شرينا مكينة اللحام و عجزنا لا نعرف لها

[خط الشمال]

السلام عليكم ورحمة الله وبركاته

كيف حالكم يالربع

شريت مكينة لحام حجم 170 أمبير

قلبتها يمين يسار مامن فايده مره تلحم خفيف ومره اللحام يصير كله كربون ولا تمسك الحديد ابد

جربت بالتوبات ملي ونص نفس الكلام والحديد المليان نفس الكلام

نقصت بالأمبير و زدت مامن سنع


يا أخوان وش الطريقة المناسبة طقت تسبدي ابي اتعلم بسرعه

عندي أسياخ اللحام 2.5 ملي

كم الأمبير المناسب لها .. هل هو من 50 الى 90 مثل ماهو مكتوب على كرتون أسياخ اللحام أم لا

وهل السيخ اخليه على يلامس الحديد اللي ابي الحمه أو ابعده عنه شوي

اذا طقيت اللحام بالشاكوش طاح 90 بالميه منه لانه كربون :(

[م.سعيد]

احسن واسرع طريقة تشوف احد الحدادين او اللحامين وتخليه يلحم قدامك..

[ابو نايوفيتش]

تبي تتعبك بالبداية ،
الاول على حسب الحديد اللي تلحمه ، اذا الملي عريض تزود الامبير ، والعكس صحيح

التيوبات لحامها مثل التلميس ، لا تخلي سيخ اللحام على التيوب لانه يموع مع الحرارة ، فلامسه تلميس

التيوب تلحيمه يختلف عن تلحيم الحديد 1.5 ، ويختلف عن 3 مل وفوق ، كل مازاد عرض الحديد تزود الامبير ، ومسكة السيخ لا تصير عامودية على الحديد لازم فيه ميلان عشان ما يطلع له الكربون ،

واذا تلحم اقعد 3 دقايق وبعده اضرب مكان اللحام بمطرقة عشان تشوف انه مسك او لا ...

والفراغات لهن طريقة باللحام عشان تسد الفتحات او الفراغات

لكن بالعادة التلحيم يكون بين 70 وبين 110

وقبل ما تلحم لازم تحمي السيخ عشان يلحم معك ولا يقعد يلصق بالحديد اذا جيت تلحم مثل الطريقة هذي

https://www.instagram.com/p/BEJ0o9KKLbo/


واللحام امره هين لكن بالبداية يبي يكون صعب عليك ،


واذا تبي تتعلم جب مبسط عرض 3 مل ، وقصه الى 2 ، وحطهن جنب بعض وحاول تلحم المبسطات مع بعض

تبي تضبط امورك ان شاء الله

[مسماري]

اول شي تعلم ع حديد بجميع المقاسات اعني السميك منها والخفيف بطرق مستقيمه ومن اعلى الى اسفل وهكذا
واحسن شي اليو تيوب عندك
وشكرا

[بلحارث]

اللحام باختصار يحتاج وقت لكي تتقنه بمهاره لاتسابق الزمن ونصائح الاخ ابونايوفتش لاتقدر بثمن

[alsharef]

حاول تتعلم من اليوتيوب ،،، مقاطع جدا مفيدة وتبدا من الصفر الى الاحترافية ....
وحاول التطبيق لكل المقاطع اللي تتابعها .... بامكانك تبحث عن المقاطع اللي تناسبك باليوتيوب.... وارفق لك مثال ع ذلك

https://www.youtube.com/watch?v=4a-mwT-cibg

[hamido]

الكربون عادي لانه طبقه عازلة عن الاكسجين فطبيعي اذا خلصت ملحم تطقه وتنضفه بالبروش وعلى حسب ثخانة الحديد ترفع الانبير والدعوى تبي سعة صدر

[الصيادالمليح]

اللحام ما يصير تتعلمه لوحدك .. لابد من أخذ دورات مكثفة في فن اللحام من خبراء معتمدين

حتى لا تصير حوادث حريق بسبب سوء التعامل معها

وهناك عدد و أدوات وملابس خاصة و إجراءات وقائية لازم تتعلمها و تطبقها حرفيا

وبعض الكليات التقنية تعطي دروس و دورات في فن اللحام بالغاز و الكهرباء

[فهد أبو محمد]

بِسْمِ اللهِ الرَّحْمَنِ الرَّحِيمِ

السلام عليكم و رحمة الله و بركاته ...

اللحام لهدوء النفس ...

ممكن مكان بيع مكينة اللحام صينية بالمنطقة الشرقية ، داخل دائرة الجبيل و الخُبر ، و شكراً .

[باتمان]

بِسْمِ اللهِ الرَّحْمَنِ الرَّحِيمِ

السلام عليكم و رحمة الله و بركاته ...

اللحام لهدوء النفس ...

ممكن مكان بيع مكينة اللحام صينية بالمنطقة الشرقية ، داخل دائرة الجبيل و الخُبر ، و شكراً .

تلقاها عند ساكو بالتوفيق

[فهد أبو محمد]

شكراً أخوي باتمان ... موفّقين جميعاً .

[سليمان الصقر]

شف يالغالي
حط الامبير على 80
اشبك السالب بالحديده
وحط بالموجب سيخ 2.5 ملي
وابدأ شخّط بسيخ اللحام على الحديده لين مايسخن السيخ ويروح التقطيع
بعده الله يسلمك قرب السيخ من الحديده خله قريب بالحيل ولا يلمسها حتى تبدا عملية اللحام
وانتبه لا تخليه يطول وهو يلحم ثانية وحده فقط وشل يدك وكرر نفس العمليه بعدها بواحد سانتي