المساعد الشخصي الرقمي

مشاهدة النسخة كاملة : فائدة من استشاري .. عن بعض المشروبات والمأكولات


فروووس
06/02/2007, 12:20 AM
ياالله صبحهم بالخير ..
يا إخوان بما إنكم حول الاكل تدندنون بغيت انقل لكم كلام استشاري باطيه لعل البعض يستفيد ..
من المعروف انه في الرياض افضل دكاترة باطنيه تقريبا ًهم ثلاثه ( الشدوخي ، مفرح ، الحربش )
المهم زرت واحد منهم قبل اسبوعين وعطان بصراحه نصائح ، جدا ً احسها مفيده بالنسبه لي واتوقع حتى البعض منكم
أولا ً .. الزنجبيل ماله فوائد كما شاع عند العوام ؟؟
ثانيا ً .. الجرجير ويسميه قت الحمي..يقول انه غير صحيح انه مفيد .
ثالثا ً .. القهوة ..بصراحه قال كلام اعجبن يقول شف قاعده بالحياة ( أي مشروب كيف تراه مضر بالصحة ) عندك الدخان مضر عندك الخمر مضر عندك القهوة مضره يقول ان غالبية الشيبان يموتون عندنا بعمر السبعين بأمراض السرطان عفانا الله وإياكم لكونهم مدمنين عليها .. اللي هي القهوة
سألته عن الفواكه قال عندك اربع فواكه هي الرئيسيه والباقي نكهات فقط ؟؟الرئيسيه هي ( التفاح ، التين ، المشمش ،الرمان )..
دمتم بحفظ الله ورعايته ..
راعي الهـــدد
06/02/2007, 12:29 AM
والله يابن الجواد ان كلامه مايخش الراس ابد

هناك دراسات طبيه في الأغذيه ومنها الفواكه على سبيل المثال تنقض كلامه عن بكرة ابيه

كيف الفواكه مالها فائده الا الي ذكر

ماهوب صحيح ابد

واول واكبر واقوى رد نقوله له مع احترامي له وتقديري لشخصه النافع للمجتمع

اقول له تذكر ان الله لم يخلق شيء عبث ابد

وما من شيء الا وله فائده

حتى الحيات والعقارب على مظرتها لها فوائد بل يستخرج منها علاجات وادويه

فكيف بشيء طيب ونافع بالتجربة كبعض الفواكه

القهوه انا معك انها مابها زود فايده

بس مايقال مظره وتصور للناس بهذه الصوره

فعندنا شيبان بلغو المائه 100 وهم باتم صحه بل والله لو تمسكه بيدك ماتقواه وهو مكرع في القهوه صبح مساء وش رايك

رأيه يحتمل الخطأ اكثر من الصواب

ورأيي يحتمل الأثنين معا وكلنا ذو رأي وخطأ وصواب

محبك ابو حمد
متيم البر
06/02/2007, 08:47 AM
الأخ فرووووس
أرجو التأكد من نقل المعلومات لأن ماذكرته فيه مغالطات كثيرة وهو أقرب ما يكون لكلام العوام. أجل ا"الدخان" مشروب؟؟؟
عموماً يوجد مراجع في هذا المجال يمكن الرجوع إليها والاستفادة بهذا الخصوص.
وبالنسبة للأطباء المذكورين وش دخلهم كلهم بالموضوع إذا إنك تقول زرت واحد منهم؟؟؟؟

مع التحية
فروووس
06/02/2007, 12:07 PM
ياسلام عليكم ايه كذا التفاعل ..
ياعزيزي ابو محمد هو ماقال الفواكه مالها فايده ابد وان الله خلقها عبث .. هو يقول انها طعم بس يعني مثل العنب طعم حلو وانت تتلذذ فيه وانت تاكله لكن هل للجسم فائده مثل التفاح ؟ انا بصراحه استغربت من قوله عن الفواكه قال ارجع للكتب المقدسه وتلقى كلامي صحيح .. عاد اي كتب مقدسه مادري .
اما بالنسبه للقهوه يقول من مضاره ان الشايب اذا بغى يسوي عمليه مايكفيه بنج مثل الناس الا لازم تدبل الكميه مره ومرتين علشان يستجيب ولا يصحي الا بعد ساعااات وش يدل عليه ؟

