أهل الخبره في البليزر و الجمس قير عايدي اسعفونا

[أبو فهد بليزر]

السلام عليكم ورحمة الله وبركاته
أخوكم عضو جديد فالمنتدى و عندي مشكلتين أتمنى الأفاده فيها

الموتر \ بليزر 79
المحرك \ 350 حمراء
القير \ عادي دبل ثلاث نمر

المشكلة الأولى \ كان الموتر ينتفض عند القومة و أحيانا مايعشق أبد لاقدام ولا وراء وديته كذا ورشه قالو الدزك والكلتش و الفحمه وخرط الحذاف وبالفعل غيرت الأشياء اللي قالوها بالأضافه للهلال حق القير و كراسي قير مره وحد و ابشركم راحت الرعشه اللي كانت فيه
ولاكن فيه صوت ونه او احتكاك اسمعه جواء الغماره ولما ادعس على الكلتش يروح ولين شلت رجلي ( الله يكرمكم ) يرجع الصوت مع العلم ان كل شي جديد ومركب قدام عيوني وش السالفه ؟؟:eek:

الممشكلة الثانية \ الموتر منفوض من جميع القطع الاستهلاكية الميكانيكية و الكهربائيه المهم اني لين شغلته ورحت عليه لمدة ساعه تقريبا يطفى ولا عاد يشتغل وحرارته على الربع المعدل الطبيعي
يدق سلف بس مستحيل يشتغل لين يبرد مع العلم اني مغير طرمبة البنزين اللي فالمكينة جديدة و التانكي معروف مافيه طرمبة بنزين

اللي عنده خبره أو قد حصل معه شي من هالمشاكل يفيدنا لايقصبونا هالسباكين:D

[أبو فهد بليزر]

شدعوه ياشباب وين الحلول داخلين على الله ثم عليكم

[YUKON_GMC]

المشكله الاولى .. الفحمه ماهي مضبوطه تحتاج تغيير

المشكله الثانيه صعب تحديدها خصوصا وان الموتر كبليتر وكل شي فيه عادي بواجي واسلاك وديلكوا وكويل وكبليتر


احتمال الكويل ضعيف ومع الحراره مايوصل كهرب


الكويل اللي يطلع من سلك رئيسي للديلكو

[أبو فهد بليزر]

بالنسبه للمشكله الأولى رجعت اليوم للورشه اللي ركب لي الدزك و الكلتش و الفحمه وقال الحذاف يوم خرطناه خذينا منه كثير لانه كان مطعج وسبب فضاوه قلت طيب فكه واجيب لك حذاف من التشليح قال مايضره ابد 5 سنوات اعطيك ضمان لاتشيل هم ومع الاستخدام بيخف قلت معليش انا تعبان بالموتر مابي شي زي كذا يسبب لي ازعاج
اما المشكله الثانيه بعد ماقضينا من تركيب القير وشغلنا الموتر طلع عندي صوت طقطقه فالمكينه الله لايوريك خطر انه تخبيط وبعد التفحص صار الصوت من الديلكو وغيرته تشليح و الحمد لله راح الصوت و الكربريتر جاري تصليحه الأن و بكذا أكون غيرة ديلكو كامل و اصلاح كربريتر و بجرب و اشوف النتيجه

[مازن النعمان]

السلام عليكم اخوي اذا كانت السياره تستمر شغاله بس اذا طفيتها ما تشتغل الا اذا بردت غير غطاء الديلكو وبتنحل المشكله باذن الله

[أبو فهد بليزر]

بالنسبه للرعشه لازالت موجوده و الحل ان اغير الحذاف وبدور لي جديد ان شاء الله
اما لمشكلة الطفيه فصارت من الكربريتر سويت له اصلاح و ضبط الحمد لله بس صار و انا امشي 80 ينهبل ماعاد يقبل دعسه يصير كنه طافي
ولين شلت رجلي عن الدعسه رجع وضعه الطبيعي و على هالحال برجعه للي صلح الكربريتر يشوف وش المشكله وبالنسبه للصوت صار من الديلكو غيرناه وراح الحمد لله