يا أعضاء مكشات،،من يدلني على هذا البريق

[Magellan]

السلام عليكم......
إخواني صار لي فترة وأنا أبحث عن بريق ستيل كوري الصنع في المحلات وللأسف ماوجدته....
دوّرت في محلات كثيرة في الرياض (الديرة وسبالة والعويس والمروج والربوة والأسواق اللي على الخطوط السريعة ووووو) ...
وللأسف ماوجدته ، كل اللي موجود هو صيني الصنع وأنا ما أبغاه ...
أمس كنت عند واحد من الربع وشفته وإستحيت أخذه وهذي صورة له:

http://www.mekshat.com/pix/upload/images27/mk11979_abcd0001.jpg

ياليت أحد يدلني وين يباع ،،،
ما أبغى أحد يقول لي رح لم المكان الفلاني أو المكان الفلاني ، لأني تعبت ماحصلته حتى أصحاب المحلات يقولون ماعاد يجي...
اللي شراه قريب ياليت يوصف لي ولو حتى خارج الرياض
وشاكر ومقدّر مُسبقاً

[طــامــي]

انصحك تدوره في القورى يعني خارج الرياض وخاصه المحطات الاتي على الطرق ولقديمه او سوق سويقه في الرياض

[Abu Saad]

اذا انت مالقيته في شارع السبالة فأطلب الله .
الا في حالة واحدة (حراج ابن قاسم ) طبعا مستعمل!!!
يمكن ويمكن بعد :)

[محمد العبدالسلام]

رح للحراج وبإذن الله تلاقيه بس يبي لك شوي لف وانصحك بآخر العصر يكون الناس قليل وتحاش يوم الجمعة وبالتوفيق

[Magellan]

أخوي طامي دورت في القرى وفي العيينة بالذات عند شايب ومالقيته ...
وصارت هالسالفة مثل سالفة شاهي أبوجبل أبو صندوق....
فرّيت الديرة ومالقيته أبو صندوق خشب وكل ماسئلت عنه قالوا عنه إنه في الديرة، وأشوى يقولون الموجود مثل القديم...

[Magellan]

أخوي ددسن79 .....السبالة غير موجود،،،والحراج هي الحروة
وأنا أنصحكم أنكم تلحقون على الغضار دامه أصلي ويجي من تشيكوسلوفاكيا

[Magellan]

نجـ أبن ـد
الله يجزاك خير ........مقصودك مستعمل وإلا جديد من الحراج
الله يحفظك

[عجاج]

اخوي ماجلان الله يعينك انا مثلك تعبت وانا ابحث عنه ولكني ولله الحمد لقيته في اجازة الحج بحفر الباطن كنت اتسوق انا

والشباب في سوق المواعين وكنت ابحث عنه عند كل محل مواعين ولقيته عند محل ولا عنده الا بريقين فقط وقالي ب50 ريال

ولكن الشباب قالو لي لاتستعجل يمكن نلقى ارخص وفعلا لقيته عند محل ثاني ب 35 ريال واخر حبة وشريته منه

وللمعلومية مواصفاته ستيل 3 لتر صناعة كوري ورقمه 8/ 18

[ابرق العزاف]

شوف جدة ام الرخا والشده باب مكه

[فارس عنيزه]

اسلام عليكم
يفداك الي عندي شف انا عندي 3 انا باخذ الصغير وانت الكبير وواحد ياخذ الوسط تعال لمي تراي صامل
راسل علا الخاص كانك تبي تجي

[رحال2010]

خلاص يافارس عنيزه احجز لي الوسط ارسل لي العنوان والله يسلمك على هذا الكرم

[المموه]

طيب وش السر بالبريق . الهندي ابو تاج افضل منه ومتوفر

[Magellan]

أخوي عجاج
جزاك الله خير،،
شكلي أبطمر للحفر هالأيام الجاية.....
وبالفعل هو 18/8 وفيه نوعية جيدة منه وهي 18/10

[Magellan]

ابرق العزاف:
شكرا لك ،ولا أتوقع أحصله هناك

أخوي فارس عنيزه
شكرا على كرمك ولا يُستغرب منكم يا أهل عنيزة ذلك،،
وجعل ربي يسلمك،،
أنا راح أدور عليه في الحراج بالرياض لأني أباخذ كمية منه مهيب سهلة...
وشاكر لك كثيراً،،

أخوي المموه
السر في البريق لأصحاب الكيف واللي يضبطون الشاهي أبوجبل،
تلقاه مايتغير طعمه من أول البيالة إلى تاليها عادة...
بالإضافة يُضبط على الدافور وعلى الحطب....
أما المعدن فهو مخصص للحطب وإذا تبي الزين فهو ماركة 555 الهندي وليس أبو تاج ،
على فكرة يبدو لي إن ماركة 555 إنقطعت حالها من حال بيالات بادريق الفرنسية...... صارت الآن إماراتية

[كادر]

السلام عليكم

انا ماخذه من قريب من محطة المدينة اللي على اول خط القصيم وانت طالع من الرياض
تحياتي

[Magellan]

شكرا أخوي الكادر ،،،
وراح أجي لمه اليوم إن شاء الله ....
تقبل تحياتي

[البركة]

شايفه مع واحد من العيال توه شاريه ابساله واعلمك ان شاء الله

[الماس البري]

السلام عليكم ==============
طع شوري ورح للحراج القريب من الحرس الوطني وبتحصلة إنشاء الله
العام اللي راح أنا شاري واحد
=
=
=
=
http://www.mekshat.com/pix/upload/images27/mk42971_image(022).jpg

[Magellan]

شكرا أخوي البركة لمشاركتك .......

أخوي الماس البري،،
لعلي أجد الفرصة وأروح هناك ........

والحقيقة يعجز لساني عن شكر جميع إخواني اللي شاركوا في الرد على هذا الموضوع ...
وأشكر كل من تفضل وقرأ وشارك بهذا الموضوع

[راعي الهـــدد]

اخونا الغالي

عصر هذا اليوم الأربعاء
رحت لشارع السباله ودجته كله من اوله الى آخره وحصلت البريق الي تبي عند محلين او ثلاثه فقط

المحل الأول اسمه بن شيهون شفه في اول شارع السباله بيجيك محلات تخش لها يمين متقابلات شفه اذا لفيت يمين يجيك في الصفه الي على اليسار

المحل الثاني
وهذار قم المحل اسمه الجزيره يجيك على اليسار على نفس امتداد شارع السباله
0560661489 اسمه راشد يمني
وهذا رقم الثابت

014131153

وبعد السباله صليت المغرب في سوق بن دايل وحسته كله وماحصلت البريق الا عند محلين ايظاً واحد اسمه السيف بس مشكلة السيف بكل محل بس خذ رقمه

014596557

وهذي النوعيه مثل ماطلبت كوري ومن الستيل الجيد 8/18

بس شف ممكن ماتحصل الا هاه كم حبه لأن الوكيل ماعاد يستورد وكيله ابن شيهون ورحت له بالسباله قال الي باقي عندنا بقية بظاعه قديمه ومنتهيه ماعاد بقي الا حبات معدوده ونبيعه جمله

اذا تبي الوكيل بن شيهون شفه في آخر شارع السباله تراه اثنين شف المحل الثاني بن شيهون على اليمين

عموماً ترى هالبريق نوعين فيه نوع بجوده عاليه جداً ستيله من نوع 18/10

بس نافده الكميه ماتحصل الا منه بريق صغير اصغر حجم وشريت منه واحد
واتمنى اني اعرف اصغر حجم الصور كان صغرت حجم صورته ونزلتها لك هنا

عموماً انا في خدمتك اذا تبي اشتريه لك ابشر ونخوك

اخوك ابو حمد

[الكاسر23]

والله يا اخوي ماجلان انك شوقتنا لشرب الشاهي من هالابريق

ذكرتني قبل 20 سنة كان عندي مثله (3) لتر، بالفعل تشرب الشاهي من اوله إلى اخره ما يتغير طعمه ولا لونه.

