ماهي الطريقة الصحيحة لسن السكاكين في البر

[قارّة بنّا]

أخوتي الأفاضل :D
لا شك ان كل واحد منا يمر بمثل هذا الشيء في البر ، وهو الطريقة الصحيحة لسن السكاكين ، وقد كنت ألاحظ جدي يرحمه الله يحتقظ بسكاكين مصنوعة يدوياً وكان يسنها ويحدها على حجر وتصير حادة جداً.
أما في هذا الزمن وبسبب فقدان الخبرة والمهارة صار من حظ اللي يبيعون السكاكين هالشيء فتجد الشباب بمجرد ما عاد تقطع سكنيه يشتري جديدة على طووووووول .
نحن هنا بحاجة للخبرة ... فلا تبخلوا علينا يا أصحاب الخبرة . :type:

[أبوناصر]

من رايي الشخصي

سكين اللحم غير سكين البصل والطماط

يعني لا تقطع بسكين اللحم بصل وغيره


وأزين مسن هو الي عند الرماية بـ 30 ريال تقريبا

ونوعية السكين لها دور فالخايبات تتعب في السن

مجرد راي شخصي

[كشته 111]

قارة بنا كلام ابو ناصر صحيح 100 % بس احذر احذر احذر من السكين اللي تسنها بمسن الرماية تراها تطلع احد من الموس واي غلطه الله يخلف عليك ,,,,

[قارّة بنّا]

أبو ناصر - كشته 111 شكراً لمروركم ومشاركتكم
ومعلومات جيدة
لكن نحن نريد طريقة تحريك السكين على المسنات

[البرحه]

لكن نحن نريد طريقة تحريك السكين على المسنات

ما يبيلها امسك السكين والمسن ..شن شن شن ...وين البصل ؟؟

اذا كان عندك حصاة وهي ملساء تحك عليها السكين وتسنها ...بس يبيلها احترافيه !!

شكرا

[الكوسه]

اذا دعت الحاجه سن السكين بفنجال اسفل الفنجال قاعته تكون خشنه تسن السكين عليه

[قارّة بنّا]

ما يبيلها امسك السكين والمسن ..شن شن شن ...وين البصل ؟؟

اذا كان عندك حصاة وهي ملساء تحك عليها السكين وتسنها ...بس يبيلها احترافيه !!

شكرا
البرحه
شكراً لمرورك
ولكن نحن نبغى نتعلم هالاحترافيه !!
بورك فيك :good:

[ابو عادل1]

ياجماعة الخير

احد الربع مايمدح مسن الرماية

والله اني ابي رايكم

[عاشق الزلفي]

أولا السلام عليكم ورحمة الله وبركاته

ثانيا بالنسبة لمسن الرماية له قطعة خضراء تخليها على تحت وتمسكه بيك اليسار وتمسك السكين بيدك اليمنى وتبدأ باسم الله وتمشي السكين بشويش إلى ان تسن ولا ترميه إذا خلص المسن فكه وأقلب المسن الداخلي ويصير عندك واحد جديد.

بالنسبة للحصى وكيف سن السكين فيها أشوف العيال بطرف بلكة أو أي حصاة يمشي السكين شوي شوي لكن ما قط جربت .

أتمنى إني أكون أفدتك

[طلو]

اذا كنت بالبريه وما عندك مسن سن سكين بالمروا الابيض او الحجار الخشنه

[ابن بدران]

السلام عليكم

مسن الرماية ما مثله للسكاكين العادية (الرخيصة)
أما السكاكين الغالية فتراه يخربها مع الوقت
فيه حجر مستطيل لسن السكاكين لونه رصاصي كأنه مصبوب من اسمنت يباع بـ10 ريال له وجهين
خشن وناعم ممتاز للسن

[قارّة بنّا]

شكراً لمرور الجميع
وافادات طيبة

[قارّة بنّا]

مسن الرماية ما مثله للسكاكين العادية

ابن بدران
عاشق الزلفي
طلو
ابو عادل1
البرحه
الكو899سه
كشته 111
أبوناصر
اشكر كم على المداخلة :good:

[aaez]

عليك بسكين أم طير السويسريه تراها غاليه سعرها من 60 ريال وطالع على حسب مقاسها وسنها بمسن الرمايه وإنتبه ليدك من الجروح ....

وإدع لي

[عبادل العاصمي]

أولا :السكاكين الفشلة أنتشرت بكثرة هالأيام

ثانيا:نصيحة لوجه الله خذ لك سكين راجس أو وارد الموسى تراها تشفي الصدر في الذبيحة وأما المسن فخذ لك حجر ومسن عادي ولاعاد تحتاج لمسن الرماية ولاغيره وأما أذا ماكان عندك مسن شف لك حجر أملس بسفيه خشونة شوي وسن السكين عليه مع الضغط الخفيف وحافظ على السكين وأعتبرها بنتك !!!!!!!!

