فــــقـــع ... قـرقـاص ... حميّض .. وقريب من الرياض ما اصدق رحلة مصوره . راعي الهــدد

[راعي الهـــدد]

تحملوني يالربع



أخوكم طلع بأهله ووسع صدورهم يم شغايا بنبان الي توالي الرياض



وهو مكان جميل جداً جداً وممتع بكل ماتعني الكلمه



وميزته الوحيده التي لن تجدها في غيره



أنه قريب من الرياض تخيل من البيت الين تآصل المحل 60 كيلو او اقل يعني مناسب للعوايل حيل



بس مشكلتنا الي ذابحتنا هي اهمال الناس في تنظيف اماكنهم اصلاً هذا المكان كان محمي حسب افادة اخونا معاند الليل لي كان محمي وتوه مفتوح هذي السنه ومع ذلك مافيه احد يقدر غدياتهم وعشياتهم مرميه



عموماً خذ عيالك ورح يمه ووسع صدرك عشب كثيف وشجر طيب بالحيل ومسايل توسع الصدر وحزيمات طيبه بالحيل واشوف الناس هناك تدور فقع والقطو فيه شي طيب



عموماً لقطت لعيون الأعضاء الكرام كم صوره بعد الطقاق ومحاولة الأفشال من أحد الأنساب (( ابو معاذ )) الله يهديه يبي يخرب علي التصوير كل ما اجي اصور وصرت اخت ختات وهو مايدري ههههه



1 - الصورة الأولى سيارة ابو حمد ودليل الرحله (( الخرّيت )) الذيب منكم يعرف وش الخرّيت وكلكم ذيابه بتعرفونها ولاشك



الظاهر نيسان لو تدري عن الصوره اسرقتها مثل الجزيره الي مشتغله فينا اعضاء مكشات ولا احد يدافع عنا (( ههههه واثق ))



http://www.mekshat.com/pix/upload/images27/mk33838_1111111111111111.jpg





2- وهذي لقطة طيبة للعشب الي هناك وكثافته تصدق في بعض الأماكن يغطيك تغطيه



http://www.mekshat.com/pix/upload/images27/mk33838_22d.jpg





3- وهذي وحده مستحيه كل ما اجيها مع جهه تعيي تقول ارجوك ارجوك الله يرحم والديك لاتصور قلت تراه حلال ولستي من ذوات الأرواح حتى تقولين لاتصورخلاص ولايهمك ويوم قفت كشحت لها هالصوره هههههه



http://www.mekshat.com/pix/upload/images27/mk33838_33d.jpg



4- وهذي لقطة أخرى للعشب هناك مع تخريب ابو معاذ الله يهديه



http://www.mekshat.com/pix/upload/images27/mk33838_44d.jpg





5- وهذا تعبث مني ابي اسوي مثل بعض المحترفين وعجزت اظبط الأعدادات توني شاري الكمره واتعبث انواع التعبث الله لايوريك



http://www.mekshat.com/pix/upload/images27/mk33838_55d.jpg



6- ابشركم طلعتنا صارت بوقت دفوه ولله الحمد بس الوالد الله يحفظه لزم علي الا تشب لنا ظويه قلت سم واليني جايب معي غضا حاطبه قبل اسبوعين وشبيتها له



http://www.mekshat.com/pix/upload/images27/mk33838_66d.jpg





7- وهذا طرف من مطبخنا الفاخر تشوفون فرن قليم قاز هههههههههه اي قليم قاز الله يرحم والديك كسرة قز وانت الصادق



http://www.mekshat.com/pix/upload/images27/mk33838_77d.jpg





8- وهذي مرقة اللحم طفينا عنها وجاهزه لكب الرز (( المعذره يا أخوان ابو معاذ حياسني حوس وتراه اقوى مني والا كان صورة لكم كل شي عن طبختنا وعن امورنا ))



http://www.mekshat.com/pix/upload/images27/mk33838_88d.jpg







9- وهذا الرز مخمور وجاهز للطبخ يازين شكله حتى وهو ني



http://www.mekshat.com/pix/upload/images27/mk33838_99-d.jpg







يتبع >>>>>>



ارجوك لاترد اصبر شوي باقي كم صوره تكفى تكفى لاترد





لاترد تكفى

[راعي الهـــدد]

تابع <<<



10- وكانت السلطه عضو مشارك في الرحلة المباركة (( احرصو على السلطه تراها طيبه حيل ))



http://www.mekshat.com/pix/upload/images27/mk33838_1010d.jpg





وللفاكهة طعم خاص في البر تآكل فيها ماتقول لا بس الله الله في ابو صره تراه على كيف كيفك يالله الجنه





http://www.mekshat.com/pix/upload/images27/mk33838_44444444444444.jpg





11- آآآه يابو معاذ الله يصلحك والله اطقاق الين صورة هذي يالله يالله لحقت تو الكشنه طايره من علو القدر





http://www.mekshat.com/pix/upload/images27/mk33838_1111d.jpg





12- وهذي الكشنه معزولة على جنب وشغل يحبه قلبك



http://www.mekshat.com/pix/upload/images27/mk33838_1212d.jpg





13- وهذي الحيمات نعيمي طيب قولو ماشاء الله



http://www.mekshat.com/pix/upload/images27/mk33838_1313d.jpg





14- وهذا الصحين جاهز للألتهام وهو بعد قليل في طريقه لمكان الرجال شرواكم لأن تعرفون عندنا ترتيبات يحبها قلبك مكان للطبخ ومكان للجلوس وبدون هالترتيبات تطلع الرحله ملح هههه ياقدمه ملح

http://www.mekshat.com/pix/upload/images27/mk33838_1414d.jpg





15- وهذا المفروك الي يحبه قلبك البر لابد منه في طلعتك للبر لاتنساه



http://www.mekshat.com/pix/upload/images27/mk33838_151515.jpg







16- البصل يا أخوان خشمً طيب لايفوتك البصل الأخضر (( الزماليق او بصل زماليق ))



http://www.mekshat.com/pix/upload/images27/mk33838_1616d.jpg





17- ومثل ماقلت لكم في موظوع سابق عن القرقاص لابد منه ولا يغادرني ابد وهذي بياله محكوره قرقاص عقب تناول الغداء خليت القرقاص يرصص الباقي هههه ياسللالالالالام سلم



http://www.mekshat.com/pix/upload/images27/mk33838_17171717.jpg





وبعد تناول الغداء ضفينا العفش والبزارين والحريم وقلنا وينك يارياض معه ووشت على طريق المطار ووشت على طريق الدايري الشرقي ووشت على البيت والله يا اني قديم اليوم من الي يقول فيكم وشت هالأيام



18- وهذي صورة مغيب الشمس تكلفت واجد الين طلعت كذا والله خربطت ثم خربطت الين طلعت كذا والعذر والسموحه



http://www.mekshat.com/pix/upload/images27/mk33838_1818d.jpg





أخوتي الفضلاء تقبلوا فائق الأحترام والتقدير وانتظرو القادم فهو اشد وأنكى موظوع صارخ ينتظركم احبتي



محبكم يا أعضاء ياحلوين



ابو حمد

[نفل]

السلام عليكم





الحمد لله على السلامة ابو حمد

ومشكور على وصف الرحلة وجزاك الله الف خير

[طوقي]

الله يجزاك خير يالغالي
بس ياليت توصف لي المكان زين .. الله لايهينك

وشكرا

[الجافي]

كل علومك طيبه يا راعي الهدد بس وين الفقع ماشفنا ولا صوره
جعلك على القوه والله يغفر لك ولوالديك

[كن كن]

ما شاء الله عليك ياراعي الهدد رحلة جميلة وطبخ ولا أحلى وأنا يعجبني الشغل النظيف والترتيب والله يهنيكم على الطلعة

[فتى الدهناء]

له له له له .. مانيب مصدق !! :eek:



ماشاء الله يابو حمد هذا الشغل .. الصح .. ياخي من زمان :good:



وشوله شاري كمرة :confused: ..هذي زكاة الكمرة على قولة أبو محمد .. صور الربيع والطلعات



بارك الله فيك على التقرير الرائع .. :good: ;)



------------------------



بخصوص تصوير الزهرة .. من قريب .. فيه زر يسار العدسة .. عليه رمز ( وردة ) .. اضغطه ..وبيطلع لك رمز الوردة في الشاشه ..( ومعناته اشتغل الماكرو عندك ) .. واذا تبي تشغّل ( السوبر ماكرو ) وهو الأفضل للزهور .. تضغط نفس الزر ..بس ضغطه طويله ..لين يطلع رمز الوردة وبوسطة حرف ( s ) .. بكذا اشتغل السوبر ماكرو ..



واي استفسار من ناحية الكمرة .. لايردك الا الخاص ..

[الوافي88]

الله يعطيك ألف عافية ياخوي

[راعي الهـــدد]

الغالي نفل حياك وبياك ويشرفني مرورك

والله يغفر لك ووالديك

--------


الغالي طوقي واياك جزا

وحياك وبياك وابشر بالوصف الممل بس الحين العيال عند اهلهم والتلفون ماغير رن رن رن رن باروح اجيبهم وابشر من يوصف لك

---------

الغالي الجافي

وانت اطيب وانت شايفني قايل اني لاقط فقع

قلت لك الناس يلقطون مر من عندي واحد وانا اتمشى وقال هاه لقطت شي قلت انت لقطت (( اسلوب طيب )) وطلع لي ثلاث فقعات ههههههههههه هاه فقعات او ثلاث فقع والله ما ادري

المهم مالك بالطويله الأرض طيبه وبحلق بعيونك وبيرزقك الله ياحبي لك يالجافي وتسلم على المرور

-------------

هلا بك اخوي كن كن والله اني سعيد يوم اشوف اسمك هنيا

ياهلا بك مليون والترتيب مامثله ابد راحة وسعة صدر

------------

فتى الدهنا

هههههههههههههه

مانتب مصدق الا بتصدق بس شف خل صورة غروب الشمس خلفية على جهازك تطلع شي ههههه واحد ماصدق انه يصور صوره وغث خلق الله عندها

اما عن الزر فوالله اني ماخليت زر الا وطزيته طز ابي اصور زي صورك او صور المتألق نفل بس ماش تعبت واذا عجزت مره قفلتها وخليتها

واشكر لك المجاملة اي رائع الله يخلف

[srk]

الله يجزاك خير يالغالي
بس ياليت توصف لي المكان زين .. الله لايهينك

وشكرا

وانا بانتظار الوصف يا مبدع ........

