمنه يؤتى الحذر.
ارجو انك تستوعب ظروف وحالة الناس في هذه الايام اللي انتشر فيها السرق والخطف
والقتل بعد.
تدري معلسلامة والله يوفق

[هاوي خلا]

ندفرسان الحيبيب ((الحبيب بورقيبه)) :
الله يحييك يا أخوي وينك من زمان وين التلفونات والكشتات والله انك خرطي بس علشانك شاركت بالموضوع ابسامحك وشلون الأهل والأخوان والعيال والجماعة والشلة .
ادري يا بعدي انك منت مقصر وادري أنك راعي الأوله ((اجحده ، خليتك فوق بالمنتدى)) بس والله غابت عن والا اللي انت خابر ماهو مقصر بعد بس ما قام يسوي عشاه علشان يفك ويربط كفارات خله للوحوش اللي زيي هههههههه.
الله يسلمك من كل شر يا أبو محمد والسلام عليكم ورحمة الله وبركاته ، وسلمي على النشاما .
أخوك / هاوي خلا .

[هاوي خلا]

اخوي مريقب العيفار :
الله يسلمك وكلامك عين العقل والصواب الله يديم المعروف بين الناس ويهدي ويصلح من يسيء لمثل هذه الصفات المهم بالأنسان المسلم والتي تشوه من صورة مجتمعنا الجميل .
أخوك / هاوي خلا .

[هاوي خلا]

الغالي بو اسامة :
الله يجزاك خير على أيراد هذا الحديث اللي والله أني معلقه في مكتبي بالدوام ويا علنا من الناس اللي تقراء وتعمل بما قرأت وتستفيد من ما تسمع وترى وتقراء ولك مني خالص الشكر والتقدير ، جعلنا الله وأياك ممن يمشون في حاجات الناس .
أخوك / هاوي خلا .

[هاوي خلا]

أخوي العزيز الرسن :
الله يجزاك خير على ردك الجميل والسريع وانت عجل وانا اخوك واكيد انك صادم الجدار يوم قمت ، بالنسبة لكلامك جميل وصحيح بس قولة الرياض تخوف والرياض به ومابه لو الواحد سمع كلامك قعد ببيتهم الدنيا فيها خير وانا يا بعدي ما كتبت الموضوع الا للتذكير وليس لبث اليأس في قلوب الناس وكل أملي ان نتساعد في صناعة المعروف بيننا وبين الناس ((وتراي كد لحقن أذى وكانت في نفس الوقت اصنع المعروف للي تسبب بالأذى لي ولكن الحمد لله زادني هذا أصرار على أكمال ما بدأت به وإلى يوم الدين ان شاء الله .
وانت أخوي ان شاء الله مثلي وأحسن .
أخوك / هاوي خلا .

[عاشق سفر]

هاوي خلا والله ان موضوعك جدير بالاهتمام ويستاهل النقاش.... هذا وصار عليك الموقف بوسط البلد وعند محطة كيف لو كنت مع طريق طويل زي الرياض الطائف والا الخرج الامارات ليتك تلقى احد يفتح الدريشة 2 سم على قولك الا مافيه احد يوقف لك ابد....

بس تبي الصراحة اللي بالخطوط معذورين بس اللي بالبلد والله مايقدرون الواحد طبعا ما اقصد الا القلة...
وتبي علمي التمس عذر واقنع نفسك واقول انك بوقت متأخر بالليل واللي وقفوا لك مو سويين... وقول لنفسك لو كان بوقت عصر والا مغرب كان شفة وقفة رجال...


تركي بن عازب

[هاوي خلا]

الأخ العزيز الطيب تركي بن عازب :
يشرفني مرورك على الموضوع ومشاركتك لنا فيه وجدنا الفائدة الكبيرة المرجوة بأذن الله وكلامك صحيح أجل لو أنا بخط وبليل ومقطعه كان يجي خبري بالجرايد رجل بنشر كفره ولا لقى أحد يسعفه ومات من العطش وأكلنه القطط والذبان ولم يبقى فيه الا بطاقة الأحوال وسوف يتعرف على شخصيته عن طريق الحامض النووي والسيارة تبي تباع بحراج السيارات بالنسيم فعلى الراغبين دخول المناقصة الذهاب لأقرب مركز شرطة وطلب المساعدة هههههههههههههه.
وانا أخوك والله اني مثل ما قلت لبعض الشباب في بعض الردود ملتمس للواحد أكثر من عذر بس اللي فاقع مرارتي هو اللي فاتح الدريشة 2 سم يعني لو خلاها 3 سم كان أحسن هههههههه يعني لو فحط بوجهي وهج كان معذور خايف أو ما له نفس يكلم أحد أو ما معه ماطور أو ما يبي يساعد أحد بكيفه بس 2 سم كبيره شوي يعني القزازة تبي تحميه من الناس .
وحنا يا بعدي ما نبي رجال بالنهار نسوان بالليل نبي شبابنا وعيالنا يكونون شباب بالنهار ذياب بالليل ((هذا مثل بدعته قبل قليل)) وش رايك يا تركي يصلح يتداول بين الناس مثل الأسهم هههههههه.
اشكرك على مرورك العزيز على قلبي والذي يشرفني ويزيد في أثراء النقاش حول الموضوع ولا تحرمنا من أرائك أخوي العزيز .
أخوك / هاوي خلا .

