مشكلة فتك حيرت علماء ناسا والأطباء والخبراء

[بايسن حار]

السلام عليكم مساكم الله بالخير
عندي مشكله في موتري الفتك 2007 تماتيك


أنفجرت الطبه وارتفعت الحراره (رديتر صيني استخدمته 4 سنوات ممتاز معي)
رحت وركبت له راديتر اردني وغيرت الخراطيش الكبار والصغار والغطاوي والبلف وحساس الحراره وكل شي يتعلق بدورة الماء (تغيير وكاله ماعدا الرديتر اردني)
بعدها الحراره ممتازه جداً وطبيعيه سواء تمشي 200 او الموتر واقف مده طويله وشغال


بس المشكله بين كل فتره وفتره ينطلق الخرطوش الكبير من جهة الرديتر مره من فوق ومره من الطبه اللي تحت كذا من دون سابق إنذار لدرجة انه ينطلق والقفيز اثنين (مدبّل) ومعه سيلكون
واحيانا ينطلق والموتر يمشي واحيانا بعد مايوقف من سفر
الغريب لو الراس فيه شي كان ارتفعت الحراره او نقصت مويته لكن هذا حرارته ممتازه ومويته ماتنقص
واللي يقهر ماهو دايم ينطلق ، يعني من كل 5 مشاوير طويله ينطلق مره

وش العلم ؟!!

[أبو صاروخ]

وعليكم السلام يمكن والله اعلم ان ضغط الماء قوي عندك

[SGL]

ركب الخراطيش بدون سيلكون بس شدها بالقفيز
وحتمال تحتاج تفريغ للهواء

[YUKON_GMC]

احياناً يكون السيلكون هو السبب ؟؟ ركبه بدون

[Hbk]

اعمل الطريقه الاتيه;
السياره بارده يعني مطفيها لها حول 6ساعات شغل وافتح غطا الراديتر اذا شفت الماء تخرج منه فقاعات او زبد هذا يبغى تفريق الهوا
وتفريغ الهوا اما من الماصوره الخاصه الي فرق الدينموا او من غطا الراديتر طبعا لما تفتح الغطا وتبي الهوا يطلع لازم تفتح الغطا الخاص بالقربه والراديتر مع بعض وتجيب معك مووويه وبيبتدي الما يطلع من الراديتر وانت تعبي بالقربه بتاخذ منك وقت لاكن تحمل
ويبي للك تكررها اكثر من مره وباذن الله تزين امورك
واذا ماوضح شرحي دور ف قوقل عن طريقة تفريغ هواء الراديتر وبتحصل شرح وافي

[ابوراكان تبوك]

الأديتر صغير مايتحمل الضغط او بالاصح مايستوعب او مشكلة غطاء الرديتر نفسه

اذا عندك غطاء الرديتر القديم جرب عليه

[مطر وسم]

الأديتر صغير مايتحمل الضغط او بالاصح مايستوعب او مشكلة غطاء الرديتر نفسه

اذا عندك غطاء الرديتر القديم جرب عليه

^^^^^^^^^^^^^^^^^^^^^^ اعتقد هذي مشكلة خروج الخرطوش من محله :good2:

[بايسن حار]

بالنسبه لتفريغ الهوا فأنا مفرغه واعرف طريقة التفريغ
تعبي من القربه حتى يطلع من الماصوره الصغيره اللي من فوق الثلاجه ثم تسكرها بمسمارها


السيلكون احتمال ضعيف لأني مدبل القفيز وشاد عليهن لكن مانقدر نستبعده و راح اركب الخراطيش من دون سيلكون


اما الغطا القديم فهو نفسه الغطا اللي اشتريته جديد (وكاله)


لكن مسألة ان الرديتر صغير مايتحمل فهو ممكن مع العلم ان الرديتر السابق كان صيني وله اكثر من 4 سنوات ولا احلى منه
اذا ابي اغيره كيف اعرف انه يتحمل او لا ؟؟
رديتر الوكاله غالي جداً 1400 أخاف اشتريه وماتنحل المشكله


شاكر ومقدر لكل الاخوان اللي ردوا
الله يجزاكم الجنه

[YUKON_GMC]

مااعتقد ان كبر الاديتر وصغره له علاقه بخروج الخرطوش ..
لأن قوة الضغط واحده سواء تحط اديتر كبر موية الصحه والا تحت اديتر اكبر من السياره

لكن 90% من السليكون اوالخرطوش كبير وغير مناسب او الماصوره اللي تخرج من الاديتر صغيره

