سحاب -والقليب الي يصب فيها الشعيب [الأرشيف]

مشاهدة النسخة كاملة : سحاب -والقليب الي يصب فيها الشعيب

سحاب نجد راعي شقراء

29/11/2016, 06:35 PM

يالله تحييهم الي معاد يردون علي تراي معادني مسولف كانكم ماودكم انا ادري وش انا فيه انتم تبوني ولا اسكت
سالفه اني ابا اسولف على روحي منيب مسولف ان مارديتو علي وبصركم

يازين لو تعلموني وش تبوني اسولف عليكم وبشرو بالخير وتغانموني قبل اودع منيب باتل عندكم http://www.mshaqra.com/vb/images/smilies/cd.gifوراي اشغال في الجنه ان شاء الله تعالى قولو امين لا تسكتون http://www.mshaqra.com/vb/images/smilies/aq.gif

فيه مزرعه في شقراء معروفه اسمها الحميضيه

وهل يخفا القمر هههه او وهل يخفا الثور رجل بقر شقراء كلهن اذكر منول نجيب البقره نزفها مثل العروس http://www.mshaqra.com/vb/images/icons/28.gif وندخلها على الثور في المنحات

وفيه القليب حقه الحميضيه طال عمركم من عمر الدنيا ايام الصدر والناس ياخذون منها الماء وخص الحريم يجن طال عمركم ومعهن قدوره ويصير معها وقات هذي طال عمركم تحطها الحرمه فوق راسها مثل العقال بس هي يسمونها الوقات وهي من القماش او من الشيله يلفونها علشان توقي عن الراس الا شالت القدروفيه ماء تصدقون ان الحريم تمرك والقدر مليان بالماء وهي شايلته على راسها وهي مامسكته بيديها http://www.mshaqra.com/vb/images/icons/w00t.gif
علشان الوقات مركده القدر على الراس http://www.mshaqra.com/vb/images/smilies/dd.gif
وتسولف مع رفيقتها وتشر بيديها وتلتفت يمين ويسار ولا يطيح القدر مبطيت مذكر عجوز في شقراء وقولها الله وكبر يم فلان تذكرين يومنك تروين من الحميضيه وتشيلين القدر مليان بالماء وهلحين مايردك الا سريسرا يعني سويسرا بس هي الي تقول الا نشدتها وينك فيه يم فلان الصيف الي راح قالت في سريسرا مع وليدي مسفرني يم البراد
المهم نسيت السالفه ههههههه
المهم قليب الحميضيه جعل اهلها للفردوس وكل مسلم
حاطين نص الشعيب يصب في القليب والنص الثاني يسقي النخل
الا يومنا هذا
ومنول طال عمركم الا جانا السيل وصب في القليب تمتلي القليب ويخافون على الطوي الحصا لياه يطيح ثمن تنهد القليب يروحون ينادون شايب جعله للفردوس وذا الكلام ايام الصدر موووبطي
ولا نادو الشايب قالو له يبو فلان قليب الحميضيه تبي تفيض يجي معهم وياخذ كسره جمش الطين اليابس اسمه جمش http://www.mshaqra.com/vb/images/icons/008.gif
ويقرا عليها من كتاب الله ايات ثم ينطلها في وسط القليب وشوي وتشوف الماء نازل سبحانك ربي
وترا سالفه الشايب انا ماحظرتها بس معلمني بها شايب جعله للجنه متوفي من سنين
ولا ادري هو من القرائه ولا تنفتح المجاري الي فسفل القليب ثمن يروح الماء العلم عند الله سبحانه
ولا قط قالو الناس الا شارب من الحميضيه وهذا مثل يظرب منول في شقراء لان ماها حلو بالحيل
وطبعن قلبان شقراء كلهن يلتقن مع بعض سبحانك ربي
ويزيد الجم في القلبان كلهن الا جانا السيل وصب في قليب الحميضيه ونتم خابر منول مافي شقراء سد الا سد عزيز ابن ربيع جعله للجنه الي في الحسيان تحت الجبل الشمالي ولا حطه الا السنين التوالي بعد وهو من التراب مهوب مسلح
وفيه بعد قليب بين بيوت الطين يصب فيها السيل الا جانا يعني سيل السكيك والبيوت مهوب شعيب بس والله مايحظرني شي عنها ولا عن اسمها نسيتها ماورا مني بعد الي اذكر بعض الامور انتم خابرين المحال يدرج والحسابه تحسب يالله حسن الخاتمه