[ابوسلطان 11]

راحت الاخلاق الله يخلف بس، والله يعينك

[هاوي خلا]

الأخ العزيز أبو سلطان 11 :
الله يحييك أخوي ويشرفني مشاركتك في الموضوع المهم والمطروح للنقاش ، بس عاد لا تصير متشائم مرة أخوي ابو سلطان ترى الدنيا بخير وانا حاط الموضوع حتى استثير حماسة الشباب وأجدد لهم هذه العادة والطبع الجميل اللي كنا مذكورين ومشهورين به بين دول العالم وبين الأديان الأخرى ، لا تكن نظرتك أخوي سوداوية ((حلوه سوداوية)) على بالي ببرنامج حواري ههههههههه.
الله لا يضيع المعروف بيننا وما دام هذا ردك فأنت أن شاء الله من أهل المعروف لأنك تتحسر عليه ، نقول المعروف مرض وان شاء الله يشفى ويعود كما كان وأحسن بس نقول أن شاء الله ونعمل به ونعلم من حولنا عليه ونعودهم على صنعه .
أخوك / هاوي خلا .

[إبن فيصل]

يا أخي العزيز الاول تحول شف وين كنا وين صرنا ألحين ....من أول ما يمديك توقف الا العالم كلهم موقفين يسألونك حاجة مساعدة شي...لكن ألحين كلن يقول الفكة ما لي ومال الناس ما أبغى المشاكل ولي وجهة نظر بسيطة في هذا الموضوع هو أن الناس تغيروا ...فنلاحظ إنك تفزع لبعض الناس ولا يجيك منهم الا الكرف وبس لا شكر ولا حمد ولا حتى كلمة يعطيك العافية....وبعضهم ما يجيك منهم الا التبلي عليك بكلام ما يصلح وإنك تساعدهم لإغراض سرقة منهم أو شي ...وغيرها الكثير...فهذا شي ينفر الناس من عمل الخير.

ولكن من وجهة نظري أن الانسان يعمل بأصله ويقدم المساعدة على قدر ما يقدر وفي وقت يمكن تكون المساعدة واجبة ..كيف يعني واجبة ....يعني أن المحتاج منقطع ما حوله أحد وفي خلا يعني إن ساعدته وأسعفته فكه الله وإن تركته بيتوهق وبتدهور حالته...لكن إذا كان في مكان حوله الناس والخدمات وعنده إرسال جوال فهذا ما ينخاف عليه بيلقى من أخوياه وربعه وبيتصرف.
لكن أنا أمشي على نظام ساعد الناس قد ما تقدر وإذا كانوا من الناس الي ما تقدر أسحب نفسك ويا دار ما دخلك شر.
آسف على الاطالة وشكراً.
وتقبلوا تحياتي...إبن فيصل،،،،

[ساروت]

يا شباب يقول انه سئل ما بين 25 الى 30 سيارة
وبعد ساعة جاه واحد وقاله اوصلك والصباح رباح
من الساعة 1.15 الى الساعة 4 الفجر
ما تنلااااااااام يا هاوى خلا
كلذا الوقت وكلذا الشباب والسيارات ومنطقة استراحات ليلها ونهارها واحد
الدنيا بخير والناس بينهم معروف لاكن الحق حق قصة تخلى الواحد ينصدم

انا مره صارلى زى كذا وقت الضحى رحت للعامل بغرفة وطقيت عليه
وقلت له قم افتح ماطور الهوا ليش تسكره على المسلمين يمانى وفتحه
والعام بعز الصيف حر موت احمر اتصل على واحد وقالى انه منسم بحي الحمرا وانا بالورشة فى السلي وقت الظهر طلعت دوامات زحمة وحر وانا عندى شغل بالورشة والمشوار بعيد قلت له ياخى وقف احد شف اى احد انا يبغالى اقل شي نص ساعة ويمكن ساعة الى ربع مع الزحمات
قالى لو لقيت احد اوقفه ما اتصلت عليك ما احد موقف لى بهاذا الوقت وهو صادق ماحد فاضي لحد حتى الاجر ما يبغونه واروح لخويي واجلس ساعتين من المشوار والطريق والكفر واخر شي طلع خويي يشد مهوب يفك الكفر

انا عندى قاعدة سو الى تقدر عليه واعرض خدماتك ولا تقول يمكن يجي احد يساعده خلنى اروح او تقول عيال الخير كثار يجون يساعدونه
وترا بعض الناس يستحى لازم تلزم عليه
واذا صارت لك مشكله لاتتنظر احد
حطوها قاعدة لا احد ينتظر من احد مساعده حاول تخلص
نفسك بنفسك او اتصل على اخوياك
طبعا موقف الرجال صعب شوي ساعه متاخره بالليل ولا فيه احد يعنى منكب صح
اللللللله المستعااااااااااااااااان بس

[هاوي خلا]

أبو فيصل العزيز :
اسعدني مشاركتك ومرورك على الموضوع واضافتك له مشاركة مفيدة وغنية بالحكم والمواعض الجميلة .
و عز الله كفيت ووفيت ولا طولت ولا لفيت وكثر الله من أمثالك وعلى قولك كلاً يعمل بأصله والناس ما هي واحد ، الله يجعلنا وأياك من أهل الخير والعاملين به و من اللي يتسابقون في مساعدة المحتاج وصناع المعروف من غر غرض ولا حاجة .
أخوك /هاوي خلا .

