ماهو أفضل ماوطير الكهرباء وأفضلها سعرا وخدمة

[السفيرنواف]

إخواني الأعضاء
احترت في اليومين الماضية في اختيار المواطير
وللأسف اخترت مستعمل وجدته فاشل

وأسعار المواطير الزينة غالية والصيني ريخص ولا أحد يمدحه

إخواني ماهو الفرق في الخدمة بين البنزين والديزل.....؟؟

وكذلك هل 2 كيلو يمكنه تشغيله متواصلا 10 ساعات يوميا في المساء من بعد المغرب إلى الفجر....؟؟

هناك ماطور مستوبيشي قوته 2 كيلو يصفي مع التشغيل كيلو ونصف يابني بدون ضمان ولكن قطع غيراه متوفرة وبكثرة
سعره 1600 ريال بنزين ... للأسف فترة تشغيله مابين 3 إلى 4 ساعات ويستريح أقل شئ نصف ساعه

الآن ماهو أفضل ماطور يكون قوته من 2 كيلو وفوق وسعره زين ولا يتعدى 1500 ريال ويشتغل أقل شئ 8 ساعات متواصلة


منتظر رائكم
فأنا مستعجل

تحياتي وتقديري

[بوراشد]

السلام عليكم ورحمة الله وبركاته

أتذكر أني شريت ماطور 7.5 كيلو من روبن ياباني سلف وهندل تصل قيمته حوالي 4000 ريال لكنه كان يشتغل معاي 12 ساعة

ملاحظة: مواطير روبن تجي صفرا وحمرا واللي شريته احمر

[Magellan]

السفير نواف ...
حياك الله ، والصراحة وقعت على الخبير ،،،
أخوك Magellan عنده مخيم لربعه يتكون (وفي رواية يسنترون أو يجلسون) فيه من المغرب إلين الساعة 1 بعد منتصف الليل ...
وهذا بشكل يومي على مدار السنة،،
وهالمخيم واقع بالقرب من العمارية (شمال الرياض) وفي حولنا رعيان سودانيين وهنود ،،،
يعني إذا ماجوا المعزبين قاموا هذي العمالة وشغلوه لأنفسهم وقعدوا يطالعون التلفزيون ،،،
بمعنى إنه لازم يشتغل يومياً...
كان المخيم شغال في بدايته على محول كهرباء من سيارة ليولع كم نجفة ...
وبعد فترة وبالتحديد العام الماضي قلت في نفسي ليش ما أجيب ماطور كهرباء ونفتك من تشغيل السيارة كل ساعة عشان ماتفضي البطارية وسبحان الله كان هناك دعاية لمواطير في كارفور من نوعية Tiger (بالعربي النمر) ويابلاش بسعر 294 ريال فقط لاغير ويخلط البنزين مع الزيت..
وعينك ماتشوف إلا النور 1200 شمعة أو إنه 900 (وفي رواية واط) قعد 21 يوما بالتمام والكمال وبعدها ماعاد يشتغل ...
نحاول نسحب هندل نشرّقه بنزين ..ماحولك أحد،،
والله لايعيدها من تايقر طلع فار الله يكرمكم...
أخذنا يومين من البهذلة وخرب مزاجنا خصوصاً تعودنا على الماطور وفكّنا من المحول وشفنا الفرق صراحة،،،
ويقوم أحد الإخوان بشراء تايقر آخر لكن من العثيم بسعر أرخص وبقيمة 220 ريال لكنه أخضر اللون ،،
وبرضه نفس الحال 21 يوم مؤقتة ويفسد ،،
تسحب هندله ويشتغل لكن مايوّصل كهرب،،،
وبعده هداني الله لماطور من هوندا 2500 واط، بنزين (ياباني ،تجميع ياباني) أخذته من شارع الريل بقيمة 2150 ريال والصراحة شغال معنا زي الحلاوة مابين 6 إلى ثمان ساعات يوميا ،لكن مشكلة تانكيه صغير كل 5 ساعات يلزمك تصب وتزوده ...
وجاء قبل شهر وسرقه الحرامي (الله يعقله لي) وإنتهت أسطورة الهوندا،،،
والحقيقة ماطور متميز إلا أنه تانكيه صغير وماخرب إلا مرة وصلحته بـ100 ريال...

ثم رجعنا لسالفة المحول وتشغيله لمدة أسبوع لعل وعسى يهدي الله الحرامي ويرده لنا..
لكن قرّرت ورحت لشارع الريل وشريت روبن Roben ياباني تجميع صيني وتاكيه يشيل 15 لتر بقوة 2000 واط ويشتغل لمدة 18 ساعة متواصلة ...