والله اني اذكر ونا في نخلي في شقراء اشغل المكينه البلاكستون الهنديه تعرفونها اكيد يالعويد
المهم والله يعينا على المهم اشغل المكينه من الساعه 7 الصبح انتم خابرين اروس يعني اسقي النخيل الين مسيان يعني حول المغرب ولا طفيتها طال عمركم الاي اسمع صوت وشيش وصوت الماء يهدر في القليب وذا الكلام والشمس غايبه وباقي شفقها احمر في القبله
وذكر يوم سمعت الصوت والله اني خفت وشذا الي يهدر وويق في القليب ولا فيه شان يعني مجرا للماء يصب وسط القليب الين ياصله الماء ويغطيه سبحانك ربي لا اله الا انت

والقليب يجي في اسفلها توسعه من الجوانب تحت الطوي نسميها السلال
والمجرا الي يصب في القليب نسميه شان

وصلى الله على نبينا محمد

وفي الختام احسن شي نقوله سبحان الله والحمد لله ولااله الا الله والله اكبر عدد خلقه وزنه عرشه ومداد كلماته ورضى نفسه

قوافي ( أم نهار )

29/11/2016, 07:04 PM

مريقب العيفار

29/11/2016, 10:34 PM

سحاب نجد راعي شقراء

30/11/2016, 03:59 AM

السلام عليكم ورحمة الله وبركاته
حياك الله ابو نوره مؤرخ وقاص ومبدع خيمة السوالف ماشاء الله لا قوة الا بالله
دائماً بانتظار سوالفك القيمة ولو فيه تقييم اكبر من الخمس نجوم قيمت
تاريخ .. ماضي.. ذكريات
اجمل واجمل
مهما بلغ الكلام عن تلك الايام يظل الحنين والشوق لها اكثر
الله المستعان
حريم منول شقى وتعب ورضى وقناعه وسعاده سبحان من وهبهم اياها
آخر قليب شفته من 30 سنه ويمكن اكثر وشكله يضيق الصدر
غادروه الاهل والرفقه والمنازل حوله متهدمات
رحم الله الحي والميت منهم
جزيل الشكر ابو نوره
تحياتي وتقديري واحترامي لشخصكم الكريم

قوافي جتني الموقه :pعلى قوله عجيزات منول يقولن شوفو فلان مايق يعني شايف نفسه محد قده هذا المايق منول ههههه
جعل ربي يسعد قلبك ياقوافي الغاليه قبلك تشجعيني على الكتابه وماقصرتي معي ولا مع غيري جعل ربي يوفقك امين

تصدقين يالغاليه هلحين مدري وش جايني صرت اخاف من القليب ولا جيت اطل فيها انوم على بطني وويق ونا اتنافض
وين منول اركب الرشاء على المحال الا انفصخ وعادي
سبحانك ربي مقلب الاحوال

سحاب نجد راعي شقراء

30/11/2016, 04:04 AM

ابو نوره

عزيز وغالي

والربع الظاهر ما يردون لانهم هالحين يتابعون من جوالاتهم

ماهو مثل اول كمبيوتر ولوحة مفاتيح

شكرا ابو نوره على السرد

ونقل صورة من الماضي القريب

سلمت اناملك

وبقيت لمحبيك

جعل ربي يسعد قلبك امين
ابد الا كتبتا لي انت وقوافي يكفيني ههههههه يالله انشب
انت وافي معي جعل ربي يوفقك ويفتح ابواب فظله عليك امين

Al3rands

01/12/2016, 03:06 AM

سحاب نجد راعي شقراء

05/12/2016, 09:08 PM

ولو كن الصدر ضايق ونا خوك (لايضيق صدرك ولاتحسف على مافات ..... ترا الحسايف تورث الضيق والغمه ) مازيد على على رد مشرفتنا الغاليه الا حكمه دايم لا شفت ضيقه اتذكر انها من الله سبحانه واذا ردني شي لكبر سني اتعزوا بروحي افا ونا فلانان .احن راسك للزمن سيسويك بالارض.دايم اقول لروحي انا اقوى من كذا ويفرجها الله .(كيف ربك فرجها لاتسايلني كيف ..الواحد اللي يدبرها ويفرجها) تساعدني سحاب اطبع ديوان نسميه سحاب العرندس هههههه

ياهلا ويامليون مرحبا

هههههههههههه وشلون دريتا عني ان الصدرضايق :D

انت صادق الدنيا يبيلها جهاد ياجعل ربي يسعد قلبك دنيا ودين امين ويمتعك متاع الصالحين
وجعل قلبك مايجيه الضيق ولا تذوقه
انت من الناس الي مايمدي ننحاش عنهم :p تقرا الي في الخاطر ولو مابيناه

