طال المقيض وضاق خلق الصقاقير(من الإرشيف)

[نديم القوافي]

(( طال المقيض ))
الجيب عن قطع الخلا والمشاوير=ابطى يابو نوره بظل الكراجي

طال المقيض وضاق خلق الصقاقير=والجوّ بالديره يعكر مزاجي

كان الهوا يومي بروس النواوير=واليوم يا هبّت سموم و عجاجي

وامر الحكيم مدبّر الكون تدبير=استغفر الله ما عليه احتجاجي

متى يويق سهيل ويصفّي الطير=ويجي لنا عقب الرباط انفراجي

والبرق لاح وتبّع الخير للخير=العشب من لوقه لعقرب دماجي

على الوعد ياهل الوجيه المسافير=نبي لنا جوله وفلّة حجاجي

ربعن لها من طيب مبداه تقدير=بالبرّ جمعتهم تزيد ابتهاجي

للصيد نجهم بالصحاري مداوير=الصبح يا جا للصباح انبلاجي

يا فِــرِّع الطلاع من بعد تدوير=والكل متشفّق طلوعه و راجي

وقام يتطلّع يقلب الشوف ويدير=حاديه مع شفحة هداد احتياجي

على خطاة الخرب يا اعطيته السير=يسطي مثل سطوة عقاب العواجي

يا شافها بالروض ماعينت خير=فعله لمن يعشق هداده علاجي

يا قام يلقف له هبوب المعاصير=تعوج وهو ياخذ معاها انعواجي

صدّت وردّت لين حول به الطير=والاجهزه كنّك بوسط الحراجي

وجيته بالارض يمزّر الخرب تمزير=متوتّر ومفتن بحالة اهياجي

هذا غرام مقزّر القيض تقزير=تواكل بصدره فتيل السراجي


نديم القوافي

[احمدالدمام]

السلام عليكم ورحمة الله وبركاته
ما شاء الله تبارك الله
صح لسانك على هذه اللوحة الجميلة الممتعة








يالي نقشت من المعاني تعابير
وقطعت ساحات الخلا والسياجي
وصورت قنص الحر يالقرم تصوير
و ردار فكرك داج وسط الفجاجي




وبانتظار المزيد من مخزونك وارشيفك الحافل بالابداعات