[هاوي خلا]

الأخ العزيز ساروت :
الله يعطيك العافية على مشاركتك المهم والمفيدة لنا ، و مثلك وشرواك هم اللي يزيدون الموضوع والحوار أهمية وبالنسبة للناس علمك ما هي واحد وأنت خليت شغلك و الورشة ورحت لخويلك وفزعت له وهذا ما هو كثير للي يستاهل ((بس حط على جنوط خويك سهم مثل اسطوانة الغاز (غلق) و (فتح) علشان ما يتوهق مرة ثانية )) هههههههه .
الله لا يحيجك وانا أخوك الا لوجهه الكريم والا الناس ترى بعضهم يحب الفزعة والخير للناس بس متى تلقى مثل هالشقردية اللي لقيتهم بأخر قصتي الله يخليهم لهلهم .
انت مصدوم وانا مصدوم والله يعين الورش على كثر ما أنصدمنا وشكلهم بيكسبون من كثر المنصدمين بالموضوع ههههههههه.
جعلني الله وأياك ممن يعمل الخير والمعروف ولا يريد له مقابل الا وجه الله تعالى .
أخوك / هاوي خلا.

[الربذي]

السلام عليكم
طبعا انت ماسلمت عشان كذا اسلم عليك
اخي الفاضل هاوى خلا المبنشر سابقا ((هذا بوسط الرياض شلون لو باحد الطرق))
قصتك قراتها وردود الاخوان حرف حرف اخوي هاوي فيه اسئله مرت علي وانا اقراء الردود وهي ليش ماكلمت على اخوياك
ثانيا ليت كل واحد رد يقول وش ناوي يسوا لو مر عليك او بموقف وجاه واحد مثلك وقد يكون احد الاعضاء من ردوا عليك هم من قابلتهم في محنتك
المهم اخي احينا وهم صادقين بعض الاخوة ان هناك استثنئات صح كذا !! مثل سالفة خوينا والشايب المهستر وقد يكون شاب مسوي شايب لان تصرفاته تدل على همجيه مقيته مع خبال لايوصف الا اذا كان مفوت مهذري
طبعا انطباعي انا ابي اشوف هيئته يمكن سكران وحاشا لله اخوي هاوي بس اتكلم عن انطباعي وبعدين يمكن البعض عنده ظروف قاهره وبعدين اسمع كلامه ويبين كل شي
ذكرتني بقصه احد الزملاء يقول في احد ليالي شهر رمضان المبارك كنت ذاهب الى غسيل الملابس لكي احضر بعض الملابس
وفي ذلك الوقت ناسي جوالي بالشقه وهو طالب بكلية الطب المهم يقول كلمت من تلفون ثابت المغسله على زملاي في الشقه اذا ماجابوا عشى اجيب معي يقول طبعا ماعلي شماغ ولاشي وراسي محلقه على الصفر المهم سياارتي شغاله كابرس موديل جديد يوم نظرت الا فيها واحد ويوم حرك وهرب بها واطش السماعي من يدي لكي اللحق به الغريب اني اصوت له بسعمي يبي ينكسر خاطره ويرجعلي حط رجله انهبلت بغير شعور اوقف السيارات ولا اميز اللي معي عايله ولي لحاله المهم البعض متاكد يحسبني سكران اصلع واقف بنص الشارع حسبي الله على من روعه
فعني انا تصدق اني اوقف للباكستاني واهندي والسوداني ولا اوقف لسعودي تبي تقول ليش اقول فيه الف طريقه تكلم على صديق تاخذ تاكسي
لاني غير مطمن له ابدا بدا وخصوصا اذا كان في مكان بعيد عن العمران ولا حلوله سياره ولا اذكر اركبت احد الا القاه عليه نص لفه بمعنى غير طبيعي تصدق صارت معي عدة حالات
واحد عذره يقول تخبر سيارتي جديده ولا ودي امشي عليها !!!!!!!!!!!!!!!! ولاخر يقول تعبت من السواقه وقفت سيارتي وجيت بلموزين تصدق ولا لا هذا كلام عقيل !!!!!! وبعدها مافيه امل اوقف لمن يلبس شماغ وثوب
الا اذا كان معه عائله ومتعطل لايمكن اتعداه ابدا بدا بدا وواحب عمل الخير والحمد لله وكم مره ساعدت ناس متعطلين وبعضهم سحبته بسيارتي بالنفود مسافه تقريبا عشرين كم تخيل لان سيارته متعطله وكنا صايمين رمضان وله ساعتين يقول يمرون واذا صوت لهم انحاشوا الانذال

[عاشق سفر]