الحقيقة أخوي السفير نواف
من واقع خبرة وتردد على المواطير ومكان بيعه (شارع الريل) إتبع التالي:
1-حدد هدفك من الماطور، يعني تبيه شغال على طول وإلا كشته بسيط ثم ترميه أو لك وللزمن وكم حجم الطاقة اللي تبيه..
2-إعرف أن الصيني وخصوصا Tiger من أخس الأنواع خصوصا من يخلط البنزين والزيت فلن يصمد طويلا ، حتى ولو إشتغل تمام فإنه يشكّل دائما( يطّلع صوت منخفض ثم يرتفع الصوت بشكل مفاجيء)، لكن لايمنع من وجود صيني جيد مثل روبن ...
3- الفرق بين البنزين والديزل ،،حقيقة ماجربت الديزل ، لكن الديزل بارد فهو يحتمل الإشتغال طويلاً ، لكن ياسواد ليلك لو طفى فهو معاناة بحيث يلزمك تشريقه وترفيسه لعدم وجود البوجي حتى يشتغل ،، ومايقوم به أصحاب المواطير بتعبأته قبل أن يخلص وأسعاره نار الزين يبدأ فوق 3000 ريال..
4- لا يغرك الصيني أبو سلف وهندل من الماركات المغمورة فهو تقليد إلى أبعد الحدود ...
5- المواطير الجيدة هي كالتالي:
ا-هوندا
ب-روبن(Roben) مع إن فيه تقليد له بإختلاف حرف من السبيلنق حقه صيني ماينفع ، لكن الروبن يجي منه نوعين ياباني أصلي وهذا جيد وياباني تجميع صيني وهذا جيد ولكن بدرجة أقل من سابقه...
ج- سوزوكي : بس يسبون وكيله باريان وتأكد قبل ماتشتريه
د- الديزل خذ (يانمار) لك وللزمن مع العلم أن السلف يجي بالأحجام الكبيرة وهو ضروري للديزل بعكس البنزين بس سعره غالي يبدأ بـ3800 ريال لـ 2500 واط وكلما كبر حجمه زاد سعره...
6-وكيل الهوندا ويانمار بشارع غبيرة، والروبن مؤسسة الخرخير بالريل...
7- وإذا شريت ماطور ربطه بسلاسل مهوب مثلنا ياغافل لك الله...


أخيرا مثل ماقلتلك عندي روبن 2000 واط (ياباني صيني) ممتاز للي عندهم مخيم أو مخيمين أبو 10 خيام فمادون ومايشغلون إلا نجفات وكبسين حولهم وكم تلفزيون وريسفر وسعره يابلاش خذه من غزلان بشارع الريل من عند واحد شباب سعودي ولا تسأل السوداني عن سعره،،،

[مهندس زمانه]

يعطيكم العافية جميعاً ..
أخوي ماجلان:
لاهنت نبي وصف شارع الريل اللي تقوله ومشكور يالغالي ..

[التسعه شفر]

شارع الرين مهوب الريل
وانت جاي من تحت كبر البطحا يجيك مفرق تخش منه يمين
بعد ماتخش
بتشوف الغرابي حق زينه السيارات قدامك
اول محل بالغرابي بالزاويه اليمين ,, محل احمد الزهراني
لف قبله يمين يصير محل الزهراني يسارك
وامش على طول يجيك اشاره بعد الاشاره هذا شارع الرين ,, متر الشارع على كيفك ..

[طارق الحربي]

التسعه شفر

اسمه شارع عمر المختار ( الريل سابقا )

من وجهة نظري انا اشوف الهوندا احسن شي وترا فيه نوع صيني ممتاز جدا ورخيص

وفيه نوع صغير كاتم صوت سواء صيني او ياباني

تحياتي لكم

[Magellan]

التسعة شفر:
الرين ديرة تقع جنوب الرياض ويقطن غالبيتها قبيلة عزيزة تُكنى بقحطان،،،
أما الريل وفي رواية (القطار) شارع يمتد من الغرابي إلى كوبري العمل...

أخوي مهندس زمانه :
شارع الريل(عمر المختار) وصفه صعب شوي لأنه داخل مناطق مكتظة واجد ...
وهو بالحروة عكس أمتداد شارع الغرابي( يعني من جهة شارع الفرزدق)...
والوصف اللي ممكن يكون سهل،،،
هو إنك تتجه مع الدائري الشرقي إذا جاك مخرج16 خذ غرب (يعني بإتجاه حي الملز) وامش سيده وعد أول اشارة ثم ثاني إشاره ..
بعدها الخط ينعطف فيك يسار يجيك نفق قدامك على اليسار إتركه وخلك ماشي سيده بدون ماتنزل للنفق واتبع لوحة مكتوب عليها شارع عمر المختار، وإن شاء الله توصل إليه ...وبإختصار إتبع أحد الليموزينات إذا قربت من نفق كوبري العمل وإمش وراه تراهم أغلبهم يروحون شارع الريل (عمر المختار)...

أخوي طارق الحربي :
أخبر فيه هوندا تجميع هندي ، وأعتقد إنه أفضل من الصيني وتانكيه كبير...


أخوي السفير نواف وينك وش أخبارك طربقتنا وقلت مستعجل ،،،
هاه بشّر شريت وإلا لا..

[السفيرنواف]

أشكرك أخي الفاضل/Magellan (http://www.mekshat.com/vb/member.php?u=11979)
على هذه المعلومات الجيدة

وأحب أن أخبر الجميع بأنني شريت ماطور روبن قوته 2300 يعني كيلوين وشوي يصفي 2 كيلو بنزين ومستخدم
بسعر 850 ريال
جربته يومين تقريبا والحمدلله زي الحلاوة ...
أشغله من 6 المغرب إلى 3 الفجر أو 4 متواصل دون توقف .... وأطفيه رغم أن البنزين ماراح إلا النصف فقط
وأعيد تشغيله في اليوم الثاني المغرب وعلى نفس الموال .....
ولكن هناك مشكلة واجهتها
الزيت ينحرق ويروح نصفه عندما يشتغل 10 ساعات متواصلة وش السبب ياشباب
هل لأنه قديم أو التواصل يؤثر عليه بشكل عام والجديد والقديم .....

اتمنى أن أجد الإجابة

[الرهدن]

ابتعدوا عن اللي وكيله عبد الله هاشم ( هوندا ويانمار00
لأنه محتكر القطع00
روبن الاصلي رائع وسعره زين والقطع في كل مكان
ومن فترة اشتريت روبن بنزين من غزلان 3600 وات ب 2800 ريال تقريبآ
والآن لايوجد إلا 2600 وات00



.

[التسعه شفر]

الريل الريل ,, اذكره منذ الطفوله وضيعت اسمه ....