العقير العجيب / ارجو المساعده

[ابوميدار]

مسّاكم الله بالخير شباب ...
كيف حالكم انشالله بخير وصحه وسلامه .... انا جديد على المنتدى وانشالله اخذ منكم المعلومات الطيبه عن طرق الصيد ...الخ
انا مو مبتدأ لكن..اسمّي نفسي شبه مبتدأ.. لاني من عرفت البحر وانا اروح اصيد فيه واخترع اشياء للصيد من دون ما اسأل احد واجرب كل شي والحمدالله اطلع أشياء زينه ... المهم شباب لا اطول علييكم انا من الاحساء واقرب بحر للأحساء العجير(العقير) وهذا البحر غريب عجيب ماعمري صدت فيه شي عدل .مافيه اللا هالحاقول في وجهي.حتى يوم صدت شعمه صغيره وانا ساحبها جه الحاقول وعض نصها ...شباب ماعليكم امر اللي يعرف مناطق بالعجير فيها سمك يخبرنا ولكم الشكر .. مابي احد يقولي في هالمنطقه سامع عنها :cool: .. ابغيه اهو راح وصاااد ;) لاني تعبت وانا اسمع:eek: .. ويقولون لي في هالمنطقه واروح ولا اصيد شي:( .. واتمنى تقولون لي عن الشعم في اي الشهور من السنه يكون متواجد.. بالتاريخ الهجري ...او الميلادي... لاني كنت سنه من السنين رايح هافمون .. في منطقه جنب شاليهات طبعا مكان ممنوع ;) بس انا دخلت من ورى شباك وعبرت المهم هذاك اليوم المكان ملياااان شعم على كبر الكف واكبر منه والحمدلله صدت حدود ال54 شعمه.. وهم متواجد سمك مدري اهو سبيطي وانا جالس على صخره يجي جنبي تحت كان في خبز مرمي في الماي يجي ياكل الخبزه ويهرب داخل ..على ما اعتقد سبيطي و مو عارف اصيده لأنه حذر جدا.. المهم ان من هذاك اليوم لليوم وانا اروح نفس المكان مو لاقي ولا شعمه السبب ..:( ..؟؟؟ ولكم الشكر:rolleyes:

[صياد السيف]

اصبر على هالحواقيل
أو مد والرزق على الله والطعم مصران الدجاج .والصيد في العقير يبيله صبر وكبد بعير ما تمل .

[صادوه]

يا ريت اقدر افيدك واتجمّل العفو منك

[ابوميدار]

يعطيكم العافيه صياد السيف... و....صادوه
مثل ماقلت صياد الرزق على الله.. ومالنا اللا الصبر

[ali20002ila]

انا اقول اغسل اليد من العجير لانه البحر الميت
وانا اعتقد ان سبب قلة الصيد هو الملوحة الشديدة لماء العقير لانه شبه مغلق على الخليج وانا نفسك رحت وتعبت لايوجد شيء عدل

[ابو فوزي]

اتوقع برودة الجو لها دور في عدم وجود سمك قريب ... والله اعلم
لكن ياريتك تجرب روبيانة كاملة في ميدار كبير بخيط متين في المكان اللي فيه صخور اللي تحتك او راس خثاق وتصبر عليه
ان شاء الله تتوفق بصيد طيب ... شد حيلك ننتظر صور منك .

[ابوميدار]

يعطيكم العافيه شباب ماقصرتو .... صحيح مثل ماقلتو ملوحة البحر والبروده لها دور.. لان جربت ورحت بالشتاء وشفت سمك على كبر الكف ميت على الشاطئ من شدة البروده(طبعا برد السنه هذي) وابشركم اليوم رحت و4 ساعات وماطلعت بشي...لاني قلت يا انا يا هالبحر
لا انشالله العجير ننساه ... ونلف على بو قميص يازينه ... وانشالله يا ابو فوزي اجرب الطريقه في بحر بوقميص

[عاشق الموج]

العجير مافيه شي ابد يعني اتوقع تحصل سمك في البر

ولا تحصل سمك في العجير

[jwan]

ابو ميدار والله ردودك للشباب جميلة واعجبتني يا صاحبي في سمك بس القصة بدها صبر ابوفوزي ادلى بدلوه وقالك حكمة صيد جميلة انصحك فيها وخصوصا في الليل ما اعرف اذا كنت تنزل الكسارات في الليل بس حاول تنزل لو عند الكسارات ونزل طعمك واستنى بهدوء وتشوف السمك على اصوله واي خدمة عزيزي:d اتمنالك الصيد الوفير

[شعور]

اكيد فيه اسباب لهذه المشكله سواء من اسلوب الصياد او من البحر نفسه

افهم من كلامكم ان العقير عباره عن شرم صغير يشبه شرم ابحر عندنا في جده وهذه البحار ممكن يختفي السمك منها فجأه وفي هذه الحاله مالكم الا الصبر او الابتعاد عن الشط

وكمان كل ما كان البحر صغير ومحوط وقليل العمق كل ما اختفت منه الاسماك في الشتاء


لكن اصبرو لما يعود الجو الى طبيعته الدافئه وشوفو كيف السمك

[طحنون]