الأخ العزيز الطيب تركي بن عازب :
يشرفني مرورك على الموضوع ومشاركتك لنا فيه وجدنا الفائدة الكبيرة المرجوة بأذن الله وكلامك صحيح أجل لو أنا بخط وبليل ومقطعه كان يجي خبري بالجرايد رجل بنشر كفره ولا لقى أحد يسعفه ومات من العطش وأكلنه القطط والذبان ولم يبقى فيه الا بطاقة الأحوال وسوف يتعرف على شخصيته عن طريق الحامض النووي والسيارة تبي تباع بحراج السيارات بالنسيم فعلى الراغبين دخول المناقصة الذهاب لأقرب مركز شرطة وطلب المساعدة هههههههههههههه.
وانا أخوك والله اني مثل ما قلت لبعض الشباب في بعض الردود ملتمس للواحد أكثر من عذر بس اللي فاقع مرارتي هو اللي فاتح الدريشة 2 سم يعني لو خلاها 3 سم كان أحسن هههههههه يعني لو فحط بوجهي وهج كان معذور خايف أو ما له نفس يكلم أحد أو ما معه ماطور أو ما يبي يساعد أحد بكيفه بس 2 سم كبيره شوي يعني القزازة تبي تحميه من الناس .
وحنا يا بعدي ما نبي رجال بالنهار نسوان بالليل نبي شبابنا وعيالنا يكونون شباب بالنهار ذياب بالليل ((هذا مثل بدعته قبل قليل)) وش رايك يا تركي يصلح يتداول بين الناس مثل الأسهم هههههههه.
اشكرك على مرورك العزيز على قلبي والذي يشرفني ويزيد في أثراء النقاش حول الموضوع ولا تحرمنا من أرائك أخوي العزيز .
أخوك / هاوي خلا .


أول شيء أحييك على اسلوبك الراقي...
ثاني شيء بالنسبة للخبر اللي بينزل في الجريدة بصراحة فكاهي بس اتمنى مايصير...
ثالثا حلوة 2 سم ههههههههههههه
رابع شيء بالنسبة للمثل يدل على انك حكيم وتقدر تألف مجلدات من هالحكم يالغالي...
خامس شيء بالنسبة لتداول هالمثل فلابد من زيادة راس المال عشان يدخل السوق...وبعدين بتداول ويصير مثل سهم الراجحي...

اخير تحياتي لك ...

[عاشق البران99]

قسم بالله ظاق صدري يوم قريت موضوعك لسببين :

الأول عشانك ،،،

الثاني أن المعروف مات بين الناس ،،،

الثالث (قلنا سببين وش جاب الثالث ههههههه ) موقف صار لي من زمان لكن ما أتذكر متى بالظبط لكن قبل البياجر والجوالات ،،،

الي صار الله يطول بعمرك على طاعته هو اني كنت راجع من الرياض للمجمعة بالليل على الخط السريع ومعي الوالدة الله يحفظها ، المهم قبل المجمعة بعشرين كيلو ظرب علي كفر وفرت السيارة كم فرة لكن الحمد لله ربك ستر علينا ( لكن الوالدة ارتفع الظغط معها من الروعة ) واستقرت السيارة بوسط الشارع لكن عكس السيد ، بسرعة عدلت جهة السيارة وطلعت يمين ( الكفر طبعاً قدام ) ، نزلت الاستبنة لقيتها منسمة يعني الله يعين ،، المهم وقفت أشر بيدي تقريباً أكثر من ساعة والسيارات الي مرت من عندي بالمآت ولا واحد كلف نفسه وشاف وش ابي ، والجو كان باااااارد جداً وهوا شديد لايمكن أنساه ،، بعد مايأست من الناس ركبت السيارة وحركت مع إن سواقتها صعبة جداً وخطرة لأن الكفر الي بنشر قدام ، مامشيت شوي إلا ألحت على الوالدة بالوقوف لأن صوت الكفر على الأرض خوفها وقالت يمكن نقلب أو يشب الكفر مع اني كنت مهدي مرة ، وقفت عشانها ونزلت ثاني مرة أشرت بيدي وشوي وقفوا شباب إماراتيين الله يوفقهم ( وللمعلومية ترا الشعب الإماراتي من أكثر شوب الخليج شهامة من غير قصور في البقية ) ويوم شافو معي مرة ماناقشو ولاتشاوروا ، على طول شالو الكفر وسيدا للمجمعة صلحوه ورجعوا حطوا الكفر وبعد ماشكرتهم ودعيت لهم بغيت أعطيهم حق التصليح لكن رفضو بشدة وركبو سيارتهم وحركو ،، وهذي قصتي والحمد لله على كل حال ،،،

الخلاصة أن كثيييييير من الناس مافيهم خير ولاحول ولاقوة إلا بالله ( يعني واحد متعطل في ليل والجو بارد حيل يجلس أكثر من ساعة مايوقف له أحد ) !!!! شي مخجل ،،،

[هاوي خلا]