شكلي بابدأ البحث من جديد ، لكن بأبدأ من محطة المدينة اللي على طريق القصيم مثل ما قال اخونا كادر، ثم ننتقل الى ابن شيهون والجزيرة ، مثل ما وصف لنا الاخ راعي الهدد والله يعين على المشاوير .. لقينا ما يشغلنا .. الله لا يشغلنا الا في طاعته.

وبالتوفيق.

[راعي الهـــدد]

والله يا اخوي ماجلان انك شوقتنا لشرب الشاهي من هالابريق

ذكرتني قبل 20 سنة كان عندي مثله (3) لتر، بالفعل تشرب الشاهي من اوله إلى اخره ما يتغير طعمه ولا لونه.

.


ازيدك من الشعر بيوت

البريق هذا له ميزات

1- الأوله مثل ماقلت مايتغير به طعم الشاهي

2- ايظاً صحي فهو مصنوع من الستيل ذو النوعية الممتازه خصوصاً الي يجي منه 10/18 فلا يمكن يصدأ لو بقى فيه شوي ماء بعكس ابو تاج الي مع اكثرنا لو بقى به ماء صدا وحاسك

3- وايظاً اذا جيت تفوح فيه ماء بسرعه يفوح في وقت وجيز بخلاف ابو تاج والأباريق الثانيه لأن هذا حديده خفيف من تحت فتاصله الحراره بقوه مابه طبقه كبيره تمنع وصول الحراره بسرعه

وانت في البر محتاج للوقت ومحتاج لتوفير الغاز

4- ايظاً هو عملي جداً جداً تصدق عندنا واحد له فوق 15 سنه ماقال لا الى الآن مظبوط وبأنزل صورته لكم تشوفونه بس ياحيلة الله عسى اعرف انزل صورته

عموماً البريق هذا قيم قيم قيم جداً

وراعي المقانيص والكشتات مناسب له

[أبوعمار]

ياخوي ماجلان شايفه بالنسيم عند محلات الواني المنزليه يمكن ست محلات جنب بعض

[عاشق صقر]

اخوي ماجلان
بانسبة للابريق الي انت طالبة هذا كوري ووكيلة السيف تلقاه عند محلاتهم الي في دخنة خلف المحكمة الكبرا ( شارع الغنم سابقاً)
المل اسفل محلات الجملة .

[azozy]

احد الربع يذكر انه شاري هالبريق من محلات الاواني بالبطحاء في اجازة العيد

[راعي الهـــدد]

أخوي ماجلان هذي صورة البريق الي اقول لك عليه

وتراه افظل شي

والستيل حقه 18/10

يعني افظل الستيل كما هو واضح من الرقم

وهذي الصوره للبريق طبعاً انا فكيت البلاستيكه الي في ممسك اليد لعشان اذا حطيته بالنار ماتنشب بها وتميع

http://www.mekshat.com/pix/upload/images27/mk33838_aaaaaaaaaaa.jpg



وهذا رقم الستيل من خلف البريق بس عسى نظرك زين

والله عجزت

الكمره ممتازه ولابها خلاف بس توني شاريها ولاعرفت لها

عموماً قزقز الين تشوف

ماظنيت تشوف كانك متزوج ههههه

http://www.mekshat.com/pix/upload/images27/mk33838_lflflflflllfllflflfllflf.jpg

[واحد من البشر]

أخوي Magellan الظاهر البريق اللي انت تبيه موجود عندي نوعه والله أعلم انه صتاعة كوريه لا وأزيدك من الشعر بيت ترا يه صفاي لورق الفلة وشاريه من محلات الحارثي للبضائع المخفضة اللي على طريق الملك عبد العزيز حول مطعم الرومانسية
وإذا حبيت تشوف صورته علمني خلني احاول فيه عسى الله يهديه أصوره vbmenu_register("postmenu_700912", true);

[الكاسر23]

والله ياخوي يا راعي الهدد خليتنا شيبان عقب هالقزقزة اللين دمعة عيوننا، ياخوي اضبط زووم الكاميرا اللين نقدر نقز الكتابة .. وانا داري ان عذرك سبق ذكره ... متزوجين معذورين !!

عجبني تعليقك .. قلت خلني اعلق عليه :)

[راعي الهـــدد]

والله ياخوي يا راعي الهدد خليتنا شيبان عقب هالقزقزة اللين دمعة عيوننا، ياخوي اضبط زووم الكاميرا اللين نقدر نقز الكتابة .. وانا داري ان عذرك سبق ذكره ... متزوجين معذورين !!

عجبني تعليقك .. قلت خلني اعلق عليه :)


هههههههههههههههههههههههه

يابن الحلال ماهوب كل المتزوجبن انت مافهمتني

اقصد الي يبحلقون واجد هههههههههههههه

[الكاسر23]

والله موهوب اكثر من بحلقتي حتى دمعت عيوني .. والمشكلة اني نزلت الصورة على الجهاز وكبرتها اللين دخت، وما شفت شي.. الظاهر ان العملية مقصودة بس للاسف انا اول الضحايا.. :)
لا عدمناك ولا عدمنا سوالفك الطيبة يا طيب

[Magellan]

السلام عليكم اخواني:

الحقيقة يعجز لساني عن شكركم جميعاً وإعذروني عن إنقطاعي، وحبيت في هالموضوع إني أذكركم جميعا بقيمة هذا البريق وأصالته خصوصا للكشاتة وومن يحرصون على تذوق الشاي المميز، فهو أهم أدوات الشاي، وحرصاً مني بإقتناؤه لمن لم يحصل عليه أو الإحتفاظ به لمن هو عنده وعدم إهداؤه للغير حتى ولو كلفك شراء أباريق جميلة غالية الثمن وإهداؤها بدل هذا البريق الرخيص والمميز....

ثانياً:
في يوم الإربعاء الماضي 19/1/1427 وجدته في محطة المدينة وأخذت لي واحد وأشكر أخي الكادر على ذلك ويوجد نوعين 18-8 و 18-10 من حجم 1 لتر ...