الحقيقة ان تقريرك معجبني جدا .........

[سنار 2007]

السلام عليكم
الحمد لله على السلامة ابو حمد
ومشكور على وصف الرحلة وجزاك الله الف خير

[راعي الهـــدد]

أخوي الغالي SRK

شاكر مرورك وابشرو بالوصف بالتفصيل الممل وشاكر مرورك

الغالي سنار 2007

شاكر مرورك والله يسلمك من كل شر ياربي ويغفر لك ووالديك

[راعي الهـــدد]

اخوي الوافي 88 عذراً والله ثم عذرا

انت رديت في وقت كنت اكتب فيه رد وتوني انتبه لردك

حياك اخوي وشاكر مرورك الطيب يالغالي

والله يغفر لك ووالديك وييسر امري وامرك آمين

[باب هداج]

مشكووور يا ابو حمد على ها الصور الاكثر من رائعه وتسلم يمينك

[طالب الحور]

الله يهديك يا أبو حمد




:D قطَّعت قلوبنا وقطَّعت بطونا :D




ماشاء الله تبارك الله :good: :good:



رحلة موفقة



ووصف رائع




وتصوير فائق






كعادتك





لكن لماذا لم تكفش لنا أبو معاذ في صورة



عقابا له وردعا لأمثاله

[واحد نفر]

يعطيك العافيه

[الهلالي]

أبو حمد شغلك تمام ومتكتك واهم شيء ان الوالد معك الله يطول بعمره على الطاعه , وتصويرك ممتاز والكبسه خيال .

[ربيق]

جزاك الله خير
وننتظر الوصف المكاني > ههههه

[ديم نجد]

يعطيك العافية أبوحمد

[المخضرم]

مشكور اخوي على هذا الموضوع

[عابد]

الأخ في الله أبو حمد
السلام عليكم ورحمة الله وبركاته

الحمد لله على السلامة

إن شاء الله استمتعتم برحلتكم ولا تنسونا في الرحلات القادمة :)

أخوك عابد

[طلحة]

ما شاء الله رحلة حلوة وناس أحلى والله يسعدكم دنيا وآخرة
ومثل ما قلت أخوي راعي الهدد الربيع في شعيب بنبان طيب مرة ولكن اللي ما يحب زحمة الناس يمكن ما يصلحله.

[راعي الهـــدد]

الغالي باب هجاد

شاكر لك المرور والمشاركه الله يغفر لك ووالديك

--------------

الغالي طالب الحور الله يحرم وجهك عن النار ويجزاك الجنان ياربي

وش هالطله البهيه جعلك تسلم يالغالي

اما عن تصوير ابو معاذ فكما تعلم أن تصوير ذوات الأرواح محرم ولايجوز بدلالة النصوص القطعية الدلالة والثبوت كذلك

والأدلة تزيد على الأربعين دليلاً كلها تحرم التصوير الا أمور

1- ماليس فيه روح كالشجر والحجر والطبيعة بشرط أن لاتكون وسيلة لعبادتها

2- ماكان كالرقم في الثوب بدلالة قوله صلى الله عليه وسلم (( إلا رقماً في ثوب )) والرقم الشيء الصغير جداً ومثل لها احد طلبة العلم مثل حلاوى البقر كان تعرفونه صورة البقرة الي فيه تعتبر رقم وداخلت في حكم المتحرج منه ومن طمسه ومن اعانه الله على تمزيقها بدون مشقة فحسن

3- ماكان كعكس الصورة مثل المرايا الي في بيوتنا تعكس صورتك فهذي جائزة لأنها كانت على زمن النبي صلى الله عليه وسلم ولم ينكرها

ولأن النبي صلى الله عليه وسلم وصحابته الكرام تنعكس صور وجوههم في الماء ولم يتحرجون من ذلك وحديث البئر واظح وجلوس الرسول صلى الله عليه وسلم وابوبكر وعثمان وعلي رضي الله عنهم عليه

4- استثنى الشيخ عبدالعزيز بن باز مسألة للضروره وهي بطاقة الأحوال والنقود لضرورتها وصعوبة التحرز منها

ماعدى ذلك كله فهو حرام وينطبق عليه أحاديث اللعن والعقوبة بأشد العذاب يوم القيامة اعذنا الله واياكم

وهذا هو قول الشيخ عبدالعزيز بن باز والمشائخ الأعلام في ذلك وهناك من خالف هذا القول بدون دليل بل باجتهاد منه ورأيه

ارجع لكتاب الشيخ ابن باز الجواب المفيد في حكم التصوير

تجد الشيخ سال عن حكم التصوير فأجاب بأكثر من ثلاثين دليلاً كلها تحرم التصوير بجميع اشكاله وصوره إلا ما استثنيت لكم أعلاه

وهو كتيب صغير انصح بقرآئته

أخوي الغالي طالب الحور منكم نستفيد ونتعلم ومن باب المذاكره كتبت ذلك وانا في حرج منك حفظك الله

[راعي الهـــدد]

الأخوان الأحباب

واحد نفر - الهلالي - ربيق - الحقيل - المخضرم - عابد - طلحة

شاكر لكم المرور الله يجزاكم الجنه والمكان مابه زود احد مثل ماتقول ياخوي طلحة

شكرا لكم

[@@معلم صف@@]

أخوي أبو حمد شكرا على التقرير الجمبل :D

[@@معلم صف@@]

مشكووووووووووووووووووووووووووووووووووووووووووووووو ر

وبارك الله فيك



:D

[أبوتركي 999]

صحيح لو الناس تهتم بنظافة الأماكن بعد ما يكشتون كان ما ضربنا هالكيالو نبي الزين

يعطيك العافية

[طالب الحور]

الله يرفع قدرك أخي الرائع



راعي الهدد



:good: معلومات قيمة وتوثيق رائع :good:




لاحرمك الله الأجر والمثوبة



:good: كل يوم ازداد اعجاب بك وبمشاركاتك الرائعة :good:

[راعي الهـــدد]

الأخ الفاضل معلم صف (( أوليه أو ايش ههههه)) الله يحفظك


شاكر لك المرور وتسلم ياغالي والله يبارك فيك ويرفع قدرك

--------------------------------------
الحبيب ابو تركي 999

شاكر لك المرور ومقدر لك ذلك والله لايحرمنا من الطيبين امثالك

وابشرك مابه زود وسخ يذكر هناك لأن المكان توه مسموح بدخوله من هذه السنة

بس والله كرفت البزارين الين قالوا بس

آخر شي قال لهم الوالد خلاص ماعليكم منه هههههههههه

كرفتهم ماغير تلقيط في زبايل الناس الحمدلله على كل حال

والله لو الود ودنا كان تطبق عقوبات تعزيرية بالمال جراء تلك الأفعال الشنيعة

هدم للبيئة وقتل وتصفية لكثير من النباتات البرية بدون ذنب ولا جريمة لماذا تلك التصرفات لااعلم سوى العجز والكسل والإتكالية عند البعض

----------------------

الأخ الغالي والعزيز طالب الحور اشكر لك تواظعك وطيب خلقك وحسن ادبك في الحوار (( صفة قليل من يحملها ونادر من يتحلى بها ويجبر نفسه ويقهرها على التزيي بزيّها ))

شاكر لك يابعدهم

[نجم حفرالباطن]

مشكوراخوي ويعطيك العافيه بس اشوف اللحم قبل لاتطبخونه ماكول مهوباقي فيه شى
وين راح هههههههه

[عاشق النوكيا]

ياخوي بارك الله فيك وين المكان فيه . وبعدين حلوه ذي وشت. الله من مره وشينا .

[راعية الهدد]

راعي الهدد .. تبغي الصدق ..

شفت ترتب وودقه في طلعات بر كثيره بس ماهي مثل طلعتك ابد

الله يباارك لك في وقتك ويرزقك الخير

سلمت امتعتناا مره

بس المشكله جوعتني ههههههه

سلمت يمينك

[راعي الهـــدد]

نجم حفر الباطن ماقصرت على هالطلة الطيبة

واللحم عازلينه بعد الطبخ في الحافظة بس انت خابر ابو معاذ مايخليني اصور كل شي الله يهديه

وترى هالي تشوف حافظه وما ادري ايش وملاعق دلع ومواعين بلاستيك كلها لعشان العنصر النسائي الي معنا انت خابر مايكلون من عزبتي واقدورها واباريقها

يقولون ماتصلح كلها وسخه ههههههههه

قلت ليه قالو شف بريقك حق التفويح اسود من الظو هههههههههه

قلت هذا الي مزينه وخليتهم على فالهم وجبت لهم عدتهم من البيت

------------------------

الغالي عاشق النوكيا شرفني مرورك يالغالي والمكان ابشر به بانزل وصف مفصل في موظوع مستقل الليله ترقبوا موقع ولا في الأحلام

[عاشق النوكيا]

شغايا بنبان الي توالي الرياض بس نبي الوصف الليله على كلامك . وتسلم يالغالي

[راعي الهـــدد]

شغايا بنبان الي توالي الرياض بس نبي الوصف الليله على كلامك . وتسلم يالغالي

ابشر ياغالي ابشر ثم ابشر ثم ابشر

[ملاعب الريح]

مشكور أخوي راعي الهدد موضوع وصور رائعه بإنتظار جديدك.......


