المساعد الشخصي الرقمي

مشاهدة النسخة كاملة : خبرة ودرايه في قص اثار السارق



راعي الصقلاوي
29/08/2017, 12:44 PM
السلام عليكم ورحمة الله وبركاته .
صبحكم الله بالخير الجميع .

ابان خدمتي العسكريه ذات مره مكثت في دوامي 3 اشهر وكان الله جل وعلا رزقني بابني ضاري حفظه الله ورعاه وصار عمره 4 شهور اخذت اجازه مدتها اسبوع
ورحت للبيت مستعجل ودي اشوفه حين دخلت حوش البيت سمعت صوت رجاجيل في البيت دقيت جرس البيت ودخلت لقيت خوالي ومعهم طبيب الديره
طرحت السلام عليهم ردوا السلام كانو جالسين في غرفة الضيوف
خالي قال للطبيب : ها يا دكتور احمد طمنا ان شاء الله خير .
رد عليه الطبيب : ان شاء الله خير تطمنو يالربع بسيطه ما في شيء يخوف التهابات في الجهاز الهضمي
وعندها حراره هاذ كل شي كتبت لها هاذ الادويه
قلي خالي : يبه روح شوف والدتك .
رحت للغرفه لقيت حريم العائله عند والدتي طرحت عليهم السلام وصرت احب على ايدين حريمنا خالاتي والوالده وعمتي ام صالح رحمها الله واموات المسلمين جلست جنب والدتي
قالت لي : هلا يمه عساك بخير ؟
رديت عليها : طول وانتي بخير انا بخير والعياذ بالله من كلمة انا
خالتي قالت لي : شغله بسيطه يمه والحمدلله على كل شيء .
سمعت الطبيب يستأذن لاجل يروح عيادته ويشوف المراجعين اللي ينتظروه في عيادته جاني خالي
وقلي : يلا يبه نروح نجيب دوا والدتك من الصيدليه .
طلعنا بسيارته ورحنا جبنا الدوا ورجعنا ظليت عند الوالده حفظها الله ام عيالي جابت لي ضاري حملته والدتي وظل طول الوقت جنب الوالده
ثاني يوم في الاجازه الساعه 7 الصبح رن تلفون البيت رديت كان على الخط صديقي ابومرزوق .
قلي : عرفت انك بالديره امس ودي اطلع مشوار ترافقني ؟
رديت : ما اتوخر عن مشاويرك ارافقك لو تروح اخر المعموره .
قلي : زين لعاد حطوا القهوه على النار .
قلت لام العيال تسوي قهوه وطلعت من البيت صفرت لحصاني اليحموم جاني بسرعه .
قلت له : تجهز يا الغالي عندنا مشوار اليوم الجمته واسرجته وخليته واقف في الظل الا وصل ابومرزوق .
دخلنا البيت شربنا القهوه جهزت نفسي وحملت سلاحي وطلعنا جنوب غرب الديره منطقه جبليه ومزروعه باشجار الزيتون المعمره .
قارب الوقت الظهر توجهنا لغدير مويه لاجل نشرب ونسقي خيولنا وصلنا الغدير نزلنا عن خيولنا وتركناها تشرب ناظرت خلفي الجبل شفت شخص كان واقف
وتخبى خلف صخره كبيره كان يلبس ثوب لونه ازرق كان ابومرزوق يناظر الارض حولنا جاني
وقلي : جهز سلاحك وخلك حذر
قلت له : شفت الرجال اللي تخبى خلف الصخره الكبيره هز راسه علامة انه موافق
انزلت بندقتي M 16 عن كتفي حملتها واصبعي على الزناد كانت الخيول ارتوت سحبناها ومشيت خلف ابومرزوق وهو يناظر الارض مسافه حوالي 300 متر
اشر بيده لي ركبنا خيولنا ومشينا بركاده ظل يناظر الارض وحنا نمشي مشيت جنبه توقف لحظات نزل عن فرسه وتمعن باثر خطوه رد ركب الفرس
قلي : هاذ الاثر اللي اتتبعه مضى عليه ساعتين على اكثر تقدير هاذ اثر رجال سارق محترف يسرق
خيول وشياه وحلال بنفس الوقت شرس وعنيف صارلي 6 سنوات
ما شفت اثره حولنا مدري ويش جابه علينا
مشينا مسافه حوالي 2 كليومتر وصلنا مدخل وادي توقف ابو مرزوق وناظر الارض اشر لي بيده نزلت عن حصاني ووقفت جنبه
قلي : اجلس وناظر معي طرف الواد اليمين وانصت زين .
كان صمت عميق ما يقطعه إلا اصوات طيور الغربان تعوذت من الشيطان الرجيم كان جانب الوادي اليمين عباره عن جدار صخري عالي وفيه مغاوير وكهوف .
قلت له : هاذ اثر حوافر خلنا نتبعه .
قلي : لا تظمن انه هاذ السارق مو جالس بكهف او مغاره تقابل الطرف الثاني من الوادي
يقدر يصوبك وقبلها يصوبني .
قلت له : هو هاذ السارق عرفك ؟
رد علي : طبعا ولاجل كذا تخبى خلف الصخره يظن اني ما شفته لاحظته وحنا مقبلين على الغدير
يلا خلنا نرجع نطلع من هناك .
ركبنا خيولنا ورجعنا بسرعه طردنا فيها مسافه حوالي 1 كليومتر ودخلنا طريق ضيقه وطلعنا طريق وعره ومشينا لين وصلنا الصخره اللي تخبى خلفها السارق
