زيارتي الأولى لسوق الرياض

[خيال الصبحا]

بسم الله الرحمن الرحيم







السلام عليكم



ورحمة الله وبركاته



كيف حالكم يا أهل مكشات







بيوم الخميس الموافق 28/12/1427هـ



رحت لسوق الرياض. وكنت دايم أسمع به ولا عمري



جيته.المهم أني وصلت على الوصف لطريق طارق بن زياد.



تعديت الإشارة الأولى والثانية وأنا أتلفت وما شفت السوق ورجعت , ومره



ثانية تعديت الإشارة الأولى والثانية ورجعت , ووقفت عند رجال وسألته ودلني







المهم وصلت السوق.



.

.



.



(وأنا من طلعت من الخرج وأنا أنتظر شوفت سوق الرياض . ويوم وصلت للسوق ألا



الوضع مزري.)تخيلوا معي أن السوق الي دايم أسمع عنه طلع على رصيف بالشارع,يعني



الصقارين يجتمعون على رصيف بأحد الشوراع ويبيعون ويشترون.أنا بصراحة تفاجأت.



أقل شيء كنت أتخيله أنه زي سوق الحمام عندنا(سوق الحمام بالخرج برحة كبيرة والناس تبيع وتشري)







المهم قلت يالله ماهي مشكلة أهم شيء أنهم يبيعون ويشرون.



*على فكره أنا ماجيت أشتري ولكن أتفرج(شوف وحرق جوف هههههههه)*



المهم نزلت للسوق وكان فيه تقريباً 5 طيور فقط( لإني جيت بدري)



وأتصل بي الأخ أبو عبدالله(طارق الحربي)وبعد لحظات جاء للسوق.







وبدء الناس يجون للسوق.



وبدء الدلال يحرج على الطيور و كان بالسوق



طيور حرار جرودية(جمع جرودي)أنا طاح قلبي عندهن ما شاء الله عليهن.



وكان فيه حرار غير الجروديات



وكان فيه شياهين



وكان فيه وكري واحد



وكانت الأسعار مناسبه وأقل بكثير مما توقعت



تخيلوا أن أغلى طير باعوه وأنا موجود تقريباً بـ 5400 ريال.



طبعا الدلال حرج على الحرار وأنا موجود.وما ادري بعد



ما مشيت وش باعوا(العلم عند طارق الحربي)







المهم أني بعد ماشفت السوق وأخذت فيه أكثر من ساعه



ركبت موتري وللخرج,ولكن بعد ما جاء ببالي كم سؤال



أبيكم تجاوبونها(ولا عليكم أمر)











***







1-فيه طير بدء يحرج عليه الدلال وبعد شوي شافه رجال



وقال الطير مافيه أمواس , وفعلاً شافوه الا مافيه أمواس , ورجع



الدلال يحرج عليه من جديد.



كيف عرف الرجال أن الطير مافيه أمواس(أظنه ماعد الريش ولكن من النظرة)؟



(تقريباً عرفت الحل ,وهذا هو سبب تعديل المشاركة, ولكن أبي أتأكد أكثر

عرف أن مابه أمواس أن الأمواس أقصر من الي قبلها , ويوم شاف أخر ريشه إلا طويلة ومابعدها

شيء أقصر منها , فعرف أن مابه امواس)



2- هل الطير الي مقاسه فوق 17يصيد الكراوين؟







3-هل هذا هو السوق الوحيد بالريض(الي على طريق طارق بن زياد)أو فيه أسواق



غيره؟أبو معيض هل هذا السوق الي أنت تجي له بالرياض(أذكر أني كلمتك مرة وقلت لي



انك تجي مرات لسوق الرياض)








4-فيه سؤالين مستطرفات مالهن شغل بالسوق

أ-الطير الطلاع لاشاف الحبارى وهو على التكية وش يسوي ؟ يطير والا ينزل عن التكية؟

أنا ادري أن الطلع صفه مكتسبه بالتعليم , وأعرف طريقة تعليم الطلع , ولكن الشيء الي يسويه

الطير هل هو بالتعليم(أقصد أن بعض الطيور ينزل من التكية , وبعضها يومي براسه , وبعضها

يكفخ , فهل هالاشياء بالتعلوم؟)