(ملاعب الريح)

[راعي الهـــدد]

الغالي ملاعب الريح شاكر مرورك يابعدهم

وابشر بكل جديد

[راعي الهـــدد]

هلا بالأخوان الغالين

وكما وعدتكم بأن آتيكم بالوصف لمكان طلعتنا

احب اقول لكم أن مافيه وصف

تبون تدرون ليش تعالو هنا في هالرابط الي بآخر الموضوع وشوفو الي يصير لنا يوم نحط أحداثيات لمواقع حلوه شوفو وش يصير عليها


والله انكم كلكم يا أعضاء ياغالين والله انكم رجال وانا على ثقة تامة تامة انكم تراعون شيء اسمه المحافظة على المكان وجعله احسن مما كان

ولكن البلا في هالي يناقزون في شاشات مكشات يدورون أحداثيات الأماكن الحلوه وزبدة عمل البعض منا لا وبعد بالصور يعني مابقى لهم الا يمرون مكدونلدز وهمبرجر ... وشوي جلكسي ... وشوي مارس ... وببسي ... وبايسون ... ويالله يروحون يحوسون هالمحلات الطيبة

لذلك يا أخوه الي يبي وصف المكان يرسل بس رسالة خاصة ويبشر والله

بس العام نعتذر لما قلت لكم وادخلو الرابط في آخر الرد تفهمون وش الي حايسنا والله ما حاسنا الا طيبتنا وحبابتنا

هذولي ناس تعبنا وحنا نوجهم تعبنا وحنا نقول ياناس محافظة على البيئه ياناس خافو الله اتقو اللعانين كما جاء في الحديث الصحيح قال رسول الله صلى الله عليه وسلم : (( اتقو اللعانين قالوا :وما اللعانان يارسول الله؟ قال :الذي يتخلى في طريق الناس او في ظلهم )) رواه مسلم

وهذولي شفنا والله وسايخهم وقذراتهم وحفايض اطفالهم وكل شي شفناه في طريقنا وفي ضلنا

وش تبون نقول

الله يصلح الأحوال


يجب ان نسعى في حل لهالزبايل وقلة الحيا الي نشوفها في البر


عموماً لازلت اكرر ادخلو على هالرابط ثم لوموني او لاتلومنني

والله انه شي في نفسي من زمان وهيجني اخي صاحب الرابط عليه

وانا اعلنها من الآن

لن ادل على اي محل في العام

الي يبي بالخاص ويبشر لو يبي بعد اوصله بموتري

الله يحفظكم والله اني احبكم واغليكم يالحبايب


http://www.mekshat.com/vb/showthread.php?t=74882 (http://www.mekshat.com/vb/showthread.php?t=74882)


ياليت نتكاتف ونتحد على راي واحد

[عجمي]

وعليكم السلام ورحمة الله وبركاته

الله يعافيك وماقصرت على الموضوع الرائع ..

والله لا يهينك والف شكر ...

اخوك عجمي

[راعي الهـــدد]

وعليكم السلام ورحمة الله وبركاته

الله يعافيك وماقصرت على الموضوع الرائع ..

والله لا يهينك والف شكر ...

اخوك عجمي

شاكر لك المرور ياغالي

ويشرفني ردك

والله يغفر لك ووالديك

[راعي الذيب]

ما شاء الله...
صور رائعة وشغل نظيف..
يعطيك العافية.

[راعي الهـــدد]

ما شاء الله...
صور رائعة وشغل نظيف..
يعطيك العافية.


هلا بك اخوي ومرحبا بك عد مامشيت

والله يعطيك الف عافية وصحة في بدنك ونفسك وفي كل ماتملك قل آمين

شرفني مرورك ياغالي

[ابونايف 2010]

ياراعي الهدد صبحك بالخير وانا اوافق على السريه والمحافظه على نظافت المكان والافضل والمتبع لدينا هو حمل الزباله وعدم حرقها وعند الوصول للمدينه رميها في اقرب زباله تكرمون وبنتظار وصفك على الخاص ومشكور:good:

[طير سدير]

ومع احترامي وتقديري للكلام اللي قريناه في الرابط اللي انت حاطه لكن يا خي مهوب دليل الله من واحد وواحد راحوا للصمان وغيرها بدون ما يعرفون مكشات .. لكن خوينا الله يجزاه خير عمم الموضوع علي الجميع وذكرني بقصه حصلت قبل كم سنه ..
قبل حول ست او سبع سنين كنا طالعين نرمي طيور وكاشخين بهاك الشاص ومسوين زحمه بسواكتينا ويمر واحد يسوق(كدلك) وفاتح الدريشه ويرمي يمين يسار من سيارته اللي تحك في الارض.. قال واحد من ربعنا افا وش جاب هالنمونه هنا.. وقعدنا نضحك ونتريق علي الرجال وهو رايح راجع يدور بين الشجر الين جا العصر ما صدنا الا يجي اربع او خمس دخلات وقميريه ما انساها.. مير يمر الرجال من حولنا ويوقف ويسلم وينزل لابس الجنز و وفي يده(كت كات)ويسأل بشروا عسي صيدكم طيب.. توقعنا انه ماصاد والا حبه وانه جاي يسألنا يشوف حنا مثله والا لا.. يوم علمناه استغرب قال انا وانا لحالي صايد يجي ثمانين دخله ويحلف الا تاخذون منها.. والله يجزاه خير عشانا ذيك الليله ومشي..
الشاهد يا جماعه لا تستهرون بالناس وتحسون ان البر لكم لحالكم صح ان فيه ناس تضيق صدرك الا رحت للبر وشفت هالزبايل وتري راعي البر يعرف وين يروح له الصمان طويله عريضه اللي يبي برها الزين يتعمق .. العام الماضي انا رايح لها ومشكله العالم متجمعين في فياض معينه كن مافيه الاهي ما تلقي مغز ابره يوم تعمقنا شوي لقينا اماكن اطيب والا حولك احد

فياجماعه البر له رجاله ما نقول شي لكن هذا ما يمنع خوينا اللي شاف هالشباب اللي علي قولته خكاريه ينصحهم وان ما نفع يقولهم مسجلكم عالي ويقولهم عن زبالتهم الله يعزكم مافيها شي.. لكن ما نحط اللوم علي مكشات والا غيره

ولك تقديري يا راعي الهدد والكبسه طيبه ما شالله جعلها منازل العافيه

[راعي الهـــدد]

ياراعي الهدد صبحك بالخير وانا اوافق على السريه والمحافظه على نظافت المكان والافضل والمتبع لدينا هو حمل الزباله وعدم حرقها وعند الوصول للمدينه رميها في اقرب زباله تكرمون وبنتظار وصفك على الخاص ومشكور:good:


هلا بك يابو نايف ومرحبا بك مليووون

وشاكر مرورك ومقدر لك ذلك

والوصف وصلك في الخاص الله يطول عمرك

مغليك يابعدهم ابو حمد

[راعي الهـــدد]

ومع احترامي وتقديري للكلام اللي قريناه في الرابط اللي انت حاطه لكن يا خي مهوب دليل الله من واحد وواحد راحوا للصمان وغيرها بدون ما يعرفون مكشات .. لكن خوينا الله يجزاه خير عمم الموضوع علي الجميع وذكرني بقصه حصلت قبل كم سنه ..
قبل حول ست او سبع سنين كنا طالعين نرمي طيور وكاشخين بهاك الشاص ومسوين زحمه بسواكتينا ويمر واحد يسوق(كدلك) وفاتح الدريشه ويرمي يمين يسار من سيارته اللي تحك في الارض.. قال واحد من ربعنا افا وش جاب هالنمونه هنا.. وقعدنا نضحك ونتريق علي الرجال وهو رايح راجع يدور بين الشجر الين جا العصر ما صدنا الا يجي اربع او خمس دخلات وقميريه ما انساها.. مير يمر الرجال من حولنا ويوقف ويسلم وينزل لابس الجنز و وفي يده(كت كات)ويسأل بشروا عسي صيدكم طيب.. توقعنا انه ماصاد والا حبه وانه جاي يسألنا يشوف حنا مثله والا لا.. يوم علمناه استغرب قال انا وانا لحالي صايد يجي ثمانين دخله ويحلف الا تاخذون منها.. والله يجزاه خير عشانا ذيك الليله ومشي..
الشاهد يا جماعه لا تستهرون بالناس وتحسون ان البر لكم لحالكم صح ان فيه ناس تضيق صدرك الا رحت للبر وشفت هالزبايل وتري راعي البر يعرف وين يروح له الصمان طويله عريضه اللي يبي برها الزين يتعمق .. العام الماضي انا رايح لها ومشكله العالم متجمعين في فياض معينه كن مافيه الاهي ما تلقي مغز ابره يوم تعمقنا شوي لقينا اماكن اطيب والا حولك احد

فياجماعه البر له رجاله ما نقول شي لكن هذا ما يمنع خوينا اللي شاف هالشباب اللي علي قولته خكاريه ينصحهم وان ما نفع يقولهم مسجلكم عالي ويقولهم عن زبالتهم الله يعزكم مافيها شي.. لكن ما نحط اللوم علي مكشات والا غيره

ولك تقديري يا راعي الهدد والكبسه طيبه ما شالله جعلها منازل العافيه




أخوي الغالي طير سدير يشرفني مرورك اي والله

ونخوك ترى موضوع اخونا بالرابط مخصص لفئة من المجتمع معروفة ولم نعمم على الجميع ونخوك