توقف ابو مرزوق ناظر الارض نزل عن ظهر فرسه وتفحص الارض مد يده وازاح حجر شفته يرفع رصاصه عطاني الرصاصه تفحصتها كانت رصاصة
بندقية M 1 امريكية الصنع يتسع مخزنها 8 رصاصات عيار الطلقة : 7.62x 63mm مداها 400 متر
تابعنا طريقنا ووصلنا منطقه فيها اشجار كثيفه توقفنا ونزلنا عن خيولنا
قلي ابومرزوق : ودنا نتفقد المكان خليك حذر انت عسكري وتعرف تتفقد المكان هيك تتدربت
جهزت سلاحي ومشيت خطوات وقفت ودقيت ابو مرزوق بكتفه ناظرني مديت يدي اليمين لقدام
وكان اصبعي السبابه ممدود ابو مرزوق انزل سلاحه
قلي : خلص انحاش السارق راح لحال سبيله
قدرت المسافه بينا وبينه حوالي 1500 متر كان يركب على فرس لونها احمر ضارب للسواد تفقدنا
المكان وحنا ندور لقينا بقايا بعر فرس السارق
وانتم بكرامه واثار حوافر الفرس واضحه على التراب الاحمر كانت مربوطه خلف اشجار البلوط البري والعليق
قلي ابو مرزوق : مثل ما توقعت كان السارق في ذاك الكهف مشى من هناك لهنا وركب الفرس وانحاش .
قلت له : لكن ما في اثار ارجول على الارض شلون وصل لهنا وما ترك اثاره على التراب الاحمر .
قلي : مشى على الاحجار وداس على الحجر ذا ارتكز عليه حين حط رجله في ركاب فرسه انخلع الحجر من مكانه لاحظ لون التراب على الحجر
ولون التراب حوله حرك الحجر بكف يده رجع الحجر مكانه كان حجم الحجر طوله حوالي 25 ستنتمتر وعرضه حوالي 15 سنتمتر بيضاوي الشكل
قلت لابومرزوق : ركوبة السارق فرس وإلا حصان ؟
جاوبني : فرس يا ابو ضاري ما هي حصان لانه حصانك حين شافها واذا تتذكر حصانك حمحم
بصوت خافت صح ؟
قلت : صحيح يا رفيقي الحصان عرف ركوبة السارق انها فرس من ريحتها كملت كلامي
ويش رايك نتبعه نقدر نلحقه حصاني سبوق وفرسك بعدها نشيطه عمرها 4 سنين .
قلي : ويش عليه نلحقه لكن حين اقولك خلص يكفي ما تلحقه لحالك ترجع معي موافق ؟
هزيت راسي علامة اني موافق .
ركبنا خيولنا وطردنا خلفه كانت تفصلنا عنه مسافه اكثر من 3 كليومتر كانت طريق ترابيه واسعه
ابو مرزوق كان قدامي على فرسه كانه شاب في العشرينات
من عمره وهو تعدى الستين من عمره وصلنا منطقه حجريه وعره ناظرناه كان بينا وبينه مسافه حوالي 1 كليومتر حصاني حين شم ريحة فرس السارق صهل بقوه
السارق ناظر خلفه شافنا وقف
وقال : ما تلحقني يا ابو مرزوق والولد اللي معاك بعده اول عمره جاهل بالدنيا انصحك نصيحه
لوجه الله تعالى ارجعو بلاش تخسرو حياتكم
رد عليه ابو مرزوق : انت الحين تذكر اسم الله سبحانه وتعالى ما خليت درب ردي إلا مشيته لكن
انصحك ما ترجع لديرتنا انت تعرفني اقدر اصيدك
قلي ابومرزوق : يا حمود خلنا نرجع ما بي فود نلاحقه الحين صار حذر قدامه مسافات ما فيها احد
كلها اراضي جبليه ونائيه .
قلت له : ودي الحقه واللي يصير يصير ما اتركه بعد ما عاينته وهو قدامي ما هو بعيد عنا .
رد علي ابو مرزوق : حمود تراك وعدتني حين قلت لك خلص يكفي ما تلحقه لحالك ترجع معي .
قفلنا راجعين للديره وصلنا الديره كان الوقت شارف على العصر مشينا في الديره لين
وصلنا بيت خالي ابو حاتم كان يجلس مع بعض الشيبان
تحت اشجار الزيتون جنب البيت .
قال واحد من الشيبان : ابن احلال عن ذكره يبان هاذ هو ابومرزوق وخويه حمود .
طرحنا السلام عليهم ونزلنا عن خيولنا وجلسنا معهم كانو يسولفون عن ابومرزوق حين وصله خبر
انها ام عياله جاها ناس من الديره يخطبونها
فراح لهم وقال : هاذ بنت عمي ما احد يتزوجها غيري وكنت صابر لاجل تنقضي سنه على
وفاة شايبي الله يرحمه واموات المسلمين
الربع تراجعوا عن خطبتها لاجله وخاصه انها بنت عمه .
استأذنت منهم ورحت لبيتي اتطمن على والدتي واشوف ضاري مع وعدي لابو مرزوق اشوفه بعد صلاة المغرب في ديوان خالي
وهاذ هو اللي صار التقيت مع ابو مرزوق في ديوان خالي وسولف ابو مرزوق لخالي السالفه من اولها لتاليها
بعد الحادثه هاذ سنتين وحوالي 7 شهور وقع السارق في يدي وهو يحاول يسرق 5 نعجات من نعاج ابو مرزوق حين كنت سارح بحلال ابو مرزوق
هاذ السالفه اسولفها لكم المره القادمه ان شاء الله .