الأخ العزيز الربذي :
سلام من الله عليك ورحمة الله وبركاته وأعتذر عن عدم السلام ((لأني كنت حزين والشيطان يدخل للأنسان في مرحلة ضعف )) واقدم اعتذاري مرة أخرى لعدم الرد عليك بأسرع وقت ، وأنت كريم وحنا نستاهل ((العفو)) منك .
كلامي أخوي العزيز جميل وهو يمثل وجهة نظرك التي أحترمها وكل أنسان يمشي على مبدى له في حياته يركز عليه ويتمسك فيه ويعتبره الأسلوب الأمثل للتعامل مع المستجدات التي تحيط به ((أدري دوختك بكثرة الهرج )) .
أولاً ما كلامت على زملائي لأني بوقت متأخر ليلاً ولا حبيت أزعجهم يمكن نايمين ووش هالصديق اللي يبي يكلم علشان بنشر .
ثانياً : أؤيدك على اقتراحك الجميل وليت كل واحد يكتب ردة فعله تجاه ماذا يعمل عندما يتعطل أو ماذا يعمل عندما يستوقفه أحد بالطريق .
ثالثاً : الاستثناءات هذي راجعه للشخص نفسه وما هو مقياسه ونظرته لمن حوله .
رابعاً : هذا شيء طبيعي أنك تعرف الرجال اللي تبي تواجه يعني لو واحد حاط الشماغ على الكتف وبيده زقارة ووجهه شبهه يمكن الواحد يفرك ما ساعده ولكن يجب أن لا نحكم على أحد حتى نسمع منه ونشاهد ما يحتاجة فإن كان بالمقدور والا يكفيه الدعاء له منك .
خامساً : قصة صديقك الطبيب دائماً تحصل وأهل الفزعة جزاهم الله خير يساعدون أما بلحق السيارة المسروقه حتى يوقفها السارق أو بأبلاغ أقرب مركز شرطة ((ويا ليل مطولك )) اذا وصلت الشرطة يمكن يتخرج خويك من كلية الطب ويسافر يكمل دراسته ويتزوج ويجيه عيال عام 2067 ميلادي بعدين يقولون له وش لون سيارك اللي انسرقت ، المهم يحق لك تعرف واحد دكتور يعني العلاجات ببلاش .
سادساً : أما بخصص وقوفك للأجنبي من دون السعودي فأنا اخالفك الرأي ((والخلاف في الرأي لا يفسد للود قضيه)) فمادمت واقف يا وقف لهم كلهم أو أتركهم كلهم ، وأحذرك ان استمريت على عملك من بعض الجنسيات اللي لا يخاف الله فيك ولا يخاف من الناس ، وأنت واجهت ناس ((مش ولا بد)) وحظك كذا بس ترى ساعدنا ناس وركبنا ناس زادنا شرف التعرف عليهم واصابعك ماهي سواء ، والساقط عليه سقوطه والرجال نتشرف بمعرفتهم وخدمتهم .
سابعاً : وأخيراً كلي ثقه بك أخوي الربذي أنك من أهل الخير وأهل الفزعة ولا اشك في ذلك و ما شاركت بالموضوع الا عن سابق تجربه وسابق خبره .
جزاك الله خير ، وجعلنا الله ممن يهب في مساعدة الآخرين وحفظنا من كل مكروه وجميع المسلمين ((تعبت وانا أكتب لك يا الطيب )) .
أخوك/ هاوي خلا .

[هاوي خلا]

الأخ العزيز تركي بن عازب :
الله يحييك وترى الرد فيه خفة دم شوي على شان نشيل الملل من الموضوع والمعذرة إذا استخفيت دمي زود ، ولا تستبعد شيء وانا أخوك، وبالنسبة للأسلوب هذا بعض ما عندكم ومنكم نستفيد أخوي العزيز ((أخجلت تواضعي )) تراي عاد مبسوط على المدح هههههههههه ، والحكم مثلك يعرف تؤخذ من المجانين ((خذو الحكمة من أفواه المجانين )) اعذنا الله وأياك من الجنون والمجانين ، اما بالنسبة للأسهم والله مالي بها خبر أسمعهم يقولون تداول وانخفاض وارتفاع والحمدلله لم ادخل فيها لشيء في نفسي وانا ما أعرف الا علك أبو سهم ، والسهم الملتهب ، وأسهم المخارج في الطرق بس .
اشكرك أخوي تركي على حسن ردودك ويشرفني ان اتواصل معك مثل هذا التواصل ويا هلا بك ومسهلا .
أخوك / هاوي خلا .

[هاوي خلا]

أخوي عاشق البران 99 :
السلام عليكم ورحمة الله وبركاته ((لا يزعل أخونا الربذي))
أولاً : الله لا يضيق صدرك ويسهل أمرك .
ثانياً : أشكرك على تفاعلك معنا في الموضوع المهم ((واللي تلدغه الداب يخاف من الحبل )) .
ثالثاً : الحمد لله على سلامتك وسلامة الوالدة والله يخليكم لبعض ولا يفرقكم ويطول بعمرها لأنها بحسبة أمي ((ووشلون الضغظ معها الآن عساه ان شاء الله متوازن وثابت )) رفع الله عنها كل مكروه .
رابعاً : اسئلني أنا عن أهل الأمارات يما تفازعنا بالمملكة وخارجها وأشهد بالله أنهم أهل نخوه ورجوله وفزعه ولي منهم أصدقاء كثيرون من جراء هذه المواقف ساعدوني وساعدتهم ((عيال زايد ما يجي منهم قصور = ناس تربوا على الفزعة وفزاع )) هذا مطلع قصيدة وعليك أكمالها أخوي عاشق البران 99 ، وترى النخوة بأهل الخليج كلهم ولكن لأن أهل الأمارات لازالوا أكثر أهل الخليج تمسك بعاداتهم وتقاليدهم تجد أن هذه الصفة المميزة فيهم كثر الله خيرهم ((بس لو ما هزمونا أمس كان تمام ((يستاهلون)) .
أرجوا أخيراً أخوي العزيز أن لا أكون أطلت عليك لأني لا مسكت الكي بورد أهوجس وأكتب ويجين الهام ((الهام شاهين)) ، وترى الناس ما هي واحد هذا يجب أن نأخذه بعين الأعتبار .
جعلنا الله وأياكم من الذين يسارعون في المساعدة والنجدة لمن يحتاجون منا ذلك .
أخوك / هاوي خلا .