وكل ماأستخدمتها في تذكية أوغيرها سنها ولاتتهاون أبدا
وكل ماقلته خلاصة ناس حكماء منهم والد الوالد والوالد حفظهم الله وأنا لاأمدحهم ولا أمدح نفسي ففي هذ المنتدى من هو أعلم منا وملم بجميع فنون الصيد

أخوك المحب

[قارّة بنّا]

رجل الجنوب
بيض الله وجهك على الرد الرائع

[صدى الهوجاس]

بالنسبة لسن السكين على حافة فنجال او مرو او مسن عادي له طريقه واتمنا اني اقدر افيدكم بحكم خبرتي القليلة

تجيب المسن الي تبي تسن السكين عليه وحط السكين على جنبها وتميله شوي من جهت السنه يعني تكون السكين مشكله زاويه مع المسن وتقوم يوضع اخر السكرن اولا وثم سحبه وتكرها اكثر من مره بعدين تقلب السكين على الجهه المقابله وتبدا تسن (احذر من انك تسن جهه وتترك جهه او انك تسن جههاكثر من الثانيه لان السكين تغدي عايبه....
تقبلوا مروري....

[عروس الشمال]

تسلم يالذيب

[أبومطلق]

أخواني الى مايحب مسن الرمايه فيه طريقه حلوه مسن الحجر تلقاه رخيص 10 ريال قيمته أشتره وحط تحته خرقه علشان مايتحرك حط عليه شوي زيت شوي لاتكثر وشف شلون يسن السكين بس لاطول ونت تسن تراه ياكل السكين

[سندباد الخليج]

مشكور اخوي قاره على الموضوع

زي ماقالوا الاخوان مسن الرمايه مافيه مثله للسكاكين الخايبه الى من ابو ريالين وماجر غصنه

اما السكاكين الجيده يكفي انك نسنها بالحجر او بقاعة الفنجال وهذا شي مجرب

[الغزال الشارد]

الله يعطيك العافيه سن السكين على حصاه..سوده..وتكون خشنه ...
وبيـــــض الله وجهــــــــــــك...



تحـ الغزال الشــــارد ــــــــــــياتـــــــــي...

[راعي الشهامه]

بالنسبه لسن السكين بالبر واذا ماكان معك مسن .... فخذ لك حصاة وسنه بها ..وطريقه السن : تمسك السكين بيدك اليمنى وتمسك الحصاة بيدك اليسرى وتحط طرف السكين الحاد على بدايه الحصاة وتبدا تحركها يعني من فوق لتحت وليس العكس ...ثم تقلب السكين للجهه الثانيه وتسوي نفس اللي سويته بالجهه الاولى.. ثم تلمس طرف السكين اذا صار احرش يعني ان سنك مظبوط

وفيه شي يسوونه كثير من الناس اذا مثلا قطع لحمه يترك السكين ولا يغسلها بوقتها ويصير لاصق بها شحم .. وهاذا يقلل من عمر السكين

هاذي وجهه نظري ...... ولكم الشكر

[شفر 10]

أهم شيء إنك تسن السكين بجهة وحدة يعني لا تمشي السكين على المسن رايح وجاي خلك باتجاه واحد

[(سكود)]

الطريقة الصحيحة لسن السكاكين والي تخلي السكين تلهب ولا تحتاج مسن الرماية ولا غيره كما يلي (1)صنفره ناعمة 2)تسن السكين بطريقة سريعة على الجنبين مدة خمس دقايق (3 تاخذ عود طلح اي عصاء بس ما تكون خظراء تكون يابسة وتسن عليها السكين مرة ثانية وهي طريقة تنعم خشونة السكين وتجعلها تحلق زي الموس تقبلو خالص تحياتي

[فزاااع]

كثرت السكاكين الخايبه هاليومين :no: ونا اشووف ان السكين الطيبه الالمانيه
من اجود انواع السكاكين ويكفي سنها على قاعه فنجال
اما بعض السكاكين ام ريالين او ثلاثه لو سنت معك زين بمسن الرمايه مصيرها كم يووم وترميها :(

[حب الوطن]

السلام عليكم اخوي حبيت ارد على موضوعك الجميل وابدي تجربه عشت وشفت الي قبلي يسونها

اذا انت في البر واماعندك الى عزبتك اكيد بيكون في فنجال قهوه اقلب الفنجال وسن السكين في قاعت الفنجال

وعلى كذا تكون عندك سكين ولا احد من كذا تقبل مروري

اخوك / مافيا

[taag1]

من واقع تجربه متواضعه اشوف الشيبان
من زمان يسنون سكاكينهم بحجر المرو
بعد كسر الحجر ليبين لك طرف حاد كالسكين
جدا وممكن تسن به سكينك
اما الان فمسن الرمايه هو الأنسب

[al-musad99]

السلام عليكم ورحمة الله وبركاته
اشارككم في سن السكين في البر والطرق كثيره منها :-
1- طريقة سن السكين أو الساطور على جنط السيارة والطريقة هي ان ترفع السيارة من الخلف أو تثولث بالسيارة ليرتفع كفر ثم تبدأ بسن السكين على الجنط فقط للجنوط الحديد .وليس للالمنيوم .
2- طريقة سن السكين أو الساطور على زاوية مقص السيارة العلوي أو السست وهي بسيطه فقط اسحب السكين على المقص أو السسته ومن ثم اقلبها وواصل السن .
3- طريقة الحجر الاصم الأصفر وهي مماثله للطريقة العاديه للسن وتتمثل بسحب السكرين على الحجر الكبير .
ودمتم هذا ما عندي والله اعلم .