ونقصد ونخوك بصورة مبسطة نقصد انه بدال ماتسهل لهالخكاريه الله يعافيهم ولا يبلانا وهالي مايقدرون بدال ماتسهل لهم مطلاعهم للبر وتخريبهم حاول انك تجعل الأمر بينك وبين الرجال شرواك والكتب والأحداثيات الي تقول ترى ماهوب كلاً يعرف لها او يدري عنها

اما النت فسهل ويدخله الجميع وبنسبة 80 بالمائه يستعينون بالنت في مواقع البر بل حتى الجرايد تآخذ من النت وش رايك

والدليل على ذلك شف ونخوك خذ الدليل ابيك تنزل موضوع عن موقع فيه فقع طيب والفقع الي فيه الوحده كبر يدك ومليان المكان فقع وابيك تنزل له صور واحداثيات

شف بكره او بعده وش يصير

اقطع يدي ان ماحصلت جريدة الجزيرة وبقية الجرائد معلنين عنها وان كان لك صور تلاقيهم حاطينها واقطع يدي ان ماحصلت المكان معفول ومحيوس وكله وسايخ بل بتحصله محروث حرث حتى لو ما اعلنت عنه الجرايد

تصدق عاد الناس هالسنه انهبلت على الفقع حتى الهنود يدورون فقع تصدق عاد

والله هالسنة اول مره اشوف الحصى مقلع من الأرض هههههه


تمر على مكان تلاقيهم هالمخفف يشوفون الأرض مرتفعة شوي ويحسبونه فقع يقومون يحفرون ويلاقيها ماغير حصاة ههههه


فهم يحسبون كل سوداء تمره



عموماً لا اطيل عليك النت ولا شك سبب رئيس لما نشاهده الآن

أخوي الغالي اما عن سالفة راعي الكدلك ما الاحظ فيها شي ولا لها دخل في موضوعنا خله يقنص وان بغى على مرسدس

انا في وقت كان ماعندي موتر والربع مايبون يطلعون الا خميس وجمعه ومنهبل ما اقدر اترك شي اسمه دخل وقميري وش سويت والله قنصت على كرسيدا جي ال 95 ههههه اي والله وش تبي اسوي


ارجوك اربط المواضيع ببعض ياغالي
وللتوضيح احب اقول لك لعشان تفهمني صح


انا الآن اعرف مكان قريب من الرياض مايبعد حتى 90 كيلو بس بس بس

وفيه ارنب تقدر تقومها في النهار اذا الله وفقك وفي الليل كذلك بتقنصها وأرضها بنسبة 50 بالمائة بكر وش رايك واذا رحت مانتب خايب بأذن الله

وش رايك لو عطيتكم علم هالمكان في العام هنا وش توقع بيصير على هالمكان

والله من بكره وش بكره يارجل الا من بعد ساعتين ثلاث تحصل خطوط السيارات هناك والبلاوي الزرقا والزبايل

فلذلك نرجو أن نقارن الأمور ونقيسها صحيح لمصلحتنا ومصلحة الجميع ترى الصيد قل وكل شي بدا ينحاس حتى الأرض الي تجلس عليها انحاست وش بقى لنا ياناااااااااااااااااااس

تقبل محبتي وتقديري ياطير سدير الا تعال وش سلطك علي عقب هالفجريه والله انك حستني ياولد حوس

[ابونايف 2010]

هلا بك يابو نايف ومرحبا بك مليووون


وشاكر مرورك ومقدر لك ذلك

والوصف وصلك في الخاص الله يطول عمرك

مغليك يابعدهم ابو حمد


كفو ابوحمد بيض الله وجهك ورحم الله والديك ومو غريبه على راعى الهدد :good:

[راعي الهـــدد]

كفو ابوحمد بيض الله وجهك ورحم الله والديك ومو غريبه على راعى الهدد :good:




حياك يابوي وشاكر لك الأطراء ولو اني اقل مما تقول بكثير الله يعفو ويتسامح بس الله يعفو الله يعفو

[الضب الصماني]

اوافقك الرأي يا راعي الهدد ،،،، جزاك الله خير ،،، وياليت يالطيب اذا تنصح بالمكان للعائلة ان ترسل وصفه على الخاص وتعلمني وشلون أفتح الخاص ،،، يعطيك العافية.

[راعي الهـــدد]

اوافقك الرأي يا راعي الهدد ،،،، جزاك الله خير ،،، وياليت يالطيب اذا تنصح بالمكان للعائلة ان ترسل وصفه على الخاص وتعلمني وشلون أفتح الخاص ،،، يعطيك العافية.



أخوي الغالي الضب الصماني

حياك وبياك

وجعل الجنة مثوانا ومثواك آمين

بالنسبه للوصف فتراه وصلك في رسالة خاصة لك ياغالي

ولاتنسانا من دعائك وترآه مكان لايعلى عليه بالنسبة للعوائل

المهم طريقة فتح الرسايل

شف يسار عندك في اعلى الصفحة الي انت فيها الآن

تجد مكتوب الرسايل الخاصة اضغط عليها وتشوف الرسايل الي جايتك بالترتيب

وتحصل من ضمنها رسالة اخوك ومحبك ابو حمد

اضغط عليها وتفتح معك اقرء مافيها ولاتساني من دعائك ياغالي

[ندى النفود]

ماشاء الله والحطب غظا على ما يبدوا

ما تلعب ياراعي الهدهد

[راعي الهـــدد]

ماشاء الله والحطب غظا على ما يبدوا

ما تلعب ياراعي الهدهد


شاكر مرورك ياغالي

والحطب غضا صحيح جبناه قبل اسبوعين او ثلاثة من مكان يحبه قلبك متخرع يبي من يشيله

وصار من نصيب الوالد هالحطب وباقي منه خير

ويا هلا بك

[راعي الهـــدد]

هذي الصورة أهداء للغالي ندى النفود

بما انه سأل عن الغضا

شف ونخوك الغضا والله ماغير متخرع يبي من يشيله

وفيه صور احلى من هذي بس تبي فرغه وننزلها بموضوع مستقل

http://www.mekshat.com/pix/upload/images28/mk33838_sss-kda.jpg



وتقبلو فائق المحبة والتقدير

[الصاروخ]

بالهناء والعافيه

[عاشق VXR]

اخي العزيز / راعي هدد (( ابو حمد ))
جزاك الله خير .,.
وبصراحة طلعه رائعة وممتازة .,.
ولا تنسى تبلغ الوالد وابو معا سلامي ...
واشكرك على عدم وضع وصف المكان .,. وودي اشور عليك ان ما تعطي احد الوصف الا انت محلفه ان يسعى في تنظيفه بقدر ما يستطيع .,.
لاكن اخواننا في مكشات ثقة ولا يبي من يوصيهم .,.
اعيد شكري وتقديري ..
جزاك الله خير ,,,

[الهوعخع]

ما شاء الله تبارك الله يا أخوي يا راعي الهدد والله إنك جبتها جميع الموصفات وفل كامل قريب وحلو هذا والله الي ناقصنا وفرصه الواحد يروح بعد الدوام يمديه يتغدى ولجاء مسيان رجع للرياض، وليتك ما تنساني من الوصف الله يسلمك:no2:

[غازي 1]

ما شاء الله عليك ياراعي الهدد رحلة جميلة وطبخ ولا أحلى وأنا يعجبني الشغل النظيف والترتيب والله يهنيكم على الطلعة .. وهذي الطلعات وإلا بلاش .. ياليتني كنت معكم فأستأنس وناسة عظيمة

[راعي الهـــدد]

ما شاء الله تبارك الله يا أخوي يا راعي الهدد والله إنك جبتها جميع الموصفات وفل كامل قريب وحلو هذا والله الي ناقصنا وفرصه الواحد يروح بعد الدوام يمديه يتغدى ولجاء مسيان رجع للرياض، وليتك ما تنساني من الوصف الله يسلمك:no2:



حياك ياخوي والله ماعرفت اسمك

بس مثل ماقلت يمديك تآخذ عيالك عقب الدوام وتروح وترجع سالم

والوصف وصلك برسالة ياغالي

[weather]

بسم الله الرحمن الرحيم
بعد اذن راعى الهدد أنا أبقول لهم الوصف وأجري على الله بس لا أحد يزعل ورجاءً من الجميع نظافة البيئة وعدم ترك المخلفات شبو فيها أو احملوها لأقرب حاويه .
المكان الأول عندما تأخذ يمين وتحط وجهك شرق أنظر للأرض اللي على يمناك , أما الي صور فيها القرقاص راعي الهدد فهي في الداخل تسير حتي تتعدى المحطة وحينما يتجه الخط جنوباً تياسر مع الطريق الترابي بين المزارع واتجه الى اليسار للشعيب والجبل وسترى كل النباتات هناك وأن حبيت تواصل بتل شرق وسترى ماأحدث من ممرات سياحية هناك أنا أعرف المنطقة جيداً فقد قصدتها أكثر من مرة .الشعيب شعيب قرقاص أما الفقع فلا أخبر به فقع صراحة .