ثالثاً: أشكرك جزيل الشكر أخوي راعي الهـــدد، ويبدولي إنك تهيضت كثيرا لما شفت الموضوع ، ولا ألومك فهو بحق ابريق غير شكل ويدوم طويلاً ...
وأشكرك على إيضاح العناوين وعلى جولتك المباركة في السبالة وبن دايل ،فلقد يسّر الله لي وزرت السبالة يوم الخميس 20/1 والحقيقة ماوجدته عند إبن شيهون ولكن وجدته عند الجزيرة ولكن بأحجام 1 ،3 ،4 لتر ولم أحصل على (لتر وربع) ولا على (لتر ونصف) فأوضح لي بأنه إنقطع من السوق ولكن أخذت ابريق أبو 3 لتر...
أما ابن شيهون في آخر السوق فحصّلته مسكّر وكذلك مارحت لبن دايل...
وحب أزيد مقارنة بين الستيل الكوري وبين أبو تاج :عندنا مخيم نجتمع فيه أمس أخذت لي بريق هندي ابوتاج ورحت فيه لبيتي عشان أغسله من الوسخ ووجدت بعد فركه إنه فيه ريحت صدأ على الرغم إن مامر عليه إلا سنة وهذا ماصادفني في بريق الستيل...
وبالنسبة للصورة فيعطيك العافية واضحة وبالنسبة للمساكة(المقبض) فمن المستحسن تلبيسه بقصدير ...

[Magellan]

السلام عليكم:
أخوي الكاسر23 حياك الله والإبريق حصلناه ولكن بعد عناء والشكر موصول للإخوان بعد الله..

أخوي ابوعمار: أنا رحت للنسيم وحصلته في سوق حجاب ولكن بحجم واحد 3 لتر..

أخوي عاشق صقر: أشكرك جزيل الشكر وإذا حصلت لي فرصة أروح لم دخنة..

أخوي azozy: مشكور وماقصرت والبطحاء دايم على البال.

أخوي واحد من البشر: راح أشوف وأرد لك خبر وخصوصا إني استغربت وجود صفاية للحثل للشاي فنوعية اللي نتكلم عنها لايوجد فيها صفاية ،عموما مشكور وماقصرت...

[الكاسر23]

اخوي ماجلان

ابشرك البارحة لقيت مقاس (4) لتر في قصر الأواني على طريق خريص بجانب كارفور، ولقيت مقاس (1) لتر و(3) لتر و(5) لتر في سوق الأواني اللي بداخل البطحاء وكلها من نوع 8/18

والظاهر بارك الله فيك وفي جميع الاخوان، ان موضوعك هذا سحب بقية الكمية المتوفرة بالسوق، لان احد اصحاب المحلات اللي بالبطحاء يقول لي البارح: تصدق جاء عليها طلب هاليومين بشكل خيالي الي ان نفذت كل الكمية اللي عندنا، وصرنا نجيب من المحلات اللي حوالينا.
فتصور ان اللي زاروا هذا الموضوع 1062 حتى الآن ، فنقول ان الصاملين والجادين نصهم (50%) يعني 500 تقريبا، اجل خلصت الكمية دام ان الوكيل بن شيهون (على كلام اصحاب المحلات) توقف عن توريد هالنوعية .

للمعلومية: هذا النوع يجي منه مقاس (1) و(1.5) و(2) و(3) و(4) و(5) لتر. والمتوفر بكثرة في سوق البطحاء (1) و(3) و(4)، وترا اشهر محل للاواني في البطحاء واللي من المحتمل تلقى عنده ، ثاني محل على اليمين (طبعا كل محلات الاواني تجيك على اليمين) ، ومحل الاندلس (في الوسط على نفس الامتداد).

حبيت ابلغك وابلغ الاخوان
وبالتوفيق
اخوكم
الكاسر23

[راعي الهـــدد]

أخوي الكاسر هلا بك

اول مره اعرف ان في البطحاء محلات اواني

ياليت توصف لي نبي نتمشى ونشوف هالمحلات اول مره والله اسمع بها

[الكاسر23]

هلا بك أخوي راعي الهدد

شوف الله يسلمك، اذا جيت من جنوب بعد كبري الحلة، وانت متجه شمال (طبعا انت في شارع البطحاء)، قبل ما توصل الكبري الثاني فيه 3 دخلات يمين (الأوله لمواقف السيارات) والثانية (لمواقف السيارات ايضا، والثالثة اللي بعد محلات الساعات ، وهي قريبة جدا من الدخلة الثانية وقريبة جدا من الكبري وهي (لمحلات الاجهزة الكهربائية والأواني المنزلية وتجارة جملة العطورات والمكسرات). خذ اللفة الثالثة وامش لك يجي 100 متر تلقاهم كلهم على يمينك، شف ثاني محل على اليمين ومحل الاندلس .

ان شاء الله الوصف واضح
وبالتوفيق

[عاشق صقر]

مبروك اخوي ماجلان على انك حصلت الابريق وبالهنا والعافية :)
بغيت تدلني على محطة المدينة اين توجد واي المقاس موجوده عندهم :confused: .
مع الشكر مقدم :D

[Magellan]

حياك الله أخوي الكاسر23
والصراحة تفاجئت يوم حطيت الموضوع إن المشاركين الله يعطيهم العافية متحمسين بالحيل وأحسهم بعد ودهم يجربون البريق والبعض اللي مجرّبه وده ياخذ زود ...
والشيء اللي يضيّق الصدر إن هالصيني غزى السوق وهو ماينفع ،، تصدق أتقهوى منه الحين أبو 1 لتر وهو مصدّي مع إنه ماسوي فيه أكثر 10 مرات ....
لكن قلّي وش تبي أبو 4 لتر :D ،،،
مامثل الصغيرات أمثال 1 لتر و3 لتر وأبو (1.5) و(2) لتر لكن إنقطعن الأخيرتين من السوق لأن الشاهي كل ماكان البريق صغير ووذف كل ماكان أطعم إلا إن كان له حاجة فخذ الكبير...
وترى 18-8 فيه ميزة وخصوصا على الحطب فهي تمسك فيه ريحة الحطب مضبوط ...


أخوي راعي الهدد : شكرا لإطلالتك مرة أخرى .....



أخوي عاشق صقر :
محطة المدينة الله يسلمك هي ثالث محطة تجيك على اليمين بعد كوبري مخرج العمارية وأنت متجه شمال على طريق (سدير-القصيم) السريع ،،
وأول ماتعدى كوبري العمارية خذ الخدمة بس إنتبه لا تلقط رصيف وأنت ماتدري ترى بالظلام مايبين ...
أخوك في الله بغى يصدم كم مرة ،، حطوا أرصفة بس بدون إنارة الله يهديهم...
والمقاسات 1 لتر فقط (أبو تسع بيالات بادريقية) بنوعيه 18-8 و 18-10

[الكاسر23]

الله يعطيك العافية اخوي ماجلان

بصراحة انا خذت كم من واحد احتياط بمقاسات مختلفة، لكن مثل ما تفضلت ما أزين من الشاهي في (1.5) و(2) لتر لكن للأسف دورت عليها في محلات الأواني القديمة ، لكن للأسف ما لقيت عندهم شي.

لكن وعد وعهد .. إذا لقيت من هالمقاسات .. راح اشري لك 2 من كل مقاس هدية مني لك.

اخوك
الكاسر23

[OtherProduct]

اضهروا وبانوا يا "مدمني الشاي".

[الكاسر23]

أخوي OtherProduct (http://www.mekshat.com/vb/member.php?u=44371)

ما يزين البر الا بشبت النار، وشرب شاهي الجمر. لكن تدري .. بلاك ما شربت شاهي الجمر في هالأبريق والا كان دورته دواره.