[الكونترولCONTROL]

انت تتكلم عن المعروف من جهة العمال
=====================
ما هوب غريبة !!!! و لو كنت غير سعودي ساعدوك !!!!!!
خاصة البنغالي الحقير
اما اليماني فبعضهم مثل ما قلت و بعضهم لا ...
و اغلب الجنسيات ما فيهم معروف اصلا !!!!!!!!!!!!!
==========================
ما مات المعروف لكن انت حطك ربي بقدرته تحت رحمة اللي ما يعرفون المعروف

[عضو مكشاتي]

صدقت والله يا أخوي

[هاوي خلا]

أخوي العزيز الكنترول Control :
حياك الله وأهلاً بك في الموضوع لتشاركنا وتثري الموضوع ببعض ماعندك اخي العزيز ، كلامي والله عن الناس عامة العمال والجنسيات المختلفة وحتى السعوديين الله يخلف علي وعليك ، والبنغالي معروف ((قفش هندي ومكينة باكستاني)) يعني الجسم هندي والتفكير والأجرام باكستاني وذبحة الأنسان عنده مثل سلام عليكم ، أما اليماني فوالله بهم نخوة ومرجله بس جيلهم الجديد ((مو أد هيك)) هذي باللبناني ، والله انا أخالفك الرأي فيه مثلاً السوداني فزوع والهندي مثل أما شرق أسيا ذولا مثل جريات الكلاب يتجمعون ولا ينفعون .
وأنت تقول عين الصواب الحمدلله ما مات المعروف والمعروف باقي ولكن العنوان للأثارة ((مانشيت)) على بالي فنان بأستدراج الأعضاء إلى الموضوع .
يسعدني تفاعلكم معي ، ويسعدني أكثر أرائكم النيرة اللي خلت الليل نهار الله ينور لك دربك .
أخوك / هاوي خلا .

[هاوي خلا]

أخوي عضو مكشاتي :
يا هلا وغلا والله بها الصوت قصدي بالهكتابة الله يحييك ويشرفني مرورك ، وانت توافقنا الرأي أن المعروف ما مات ولكن مرض الله يشفيه ويقومه بالعافية لأننا وش حنا لولاه ، ما نسوى شيء .
جعلنا لله وأياكم من صانعي المعروف وأهل الخير .
أخوك / هاوي خلا .

[سندباد الخليج]

اخوي هاوي خلا

المعروف باقي بين الناس بس قدرك انك ماطحت بالاجاويد إلا بالاخير

وهذا عبره لمن يمشي بدون اهم الاغراض بالسياره

الله لايوريك ماتكره والمسلمين اجمعين

[هاوي خلا]

الأخ العزيز سندباد الخليج :
والله ما شاء الله خوش أسم ((تبارك الله)) كنت قبل شوي أكتب رد لك بس انقطع الانترنت علي وها انا ذا أكتب لك من جديد وبكل سرور فرحت بمشاركتك لنا في الموضوع وأثرائك له بهذه السطور الجميلة وترى كان ردي أحسن من هذا بس ضيعت الكلام اللي كتبته قبل .
لاشك أن كلامك صحيح بأن المعروف حي يرزق وأنه لم يمت ولن يموت أن شاء الله بس أنه مرض مرض بسيط ((انفلوونزا)) مثلاً بس ما هي انفلوونزا الطيور ونرجوا من الله تعالى أن يشفي المعروف وأن نشوفه بالصحة والعافية .
على قولك انا مقرود ولا قام حظي الا أخر الليل واللي فزعولي الله يرحم والديهم عن النار و يوفقهم دنيا وآخره .
ومن ناحية النصيحة بأخذ الأغراض انا من الناس اللي ما أكثر من أغراضي بس القرادة غسلت الموتر ونزلتهن بالبيت والا أنا من أحرص الناس على الأغراض المهمة مثل ((ماطور الهواء ، الاشتراك ، واير السحب ، سيور ، شنطة عدة ولا تلقاه بأكبر الورش ، رقع ولياور ورقع نارية وتيوبلس ، لصاتك )) ما بقى الا عامل أحطة بالشنطة بس ، و والله حتى الماء أحط لي جركل أبو خمسة أو سته ريال الأبيض الكبير معي من زود الحرص ، بس الاقدار تمشي ولا ندري عن المكتوب ((وكل صفقه أو صفعة بتعليمه )) وأنا ياما جاني من الكفوف والطراقات وأبشرك تعلمت ولله الحمد وأتوب وتوبه وآخر نوبه .
الله يجمعنا وياك على الخير ويبعد عنا الشر ولا يحيجك ولا يحيجني الا لوجهه الكريم وأن ينور عليك طريقك في سبيل الخير والصلاح وأن يجعلنا جميعاً ممن يحب فعل الخير والمساعدة ونجدة المحتاج والمسارعة لفعل الخير .
أخوك / هاوي خلا .