ب-الي يجي لمكان يدور به على جرة حباري وش يسوي؟هل يمشي ويناظر بالارض يتشوف

الجرة؟ والا كيف؟(إن كنت بسهلة متساوية مد نظرك وش تسوي , كل يومك وانت تناظر بالارض؟والا فيه دلائل

معينه؟)



(جتني فرصه وشاركت , والا اختباراتي ماتقضي ليوم 16-1)



اسف للإطالة



وشكراً

[القحطاني505]

مشكوووور اخوي خيال الصبحا وانا والله مثلك دايم اسمع عن سوق الرياض ولا مره جيته والله لايهينك

[طارق الحربي]

حيا الله ابو نايف

تصدق اني كتبت رد وش طوله وفجأة انمسح :)

على العموم

طبعا لا تقارن سوق الطيور بسوق الحمام او النياق بالخرج او حتى سوق الحمام بالرياض لان كلهن كبار وفيهن تنظيم رائع


طبعا الطيور كانت واجد وبسعر رخيص جدا والناس ودها تبيع بس يردها 200 او 300 ريال بس والشراي وده ياخذ بارخص سعر هذا الكلام عن الحرار بس

الشواهين والوكارى قليله

كان فيه طيور النورس الظاهر الجوز ب 150 ريال انطلق منها واحد من راعيه وطار وارتفع فوق فوق فوووووووق مما شجع الناس انهم يشترون منه عشان يعلمون طيورهم بس للاسف الناس تفاصل ولا تشتري والشايب راسه ناشف

اكثر اللي يسومون شريطيه يفتحون الباب ب 1500 ريال او 2000 ريال

طبعا الطير ابو 5400 ريال شراه واحد من راعيه الجديد ب 6 الاف ريال بنفس الوقت والطير اشقر من طرح الحماد راسه كاشف معلم على ثلاث وانا شايف الطير قبل وطياره زيييييين

اعلى طير انسام كان ب 10500 ريال بس مابيع

الطيور الرديه اكثر من الزينه

لوحظ وجود ناس كثير من الساحل الغربي

لوحظ وجود كثير من غير السعوديين بهيئة سعوديين يبي يبيعون فروخ حرار ولا يعرفون علومها :)

فيه 3 طيور وحوش مدعيه بس من طرح الحماد وافي ولزيز ومثلوث حمر صافيات لم تباع السوم وقف على الوافي 3200 ريال

البيع قليل حيث لم تباع طيور واجده والردي يكسرون سعره بقوه

كثير من البياعين يحلف ان طيره شاريه بنص الموسم بضعف السعر اللي يسام فيه

الغريبه ان فيه ناس ودها تتخلص من الطيور منهم الطير اللي بيع ب 6 الاف ريال حيث يقول للدلال فكني منه بعه باي سعر :)

اسعار المحلات غاليه جدا اما الحراج رخيييييص يعني اللي يبي يشتري حر يشتري من الحراج شوف عينك ومن راعيه ورخيص

متوسط الاسعار 2200 ريال للوافيات



اما اسئلتك يابو نايف

السؤال الاول

الشريطي اللي يبي يتشري شاف الموس يسوق طبعا راعي الطير ماعلمهم ولا اكتشف الدلال الشي هذا هذا اللي خلاهم يعيدون السوم .


السؤال الثاني

يصيد الكراوين ولكن بصعوبة لكبر حجمه خصوصا وقت العودة يبيلها شيهانه ولا وكري ولا مثلوث ولا حر سبوق مرره


السؤال الثالث

طبعا هذا هو السوق الرسمي وفيه محلات بشارع سلمان الفارسي بحي الخليج وفيه استراحات مثل استراحة زياد الحربي فيها طيور طيبه جدااااا


السؤال الرابع
أ- الطير اذا طلع يتوق يعني يومي براسه ويهد على اللي طلع عليه من السيارة طبعا لازم تعلمه على التكيه وعلى انه كيف يطلع من السيرة من الدرايش

ب- الواحد ينزل يقص الجره اذا كانت جديده يفرع للطير ويفك سبوقه عشان يطلع اما اذا كانت جديده بعضهم مايحرص على انه يقصها يعني يمشي ويخلي الطير مفرع عشان يطلع ويحاول يقص بالسيارة


تحياتي لك

الله يعيننا وياك على الاختبارات