صورة بندقية M 1 الامريكيه بعد اذن الاداره .


http://www.mekshat.com/pix/upload06/images/2017/08/mk348597_garand_2.jpg


وسلامتكم يالربع

قوافي ( أم نهار )
29/08/2017, 10:39 PM
وعليكم السلام ورحمة الله وبركاته
حياك الله ابوضاري رزقك الله بره وصلاحه
الفراسه تنم عن ذكاء حاد والحياة البدويه تنمي هذه الفراسه والعلم عند الله
شفا الله الوالده واطال بعمرها
مازالت عادات بنت العم لابن العم لم تنقطع وفق الله المسلمين لما يحبه ويرضاه
اشكرك لجميل ماخطت يداك ومازلنا نطمع بالمزيد
تحياتي وتقديري واحترامي

راعي الصقلاوي
30/08/2017, 06:22 PM
وعليكم السلام ورحمة الله وبركاته .
اختي قوافي الفاضله .
الله يرزقنا بر الابناء كما رزقنا بر الاباء .
الفراسه تنم عن ذكاء حاد وبالممارسه اليوميه تزيد وتنمو .
وعادة بنت العم لابن العم متواصله لم تنقطع وهاذ عاده ما هي بزينه .
لانه زواج الاقارب بكثره يورث الامراض والاعاقات .
وفقنا الله لما يحبه ويرضاه .
تركتي بصماتك على متصفحي المتواضع .
سدد الله خطاكم على طريق الخير والبر والصلاح .

مريقب العيفار
21/09/2017, 01:08 PM
شكرا ابو ضاري على السالفة الممتعة


وبانتظار سالفة الحرامي

راعي الصقلاوي
21/09/2017, 02:22 PM
اخوي مريقب الغالي .
لا شكر على واجب ومتعك الله بالصحه والعافيه .
وابشر ان شاء الله ادرج لك سالفة الحرامي حين امسكته .
زينت موضوعي بكلامك الراقي والرزين .
دمت في حفظ الله ورعايته .

Al3rands
24/09/2017, 04:04 AM
الحمد لله على سلامتكم وسلامك وصل يبو ضاري تراي لي وقت ونا بعيد عن الديره ومافي وقت الشغل واجد الله يعين

راعي الصقلاوي
24/09/2017, 06:28 PM
اخوي العرندس الغالي .
الله يسلمك ويحفظك
الله يعطيك العافيه الله يعينا على هالاشغال
الله لا يشغلنا الا بطاعته .
زينت متصفحي بما خطته الانامل بكلماتك الراقيه .
دمت في حفظ المولى ورعايته .