[راعي الهـــدد]

ما شاء الله عليك ياراعي الهدد رحلة جميلة وطبخ ولا أحلى وأنا يعجبني الشغل النظيف والترتيب والله يهنيكم على الطلعة .. وهذي الطلعات وإلا بلاش .. ياليتني كنت معكم فأستأنس وناسة عظيمة




هلا هلا هلا بالغالي يزيد الأول

واما عن ياليتك معنا فيا هلا ومرحبا

الأسبوع القادم جب عيالك وانا اجيب عيالي ونطلع سوا ونوسع الصدر وترا من هو مثلك وشرواك نحرص عليه وقربه يابعدهم

بس هاه لي شرط التصوير انا الي بصور لعشان ننزل موضوع جديد هنا وصور جديده ههههههههه

هلا بك

[بن علايم]

مشكور وجزاك الله الف خير

[راعي الهـــدد]

بسم الله الرحمن الرحيم
بعد اذن راعى الهدد أنا أبقول لهم الوصف وأجري على الله بس لا أحد يزعل ورجاءً من الجميع نظافة البيئة وعدم ترك المخلفات شبو فيها أو احملوها لأقرب حاويه .
المكان الأول عندما تأخذ يمين وتحط وجهك شرق أنظر للأرض اللي على يمناك , أما الي صور فيها القرقاص راعي الهدد فهي في الداخل تسير حتي تتعدى المحطة وحينما يتجه الخط جنوباً تياسر مع الطريق الترابي بين المزارع واتجه الى اليسار للشعيب والجبل وسترى كل النباتات هناك وأن حبيت تواصل بتل شرق وسترى ماأحدث من ممرات سياحية هناك أنا أعرف المنطقة جيداً فقد قصدتها أكثر من مرة .الشعيب شعيب قرقاص أما الفقع فلا أخبر به فقع صراحة .





وصفك غلط في غلط في غلط ولاتفرح واجد يالحبيب


هلا بك ياخوي

اول شي ودي ادري ليش متحمس واجد

الى درجة انك اخطيت علي وعلى الموضوع كله

يعني انت يوم تشوف اني اوصف بالرسايل الخاصة قصدي يعني سيء او اريد احتكار شي

او وش تفهم مني ونخوك

الله يهديك ويصلحك

والله المقصد البلاوي الي نشوفها في البر وحنا بعض من سببها باعلاننا عن الأماكن هنا

ثاني شي ودي ادري متى بنتفق ونتحد نحن العرب ليش كل واحد في راسه نعره

الله يصلحك ويهديك

والله انك تستحق رد اقوى من هذا

بس طيبتي ولأني ما ابي اجرح احد اقول لك

الله يهديك ويصلحك ويخليك لأهلك

وترى وصفك والله ثم والله غلط في غلط فلا تفرح واجد

وللأعضاء المحترمين اوجه طلب بعدم الخروج عن صلب الموضوع ولندع التعليق على مثل ذلك

[راعي الهـــدد]

مشكور وجزاك الله الف خير


هلا بالغالي بن علايم

وجزاك الله خير

وشاكر مرورك يابعدهم كلهم

[weather]

لا تزعل مني يا أخوي أنا قلت من غير زعل وعلشان أراضيك فيه شعيب غرب السكن في مطار الملك خالد أنا سنة مضت أخذت منه زبيدي وان جاب الله مطر المنطقة منطقة فقع ولا تزعل وتسلم يالغالي بس الله الله في نظافة البيئة تكفون يالنشاما لأحد يبقي مخلفات هذي بلدنا يجب نهتم فيا ونبلغ عن كل من يخرب فيها .

[ابوعبدالعزيز4]

بيض الله وجهك وغفرالله لك ولوالديك وصلت ولا قصرت صورفي غاية الروعه

[راعي الهـــدد]

بيض الله وجهك وغفرالله لك ولوالديك وصلت ولا قصرت صورفي غاية الروعه



حياك يابو عبدالعزيز وشرفني مرورك ياغالي

والله يكثر امثالك ويفكنا واياك من الجخاخ

[راعي الهـــدد]

لا تزعل مني يا أخوي أنا قلت من غير زعل وعلشان أراضيك فيه شعيب غرب السكن في مطار الملك خالد أنا سنة مضت أخذت منه زبيدي وان جاب الله مطر المنطقة منطقة فقع ولا تزعل وتسلم يالغالي بس الله الله في نظافة البيئة تكفون يالنشاما لأحد يبقي مخلفات هذي بلدنا يجب نهتم فيا ونبلغ عن كل من يخرب فيها .





لازال الأخ ضارب الشعيب وخارج نطاق التغطية

الله يصلحك ويهديك عيب الي تسويه ترى منقود عليك

[طير سدير]

الا علي طاري بنبان ياراعي الهدد اكيد انك وصلت منتزه بنبان اللي يشتغلون فيه الحين ومسكرينه لكن فيه فتحه في احد الشبوك فوق ان شالله انك داخله لان بسألك عن شي فيه ..
ما تقول جيته قبل كم يوم وتمشيت في وديانه لكن ياخي في احد الوديان الناقعه فيه ريحه حيوانات حيه وجحور واجد يوم تتبعت احد الجحور واشوف اثر بس اخوك ما يبخص هالامور وواضح ان الجحر مهوب مهجور لان الاثار فيه وغيرها فيه بقايا عظام ..
كودك شايفه وتفيدنا

[ابونايف 2010]

ياراعى الهدد والله انى اغبطك لكن على نياتكم ترزقون والله انى دعيت لك ولوالديك فى اخر ساعه من نهار يوم الجمعه وللعلم صارت بسبب وجودى فى المكان المذكور ودعيت لمن دلنى على المكان وتستاهل كل خير ودائما على نياتكم ترزقون

[الشاهين2004]

ماشاء الله رحلة مرتبة والمطبخ متكامل والطبخ شكله مبهر ماشاء الله

[سرهيد]

موفق يا ابو حمد

ومثلك ذيب ما شاء الله

وجعلك سعيد ولو انك بعيد

بس الله لنا :no: :no: :no: :no2:

[راعي الهـــدد]

الا علي طاري بنبان ياراعي الهدد اكيد انك وصلت منتزه بنبان اللي يشتغلون فيه الحين ومسكرينه لكن فيه فتحه في احد الشبوك فوق ان شالله انك داخله لان بسألك عن شي فيه ..
ما تقول جيته قبل كم يوم وتمشيت في وديانه لكن ياخي في احد الوديان الناقعه فيه ريحه حيوانات حيه وجحور واجد يوم تتبعت احد الجحور واشوف اثر بس اخوك ما يبخص هالامور وواضح ان الجحر مهوب مهجور لان الاثار فيه وغيرها فيه بقايا عظام ..
كودك شايفه وتفيدنا



حياك ياغالي

بس ترى ما اعرف منتزه بنبان

ولا ادري عن هالريحة الي تقول

بس ممكن انك تقصد مكان آخر ياغالي

[راعي الهـــدد]

ياراعى الهدد والله انى اغبطك لكن على نياتكم ترزقون والله انى دعيت لك ولوالديك فى اخر ساعه من نهار يوم الجمعه وللعلم صارت بسبب وجودى فى المكان المذكور ودعيت لمن دلنى على المكان وتستاهل كل خير ودائما على نياتكم ترزقون


مايحصل من المؤمنين غبطة كما فعلت يا أخي فجزاك الله خيرا



ومايحصل من المنافقين والكفرة حسد وعداوة





قال تعالى (( لتجدن أشد الناس عداوة للذين آمنو اليهود والذين أشركوا ))



وقال تعالى (( وأن يكاد الذين كفروا ليزلقونك بأبصرهم لما سمعو الذكر ))







فاشكرك على غبطتك لأخيك فهي جائزة شرعا



والله يغفر لك على دعائك وحرصك على ذلك



والله يقبل مادعيت به يا أخي



شكراَ لك

[راعي جمس 450]

مشكووووووووووووووووووووور
وما قصرت
وصراحة تعليقك يفتح النفس
وجزاك الله خير

[طير سدير]

عموما جزاك الله خير وبيض الله وجهك ومنتزه بنبان ياحبيب قريب وواضح وزين و وما يبعد الا 30 كم من شمال الرياض طبعا

[راعي الهـــدد]

أخوي الغالي الشاهين 2004







شاكر مرورك ياطيب والله يغفر لك





----------------------------------



أخوي الغالي السرهيد







هلا بك يابو عبدالله هلا مليوووون







هلا بالغالي هلا







لاتشرّه يابو عبدالله والي قدرك انك تكتب هنا يقدرك على شي ثاني اضن كلامي صح





الا وش اخبار الخيمة عساها ضبطت اتمنى ذلك





وش اخبار النياق الي في الزويليات عسى التصوير مدهر ههههههههههههههههههههه

[طوقي]

أبو حمد الله يجزاك خير
ارسلت لك على الخاص من كم يوم علشان توصف لي بس مارديت علي أتمنى منك الرد
ولك جزيل الشكر

[راعي الهـــدد]

أبو حمد الله يجزاك خير
ارسلت لك على الخاص من كم يوم علشان توصف لي بس مارديت علي أتمنى منك الرد
ولك جزيل الشكر


هلا بالغالي

والله مانضرت لرسالتك ممكن انك مرسل لغيري

كل الي ارسلو لي رديت عليهم مباشرة ياغالي

ولايهمك ياغالي راجع الخاص وتجد مايسرك

لا ومعها رجاحة بعد موقع احلى وأحلى لعشان تسمح لي عن التأخير

[غازي 1]

هلا هلا هلا بالغالي يزيد الأول

واما عن ياليتك معنا فيا هلا ومرحبا

الأسبوع القادم جب عيالك وانا اجيب عيالي ونطلع سوا ونوسع الصدر وترا من هو مثلك وشرواك نحرص عليه وقربه يابعدهم

بس هاه لي شرط التصوير انا الي بصور لعشان ننزل موضوع جديد هنا وصور جديده ههههههههه

هلا بك

===============================================

ياهلا بالغالي راعي الهدد .. ماعليك زود خوة مثلك تشترى .. بس عاد لو انا من الرياض كان بصراحة خاويتك ... بس تعرف أهل القصيم يبون مشوار للرياض وماعاد هالحين فيه اجازات طويلة ... يادوب خميس وجمعة .. نكبسها نومة .. وبارك الله فيك وبالتوفيق إن شاء الله ..

[srk]

اذا احد من الي انت محذر منهم وتشتكي من اعمالهم ارسلك على الخاص وعطيته الوصف ووقع منه الدمار والوساخه واشتهر المكان........

وش شعورك ؟!!!!!!!!!!!!!!