الا وش رايك بدال الديوان عندي لك مشروع مشترك بيني وبينك يعني شراكه
وش رايك نطق خيمه في الثمامه في الرياض ونحط لوحه الي يحب سواليف منول والي ضايق صدره يتفظل عندنا
انا ابا اجلس اسولف عن منول ونت اجمع الدراهم وبالنص بينا
طع شوري وافق تراه مشروع ناجح وتبي تكثرخيامنا
وشوي شوي ونبدا نقراء على الي ضايقه صدورهم جعل ربي مايخلي في قلب مسلم ضيقه امين

لا تستعجل في الرد وتركد تراه مشروع يبي يتمدد ومستقبله مقبوض علينا في اماره الرياض مامعنا تصريح :hot:

صريح المقال

06/12/2016, 09:47 AM

السلام عليكم ورحمة الله وبركاته ،،،

يالله تحييهم الي معاد يردون علي تراي معادني مسولف كانكم ماودكم انا ادري وش انا فيه انتم تبوني ولا اسكت
سالفه اني ابا اسولف على روحي منيب مسولف ان مارديتو علي وبصركم

يالله انك تحيي سحاب نجد (الشاعر الزعول) راعي شقراء والقلبان وثاني أكبر مهندس نخيل بالسعودية :D

والله يا أخيي اني منيب راعي ردود من حيني يعني من يوم عرفت النت وهالكلام مبطي يوم النت (دايل أب) يعني بالتلفون تشبك سلكه بالكمبيوتر وتتصل يقوم يطوطي شوي ثم يشبك ولامنه شبك تجلس لك شوي منتب مصدق :D

ثم تعال افتح لك منتدى وانتبه لا ترعص لك على موضوع ما تبيه ترا كلش محسوب !
ثم تجلس تَنَقّى لك كم مويضيع <- تصغير موضوع وتخبر مبطي كلش نصغره حتى الأوادم ما سلموا تعالي يا حصيصه ويا نويره ولا الحصّي وساره سوير وعبدالرحمن الدحمي واللي ما يصغرون اسمه ينادونه بعيارته ولا ودي أستطرد بالحديث أكثر (أستطرد كلمة يقولونها المثقفين ان جازت لك ولا مسحناها) :D

المهم (والله يعينا على المهم) وتراي أستعير كلماتك من شدة إعجابي بشخصك الكريم يعني منيب أسرق مجهودك الأدبي لا تخاف حقوقك الأدبية محفوظة ههههههه

المهم عقب ما تحط عينك على كم موضوع وبالك مشغول تخاف الوالدة ولا حدى اخوانك يرفعون السماعة ثم ينقطع النت ولا يجيكم اتصال وتخبر منول تلفون البيت ما يركد والأخبار ما تاصل إلا عن طريقه وكلش يعرفونه الحريم منول وكانت مهنة الصحافة ونشر الأخبار محتكرينها حتى وقت قريب :D

عاد لامنك فتحت الموضوع اصبر لك كم دقيقة وعساه يتحمل عندك كامل ثم افتح الثاني والثالث ويدك على قلبك ما تدري كم بتطلع الفاتورة بس العصى ما عنك وعنها وإذا دريت ان الفاتورة جت وفيها مبلغ جامد تطلب اللجوء السياسي لبيت جدتك تجلس هناك كم يوم لين يركد ابوك وتهديه امك الله يجزاهم ووالديك ووالدي المسلمين عنا كل خير ويرحم حيهم وميتهم ويجمعنا بهم في جناته.
ومتى ما فتحت الموضوع وتحمل لازم تسكر النت !!
عشان ما يحسب عليك !
يعني تعودنا من بداية عصر الانترنت على كذا فلا تلومنا لو ما عرفنا نرد هالحين :D

والله اني أذكر أول منتدى دخلته وكنت أفتح ثلاث وأربع مواضيع وأسكر النت ثم أجلس أقرأ وإذا وصلت آخر الصفحة أشبك النت وأفتح الصفحة الثانية وأصبر لين تتحمل ثم أقطع النت وأجلس أقرأ ..

وكانت كتابة الرد تحتاج منك قوة بأس وصلابة راس لأن الناس فيهم عياره تروع مهيب مثل هالحين :D

المهم (والله يعينا على المهم) شفني حطيتها بين قوسين عشان حقوقك الأدبية يعني تراها مسجلة بإسمك !