[أبن مصاول]

الله يعطيكم العافيه هذا الموضوع الذي يدل على أن أبناء الجزيره لا زال فيهم خير .....

بيض الله وجيهكم لتحمسكم للموضوع فهذا إن دل يدل على التكامليه بين أعضاء المنتدى....

وقد أفدتونا جميعكم حتى الذي سأل وجد الإجابه وأفاد الآخرين بسؤاله عن هذا الأبريق العجيب الذي ذكرني بـــقصة(الأبريق المكسور)....هههههههههه

تحياتي للجميع ولصاحب الموضوع مستر (ماجلان)الذي أثار شجون محبي الشاي على أصوله...

أخوكم ابن مصاول

[ابو نجود]

انا عندي بريق تفويح من نفس النوع استخدم الصغير منه للشاهي في بعض الاحيان وهو مثل ما قالوا الاخوان ستيل 18\10 ..وهذي صورته..
http://www.mekshat.com/pix/upload/images27/mk190_20070212.jpg

[الزعيم 15]

وأنا دورته وما لقيته

ممكن مساااااااااااااااااااااااعدة

[Magellan]

السلام عليكم ...
إعذروني إن تأخرت الرد فلأن الموضوع إستوفى حقه من المناقشة ولإنشغالي والبركة في الإخوان الله يرضى عليهم ......

أخوي الكاسر23 ،،جزاك الله خير ورحم الله والديك ولا يكلف الله نفساً إلا وسعها......

أبن مصاول: الله يحييك ويسلمك ومدحك من طيب أصلك ،،
ولأن البريق ستيل كوري فهو يستاهل المدح والقصيد

أبونجود: البريق عندك يختلف عن المطلوب واللي موضح بالأسفل:
http://www.mekshat.com/pix/upload/images27/mk11979_img_0313.jpg


وأعتقد إن بريقك من نوع المعدن الخفيف اللماع إن لم أكن واهم...


أخوي الزعيم 15:
لقد أفاض الإخوان بوصف المحلات التي تبيعها وبإمكانك الرجوع لمشاركتي ومشاركة الإخوان بالذات راعي الهدد والكادر والكاسر23 فقد أوضحوا الأماكن بالتفصيل

[ابو نجود]

صحيح اللي عندي من اللماع الخفيف...لكنه للتفويح وليس للتخدير..والله يعيني على تدويره ...لان اخوك يحب الشاهي الكايف..
ابو نجود..

[عاشق صقر]

يعطيك العافيه اخوي ماجلان انا عرفت الوصف انشاء الله اببحث معكم عن الابريق في عدة محلات اذاحصلت اي معلومه عن المطلوب ابعطيكم خبر .

[سفاري نجد]

الأخ ماجلان ولا يهنون الاخوان ...

كنت متابع الموضوع من أوله وسألت عنه بكذا محطه ومحل أواني بالرياض وسألت عنه بالزلفي في محلات الاواني والمحطات

وما حصلته لكن حصلته بمحطه على طريق الخرج

حصلت الأبريق حجم 1.6 لتر وحصلت حجم 1.3 لتر ونوعية الأستيل 18-10 صناعة كوريه وكميه بسيطه ،،،

وأخذت أنثين وباقي كميه منه والسعر مناسب سعر الحبه 25 ريال

تحياتي للجميع

[ع الطيار]

اخوي سفاري

وين مكان المحطه بارك الله فيك

[azozy]

اخ سفاري مع التحية
لو تسمح اين المحطة؟
لاهنت

[سفاري نجد]

الأخ الشرنقه

والاخ عزوزي

المحطه هي محطة التسهيلات بعد مخرج البحريه وقبل مخرج هيت رقم 11 وانت متجه للخرج جنوباً ،،،

[azozy]

شكرا اخوي سفاري نجد

[النايف]

اخوي الحبيب الأبريق شفه في أسواق الرايه على طريق الملك فهد بمحافظة المجمعة
والمكان الأخر في الديره عند محل الزيد للأواني
وشكراً

[راعي المستوي]

هل بحثت عنه بالعويس ... العبدالكريم واللي حولة
عموما اباريق الاستيل ممتازة جدا
واضف ايضا انه ما يهجر بسرعة مقارنة بالمعدن والغضار

[وثّاب]

الأخ ماجلان الأبريق تجده عند قصر الأواني على طريق خريص قبل كافور ووجهك غرب قبل أمس كنت عندهم ولقيته

[otaisa0v]

السلام عليكم ورحمة الله وبركاته،،

بخصوص الابريق رحت للجار لله في البطحاء ولقيته عنده وأخذت 1 لتر و 3 لتر بخمسين ريال.

اخوي عزوزي هل لقيته في محطة التسهيلات و متى رحت وهل فيه كمية وأبغى التوصيف الدقيق هل المحطة قبل مصفاة أرامكو ولا قبل وشكرً.

[SAL]

وين احصله في الشرقيه؟؟؟؟

SAL

[راعي الهـــدد]

قريبا ستطرح مسابقة بسيطة


وجائزتها


ابريق من هالنوعية المعدومة من السوق


ابريق جديد بكرتونه من نفس هالنوعية





جاوب على السؤال


وابشر بالجائزة




ابريق ستيل جديد

ومن النوعية النادرة

ههههههههه




انتظرو اقلالالاع ابو حمد

[سكب]

اليوم انشاء الله ادورلك عليه ابشر

تحياتي

[SAL]

جزاك الله خير

سكب

وانا انتظر ردك
اخوك

SAL

[SAL]

ها حصلته؟؟؟
SAL

[كانو1]

لفيت سوق الأواني المنزلية بجدة
سوق الشرفية والهنداوية والبلد وما لقيته !!!!!!!!!!!!!!!!!!!!!
وفيه سوق قريب مني ......... والله إني مستحقر أدور فيه ،،،،،،،،،،،،،، السوق الشعبي ( سوق الأمير متعب ) .ماهو نفس اللي فالصورة لكن كوري ستيل دائري 18/8 تختلف لون المسكة فقط .
ورحت له بعد العشاء ولقيته في محل واحد فقط الكمية 6 براريد مقاس 1.6 لتر وسعر الواحد 25 ريال أخذت واحد والباقي عنده .

[Magellan]

ههههه
ماشاء الله الإخوان مهتمين لها الدرجة بهالإبريق
خلاص طلقته وبالثلاثة ولو أشوفه ما آخذه
والسبب:
1- اللي عافنا نعافه واللي باعنا برخيص مانبيه.(أقصد الكوريين)
2- حولت وجهتي للغضار لأني سمعت بما أن اليورو إرتفع فامتنع كثير من التجار من إستيراد الغضار الأصلي السلوفاني وصاروا يجيبونه من الصين لذلك ماراح أفرط فيه

[القناص]

ربع تعاونوا ما ذلوا

بارك الله في الجميع

وعلى كلام مدير محلات الامل للستيل والمواعين وقراشيع المطبخ اللي في اسواق العويس ان اهم شي يكون الستيل 18\10 وخذ المقاس اللي يناسب.