[راعي الهـــدد]

اذا احد من الي انت محذر منهم وتشتكي من اعمالهم ارسلك على الخاص وعطيته الوصف ووقع منه الدمار والوساخه واشتهر المكان........

وش شعورك ؟!!!!!!!!!!!!!!



شعوري ونخوك اني بذلت الذي علي

والباقي ليس في ملك ايدينا

الله يحاسبه


وسيلعن الى يوم القيامة



قال رسول الله صلى الله عليه وسلم : (( اتقو اللعانين قالوا :وما اللعانان يارسول الله؟ قال :الذي يتخلى في طريق الناس او في ظلهم )) رواه مسلم



شاكر مرورك ياغالي وهذا شعوري يابعدهم

تقبل محبتي وتقديري

[شجاع نت]

مساء الله يابو حمد خوش كشته بس الكشنه غيرررررررررررررررر الله يعطيك العافيه

[سرهيد]

هلا بالحبيب

وطيب ليش ما يكون الامر من طرفك طال عمرك

المهم وش اللي دراك عن سالفة الزوليات وغيرها لا يكون متابع لي وانا مو داري

والا فيه واحد يعطيك الموجز والتفاصيل

على العموم النياق لو تشوفها يتنهبل من زينها وترا المكان تغير تم الاتجاه شمالا طلبا للمرعى


http://www.mekshat.com/pix/upload/images26/mk22112_u.jpg

[راعي الهـــدد]

مساء الله يابو حمد خوش كشته بس الكشنه غيرررررررررررررررر الله يعطيك العافيه


شاكر مرورك ياغالي



والكشنة سوت علوم ذاك اليوم



الله لايحرمنا من كل شي طيب وحلال

[راجح]

وشو المفروك ؟؟؟؟

[راعي الهـــدد]

وشو المفروك ؟؟؟؟

هلا بالغالي

المفروك باختصار

قرص من البر (( القمح ))

تعجن العجينة وتحط في النار الين تستوي ان بغيت في المله او في الفرن ترى تضبط

المهم اذا خلصت

تكسرها وتطحنها تطحنها بالدق بودي النجر والبعض يطحنها بفرامة مولينكس

المهم تخليها جراش مثل ماتشوف لاتطحنها مرة

ثم اذا طحنتها تكون مولم لك كشنة (( قشطة نفس المسمى )) بصل وطماط وتخليه على النار وليمون اسود مطحون وبهارات وليمون اسود حبات كبار المههم تخليها تطبخ الين تجهز

ثم انثر الكشنة على المفروك الي جهزته ودقيته واخلطهم مع بعض خلط جيد باي ملعقة وحنا نخلطها بشي اسمه مسواط من عسيب النخل

اذا خلطته يكون جاهز

وفيه شي اسمه مفروك بصل وهو بصل اخضر مخلوط مع القرص الي انت سويته بس بدون قشطة فهمت علي

آمل ان الفكرة وصلت

وشاكر لك المرور ياغالي

[راعي الهـــدد]

هلا بالحبيب

وطيب ليش ما يكون الامر من طرفك طال عمرك

المهم وش اللي دراك عن سالفة الزوليات وغيرها لا يكون متابع لي وانا مو داري

والا فيه واحد يعطيك الموجز والتفاصيل

على العموم النياق لو تشوفها يتنهبل من زينها وترا المكان تغير تم الاتجاه شمالا طلبا للمرعى




http://www.mekshat.com/pix/upload/images26/mk22112_u.jpg




هلا بالغالي

اتمنى انك بخير يابعدهم

يازين سويلفاتً معك خصوصاً اذا جت السوالف من .... وتحت ..

هههههههههههه

هلا بك

[راعي الهـــدد]

أحد الأخوة هداه الله ذهب هناك ودور فقع ولا حصل شي

ثم رجع علي يلومني يقول ليش تقول فيه فقع ولا حصلنا شي

قلت له ترآ هذي ارزاق

قل ولو لاتقول شي ماهوب صحيح

قلت شكراً لك وفي امان الله

والله انك تعجب من بعض الخلق في تصرفاتهم كيف يعني انت تبيني اقول لك تراك بتلقاه في هالمكان او ذاك

ثم انا قلت لكم اني مالقطته بس ناس يمرون علي ويقولون لي كذا

واشوفهم انا يدورون بل واحد مر علي وقال لي انه حصل ثلاث يعني وش تبي اكثر من هذا الوضوح والشفافية

الله المستعان وعليه التكلان

اقولها وبكل صراحة

الناس اختلفت كثير عقولها وتصرفاتها بل ورسم وجوهها بعد الأسهم لاعادها الله

والحمدلله الي نجانا منها ولا قربنا لمها يالله لك الحمد والا كان ملتفة روسنا مثل هذا الله يصلحه

[ALBDRANE]

شغل نظيف والبصيلات كنك في مطبخ mbc

[mr-mam]

يا راعي الهدد والله اني بلش مواعد الوالده وعيالي ابطلعهم للبر ومكانك مره زين ياليت ترسلي على الخاص احداثيات الماك او وصفه

[راعي الهـــدد]

يا راعي الهدد والله اني بلش مواعد الوالده وعيالي ابطلعهم للبر ومكانك مره زين ياليت ترسلي على الخاص احداثيات الماك او وصفه




ابشر ياغالي وراجع الخاص وتحصل الوصف

[متهبد الوجم]

الحمدلله على سلامتكم وين ذا

[wannan]

مشكوووووووووووووور أخوي و.... بالعافية عساه يتنهمش ( من يعرف معناها.:D :D
http://www.mekshat.com/pix/upload/images27/mk33838_17171717.jpg

[القناص نت]

ماشاء الله يابو حمد صور روعه

ومكان حلو وتقرير جيد والله يوفقكم ويهنيكم

[أبورهف]

ياسلاااام
إبداع في إبداع
الله يوسع صدرك ويفرج لك همك كما وسعت صدورنا وفتحت أنفسنا وأبهجتنا بهذه الصور الرائعة الجميلة
تسلم يمينك على هذا الإبداع في التقاط الصور النقية
اللهم زد وبارك
اللهم أغثنا اللهم أغثنا اللهم أغثنا

[راعي الهـــدد]

الغالي متهبد الوجم

شاكر لك المرور ومقدر ذلك

ولم افهم سؤالك ياغالي أنت اضمرت في سؤالك الى غائب غير معلوم

ارجو بيان ذلك المضمر الغائب لعدم وجود دلائل على مكانه ولا ماهو والضمير ولا شك يعود الى أقرب مذكور وليس هناك اي مذكور ههههه صار درس نحو

----------------

الغالي ونا

هلا بك افا عليك الا يتنهمش بقوة هههه

من الي مايعرف يتنهمش

ينهمش ويتنهمش ويتفلفل وكل شي من علومك عندي ياغالي

هلا بك يابعدهم

-----------------------------

الغالي القناص نت

شاكر مرورك ومقدر لك والله لايحرمك الأجر والمثوبة


---------------------------

الغالي ابو رهف

الله يغفر لك والله يستجيب مادعيت به

وشاكر لك المرور والله يجمعنا بك على منابر من نور يوم القيامة

تقبل المحبة والتقدير

[sultan8861]

ياراعي الهدد السلام عليكم

تكفي ارسلي الوصف على الخاص تراك نشفت ريقي وانا اخوك

وشكرااااااااااااااا

[ريم البراري]

ماشاء الله تبارك الله
الله يهنيكم وبالعافية
شي رائع ان نقرأ(رحلة عائلية):good:

[راعي الهـــدد]

ياراعي الهدد السلام عليكم

تكفي ارسلي الوصف على الخاص تراك نشفت ريقي وانا اخوك

وشكرااااااااااااااا



ماعاش من ينشف ريقك ياغالي

آمر انت بس تو ادري انك تبي الوصف

راجع الخاص ياغالي وتحصل الوصف الله لايحرمنا من امثالك الطيبين

[راعي الهـــدد]

ماشاء الله تبارك الله

الله يهنيكم وبالعافية
شي رائع ان نقرأ(رحلة عائلية):good:




آمين آمين آمين

والرحلات العائلية ممتعة حيل خصوصاً اذا كانو جميع الأهل والأعمام والأنساب والخوال
ياسلالالالام

اما رحلة شبابية للقنص فلا يناسبني غير يكون معي واحد او اثنين بالكثير

أما رحلة توسيع صدر وشوفت الربيع فهذي في قاموسي قليلة مع الشباب بس اذا حصلت فلا احبذ العدد الكثير 4 غاية

والله يوفق ويسدد

[حمدبن ناصر]

ما شاء الله صور فى غاية الروعه وجزاك الله خير

با نتظار الوصف يا بوحمد

[أبو الكيف]

بارك الله فيك

صور رائعة

ولا عليك امر ارسل لنا الوصف ..

[mr-mam]

مشكوووووووووووووور أخوي يعطيك الف عافية

[بو هاشم]

يسلمووووووووووووووووووووووووووووووووووووووووووووو على طرحكـ

[بيتر]

مشكور وماقصرت ياراعيها:good: ...........افتح بريدك:no2: ;)

اخوك بيتر;) ....@

[DSR284]

عضو جديد هل ترحب بي يا راعي الهدد ولا يهون باقي الاعضاء وتوصف لي المكان وانا اخوك...ز

[هدام الطوابير]

ما شاء الله طلعة طيبة .. موفقين خير :)

[عاشق صقر]

ماشاء الله عليك اخوي راعي الهدد
على الرحله والصور الحلوه وانشاء الله تكونون انبصتوا في هذه الرحله .
ومشكور والله يكثر من امثالك.