يازين لو تعلموني وش تبوني اسولف عليكم وبشرو بالخير وتغانموني قبل اودع منيب باتل عندكم http://www.mshaqra.com/vb/images/smilies/cd.gifوراي اشغال في الجنه ان شاء الله تعالى قولو امين لا تسكتون http://www.mshaqra.com/vb/images/smilies/aq.gif

يعني ناوي تلف منتب مبتل لين توصلنا؟! <- هذا اللي فاهمن غلط :D

ودي تعلمنا كيف كانت المرأة هي عمود البيت وقايمة بكل شئونه وكيف ان الرجال كان يشتغل من يصبح لين يمسي وإذا رجع البيت وش يلقى وكيف كانت مرته تستقبله ووش تزين له ..

ودي تسولف عن الحلال في هاك السنين وشلون وضعه وكيف كانت أهميته كبيرة في كل بيت وكيف يتعاملون معهن وكيف يحسنون لهن ووش يسوون بحليبهن وشعورهن وجلودهن وكلش فيهن مهوب مثل هالحين يالله لا تعاقبنا بعضهم يذبح الذبيحة ينطل كرشتها ومصرانها وراسها وكراعينها وذنبتها كل ذا ما يبونه !!

وتخزين الأكل مبطي كيف كان قبل الثلاجات والكهرباء والنعمة الكبيرة العظيمة اللي حنا فيها هالحين يالله لك الحمد والشكر ..

واللهم آمين .. اللهم ارزق عبدك هذا الذي أمتعنا ونورنا بتاريخنا وطيبة أجدادنا وامهاتنا وحياتهم التي رغم ما بها من مصاعب فقد كانت جميلة عفوية مليئة بالطيبة والنخوة والشهامة اللهم ارزقه الفردوس الأعلى من الجنة.
اللهم أحسن خاتمتنا وخاتمته ..
اللهم اجعل خير عُمُرِهِ آخره ..
اللهم اجعل حسابنا وحسابه حساباً يسيراً بفضلك وكرمك يا أكرم الأكرمين ..

فيه مزرعه في شقراء معروفه اسمها الحميضيه

يعرفون يسمون منول مهوب هالحين مزرعة نوفا ومدري وش هههههههه :D
الحميضية قد يكون نسبة لأشجار الحمض ؟!

وهل يخفا القمر هههه او وهل يخفا الثور رجل بقر شقراء كلهن اذكر منول نجيب البقره نزفها مثل العروس http://www.mshaqra.com/vb/images/icons/28.gif وندخلها على الثور في المنحات

ذكرتني ببقرة جارنا منول يسحبها راعيها للثور ورابطها بصدام هايلوكس قديم إلا منها بغت تمشي مشت وإذا عاندت ووقفت نشبت السيارة محلها ههههههههه يجلس يجرجر فيها لين يحفر الأرض ما تمشي ولا منه خذ شوي طاوعت معه ومشت قام يمشي قدامها بالموتر واللي يشوفه يقول انه يسحبها وهو ما يمديه بس عن قولة انها تهج منه منا ولا منا ..

و(المنحات) هذي وش تطلع سلمك الله ؟ :)

فيه عادة كانوا يسوونها منول إذا جت تولد البقرة يستفيدون الجيران من ولدها إذا تعرفها ياليت تذكرها لنا ولا عليك أمر ..

وفيه القليب حقه الحميضيه طال عمركم من عمر الدنيا ايام الصدر والناس ياخذون منها الماء

قل آمين .. الله يجزاك أنت وراعي قليب الحميضية كل خير.
وش قصدك بأيام الصدر ؟!
تقصد يوم كانت الناس تصدر الماء على الحمير ويوزعونه على البيوت ؟!

والله اني اذكر ونا في نخلي في شقراء اشغل المكينه البلاكستون الهنديه تعرفونها اكيد يالعويد
المهم والله يعينا على المهم اشغل المكينه من الساعه 7 الصبح انتم خابرين اروس يعني اسقي النخيل الين مسيان يعني حول المغرب ولا طفيتها طال عمركم الاي اسمع صوت وشيش وصوت الماء يهدر في القليب وذا الكلام والشمس غايبه وباقي شفقها احمر في القبله
وذكر يوم سمعت الصوت والله اني خفت وشذا الي يهدر وويق في القليب ولا فيه شان يعني مجرا للماء يصب وسط القليب الين ياصله الماء ويغطيه سبحانك ربي لا اله الا انت

لا إله إلا الله، سبحان الرزاق وشلون كانت الناس عايشه ورازقها ربي يوم كانت متوكله حق التوكل عليه ..