لان هالنوع ما يطعم ولا يتفاعل مع الماء اثناء الغليان

والله اعلم

[الحصاة الرقطا]

الله يرج ابليسك .. :eek:



احسبك طلعت البريق من عزبتي .. :D :D



عندي أخو الكبير وعمره 11سنة .. :rolleyes:



واللي مايعرف أبوجبل .. يلوم الرجال :p

[xozxo]

يبدو ان الاخ ماجلان زعل ابريقك يا اخي شريت اخوه اليوم من السباله ووصف المحل اول ماتدخل السباله يجيك شارع على اليمين المحلات الى بعد الشارع ثالث او رابع محل على اليمين امام الموركي للاوني المنزليه وسعره يزيد عن الصيني بنسبه50% واعذرنا على التاخير

[ابولولو]

السلام عليكم اخوي
انا هذي اول مشاركه لي
وحبيت اني افيدك عن الموضوع
الاباريق هذي تلاقيه في اول محطه وانت نازل
من الخط السريع ا لجديد للقديم لطرق الخرج
بأتجاه الجنوب
هذا الكلام له ثلاث شهور تقريبا
ابريق استيل كوري
واذا مالقيت ابشر بالعوض وانا اخوك

[راعي سمنان]

اخواني مالقينا هالبريق كل مابالسوق صيني طالبكم طلب الرجال للرجال واحد من الأخوان يدبر لي واحد وله فوق قيمته حبه خشم .
خويكم ماسكه معه على هالبريق ومالقاه ...... انتضر فزعه هنا او على الخاص .

[أبومنصور]

كان عندي مثله ودربااااه الشعيب
وهالحين ندور له بديل

قلبت المواجع يا ماجلان
هههههههاااي

[رعد النجدي]

في حراج بن قاسم
لا تضحك انت منتب ماخذ اخته
تراه بريق
بريق مويه
صب فيه خل واطبخه
ثم اغسله بكلوركس
ثم خدر فيه شاهي ثقيل
وخلاص استعمل بعد كذا

[hakim120]

السلام عليكم ورحمة اللة
انا شريتة من اسبوع من حراج ابن قاسم فى الجهة الشمالية الغربية من محل ادوات منزلية مخزنة بس خلصت المقاست الكبيرة 1.5- 1 ما بقى الى مقاس صغير وهو صناعة كورية والمساكات متكسرة رقمة 10-18
بس مدري تلحقون ولا

[كانو1]

أخوي راعي سمنان السلام عليكم ورحمة الله وبركاته
البريق لقيته في جدة مقاس 1.6 لتر وصناعته كوري ستيل 18/8
وإذا تبغا واحد أبشر بسعدك . أنا عندي 2 والمحل باقي فيه تقريباً 4 .
هذا الكلام قبل شهر .

[راعي سمنان]

أخوي راعي سمنان السلام عليكم ورحمة الله وبركاته
البريق لقيته في جدة مقاس 1.6 لتر وصناعته كوري ستيل 18/8
وإذا تبغا واحد أبشر بسعدك . أنا عندي 2 والمحل باقي فيه تقريباً 4 .
هذا الكلام قبل شهر .
ياما للغنات اخوي كانو 1 والله مايجي قصور بس وشلون يوصلني انا بالرياض وابي واحد من 1.6 الكوري ولاعليك امر . انتضر ردك اخوي .

[سكّين]

لأن هذا حديده خفيف من تحت فتاصله الحراره بقوه مابه طبقه كبيره تمنع وصول الحراره بسرعه

يابو حمد اتوقع ان ابو طبقة كبيرة افضل لأنه يمسك الحرارة أكثر

ولا وش رايكم

[saalh123]

اخوي سمعت ان هالنوع موجود في الخرج وسلامتك

[هبيس]

بصراحه ودي بهالابريق

بكره ان شاء الله بأجحد ام العيال ومقاضي العيد وبأخصص يومي

للبحث عن هذا الكنز النادر .

[هبيس]

رحت لمحطه المدينه ولقيت اسمها متغير وتعديتها ورجعت مره ثانيه

المهم

قلت له عطني الابريق الكوري 1 لتر حق الاخ ماجلان الي في مكشات

وكانت المفاجأه

طاع لي عشره انواع وتوهقت لأن الصوره اساسا ما طلعت عندي في الموضوع ولا اعرف شكله

ارجوكم ان تضعوا صوره هالابريق الي جاب لي الارق وما راح ارتاح لين

اتقهوى فيه من ابو جبل

عجلوا علي قبل لا يخلص ونبلش .

[كاشخ 24 ساعه]

صوره لو سمحتوا وانا اصنع لكم اللي تبون

[هبيس]

صوره يا الربع

بنطلع ان شاء الله البر في العيد ولازم هالابريق

[كانو1]

ياما للغنات اخوي كانو 1 والله مايجي قصور بس وشلون يوصلني انا بالرياض وابي واحد من 1.6 الكوري ولاعليك امر . انتضر ردك اخوي .

السموحة يا راعي سمنان
والله ما قريت ردك إلا أول يوم في عيد الأضحى لكن ملحوقة أخوي في جدة ومحله في الرياض أبرسلك ابريق معه ومحله يعرفه راعي الهدد أبو حمد وجوالي عنده .
ترى الخاص ماهو مفعل والا اعطيك الجوال ..

[الكونترولCONTROL]

يمكن عند الصانع - بريدة
=================
و غالبا اللي ينقطع من السبالة بالرياض ..... خلاااااااااص سلم عليه
=================================

[ساقان]

تم القبض على المذكور وايداعه شنطة المعاميل




http://www.mekshat.com/pix/upload02/images55/mk6745_26.jpg



http://www.mekshat.com/pix/upload02/images55/mk6745_27.jpg


http://www.mekshat.com/pix/upload02/images55/mk6745_28.jpg

[مسامرالليل]

ابشرو بالصور ولكن بشرط انا فى الطائف والا يعرف مكان هذا المطلوب للبر يعطبنى خبر والا يدلنى على مكانه
والله انى لادعيله , والله يسامج اخونا : Magellan
فتحت علينا باب كنز لاهل الشاهى والحقيقة انى دخت ولا لقيته ولا كلما جيت اسال عنه قالو ابو وردة خلص مافى الا صيني انت قديم خذلك صينى ب100 ريال تراه زين للشاهى .
واليكم الصورة اللى وردت فى موضوع اخونا العزيز : Magellan


http://www.mekshat.com/pix/upload02/images55/mk27877_1.jpg

والرقم من الخلف 18 -10

http://www.mekshat.com/pix/upload02/images55/mk27877_2.jpg

http://www.mekshat.com/pix/upload02/images55/mk27877_3.jpg

[مسامرالليل]

اخى العزيز : كانو1
لم اتنبه لردك الا بعد مراجعة الردود , وامل ان تدلنى على صاحب المحل اللى وجدته عنده بسوق الأمير متعب , بحى الجامعة بانتظار ردك , وهل هو نفس اللى فى الصورة اللى وضعتها

[vx444]

انا اول مرة اشارك في هالمنتدى العملااااااااااااااق
..............................................
وبخصوووووووووص البريق

الى هالدرجة هالاهتمام ترااااااااااااك رفعت سعره في السووووووووووووق؟
انا عندي ثلاثة من كم سنة وركنتها ؟؟؟؟؟؟؟
وجربت الغضار السلوفيني وفررررررررررق الشاااااااااهي ابو جبل خصوصا رائع فيه

[هبيس]

الله يعطيك الف عافيه على الصوره

غدا بأذن الله سيتم شرائه

[كانو1]

اخى العزيز : كانو1
لم اتنبه لردك الا بعد مراجعة الردود , وامل ان تدلنى على صاحب المحل اللى وجدته عنده بسوق الأمير متعب , بحى الجامعة بانتظار ردك , وهل هو نفس اللى فى الصورة اللى وضعتها

العنوان هو : من عند مسجد بن لادن تلف يمين تتجه جنوب وتخلي المسجد على يسارك تلقى سوبر ماركت الجهني قدامك إجباري يمين أول يوتيرن ترجع إلين السوبر ماركت وبعدها مباشرة لفة يمين بين محل الشكمانات والسوبر ماركت وطول شوي قبل نهاية الشارع تلقى المحل على يسارك اسمه فالح مفلح للأواني المنزلية . اتمنى يكون الوصف واضح .