[راعي الهـــدد]

الأخوان الغالين

حمد بن ناصر .. ابو الكيف .. أم آر أم آي أم .. بو هاشم .. بيتر

شاكر مروركم ومقدر ذلك

واسمحو لي عندي مشكلة بالرسايلة الخاصة باحاول اشوف لها حل وابشرو بالوصف ياغالين

تقبلو المحبة والتقدير

[ahkm1234]

بيض الله وجهك

[راعي الهـــدد]

الأخوة الغالين

دي اس آر 284 انا اول من يرحب بك ياغالي وحياك وبياك والوصف ابشر به بس مثل ماقلت للأخوة

... هدام الطوابير ... عاشق صقر ...

شاكر مرووركم ومقدر لكم ذلك

الله يغفر لكم ويجمعنا بكم في دار كرامته

[راعي الهـــدد]

بيض الله وجهك

ووجهك ياغالي

وشاكر مرورك ومقدر ذلك

[باترول 4×4]

هلا بك يا ابوحمد وهلا بعودتك ، صراحة أتحفتنا بهالصور الطيبة ، وخصوصا صورة بيالة الشاي الأخضر ،،، شي ثاني ،،
يعطيك العافية .

[راعي الهـــدد]

هلا بك يا ابوحمد وهلا بعودتك ، صراحة أتحفتنا بهالصور الطيبة ، وخصوصا صورة بيالة الشاي الأخضر ،،، شي ثاني ،،
يعطيك العافية .




هلا والله بالغالي هلا بالي يغيب ولا يشاف الا كود بجرجره ويالله

هلا هلا وين الناس ياغالي

شرفني مرورك وسعدت بردك كثيرا

بس ترى البيالة ماهي شاي اخضر هذي قرقاص ملقم هههه شي يطربك

[هدهد الجزيرة]

وين الحميض؟؟؟؟؟

مشكور............

[راعي الهـــدد]

وين الحميض؟؟؟؟؟

مشكور............


أخي الكريم لم افهم سؤالك

هل تقصد اين هو في الصور فالجواب لم يتم تصوير شيء منه

او تقصد مكان الحميض فالجواب تحصله بكل مكان حتى قبال بيتكم هالسنة خير عضيم يالله لك الحمد

اذا تقصد شيء ثاني وضح لي ياغالي

[معاندالليل]

صور جميله الله يبارك فيك وخصوصا صوة الشبه لانها من الغضا اه يالغضا

[راعي الهـــدد]

صور جميله الله يبارك فيك وخصوصا صوة الشبه لانها من الغضا اه يالغضا



هلا والله بالغالي

شاكر لك المرور والفضل لله سبحانه

وانت ماقصرت ارشدتني لهذا الموقع الطيب

اشكرك وادعو لك بالتوفيق اخوي الغالي

ابو حمد

[DSR284]

ممكن ترسل لي الوصف على الخاص
انتظر عندي طلعة مع الاهل

[ابو فالح]

السلام عليكم ورحمة الله وبركاته
اسعد الله اوقاتك بكل خير يا راعي الهدد
كل الشكر لك على هذا التقرير الرائع وبارك الله فيك.
ولو تسمح تراجع الخاص

[راعي الهـــدد]

السلام عليكم ورحمة الله وبركاته


اسعد الله اوقاتك بكل خير يا راعي الهدد
كل الشكر لك على هذا التقرير الرائع وبارك الله فيك.
ولو تسمح تراجع الخاص


راجعت الخاص ياغالي ووصلك الوصف اذا ماوصلك عطني خبر

وشاكر لك المرور يابعدهم

[ابوسياف]

الحمد لله على السلامة...


بس سؤالي كم باقي على الربيع؟؟؟
img]http://www.mekshat.com/pix/upload/images28/mk16871_________.jpg[/img]

[صالح الشايع]

جزاك الله خير اخي ابو حمد

ورحلة موفقة ومرتبة ماشاء الله عليك

أمل منك أرسال الوصف لي لوسمحت وهل المكان ممكن الوصول اليه بسيارة صغيرة ام لابد من سيارة دفع رباعي ؟

[راعي الهـــدد]

الحمد لله على السلامة...


بس سؤالي كم باقي على الربيع؟؟؟


هلا بالغالي ابو سياف

سؤالك يحمل معاني عدة

عموماً

يقولون باقي على خروج الشتاء شهر او يزيد بأيام بسيطة

والربيع اذا كتب الله انه يبقى فهو يبقى

واذا الله كتب لنا مطر بهالصيف فابشر بربيع الصيف وهو انفع للبهايم من ربيع الشتاء

تقبل المحبة من أخيك ياغالي

[راعي الهـــدد]

جزاك الله خير اخي ابو حمد

ورحلة موفقة ومرتبة ماشاء الله عليك

أمل منك أرسال الوصف لي لوسمحت وهل المكان ممكن الوصول اليه بسيارة صغيرة ام لابد من سيارة دفع رباعي ؟



هلا بك ياغالي

الوصف وصلك بالخاص

والمكان تآصله الصغيرة ابشرك

شاكر لك المرور والمشاركة

[غيث الغيث]

ماشء الله تبارك الله

رحلة موفقة وكبسة يحبها قلبك

[راعي الهـــدد]

ماشء الله تبارك الله

رحلة موفقة وكبسة يحبها قلبك



شاكر لك ومقدر ياغالي

شكرا لك

تسلم والله على هالطلة

[شبح الكشتات]

مشكور وما قصرت
والله يعطيك الف الف عافيه

[سلطان العوني]

الله يوفقكم جميعا
صراحه موضوع كامل والكامل وجهه الله

الف الف شكر اخوي
تقبل مروري

[omiran]

ماشاء الله عليك يابو حمد اتعبت من بعدك بهالموضوع الممتاز وفيت وكفيت
بس ياليتك توصف المكان على شان نزاحمك فيه ههههههههه

http://7hasas.jeeran.com/22.gif

[راعي الهـــدد]

مشكور وما قصرت
والله يعطيك الف الف عافيه



شاكر لك ومقدر ياغالي هذا المرور الطيب


دمت بود ومحبة ياغالي

[راعي الهـــدد]

الله يوفقكم جميعا
صراحه موضوع كامل والكامل وجهه الله

الف الف شكر اخوي
تقبل مروري



هلا بك ياغالي

مرورك تشريف لي ياغالي

اشكرك والله يغفر لك ووالديك

دمت بود ومحبة ياغالي

[راعي الهـــدد]

ماشاء الله عليك يابو حمد اتعبت من بعدك بهالموضوع الممتاز وفيت وكفيت

بس ياليتك توصف المكان على شان نزاحمك فيه ههههههههه

http://7hasas.jeeran.com/22.gif






هلا بك يابواحمد

هههههههههه تزاحمني فيه انت تدق على وتر حساس

اوريك يابو احمد

وش رايك شديد انا صح

ههههههههه

الله يغفر لك ووالديك

دمت بود ومحبة

[aziz1200]

اخى راعى الهدد
انت رجل راقي فى ردودك فى شرحك فى وصفك
كتبت ذلك عن قناعه ومتابعه لما تكتب , حفظك الله

[راعي الهـــدد]

اخى راعى الهدد
انت رجل راقي فى ردودك فى شرحك فى وصفك
كتبت ذلك عن قناعه ومتابعه لما تكتب , حفظك الله




هلا بك ياغالي

اخوي عزيز اشكر لك هذا المرور الطيب والرد الطيب

دمت بود ومحبة ياغالي

[كمونه]

السلام عليكم ورحمة الله وبركاته




اخوي راعي الهدد




ما اقول الا ماشالله عليك على هالموضوع اللي اروع من الرائع وصور خلابه




خصوصا اني احب الطلعات العائليه اللي تكون منسقه مثل طلعتكم هذي




ولا الغدا اللي مرتب له ترتيب ما شفت احلا من كذا<<<<<<<< بالهنا والشفا








جهد تشكر عليه




كمونه

[راعي الهـــدد]

السلام عليكم ورحمة الله وبركاته





اخوي راعي الهدد



ما اقول الا ماشالله عليك على هالموضوع اللي اروع من الرائع وصور خلابه



خصوصا اني احب الطلعات العائليه اللي تكون منسقه مثل طلعتكم هذي



ولا الغدا اللي مرتب له ترتيب ما شفت احلا من كذا<<<<<<<< بالهنا والشفا





جهد تشكر عليه






كمونه



حياك وبياك

وياهلا ومرحبا

مرور شرفني كثيراً واعتز به

ومثل ماقلت طلعات مثل كذا مع العائلة لايمكن ان تنسى ابد ابد وتبقى عالقة في الذهن

شاكر لك ومقدر هذا المرور الطيب

[أبا مجاهد]

الله يصلحك يابو حمد قاعد اتفرج ولعابي يسيل الله يسامحك..

الا وين الهدد ماشفناه يبو حمد؟؟

موفق ومشكور عالصور الاحترافيه -_-

[راعي الهـــدد]

الله يصلحك يابو حمد قاعد اتفرج ولعابي يسيل الله يسامحك..

الا وين الهدد ماشفناه يبو حمد؟؟

موفق ومشكور عالصور الاحترافيه -_-




هلا والله بالغالي ابا مجاهد

ياحبني لك وش يخلي سعابيلك تسيل

ورّد على ابو حمد وابشر بكل مايصلح لك

ابشر بمثل هذا وأزود يابعدهم

اما من ناحية الهدد

فالهدد راح مع اهل الهدد هههههههههه


ماجاز لي ونخوك

طلعته جديد من معرض اليحي بــ 140 الف او ازود شوي

وماش ماجاز لي الموتر

في الحقيقة هو مآخذ سمعة اكبر منه

واكثر الكلام الي يقال عنه خرط في خرط

نصيحة لاتشريه

وفقك الله

شاكر مرورك يابعدهم وتشرفت بك

دمت بود ومحبة

[نديم القرينة]

أخوتي الفضلاء





اعذروني عن المشاركة والإنقطاع لفترة محدودة

حتى تسلى النفس من شيء صار وانتهاك لحرمة مسلم

فنفسيتي تعبانه مره مره ارجوكم اعذروني وسأعود قريبا

ولاحول ولاقوة الا بالله

والله ان العين لتدمع والله ان العين لتدمع
حسبنا الله ونعم الوكيل
الأحد 26 / 4 / 1428هـ



--------------------------------------------------------------------------------------------------------------------

اخي الغالي راعي الهدد ...

