سوال للي ركبو مكاين دينالي على جيب ابي نصيحه

[عبقري91]

معاي هدد97 صراحه عزمه ماش وشرب بانزين ومشكلتي متعود على الاسيارات الامريكيه
وهذا للبر كشته ومقناص
السوال. ودي بمكينة دينالي رجل بطرب روحي
لا ابي مراقا ولا احب اروح لاماكن تجمعاتهم
عاشق للكشتات والمقانيص وامسك خطوط عليه بكم المملكه ماشاء الله كبيره من الرياض لا لشمال ومن الرياض لجيزان ولا تبوك. الي هو معناته فيه خطوط طويله
وفيه نفود ونقر وفيه ضلع وانتم ادرا بالحره
كان براسي مكينة لكزس لاكن عزمها ما اعجبني ومكينة الvxr 8سرندل ماش تسارعها غبي
ومكاين الامريكي ماشاء الله جباره من تنشقها دعسه تحس بجنون القوه وهذا الي ابحث عنه
الي بحط عليها هدرز فلتر مراوح. واتوقع هذي الشغلات الزاميه
واكيد المكينه اقتصاديه للبانزين بدل ماتمشيني مكيمة البلد 500 كم. وعليه زياده لتانكيين. هذي بتمشيني دبلها ماشاء الله
والحراره شايلها من راسي لانها المنيوم مي بحديد
الي خايف منه. القير يتحمل. مع السرعات العاليه لا 16 او 180 تكون المكينه مشحوطه. يعني بدل مايكون الضغط على 3 يكون على 5 لختلاف القير والدفرنس الخربات كيف. مع اني استخدم دينالي والحمدلله ماشفت منه شي كد ومد
هل لازم ابرمج واغير الكمبيوتر

ابي ورشه شغلها انيق وتسليك الكهرب يفتح النفس
الاهم كم تكلف مع هدرزها وحوستها
من غير الرجيع
وسلامتكم

[ابوراكان تبوك]

وجهه نظري

مقناص مع موتر مرهم ماتركب

لان القنوص يدورون الموتر اللي صوته هادي
المرهم صوته مزعج تقول شيول

اعرف قنوص كثيرين يعشقون ال 97 ولا عذربو فيه ابداااااا

المرهم والله بيشغلك بتفتح على نفسك باب كل شوي ادفع

هذا واحد من الشباب رهم ودفع 17000 مابين تحويله وهدرز وملحقاتها

والله في اقل من ثلاث شهور 2 جربكس ماهو من وكاله يقولون انا بنفسي مطبق معه الجربكسات

لانه اكثر مايتأثر الفحمه تعظ وتخرب القير

اذا انك رجال هاوي قطعات وملطعه في المقانيص رهم

والله يا اخوك ماتسوى الدراهم اللي تدفعها ع الترهيم بتشعر في الغبنه اذ وقفك ع الخط وتأشر
غير كذا حتى الفحص مايقبله

نصيحتي وانت رجل تطلع بر وتقنص

خذ لك موتر على بيته عزم وخف نفس بدون ترهيمات
الجيب الربع خفيف ونشيط وموصلك للي تبي وانت مرتاح البال وخلي الهدد للمشاوير

[أبوصالح9]

تعوذ من الشيطان ولا ترهم - وش تبي بالخساير والشقى - اذا تبي تخسر وعندك نية تدفع حط موترك عند ورشة شغلهم صح وامينين وخلهم ينفضون موترك نفض - من زمان وانا متابع لمواضيعك واشوفك تشكى من كثر المشاكل اللي بموترك - طق لك كربوريتر جديد وشيك على البلوف يمكن تحتاج وزن وغير اسلاك البواجي والبواجي ركب NGK وغير صفاية البنزين وفلتر الهواء وطرمبة البنزين - ولاتحط الا جديد اصلي وكالة طبعا من محلات قطع الغيار المعروفه مهب من الوكالة نفسها لان الوكالة مع العلباة - والديلكو اوزنه وزن مضبوط - طبعا كل كلامي اذا القطع عندك مستهلكه - واذا انت ناوي تشري كربوريتر جديد خل موترك يفضي على الاخر وعب لك جركل ابو ريالين قاز واذا شفته يبي يقطع وقف بالمحطه وصب القاز اول بالتانكي همن خله يعبي لك بنزين احمر بحدود 40 ريال وامسك لك خط وخل دعستك ثابته عشان ينظف لك المواصير - يعني خل الكربوريتر القديم للتنظيف ولو كتب الله وغيرت القطع الجديده صفاية بنزين وكربوريتر لاتسوي هالحركة لانها تحرق الجلد عليك - بعدين موترك فيه مشكله اكيد مهب معقولة يمشيك 500 كيلو بس المفروض انه يمشيك الى 600 كيلو بالراحه الا اذا انك راعي سرعه هذا شي ثاني - وراعي القنص والقطوع مايصلح له الترهيم وانت ابخص - ولاتقارن بين مكينة الدينالي ومكينة الهدد - انت اللي قالب راسك لانزلت من الدينالي طاح من عينك الهدد بعزمه - وبالاخير لاتلعب بموترك تراك بتحسف - اقول هالكلام لان معي مثل موترك هههههههههههههههههه - بالتوفيق