فقاعات هواء بالراديتر

[alwali]

السلام عليكم ورحمة الله وبركاته
ياشباب اليوم شريت سيارة مستعمله نوع شفر ابلاندر موديل 2008 السياره نظيفه واليوم بعز الظهر رحت عليها كذا مشوار حرارتها ثابته والمكيف ثلج ما شاء الله ووقفت عند المدرسه يمكن ربع ساعه والامور كلها تمام

ولكن بعد المغرب قلت خلني اشيك على الراديتر فتحته الامافيه ماء رحت اجيب ماء اعبي لقيته فل ما ادري وش تفسير هالظاهره
المهم شغلت السياره وقام يطلع فقاعات كثيره مستمره والحراره قامت ترتفع ثلاث ارباع وتنزل للنص
يا شباب فقاعات بدون زيت
سحبت عيار الزيت مافيه شي وشيكت على القير بعد مافيه شي

اللي مرت عليه مثل هذي المشكله يفيدني جزاكم الله خير

[SGL]

ياغالي عندي قاعدة أي سيارة تشتريها مستخدمة أخسر عليها بتغير كل القطع المعروفة مثل الزيوت والفلاتر والبواجي وقطع التبريد بسبب صاحبها السابق ماتدري هو مهتم ويغير أو بس يكرف ومدام موضوعك عن التبريد نختصر الموضوع بتغير
1-الثرومستات(بلف الحرارة)
2-تغير الماء
3-التشيك على الرديتر هل هو نظيف هل يوجد فيه تهريبات
4-التشيك على كل الخراطيش الكبيرة والصغيرة
5-التشيك على طرمبة الماء وغطاء الرديتر
6-التشيك على المراوح والتأكد إنها تشتغل بكل سرعاتها
7-عند تعبئة الرديتر تأكد من عدم وجود هواء داخل المكينة ودايم تصير معي بعد تغير البلف

[alwali]

يا شباب وديت السيارة للميكانيكي يقول الراديتر يهرب ماء قلت له شوف يمكن الحرارة من الراس قالي اول شي سو الراديتر
رحت حق الراديترات قالي عندك الغطا البلاستيك مكسور والسيارة فيها ضغط اخاف ابدلك الغطا وينكسر من الضغط روح ودها للميكانيكي
اللحين انا في حيره كل واحد يقطها على الثاني هل في طريقه اعرف ان الراس مشعور

[ميكا مكشات]

اذا الراس مشعورتلقى الحرارة ثابتة على 3 ارباع ولا تنزل وتلفظ الماء ولا يقعد ماء بالاديتر والخراطيش تحجروطبلات الاديتر البلاستيك تفقع

أما اذا الخرطوش التحتي ينسفط مع الدوس غير بلف الحرارة

[SGL]

يا شباب وديت السيارة للميكانيكي يقول الراديتر يهرب ماء قلت له شوف يمكن الحرارة من الراس قالي اول شي سو الراديتر
رحت حق الراديترات قالي عندك الغطا البلاستيك مكسور والسيارة فيها ضغط اخاف ابدلك الغطا وينكسر من الضغط روح ودها للميكانيكي
اللحين انا في حيره كل واحد يقطها على الثاني هل في طريقه اعرف ان الراس مشعور

ياخي أنا شخصيآ تعبت من فلسفة السباكين ذولي ونقهرت زيادة يوم كنت أروحلهم أصلح شي عندهم وأقعد أعلم فيهم
ياغالي روح فك البلف الثرومستات وخله معك ماتركبه ورد كل شي مكانه بدون بلف وصلح الرديتر وعبي ماء مقطر فقط وجرب موترك بعدها راح يبين كل شي معك إذا ضبط تروح الشركة وتشتري ثرومستات جديد وتركبه مع ماء أصلي مع تفريغ الهواء
أبيك تروح لهم ماتاخذ وتعطي معهم قوله فك البلف وصلح الرديتر ونتهينا تفتحله مجال ياخذ ويعطي أعرف إن دماغك ينقلب وبطاقة الصراف تشتغل:D

[alwali]

صبحكم الله بالخير
الحمدلله كثيرا اتصل علي صاحب السيارة وقالي بشر اشلون الموتر معك
قلت له والله اني دايخ بالصناعيه الموتر طلع فيه حراره
والله انه رجال كفو قالي ابشر فلوسك موجوده ورجع الموتر ولا تهتم
الصراحه ان اللسان عجز عن شكره الله اغفر له ووالديه وارزقه من حيث لايحتسب