[مسامرالليل]

اخى العزيز : كانو1
وصلت الرسالة , والله يجزاك خير قول امين

[هبيس]

للأسف الموجود عند المدينه ((صيني وليس كوري))

ما زال البحث جاااااااااااري

[ابو شعاق]

فعلن كلامك صحيح حنا عندنا واحد بالبيت الظاهر انه له 13سنة عندنا (هوش ومسابق من اللي يصلحبوه الاول اللي يبي زنجبيل واللي يبي عادي واللي يبي بدون سكر واللي يبيه عاقد حالة يرثاله) بعدين انا منفغي راسي قبلك ابيه ولا لقيته بس واحد من العيال يقول انه موجود ببريدة (عند محل المحيميد اللي بالجردة حق المواعين لان الصبارات الاصليات قوت مالقيناهن الا عنده لان ها المحل كل شي منقطع من السوق يجيبوه ابتاكدلك وارد عليك ان شاء الله) تصبر باي ابريق اليما الله يفرجه ونلاقوه لك

[مسامرالليل]

تم شراء الابريق وكان الفضل بعدالله لاخى العزيز : كانو1
الذى دلنى على مكانه فجزاه الله خيرا , والحقيقة عندما سالت عامل المحل اليست لديكم مقاسات اكبر , اجابنى بأنه كان لديهم ولكن حضر لديهم شخص من اهل القصيم واخذ الجمل بما حمل من المقاسات الكبيرة من هذه النوعية الطيبة والشبه منقرضة من السوق , والحمدلله على كل حال .
واليكم صورالابرق العجيب

http://www.mekshat.com/pix/upload02/images56/mk27877_pic001.jpg
http://www.mekshat.com/pix/upload02/images56/mk27877_pic002.jpg

[هبيس]

هل هو موجود في احد محلات العويس

[برق4]

يا شباب وش القصة ...؟

[ابوحمد..]

تلقاه في فوق الوصف لكل شي بريالين على شارع عثمان بن عفان
مخرج 7

[مشعل العيسى]

شف يا اخيي ... انا خابره في محطة على الخط ... ابروح بإذن الله بكره اشوفه كان لقيته شريت لك اثنين ... وتامر امر

[فتى احد]

السلام عليكم ...

يأاخوان أنا عندي مثل الابريق اللي تحكون عنه لكن مكتوب عليه من تحت made in p.r.c ستل ستيل 18/10 هل هو هذا الكوري او لا وشاريه بسعر 35 ريال من الدمام مخطط 71 ويحتفظ بالشاي ساخن فترة طويلة آمل إفادتي عنه .

[البضيع]

اخي كانو1 رحت للمحل اللي تقول عليه وما لقيت الا الصغير ونشدت عن الكبير ومالقيته وقالوا لي تلقاه بالشرفية واطمر للشرفية ومالقيت الا الصيني والله مسبب لي ازمة البريق


اخي فتى احد البريق اللي تقول عليه هذا صناعته صيني وما ادري عن جودته ولا هو نفس شكل الكوري

[فتى احد]

اخي كانو1 رحت للمحل اللي تقول عليه وما لقيت الا الصغير ونشدت عن الكبير ومالقيته وقالوا لي تلقاه بالشرفية واطمر للشرفية ومالقيت الا الصيني والله مسبب لي ازمة البريق


اخي فتى احد البريق اللي تقول عليه هذا صناعته صيني وما ادري عن جودته ولا هو نفس شكل الكوري


مشكور ياغالي على المرور يعني لازم يكون مكتوب عليه صنع في كوريا بالضبط من بكرة ندور عليه إن شاء الله .

[البضيع]

لازم يكون مكتوب عليه made in korea

[بواردي الدلم]

اخوي ماجلان


تشيك وسلوفاكيا انفصلن صارت الحين تشيك دوله

وسلوفاكيا دوله

والبريق هذا مادري وين القاه لاكن لو لقيته عندنا في الدلم او الخرج ابهديك منه اثنين بس وسع صدرك

[مشعل العيسى]

رحت للمحطة ولقيت ولكن للاسف لقيت صيني ..

لكن باذن الله ابدور عليه في عدة اماكن ..

[الكهف1]

في الحراج
او في الاحساء

[البضيع]

الظاهر حتى الوكيل اللي كان يورده ماعاد يبيعه

وش السبب اللي خلاهم يقطعونه ويبطلون يستوردونه مع ان البضاعة ماشية في السوق ولاعليها خلاف

لو اي احد من الاعضاء الكرام يعرف له تاجر اواني منزلية كبيرررر يكلمه يخليه يستورده خصيصا لاعضاء مكشات ولا وش رايكم

[z a n h o r]

انا افهم نه مش موجود

اصراحه شكلي بدخل مغامره لين احصله

جرت ابريقين كلهن رديات صراحه بياله وحده بالكثير ثنتين ثم زينه مره ثانيه

بمر محطة طريق الخرج والقصيم والدمام والله ييسر

[مكشاتي الجزيرة]

ايش الميزه في هذا الابريق...
يعني مافي البلد الا هالولد...
ليه هذه المشاوير علشان ابريق...
هذا صار ابريق علي بابا السحري ماهو ابريق شاي

[ملاعب الذيب]

مثل ماقالو الشباب في القرى بتلقاه وبا التوفيق

[ملاعب الذيب]

:good: مثل ماقالو الشباب في القرى بتلقاه وبا التوفيق

[كادر]

السلام عليكم
وصلتني اخبار سريه وموثوقه ان الابريق تم مشاهدته في الحراج
(هالبريق عندي له سنين وعقب هالموضوع احس انه ثروه)
تحياتي

[فتى التويم]

شفه على طريق الملك فهد

المنتجات الوطنيه

الدور الثاني

[جوالة]

أنا شريته قبل أسبوعين من الدمام
صناعته كورية

[الأسمري 2009]

موضوع مميز ويشد الانتباة
اشكرك اخي ما جلان على المعلومة عن هالابريق

ولك تحياتي

[alajmi100]

يا أخوان ليش عازين هالبريق مره ترا السالفه درجه الستيل اللي فيه وهي كميه الستانلس ستيل اللي فيه يعني دور نفس درجه الستيل وراح تلقى ما يسرك
محدثكم مدمن شاهي
ولي مده ما أستخدم الا البريق الأصفر النحاس والله ياهو يضبط الشاهي بس خله على المله لاتقربه للجمر
جربوا ودعوا للعجمي

[يحيي بن حمد]

اعرفلك واحد معه البريق من 14 سنة ولا يفرط فيه لو ويش ما صار لانه استيل صحيح واسال مجرب ولا تسال صيدلي

[التويبع]

الاستيل ميزته ان الشاهي ما يبرد بسرعة!!واسال القهوجية

[ابوبدران]

السلام عليكم ...