اما قول اخوي انه كيف يقول الدخان مشروب ؟
اقول انه معروف انه مشروب انت ماسمعت الشاعر ياسر التويجري يقول :
عطني زقارة كنت والا دوفي دوف ،،، ابشرب الدخان لو اني مطوع


في الختام ياخوان من الجميل اننا نطلع بفايده حتى ولو كانت معلومتي مغلوطه :no2:
L I M I T E D
06/02/2007, 02:28 PM
اي شيء ودك تاكله او تشربه

كل واشرب بس لاتكثر

ولا هوب جايك شيء باذن الله
فل اوبشن
06/02/2007, 06:35 PM
كلام الدكتور مبالغ فيه بعدين العنب مذكور بالقران بعدين التمر ما ذكره واهلنا الاولين عايشين
على التمر بعد توفيق الله ولا قد ذاقو مشمش ولا تفاح ..
مشكور على الموضوع ..
مغيب شمس
10/02/2007, 02:16 PM
أخوي اسعد الله مساك

مع احترامي لهدكتور وين راحت فوائد التفاح سواء الأخضر منه أو الأنواع الأخرى

وفي دراسات عديدة للأغذية اجمع باحثيها على فوائدالتفاح

ومن المقولات المتداولة المشهورة

اجعل آخر طعامك تفاحة تستغني عن زيارة الطبيب

أخوي ...
أما عن الزنجبيل فهو موجود في الطب النبوي على صاحبه أفضل الصلاة والتسايم
لاحظ : الصادق الأمين صلى الله عليه وسلم
نصيحتي لك لاروح عند هالدكتور وامثاله تراهم ((هب بلا لب))
فروووس
10/02/2007, 02:20 PM
هلا باخوي مغيب شمس



ليتك اخوي تقرأ بتركيزشوي ..

هو يقول التفاح من الفواكه الاساسيه .
اما عن الزنجبيل ليتك والله تفيدنا وتعطينا حديث يحث فيه المصطفى عليه الصلاة والسلام على شرب الزنجبيل ؟
وفي الأخير اشكر للجميع المداخلات .


وماكتبت هذه السطور الا لكي نستفيد .
المرقاب
10/02/2007, 04:06 PM
الزنجبيل ماهو حديث بس ... يا خوي القرآن مذكور فيه الزنجبيل (سورة الإنسان), والعنب وش خليت... كم مره ذكر في القرآن...
وهذا الدكتور أظن أنه ما تأكد وأخذ من مصدر واحد فقط الله يهدينا جميع
واحد من البشر
10/02/2007, 06:29 PM
يمكن نقول القهوة (كيف)
تمشي هذي لكن أن الفواكه الباقية مالها فوائد هذا مهوب صحيح وبعدين إذا بغيت تسأل عن فوائد الأطعمة لا تروح لإستشراي باطنية رح لأخصائيين التغذية هم يفيدونك أضرب لك مثال أخوي فروووس إذا جت الواحد زكمه بديهياً وش يطلب شي طبيعي عشان تروح الزكمة أكيد عصير برتقال ويشوف الفرق مع استعماله بنتظام وفيه مجموعة مواقع مفيدة عن التغذية والعلاج بالأعشاب مثل ملف الدكتور جابر القحطاني في جريدة الرياض أعيد وأكرر مششششششششكور على هذا النقاش المفيد
الشمالي 77
10/02/2007, 06:58 PM
ياسلام عليكم ايه كذا التفاعل ..
ياعزيزي ابو محمد هو ماقال الفواكه مالها فايده ابد وان الله خلقها عبث .. هو يقول انها طعم بس يعني مثل العنب طعم حلو وانت تتلذذ فيه وانت تاكله لكن هل للجسم فائده مثل التفاح ؟ انا بصراحه استغربت من قوله عن الفواكه قال ارجع للكتب المقدسه وتلقى كلامي صحيح .. عاد اي كتب مقدسه مادري .
اما بالنسبه للقهوه يقول من مضاره ان الشايب اذا بغى يسوي عمليه مايكفيه بنج مثل الناس الا لازم تدبل الكميه مره ومرتين علشان يستجيب ولا يصحي الا بعد ساعااات وش يدل عليه ؟