[anas]

لا ما مات المعروف وخاصة عند الاصدقاء ، ولو انا من غيرك اتصلت على بعض الاصدقاء حتى اتأكد من صدقهم .
قصة حصلت لإثنين من الاصدقاء وهي باختصار شديد ان احد الزملاء اتصل على صديقه ( محمد) في الرياض وقال له اخونا (ضيف الله) انا قريب من مكة والسيارة تعطلت ولا يوجد لدي المال الكافي لإصلاحها لأن المال اللي معي يا دوب يكفي لعمرة والسكن ... ، وقام محمد مباشرة من الرياض الى مكة وعند الوصول الى مكة استبدل السيارة مع( ضيف الله ) واعطاه الددسن غمارتين واخذ الكابرس وصلحه ورجع محمد للرياض .
صدقني اخي لو الاثنين ما اعرفهم وهم بنفسهم رووا القصة لي كان ما صدقت هذه القصة ابدا .
وش رايك هل المعروف مات بين الناس ؟
هذه القصة التي حدثت قبل 9 سنين لاثنين من الاصدقاء (ضيف الله ) و(محمد)

[الربذي]

تصدق مالومك وخصوصا اني تذكرت قصتين للوالد الله يحفظه وحده وجد شاب مبنشر المهم انزل الاستبنه ووركبه الشاب بالسياره وقال الوعد قدام عند البنشري لان كفرته ضاربه يقول عشان اركب كفره واعطيك استبنتك مشى معه ابوي المهم وصل الورشه ويبي ياطمن ابوي وقف عند الورشه هو يحسب ابوي نزل من السياره او راح للبيت ربي اعماه الا وهو ينحاش بسيارته وواستبنة سيارت ابوي معه واضحكني الوالد مره يقول وانا اتل السياره وراه واحد على الجدار واقف قدامه وانزل له ركض0 هالخسيس يقول بط كبدي يستهبلني شايفني شايب وماعرف اسوق زين وقال انحاش بسهوله بس ترا ابوي ذيب يقول امسك تلابيبه واخذ المفتاح واهزه هز وقلتله يااللي ماتستحي مسويلك معروف ومعطيك العفريته ومفتاح الكفر ومنزل لك استبنتي ومشيني وراك وانا ماهو طريقي راجع من شانك وبالاخير تقلب المعروف وتنحاش بعد قال خلاص خلاص انا اسف وقام يتراعد المسكين ابوي يخوف اذا زعل قال لابوي اسمحلي عطني المفتاح ابي ادي السياره الورشه قل والله لو متر نزل الكفره يا!!!! طبعا كلمه لاتكتب بمنتدى محترم كهذا يقول ويرفع العفريته وينزل كفري واخذه وامشي واتركه ويروح هذا الخبل للورشه على ارجوله طبعا سيارته حوالي ستين متر عن الورشه منظره مضحك مره يقول ابوي سالت البنشري وش قاله يوم وقف عنده قال ماقال شي نظر وراه وانحاش وابوي كان بجنبه يحسبه ماوصل !! ى
وقصه جديده سيارت ابوي بنشرت وبرد يقول كل من اشرتله زاد سرعته وبعد كم ساعه جاه راعي قلاب فلبيني يشتغل بالشركه اللي تردم الطريق الي دعس ابوي السيخ فيه وبنشر عليه الكفر السياره جديده وكفرات وكاله بس المشكله تخبر شايب وعجز يفك الكفر ولا استبنه تمام ماطبت الارض من الوكاله يقول يوم وقف عندي كانه نازل على من السماء تخيل شايب يرحم ياخي تخيل شايب ياشر لك وتنحاش عنه وش القلوب ذي والعياذ بالله وابوي الحبيب واقف يشار لناس اكثر من ساعتين طبعا معه جوال بس مافيه بث وهو اراد اختصارالطريق من 200 كم الى 75 بس وبنشر بدعسه لسيخ ردميه تحت الانشاء لطريق اسفلت يقول نزل وركب اللاستبنه ويقول يوم خلص انا طبعا يعيي علي يقولي اركب عن البردالقصه هذي قبل شهر تقريبا هابه شماليه شديده البروده تخبر برد حائل0ركب وخلص جاء ابوي يبي يعطيه فلوس رفض رفضا باتا والله لو ادري وينه هالفلبيني النشمي لاعطيه 500 ريال بيض الله وجهه وهداه للاسلام ذلك الفلبيني الشهم ويمكن مسلم لاندري وربعك يقول ابوي يهدون لانه طريق صحراوي واذا اشرت دعس وغبر عليه يحسب ابوي يبي ياكله ولا عشرين سياره ويقول ابوي ترا من عذرهم برد طيب يابيي وعليك انت مو برد حفظك الله ولا سلم منهم مغط ابره
طبعا ابوي يقول مات المعروف باسباب البعض وانتشار المخدرات وغيرها من اللي تخرب العقول اللي خلقها الله سبحانه نظيفه

[الكونترولCONTROL]

الربذي وراك كاتب لنا بقلم السبورة ؟؟!!