او ان الماصوره اللي يركب فيها الاديتر سطحها املس وليس لها حافه اوشفه ولاتمسك بالخرطوش لأن اي ماصورة مويه لازم فيها بروز بالنص يركب فيها القفيز
حتى ان اغلب السياره الامريكيه يكون فيها قفيز يمسك بقوة الضغط زي الكماشه بدون شد لكن الفضل يعود للبروز اللي بالماصوره يمنعها من الخروج


كما في الصوره التاليه

http://store2.up-00.com/2016-11/1478115669341.jpg (http://www.up-00.com/)

[alwali]

السلام عليكم واضح مشكلتك في غطا الراديتر مايسمح لخروج الضغط
نصيحة ركب راديتر وكالة قبل لا تخسر الماكينة

[ابو سلطانه]

الامر باذن الله بسيط


كلام اخي يوكن سليم 100% تاكد من الماصوره الي خارجه من الاديتر اكيد انها بدون شفه ودليل ذلك انسحاب الخرطوش معناه في سلاسه في خروج الخرطوش

تاكد من ذلك وان وجدته سلس بدون شفه حاول تخشن الماصوره بصنفره خشنه اوبمنشار حديد حتي تكون مثل البطناج وباذن الله تحل المساله بدون أي خساره


وممكن تقير الماصوره من عند حق اديترات وتلحم ماصوره من اديتر قديم


بالتوفيق

[بايسن حار]

بالنسبه للخراطيش فإكتشفت انها تدخل بسهوله لماصورة الرديتر (الرقبه) يعني تدخلها بيد وحده من دون صعوبه مدري هل العله من الخرطوش اللي شاريه جديد او من ماصورة الرديتر .. راح اشتري خرطوش ثاني وأتأكد انه وكاله واشوف هل بيكون مقاسه والا ان العله بالرديتر ، المشكله اني مدبل القفيز يعني المفروض انه يحل المشكله
أما شفة الماصوره ففيه سنه لكن صغيره وللأسف ان حق الوكاله زيه بالضبط

جاري المحاولات والله يعطيكم العافيه ويجزاكم الجنه

[آخر العنقود]

اكبر خطأ انك تحط معجون على كوع الرديتر لأن الضغط عاااالي جداً في الرديتر ركب الخرطوش بدون معجون وحط لك قفيز انجليزي اصلي وغير غطا الرديتر واحرص انه يكون اصلي وغير بلف الحراره وعب موية رديتر اصليه وراح تدعي لي.

[وطن العزة]

او ان الماصوره اللي يركب فيها الاديتر سطحها املس وليس لها حافه اوشفه ولاتمسك بالخرطوش لأن اي ماصورة مويه لازم فيها بروز بالنص يركب فيها القفيز
حتى ان اغلب السياره الامريكيه يكون فيها قفيز يمسك بقوة الضغط زي الكماشه بدون شد لكن الفضل يعود للبروز اللي بالماصوره يمنعها من الخروج


كما في الصوره التاليه

http://store2.up-00.com/2016-11/1478115669341.jpg (http://www.up-00.com/)

كلام سليم👍👍 صارت بموتر خوي لي

وأنا معه انفلت الخرطوش العلوي و السبب كوع الطبة منقطم من عند الشفة او البروز و صاير أملس و لا يمسك

[رقبة حاشي]

الاديتر الاردني توافيق
قبل ماتغير اي شي لازم تركب اديتر بلد حتى لو مستعمل تشليح وهمن تشوف


السلام عليكم مساكم الله بالخير
عندي مشكله في موتري الفتك 2007 تماتيك


أنفجرت الطبه وارتفعت الحراره (رديتر صيني استخدمته 4 سنوات ممتاز معي)
رحت وركبت له راديتر اردني وغيرت الخراطيش الكبار والصغار والغطاوي والبلف وحساس الحراره وكل شي يتعلق بدورة الماء (تغيير وكاله ماعدا الرديتر اردني)
بعدها الحراره ممتازه جداً وطبيعيه سواء تمشي 200 او الموتر واقف مده طويله وشغال


بس المشكله بين كل فتره وفتره ينطلق الخرطوش الكبير من جهة الرديتر مره من فوق ومره من الطبه اللي تحت كذا من دون سابق إنذار لدرجة انه ينطلق والقفيز اثنين (مدبّل) ومعه سيلكون
واحيانا ينطلق والموتر يمشي واحيانا بعد مايوقف من سفر
الغريب لو الراس فيه شي كان ارتفعت الحراره او نقصت مويته لكن هذا حرارته ممتازه ومويته ماتنقص
واللي يقهر ماهو دايم ينطلق ، يعني من كل 5 مشاوير طويله ينطلق مره

وش العلم ؟!!

[ثاقب]

ركب راديتير اصلي .