جراند ماركيز 96 يطفي عند المطاب واللفات * بحاجة للسياره *

[عمررر الحربي]

السلام عليكم ورحمة الله وبركاته
مساكم الله بخير
اخواني عندي جراند ماركيز 96 فيه مشكلة وهي انه يطفي مع المطاب واللفات والرقيات والنزلات .. اذا الطريق متساوي صافي وماعليه
* معلومات اضافية :
- مكينة 99
- اذا طول ماشتغل يومين وكذا مايشتغل الا بعد 3 دقات
- بعض الاحيان صافي 100%
- تم تغيير البطاريه والطرمبة قبل يومين
- البواجي واسلاكها عمرها سنه
- احيانا مايشتغل الا بعد ماحرك الاسلاك اللي عند المكينه وخلفها بعشوائية
- تم فصل الزر اللي بالشنطه الخاص بالطوارئ لفصل الكهرباء عن السياره .

مانظفت منظم الهواء ولكن يعمل بكفاءة .


اي حلول ؟؟ الصراحه اكلتني الورش كل شوي فحص كهرباء ومانطلع بنتيجه ..

الاصيل الحجازي ولا يهونون بقية الاعضاء ..

اتمنى ان يكون الموضوع مرتب والمعلومات واضحه .. بانتظاركم :D:D

[عمررر الحربي]

up - up - up

[ابوراكان تبوك]

كأنك تتكلم عن مشكله هبلت في بقراند ماركيز 96
كانت تطفي مع اللفات والدورات ابلشتني في البلد
السبب لقيت حساس السرعة يجيه تهريب زيت من الصوفة وفكيته وغسلته ببنزين وصلحت الصوفة وضبط1000%
تلقاه في جنب القير راكب في نفس جرم القير من جهه السائق قطعة مربعه كبر كف يدك شوفها حولها تهريبات
حساس الهواء يسوي هاذي الحركة لكن اسحب الهوز اللي جنبه وبخ جواه بختين اسي ديلكو

[ابوراكان تبوك]

نسيت سلك ايضا في اصبع البطارية + ياليت تشيك عليه هذا حتى وانا كان مشدود اذا به املاح يقطع الكهرب وتصبح السياره جثة هامدة

[عمررر الحربي]

كأنك تتكلم عن مشكله هبلت في بقراند ماركيز 96
كانت تطفي مع اللفات والدورات ابلشتني في البلد
السبب لقيت حساس السرعة يجيه تهريب زيت من الصوفة وفكيته وغسلته ببنزين وصلحت الصوفة وضبط1000%
تلقاه في جنب القير راكب في نفس جرم القير من جهه السائق قطعة مربعه كبر كف يدك شوفها حولها تهريبات
حساس الهواء يسوي هاذي الحركة لكن اسحب الهوز اللي جنبه وبخ جواه بختين اسي ديلكو

اخوي القير مايهرب ولا ينقص والصوف كلها ممتازه والبطاريه مثل ماتكلمت مغيره والاصابع مربوطه زين:(


ابغى حل

[SGL]

سوي تنظيف لثروتل البوابه
وشيك على الأفياش اللي راكبه فيه وشيك على فيش حساس الهواء مشكلتك حسب شرحك إن الخلل في فيش أو سلك شبه منقطع يفصل ويرجع

[ابوراكان تبوك]

اخوي القير مايهرب ولا ينقص والصوف كلها ممتازه والبطاريه مثل ماتكلمت مغيره والاصابع مربوطه زين:(


ابغى حل

اذا انك متأكد فك حساس الهواء ونظفة
ومثل ماذكرو الاخوان + الثروتل
غير كذا ماني خابر شي يسوي طفيات والسيارة تمشي

[أبوصالح9]

- احيانا مايشتغل الا بعد ماحرك الاسلاك اللي عند المكينه وخلفها بعشوائية




اتوقع عندك سلك منجرح من خلال كلامك السابق - شيك على الكويلات

[أبوعتيق]

أحتمال كبير يكون( حساس الكرنك) وللاسف لايمكن لاي كهربائي كشفة إلا إذاكان مختص في صيانة الفورد لايتجاوز سعرة 200 ريال
في أحد المرات غيرته في الفورد لدي موديل ( 97 ) في مركز متخصص لاصلاح الفورد ...

[عمررر الحربي]

تم حل المشكله

الحمدلله تم حل مشكلة السياره بعد مانظفت فيش حساس الكرنك من الزيوت والشحوم المترسبه عليه ووجدت جرح بسيط لكن يلمس اجزاء حديد وعزلته بشكل جيد
- تجاهلت فك الحساس لسببين
الاول انه ماصار يطفي بشكل تدريجي انما فجأه فـ توقعت سلك
السبب الثاني الرئيسي الكمبروسور قريب مره من الحساس ومايمدي اسحبه واطلعه برا من كثر ماهو قريب

- تم تنظيف الثروتل بالكامل و منظم الهواء و الفيش حقه

** الحمدلله السياره رجعت زي اول وافضل واختفت النفضه والطفيات اللي تجيه بفضل الله ..

شكرا لكل من طرح الحلول وجزاكم الله خير