يأاخوان أنا عندي مثل الابريق اللي تحكون عنه لكن مكتوب عليه من تحت made in p.r.c ستل ستيل 18/10 هل هو هذا الكوري او لا وشاريه بسعر 35 ريال من الدمام مخطط 71 ويحتفظ بالشاي ساخن فترة طويلة آمل إفادتي عنه .


السلام عليكم ورحمة الله وبركاته
اليوم كنت اكتب بقلم وشدني اسم البلد المصنع لهذا القلم

كان مكتوب علية
made in P.R.C.
يمكن الناس الي لها في الاختصارات تعرفها وخاصة الي يتعاملون بالتجارة والصادرات والواردات
بس عامة الناس يمكن ماتعرف وش يعني هذا الأختصار

P=People's
R=Republic
C= China

جمهورية الصين الشعبية= People's Republic of China

إن شاء الله تكون المعلومة هذي مفيده للمتسوقين وتساعدهم على معرفة اصل ومنشاء المنتج الذي يقبلون على شراءه

منقول من الاخ ( بعيد المدى )

[السنع كله]

ياجماعة البرقان اهم شيء للشاي الماء الخالي من الكلور بالذات يعني خال من الروائح والعكر ماء سيل والعلامة الماء الممتاز يتاخر الشاي ما يخدر لكن خذ مذاق وطعم درجة ثاني البريق ان كان استيل لا تستعمل الا 8/18وليس 8/10وهو احسن من الالمنيوم الهندي تاج والا ثلاث خمسات لاثاره الصحية السيئة ثالثا نوع السكر لا بد يكون خشن صافي اللون وقبلهن كلهن الشاي اسود خشن كامل الاوراق لازالت رائحته تشمها كل مافتحت العلبة ومتى ما فقدت الرائحة او جعلت معه شيئا فامتص رائحته فهو شاي فاسد استبدله فورا ولو كنت شاريه امس لان الشاي كيف باقي وحده وتراها هامه الشاي ولذته من الربع معك والمكان وعدم وجود ثقيل الدم وسلامتكم يالغالين وخوذوا استكانة شاي تراها جاهزه

[البضيع]

تمت مشاهدة البراد في مدينة جدة بشارع حراء ولكن المقاس الصغير

وشكرا

[Magellan]

أووووه
ماشاء الله كل هالردود عشان البريق
والله مانستغني عنكم ياأعضاء مكشات المميزين
والله ودي أرد على كل واحد منكم لأني أحس بتظامنكم جميعا وأخوة وأحبة ف الله
إخواني يعلم الله أني بحثت عنه ووجدته ولكن لم أجد البريق بالحجم ال>ي يناسب طلعاتي
وهو مقاس 1.6 لتر ، فأخذت 1 لتر و2 لتر وكذلك 3 لتر
وللمعلومية هو كنز كنز كنز فاللذي مايعرفه مايقدره
جربته على شبة الضو وجربته على الغاز كلها يعطي نتائج فتاكة
لم أرى مثله في حياتي فلابريق المعدن الهندي ولا الإبريق السوري ينافسه
وأعتقد أقرب منافسيه هو بريق الغضار وارد سعد حباب الجبر السولوفاني الذي إنقطع الآن وأصبح يستورد من الصين
ولاتنسوا الخلطة السرية دائما فالتحضير لابد أن يكون مع شاي أبو جبل

شاك لكم جميعا فردا فردا

[رياض 2005]

أووووه
ماشاء الله كل هالردود عشان البريق
والله مانستغني عنكم ياأعضاء مكشات المميزين
والله ودي أرد على كل واحد منكم لأني أحس بتظامنكم جميعا وأخوة وأحبة ف الله
إخواني يعلم الله أني بحثت عنه ووجدته ولكن لم أجد البريق بالحجم ال>ي يناسب طلعاتي
وهو مقاس 1.6 لتر ، فأخذت 1 لتر و2 لتر وكذلك 3 لتر
وللمعلومية هو كنز كنز كنز فاللذي مايعرفه مايقدره
جربته على شبة الضو وجربته على الغاز كلها يعطي نتائج فتاكة
لم أرى مثله في حياتي فلابريق المعدن الهندي ولا الإبريق السوري ينافسه
وأعتقد أقرب منافسيه هو بريق الغضار وارد سعد حباب الجبر السولوفاني الذي إنقطع الآن وأصبح يستورد من الصين
ولاتنسوا الخلطة السرية دائما فالتحضير لابد أن يكون مع شاي أبو جبل

شاك لكم جميعا فردا فردا
حبيبي ماجلان (لاتستغرب كثرة الردود والتكاتف هذا من غلا ماجلان وهذولا شباب مكشات الشقردية)
ماشاء الله
بارك الله لك بما وجدت واطعمك من خيره وكافاك شره وعساه بالعفو والعافية
ليتك تعلمن وين لقيته ودي بالمقاات الثلاث

[ابوعبدالعزيز6]

ما زال البحث جاري عن المطلوب الكوري

تعميم الى سكان الرياض

.
.
.
دلونا عليه . الإجازة قربت والعزبه ما ينقصها الا الكوري

[شعال]

أووووه
ماشاء الله كل هالردود عشان البريق
والله مانستغني عنكم ياأعضاء مكشات المميزين
والله ودي أرد على كل واحد منكم لأني أحس بتظامنكم جميعا وأخوة وأحبة ف الله
إخواني يعلم الله أني بحثت عنه ووجدته ولكن لم أجد البريق بالحجم ال>ي يناسب طلعاتي
وهو مقاس 1.6 لتر ، فأخذت 1 لتر و2 لتر وكذلك 3 لتر
وللمعلومية هو كنز كنز كنز فاللذي مايعرفه مايقدره
جربته على شبة الضو وجربته على الغاز كلها يعطي نتائج فتاكة
لم أرى مثله في حياتي فلابريق المعدن الهندي ولا الإبريق السوري ينافسه
وأعتقد أقرب منافسيه هو بريق الغضار وارد سعد حباب الجبر السولوفاني الذي إنقطع الآن وأصبح يستورد من الصين
ولاتنسوا الخلطة السرية دائما فالتحضير لابد أن يكون مع شاي أبو جبل

شاك لكم جميعا فردا فردا


يعله مبروك يامجلان
وانشاء الله تذوقنا منه
باين عليك كييف شاهي

الله يستر عليك

[Magellan]

حبيبي ماجلان (لاتستغرب كثرة الردود والتكاتف هذا من غلا ماجلان وهذولا شباب مكشات الشقردية)
ماشاء الله
بارك الله لك بما وجدت واطعمك من خيره وكافاك شره وعساه بالعفو والعافية
ليتك تعلمن وين لقيته ودي بالمقاات الثلاث
تسلم والله أخوي رياض
وبصراحة أنا كييف شاهي
وعشان كذا دورت وماحصلت وعوضناه بالغضار السلوفاني

يعله مبروك يامجلان
وانشاء الله تذوقنا منه
باين عليك كييف شاهي

الله يستر عليك

الله يبارك فيك أخوي شعال
وهذي صورة على السريع

http://www.mekshat.com/pix/upload02/images100/mk11979_20090211336.jpg

[ملك البهار]

تمت مشاهدة البراد في مدينة جدة بشارع حراء ولكن المقاس الصغير

وشكرا

مشكور عالتنويه لكن وين في حراء ؟ :confused:

انا حصلته في شارع الستين عند محل السيف بعد محلات البوادي ولكن أكبر مقاس اظن , وما أخذته لسببين كبر حجمه و المبالغة من راعي المحل في مغالاته بسعر 125 ريال !!!!