اما قول اخوي انه كيف يقول الدخان مشروب ؟
اقول انه معروف انه مشروب انت ماسمعت الشاعر ياسر التويجري يقول :
عطني زقارة كنت والا دوفي دوف ،،، ابشرب الدخان لو اني مطوع


في الختام ياخوان من الجميل اننا نطلع بفايده حتى ولو كانت معلومتي مغلوطه http://70.86.213.226/~mekshat/vb/images/smilies/no2.gif



http://70.86.213.226/~mekshat/vb/images/smilies/biggrin.gif http://70.86.213.226/~mekshat/vb/images/smilies/biggrin.gif http://70.86.213.226/~mekshat/vb/images/smilies/biggrin.gif
عجمي
10/02/2007, 10:09 PM
وعليكم السلام ورحمة الله وبركاتة

ماقصرت اخوي وتسلم على الموضوع والله لايهينك والف شكر

تحياتي لك

اخوك عجمي
محيط
10/02/2007, 10:36 PM
ولله انا اقول ماعدهم سالفه
الجرجير من العوامل المساعده على زيادة الحديدي في الدم وينصح به الامهات الحوامل وكذالك ينصح به عند تشقق البشره
والخظروات عامه غنية بالحديد .
مغيب شمس
13/02/2007, 11:04 PM
فروووس اسعدالله مساك طال عمرك ومساء الجميع
والله قريت بتركيزوماذكرات التفاح إلا لشهرته عند العامة
واستشعارهم لأهميته فكيف الدكتور هداه الله ينكرالكثير من الخضار
والفواكة والتي يصفها كثير من الأطباء لعلاج بعض الأمراض
اما الأحاديث ياليت إذا عند وقت فاضي تقرأ بعض كتب الطب النبوي
التي ذكر فيها الزنجبيل والبصل والثوم والحبة السوداء وغيها الكثير...
والعذر والسموحة بارك الله فيك
مغيب شمس
13/02/2007, 11:18 PM
اخو فروس بارك الله فيك هذا عن الزنجبيل

ومن صفات أهل الجنة أنهم يشربون كأسا كان مزاجها زنجبيلا . قال تعالى :


" ويسقون فيها كأسا كان مزاجها زنجبيلا "


وأظهرت الدراسات العلمية الحديثة أن الزنجبيل دواء فعال جدا في محاربة الغثيان والإقياء وخاصة الإقياء المعند الذي يحدث بعد إعطاء الأدوية المضادة للسرطان ، كما أنه دواء ممتاز لدوار البحر .
عسان وياك وجميع المسلمين من اهل الجنة ... آمين
مغيب شمس
13/02/2007, 11:23 PM
دونك هالرابط فيه الكثير
http://arabic.islamicweb.com/books/taimiya.asp?book=10
فروووس
21/02/2007, 11:19 PM
بيض الله وجيهكم جميع انا اشهد انكم ابدعتوا كلكم ..
وما فيكم خاسر !! كأنه صار شاعر المليون :D :D


الحكمه ضالة المؤمن انًا وجدها فهو أحق الناس بها .. (الظاهر تمشي ذي ولا تدققون ):D

هو قال كذا أنا ماقلت :D <<< حشره مغيب شمس :D

عموما والله لو مايجينا الا اننا سولفنا جميع
نراكم على خير في موضوع آخر لا يقل عن موضوعي هذا غرابة ًً ..:eek:

دمتم بود / اخوكم فروووس
واحد من البشر
11/05/2007, 04:48 PM
أرجو الاطلاع على ملف د. سعود الشقراوي حول الفيتامينات والأغذية الموجودة فيها سترى أن الطلام فيها التباس
خالد777
11/05/2007, 05:05 PM
@مشكور اخوي
فرووووس

@الصراحة أثرت الموضوع باسلوب ممتاز يبدو أن الدكتور يتكلم عن صحة البطن بحكم تخصصهم
@المشكلة حنا مانهتم بالفواكه وخاصة الجبن خخخخخخخخخ
أقصد نضرب باللحم ولا نناظر الفاكهة
@نفتقد للنقلش العلمي بالبراهين وتقبل وجهات النظر كما أننا نقبل الكل أو نرفض الكل للأسف

@عطني زقارة كنت والا دوفي دوف ،،، ابشرب الدخان لو اني مطوع
استدلال يدل على خفة دم وحب للشعر الفكاهي المهستراتي

دمت بخييير