يعلمني الوالد عن زمان أول يقول يوم حنا في بيوت الطين إذا قالوا ترا الوسم دخل نطمر للسطوح ننظفها ونفتح السواقي عشان المطر ما يجلس فوق وتنهد علينا البيوت وسبحان الله من أول يوم بالوسم والأمطار نازله والربيع يجلس يرعون منه لين الوسم الثاني والله انه يوريني محلات بالبر ضلعان كانت على وقته كلها مياه والماء ينزل منها طول السنة والعشب والأشجار يقول البقر مبطي يفكونها بالضلع معها ثور ما ترجع الديرة لين تولد يجون يعلمونه القريبين منها يا فلان ترا بقرتكم ولدت ويروح يسوقها للبيت ويفك البقرة الثانية ويسوقها للضلع تاكل وتشرب طول السنة !!
هذولا اللي ما عندهم مزارع ..

وأهل الغنم يحفرون حفرة جنب الشعيب وينز الماء فيها لين تمتلي ويسقون حلالهم منه ويرعونها جميع وإذا رجعت الديرة كل غنم تدل بيت راعيها تدخل مع الباب !
وأحيان تضيع بعض الغنم ويدخلون بيت واحدن ثاني ويقوم يدورهن ويطق البيبان (يا من عين العنز الي وصفها كذا وكذا) لين يلقاها :D

والحمير مبطي هي السيارات ويسمونهم ويعرف الحمار اسمه ويعرف راعيه ..

علوم يا أخيي وأشياء أقرب للخيال كأن الناس كانت عايشه بحلم قبل البترول والنعمة اللي حنا فيها ..

والقليب يجي في اسفلها توسعه من الجوانب تحت الطوي نسميها السلال
والمجرا الي يصب في القليب نسميه شان

يوم المزرعة والقليب هي عصب الحياة ومصدر قوت أهل البيت كانت الناس تعتني بهن أشد العناية ..

ما أقول إلا الله يوسع صدرك بالإيمان وطاعة الرحمن ،،

يشهد الله اني ما أفوت لك موضوع ولا رد وكل ما خذت جيت أفتح مويضيعاتك وأقرا علومك وأدعي لك لو ما رديت عليك، لكن العذر والسموحة منك وأنت كريم والله يكتب لك الخير ويرزقك من واسع فضله ويجعل ما قدمت من خير في ميزان حسناتك.

هذا ما لدي فإن أصبت فمن الله وحده، وإن أخطأت فمن نفسي والشيطان.

والسلام عليكم ورحمة الله وبركاته ..

خيال الغلبا

06/12/2016, 06:11 PM

سحاب نجد راعي شقراء

10/12/2016, 10:36 PM

ياسحاب الله يعطيك العافيه

انا من اسنانك طال عمرك وكنت اشتغل على المكينه اللي قبل البلاكستون الصغيره اظنها يانمار

لكن اتركنا من هالسوالف

انا ابيك تسير علي كانك بالرياض وش قلت يعني عازمك

يالله تحييه وياهلا ويامرحبا

انت تذكر الي قبل البلاكستون ذيك الي حذافاتها كبر بليس تراها عندي الا هلحين بس ماتشتغل الي تشتغل هلحين البلاكستون وحطيت معها غطاسات اريح من المكاين وغثاهن وخص الا خربت المراوح يبي من ينقظهن يعني يفكهن كلهن وزعب ولا تزعب نقعد ثلاثه وربعه ايام ونحن نصلح فيها من الصبح الين الليل الله لا يشقينا
المكينه توي مجددها :D عند القصيبي في الرياض الرجال ريض في الدنيا :D
وعندي بعد مكينه الفلفو القديمه وهي تجي صغيره بس مهيب تشتغل

انت تذكر منول مثل ذا الوقت ينهد حيل الواحد ماطاعت تشتغل المكينه بارده وتذكر ونحن نروس ونسقي والماء ثلج الله المستعان دنيا تركض الله لا يظهرنا منها الا وهو راضي عنا
وجعل ربي يسعد قلبك ويعلي قدرك على العزيمه والله انه ودي بس عندي ضرف ون راح ابشر ارسل لك وعلمك وجي يمك انشاء الله تعالى
وفي حفض الرحمن الرحيم

سامرنجد

03/05/2020, 07:23 AM

الله يسعدك سحاب السالفه مبطيه وانا مبطي عن المنتدى بشكل خاص والمنتديات الاخرى عامه
ولكن حتى لو طالت الغيبه بسبب مشاغل الدنيا والظروف مانسيناكم جميعا
اتمنى ان تكونوا جميعا بخير وصحه وسلامه

على طاري المكينه فالبرد ماكنت تصعطها عشان تشتغل هههههههه