فرج الله غمك وكفاك ما اهمك ..

وهذه دعوة لنتأمل ولنتدبرجميعاً في قوله تعالى (((فَإِنَّ مَعَ الْعُسْرِ يُسْراً (5) إِنَّ مَعَ الْعُسْرِ يُسْراً (6)))

وفي قوله تعالى (( لآأُقْسِمُ بِهَذَا الْبَلَدِ (1) وَأَنْتَ حِلٌّ بِهَذَا الْبَلَدِ (2) وَوَالِدٍ وَمَا وَلَدَ (3) لَقَدْ خَلَقْنَا الإِنسَانَ فِي كَبَدٍ (4) ))

وكما قال الشاعر/
ضاقت فلما استحكمت حلقاتها ..فرجت وكنت أظنها لاتفرج

واسلم لمحبيك ....

[الغزال الشارد]

الله يعطيك العافية وتسلم اخوي ابوحمد كفيت ووفيت وبيض الله وجهك على ترتيب سنع تقبل تحياتي لك

[ابـ معزي ـو]

ماشاء الله الرحله كله صارت طبخ

(( شهوياتنا )) هههههههههه :D
ماشاء الله عليكم مكملين اغراض الطبخ والفواكه كله ماشاء الله تبارك الله

واتمنى ان الرحله كانت موفقه :rolleyes:
تقبل خالص تحياتي

اخوك ابـ معزي ـو

[w5070]

ماقصرت ومشكو ر على المجهود الطيب و الصور والتعليق الجميل وتقبل مروري أخوك A.k.h

[راعي الهـــدد]

أخوتي الفضلاء










اعذروني عن المشاركة والإنقطاع لفترة محدودة

حتى تسلى النفس من شيء صار وانتهاك لحرمة مسلم

فنفسيتي تعبانه مره مره ارجوكم اعذروني وسأعود قريبا

ولاحول ولاقوة الا بالله

والله ان العين لتدمع والله ان العين لتدمع
حسبنا الله ونعم الوكيل
الأحد 26 / 4 / 1428هـ






--------------------------------------------------------------------------------------------------------------------

اخي الغالي راعي الهدد ...

فرج الله غمك وكفاك ما اهمك ..

وهذه دعوة لنتأمل ولنتدبرجميعاً في قوله تعالى (((فَإِنَّ مَعَ الْعُسْرِ يُسْراً (5) إِنَّ مَعَ الْعُسْرِ يُسْراً (6)))

وفي قوله تعالى (( لآأُقْسِمُ بِهَذَا الْبَلَدِ (1) وَأَنْتَ حِلٌّ بِهَذَا الْبَلَدِ (2) وَوَالِدٍ وَمَا وَلَدَ (3) لَقَدْ خَلَقْنَا الإِنسَانَ فِي كَبَدٍ (4) ))

وكما قال الشاعر/
ضاقت فلما استحكمت حلقاتها ..فرجت وكنت أظنها لاتفرج

واسلم لمحبيك ....




شاكر لك ياغالي

والحمدلله على كل حال

دمت بود ومحبة ياغالي

[راعي الهـــدد]

الله يعطيك العافية وتسلم اخوي ابوحمد كفيت ووفيت وبيض الله وجهك على ترتيب سنع تقبل تحياتي لك





الله يغفر لك ووالديك

ولاقصرت ياغالي

اشكر لك المرور والرد يابعدهم

[راعي الهـــدد]

ماشاء الله الرحله كله صارت طبخ


(( شهوياتنا )) هههههههههه :D
ماشاء الله عليكم مكملين اغراض الطبخ والفواكه كله ماشاء الله تبارك الله

واتمنى ان الرحله كانت موفقه :rolleyes:
تقبل خالص تحياتي

اخوك ابـ معزي ـو









الغالي ابو معزي

مرورك شرفني ورب البيت

هلا بك ياغالي

دمت بود ومحبة

[راعي الهـــدد]

ماقصرت ومشكو ر على المجهود الطيب و الصور والتعليق الجميل وتقبل مروري أخوك A.k.h






ياجعلك تسلم


مشكور على هذا المرور ياغالي


دمت بود ومحبة يابعدهم



محبك
ابو حمد

[حياتي البران]

بما انني عضو جديد ولا ادري وش الطبخه بس بصراحه صور خوبال
تحياتــــي : حياتــــــــي البران
وشكراا

[حياتي البران]

ابو حمد مشكوووووور وما تقصر صور اكثر من مرجوجه وتهبل خخخخخخخخخ وين المكان بالضبط
وشكرا
التوقيع : حياتي البران

[مزيون بيرق]

يعطيك ربي الف عافيه اخوي راعي الهدد وجعله انشالله بمداخيل العافيه
بس عنديلك اقتراح ( لا عاد تاخذ ابو معاذ معك ) ههههههههههه
تراها مزوح تجي وتروح وتقبل مرور اخوك المزيووووون وشكراً

[راعي الهـــدد]

بما انني عضو جديد ولا ادري وش الطبخه بس بصراحه صور خوبال
تحياتــــي : حياتــــــــي البران
وشكراا





تسلم ياغالي

شاكر لك المرور يابعدهم

واحييك في منتداك

وننتضر كل جديد منك ياغالي

دمت بود ومحبة وإخلاص ياغالي

[راعي الهـــدد]

يعطيك ربي الف عافيه اخوي راعي الهدد وجعله انشالله بمداخيل العافيه
بس عنديلك اقتراح ( لا عاد تاخذ ابو معاذ معك ) ههههههههههه
تراها مزوح تجي وتروح وتقبل مرور اخوك المزيووووون وشكراً





هلا بالغالي مزيون بيرق


شرفني مرورك يابعدهم كلهم


وابو معاذ في طلعات العائلة يعتبر اساسي


والعين ماتعلى على الحاجب هههههه


لعلك فهمت


هلا بك ياغالي شرفتني والله

[راعي الهـــدد]

ابو حمد مشكوووووور وما تقصر صور اكثر من مرجوجه وتهبل خخخخخخخخخ وين المكان بالضبط
وشكرا
التوقيع : حياتي البران







هلا بك ياغالي

صور مرجوجه اجل هههههه

الله يرج عدوك

شاكر لك ومقدر يابعدهم كلهم

[قلب شاهين]

مشكووور يابو حمد على الموضوع الممتاز جداا ،،

والله يجمعكم انت وأهلك على الخير ،،

بارك الله فيك ،،

تحياتي / صقار القصيم ،،

[راعي الهـــدد]

يعطيك ربي الف عافيه اخوي راعي الهدد وجعله انشالله بمداخيل العافيه
بس عنديلك اقتراح ( لا عاد تاخذ ابو معاذ معك ) ههههههههههه
تراها مزوح تجي وتروح وتقبل مرور اخوك المزيووووون وشكراً



هلا والله بمزيون بيرق

مرورك تتويج للموضوع طال عمرك

والمعذرة عن التأخر بالرد ناسي والله الموضوع ... ههههه

شاكر لك ومقدر يابعدهم كلهم

محبك ابو حمد

[KING GALAXY]

مشكور أخوي على ها الصور الروعة

[راعي الهـــدد]

مشكووور يابو حمد على الموضوع الممتاز جداا ،،

والله يجمعكم انت وأهلك على الخير ،،

بارك الله فيك ،،

تحياتي / صقار القصيم ،،




هلا والله وغلا ....

آميـــن شاكر لك الرد ياغالي

دمت بود ومحبة

[راعي الهـــدد]

مشكور أخوي على ها الصور الروعة



شاكر لك ومقدر يابعدهم كلهم ...

دمت بود ومحبة

[راعي الشهامه]

ماشاء الله تبارك الله

مبدع كعادتك يابو حمد

الله يعافيك ويسلمك من كل مكرووه .... استمتعت بمشاهدت موضوعك

عساااك سالم وغانم

[راعي الهـــدد]

ماشاء الله تبارك الله

مبدع كعادتك يابو حمد

الله يعافيك ويسلمك من كل مكرووه .... استمتعت بمشاهدت موضوعك

عساااك سالم وغانم





هلا والله بالغالي ...

شاكر لك ومقدر هذا المرور ...

دمت بود ومحبة ...

[الزعيم 15]

تســــــــــــــــــــــــــــــــــــــــــــــلم

ويعطيك العافية

[راعي الهـــدد]

تســــــــــــــــــــــــــــــــــــــــــــــلم

ويعطيك العافية




هلا والله بالغالي ....

شرفني مرورك يالغلا ....

الله يغفر لك ووالديك ...

محبك ابو حمد ....

[ابو زياد 1]

ليتني معاكم والله شكلها وناسه مدام فيها طبخ مثل هذا(فنان في الطبخ)

[ابوجربوش]

السلام عليكم جوعتني يعطيك العافيه على الصور

[ابو سمحه]

ياراعي الهدد شهيتنا الله يشهيك في الدين والطاعه

[االديحاني]

مشكور على الصور والتقرير

[ابو جلال]

ماشاء الله تبارك الله
بالعافية جعل مداريجه مداريج العافية
ذبحني الجوع بأخر اليل

[ابو صقر992]

ابيظ وجه ونا اخوك ياراعي الهدد وعلومك كلها طيبه والله يوفقك

[RJA]

بارك الله فيك على الموضوع