تكفى وين في حراء :j

[عفجةالصريف]

نادر ماتجدة صيدات

[Magellan]

خلاص إنقطع ياجماعه وأنا قفلت على الموضوع ،،،
يعني باح ماعاد فيه كوري أبد أبد

[عوق الخريش]

موضوع جميل

[ملك البهار]

مشكور عالتنويه لكن وين في حراء ؟ :confused:

انا حصلته في شارع الستين عند محل السيف بعد محلات البوادي ولكن أكبر مقاس اظن , وما أخذته لسببين كبر حجمه و المبالغة من راعي المحل في مغالاته بسعر 125 ريال !!!!

تكفى وين في حراء :j

يا اخوان اذا ممكن ترسلون للأخ البضيع رابط مشاركتي هذه , عدد مشاركاتي لم يسمح بارسال رسالة اليه ,,

رجاء ,, تحياتي لكم

[سامر عبدالله]

الله يجمعك مع الطيب

[البضيع]

يا اخوان اذا ممكن ترسلون للأخ البضيع رابط مشاركتي هذه , عدد مشاركاتي لم يسمح بارسال رسالة اليه ,,

رجاء ,, تحياتي لكم


معليش متأسف لتأخري في الرد عليك ولكن يعلم الله اني توي اشوف الموضوع

وبالنسبة للمكان فهو في سوق حراء التجاري وليس سوق حراء الدولي المحل اللي على الشارع العام مافي غيره حق اواني منزلية
بس مادري هل باقي عنده ولا خلصت



تحياتي لك

[ابولولو]

اخوي ماجلان حاولت ارسلك رساله بس شكل المخزون فل من الرسائل المهم قبل امس عند البريه وموجود الصغير الكوري 30ريال ويبي يجاهم بعد كم اسبوع وعندهم الكوري المدور وسط اوكبير ابو 65 ريال

[البضيع]

اخوي ملك البهار كيف الحال شخبارك

البارح رحت للمحل اللي قلتلك عليه اباخذ لي برادين احتياط للزمن بس للاسف خلصت البراريد اللي عنده لانه مسوي تصفية على المحل
لكن الحمدلله لقيت عنده دافور قز بريموس الهندي الصغير والكبير واخذت لي واحد

تحياتي لك

[ab.zayed]

السلام عليكم ونبارك لكم شهر رمضان فيه اندونسي نفس الشكل 18\8 ونفس الشئ صعب تحصله والي يخبر محل يبيعه لا يبخل علينا

[عزوز2002]

السلام عليكم
مبارك عليكم الشهر
انا ادور الابريق الستيل الياباني اللي قاعدته كبيرة طبعا مافي امل تلقى جديد بس اسلي نفسي بالمحلات والفرفرة واذا صرت بديرة ما اعرفها امرمر على الشياب ومحلات المواعين ولي فترة طويلة وانا ادوره لكن مافي نتيجة والمشكلة انها ماسكة عليه اللي يخبر لي واحد مستعمل ولا احد ناطله ولا بدون غطاء ولا اي شي يسوي معروف...

وياماجلان بعد قصة حياتي ووقتي اللي اهدرته وانا ادور الابريق لقيت مثل ابريقك كوري كثر التراب وما اذكر منهن الا محل واحد ابي امره اليوم ان شاء الله واشوفه ان كانه موجود علمتكم بإذن الله واعذروني على الاطالة

[عاشق الفرعه]

شكلي بروح لخط المدينة أحتمال في شوال

[برق بن رعد]

ولا تزال قصة البحث قائمة

[النوبل]

ولا تزال قصة البحث قائمة





الأبريق متوفر في السوق

اصدار شركة kovea صناعه كوريه
ستيل 18-10
مثل الأول ابو يد سوداء ويمكن افضل منه
الأثنين عندي جدد ابوكرتون اخضر ويد سوداء
واصدار شركة كوفيا
لاحظت دقه في صناعة الجديد من كوفيا
وصفاوة الأستيل ومتانته أيضا مقارنه بالقديم



والله يرزقك بالي يسعدك

[جمس_454_97]

اذا مالقيته اخوي ماجلان الى الان عطني خبر...

[حلم البحر]

هذا تحصلة عند المحلات البرية
متوفر
البرية برق الحيا وغيرهاكثير

[الرحال2222]

اوف اوف ويش ذا الموضوع من عام 2007
والرجال باقي يدور على الابريق الكوري
اطول مدة بالتاريخ ظيعت عمرك تطامر وراء ابريق ههههههههههههههههههه

[hwi]

اوف اوف ويش ذا الموضوع من عام 2007
والرجال باقي يدور على الابريق الكوري
اطول مدة بالتاريخ ظيعت عمرك تطامر وراء ابريق ههههههههههههههههههه


ههههههههه هذا عشق لبعض الناس ما لاتستغرب وازيدك من الشعر بيت السعارها نااااااااااااااااااااار لتر ونص تقريبا 75 رياااااااااااااااااال

[saad_504]

اخوي ماجلان البريق هاذا وارد كوفيا متوفر منه ثلاث مقاسات وموجود عندنا ببريده في محل مكشاتي اسعارها تبدا من الصغير 59 ريال والوسط 69 ريال والكبير 79 ريال

[المبتهل]

السلام عليكم ورحمة الله وبركاته
ارجو انك لقيت البريق الكوري وارجو انك تدلني على مكان بيع ماطور الهواء اللي يعبي المساعدات يوكون

[المتلولس]

انا قبل اسبوع لقيته عند السنيدي واخذت واحد الاسعار الحجم الوسط ب65

[خالد العيسى]

السلام عليكم انا مريت برق الحيا حصلته عندهم

[طلال السناني]

والله انكم ذوقيه شااااااااي صح ولا الصعايده

ههههههههه


انا احيان اخرم للشاي واسويه في زبديه ( غضاره ) عادددددددي وافك الخرمه بعد

ومرتين سويته في كيس الخبز <<===== لحد يقول ماتجي الحاجه ام الاختراع واسالو اللي جرب

[عشانا]

في بريدة محلات يشترون مستودعات اواني منزلية واكثرها قديم دائما اشتري اغراضي منهم
وان شاء الله انا ذاهب لبريدة نهاية الاسبوع وبمرهم وان شاء الله اجد عندهم المطلوب

[مطول صبري]

شوقتني عليه جاري البحث