[هاوي خلا]

أخوتي الأعزاء من ضيوف وأعضاء :
أسف على الغيبة ولكن لم أكن متواجد للرد عليكم وتعرفون العطلة الواحد ما يصدق يفتك من الشغل والدعوى ربيع وخير وفقع ، الله يتمم علينا وعليكم بالصحة والعافية ، والآن نبداء الردود .
أخوكم / هاوي خلا .

[هاوي خلا]

الأخ العزيز anas :
شكراً على مرورك أولاً ويشرفني مشاركتك بالموضوع واعطائنا ما عندك من أخبار وفوائد وجزاك الله خير على كلامك الجميل ، وانا يالطيب لو كلمت احد الأصدقاء ما قصروا وترى بعض الاصدقاء مثل الأخوان وأكثر وبعضهم والله ما ينفعك بشيء يبي منك شيء تغدي مهنا حليلك عنده ويخلص شغله يرميك ويروح ويخليك عنده مبداء ((الصديق مثل السجارة اذا خلصت منه طفه أو أدعسه برجلك )) وهذولا ولله الحمد ما أعرف منهم أحد والله يجعلك ما تعرف منهم أحد ، بس رفيقك بيض الله وجهه عز الله أنه خوي وبس وترى الخويا مثل الأخوان وأكثر وترى الطيبين للطيبين وما صار بهالطيب الا من طيب ربعه وانت واحد منهم .
الله يخليكم لبعض ويديم بينكم المعروف .
أخوك / هاوي خلا .

[هاوي خلا]

أخوي الربذي :
يا حبيبي أنت والله أني ولعت من الهيس اللي سوى السوات ببوك وعز الله أن أبوك أسد وأنت أحد اشباله وليته مضيعن مفتاحه علشان يقعد هالحرامي ينقش خشمة وكان ودي أن هالولد يكون بأخلاق الفلبيني اللي أقول أن شاء الله أنه مسلم على سواته وأن كان غير مسلم فأفعاله أفعال مسلمين أما هالهيس اللي يبي يسرق الكفر فهو والله هو اللي عمله عمل كفار .
سرني مرورك ، والكنترول يقول أنك تكتب بقلم سبورة يمكن أنه مدرس بس خله عنك كان كتابتك بالقلم مثل هالخط ففتح محل خط وأقهر الكنترول اللي غاير منك على زين خطك وإلى جاء الكنترول يبي منك تخط له للفصل لوحة أرفض والا أدبل السعر عليه ولا تبيع عليه أقلام ولا صحايف (((قديم أنا )) .
اشكرك على مشاركتك ، وسر هذه القصص الجميلة والمعبرة والمفيدة .
أخوك / هاوي خلا .

[هاوي خلا]

أخوي الكنترول :
يالله انك تحييه ، وبعدين يا أخي الرجال من تأثير القصه عليه وأن أبوه ما أحد ساعده وهالهيس يبي يسرق الكفر كتب بقلم عريض من زود القهر ، وبعدين ما عندك قلم خط عريض يا أخي أشتر لك واحد من المكتبة والا أن بغيت شارك معنا ببخاخ المهم تشارك .
الله يحيي هالوجه وخف على الربذي شوي خله يعبر عن معاناة أبوه والرجال شرط أنه لو لقى الفلبيني يبي يعطيه 500 ريال أنت سو نفسك فلبيني يعني شد وجهك وقمط عيونك وخذ الـ 500 وأشتر بها أقلام بكافة المقاسات ههههههههههههههههههههه .
سررت لسماع كتابتك في الموضوع ومشاهدة صوتك عبر النت .
أخوك / هاوي خلا .

[الربذي]

هلا وغلا بهاوي خلا فطستني من الضحك اجل يسوي نفسه فلبيني !!!!صدقت ياخوك الواحد ماصدق بالعطله انا طالع من كم يوم بر وناسه بين الرالي وربيع جنوب القصيم ترا حليل بس نشوف خضار يكفينا اشوى من حائل الله يرحمنا كل شي اشهب حتى الطلح والشجر
وفرحنا بشوف الخضار هناك
اما سالفت اخونا الكنترول فياربي تحييه وابرك ساعه اني خطيت بالقلم عشان نشوف اسمه ونقراء رده
ياخيي هذا من زود القهر مثل ماقال اخوي هاوي خلا وبعدين عشان الواحد يقراه بسهوله لان الخط الصغير متعب تخبر الشوف قل !!!! اضحك بواحد يقول اقر لي رسالة هالجوال عجزت اشوف !!

[هاوي خلا]

اخوي الربذي :
الله يوسع صدرك دايم ويديم عليك الوناسة ، بس لا يزعل علينا حبيبنا الكنترول .
اخوك / هاوي خلا .