ابوميدار
العقير
مثل ماقلت بحرغيرطبيعي وفيه من الغرابه الشي الكثير
ويعتبرمن المناطق المريضه ولا يموت السمك الا فيه وتلاقي فيه اسماك ميته كثيرمثل الدقس (الحوت الصغير)
والدلافين ويعتبرمقبره الاسماك وانخفاض منسوب ماء البحرمابين مدوجزرله تائثيركبيرعلى المراعي في قاع البحر
ولاننسا ان العجيرموطن سمك الصافي من افضل واجودالانواع
لاكن بسبب تغيرالمناخ وكثره الصيادين الغيرنظاميين من المصريين والبنقاليه اللي عاثوفي العجيرولعبوفيه لعب
والعجيرقبل 20 سنه كانت السمكه متوفره وموضوع العجيركان لي موضوع كامل وبالتواريخ والاحداث اللي حصلت
فيه مع شخص كبيربالسن
لاكن وش سبب كثره الحواقيل بشكل كبيرواحجام خياليه حتى انك تقدرتصيده بالكشاف وتتطلعه برى البحرونت جالس
على السيف يجيك منطلق مثل المكسيما
حتى انه ياكل بعض بشكل مخيف
ونا فسرتها قله الاسماك بالعجيرقام ياكل بعضه بعض
والعجير الان ماينفع للحداق ابدبس الغزول ويتلحق اوماتلحق
والدورجاي على راس ابوقميص وبيصيره مثل ماصارللعقير

[ابوميدار]

ههههه صدقت .عاشق الموج . يبغالنه نرمي السناره عكس البحر ماتدري يمكن تصيد.ههههه .نصيد جربوع ولا شي ونحوّل من الخيمه البحريه الى الخيمه البريه ونفيد ونستفيد بالمشاركه هههههه
.... مشكور اخ jwan ومشاركتك الاجمل يا الغالي .لا انشالله بسوّي هالطريقه ونصبر ومابعد الصبر اللا الفرج انشالله.. بس انشالله لو بطلع العقير راح اطلع عالصيف,لان اغسل اليد منّه بالشتاء ابد/ واوقات الصيف في المغربيه وبالليل بس واذا في
كلام الاخ. شعور. صحيح واشكره على المشاركه.. السمك يهرب من شدة البروده بالاماكن الغير عميقه..على انه في اماكن عميقه نقط السناره وماكو شي ................ ويعطيك العافيه طحنون...كلامك في محلّه كل الاشياء اللي قلتها مضبوطه... وانا مثلك مستغرب من هالحواقيل في كل وقت لافي شتاء ولا في صيف اللا تشوفهم مرززين في البحر..لا واذا صدته شلون يعفر تقول صايد هاموره الحين.....اشكر كل من شارك

[n9000r]

اولا السلام عليكم جميعا وثانيا بحر العجير خصوصا المنطقه الي يسموها راس حربه فيها خيرات بس مو في كل وقت يعني تجي النا اوقات من تقط خيطك على طول في بوزة وكل شعم يقول الزود عندي واوقات الربيانه تضل بلساعه ما تتحرك بس انا انصحك على هلوقت لان احنا من اسبوع رايحين وصدنا ثلاث شعوم جامبو والله يرزق الجميع..........

[ابوميدار]

والله جيت وجبت معاك العلوم الزينه. ياهلا فييك n9000r .... بس لو تكرمت تقوللي وين تكون هذي المنطقه راس حربه.. واوقات الصيد يعني ..ليل..فجريه..عصر .ضهر ... وبكون شاكر لك ....وبسألك الطعم روبيان..او عجين ...؟
اتمنى توريننا الصور اذا صورت ...

[ابو فوزي]

اصبر على هالحواقيل
والصيد في العقير يبيله صبر وكبد بعير ما تمل .

العجير مافيه شي ابد يعني اتوقع تحصل سمك في البر
ولا تحصل سمك في العجير


انك تقدرتصيده بالكشاف وتتطلعه برى البحرونت جالس
على السيف يجيك منطلق مثل المكسيما


ماتدري يمكن تصيد.ههههه .نصيد جربوع ولا شي

هههههه هههههه ههههه
وبعد هاهاهاهاهاهاهاها
موضوع يستاهل التثبيت تحت عنوان اليائسون من العقير والبديل !!! هههه
--------------------------

[ابوميدار]

عشت يا ابو فوزي ههههههههههههه

[صياد السيف]

اتوقع ليس السبب في الملوحة ولا في البرد لاني جربته العام الماضي في كل الاوقات في الصيف والشتاء في النهار والليل وجربت اشياء كثيرة مثل المد والشكة على مسافات قريبة وبعيدة تصل الى 600 مترأو اواكثروكذلك السنارات وغييرها وتقريباً رحنا مرات مع اكثر من 10 أشخاص ومرات 2أو 3 اشخاص ويمكن عدد المرات اللى رحناها اكثر من 25 مرة وبصراحة ما صدنا الا من هالحواقيل الثلاجات طفشت منه .
واتوقع السبب هو ان ارض العقير ارض مرعى للسمك ولا يلتفت للطعم اللى تثبته على السنارة

وفي يوم من الايام عند الساعة 6 صباحاً كان الماء هادي تقريباً مايتحرك وكنا نشوف بعض الاسماك واضحة في الماء انواع مختلفة كان المكان اللي نصيد فيه غزير على طول متر ونصف تقريباً وكنت انزل السنارة لهم بانواع مختلفة من الطعم ولا يلتفتنون عليه .
وبعدها قمت ما أجي الى العقير الا اذا كنت ابي اضيع وقت .
وانا آسف اني طولت عليكم ................................

[azd]

مشكووووووووووووووووووووووووووووووووووووووووووووووو وور

[حداق العجير]

عزيز انا من حداقين العجير وتقريبن كل اسبوع اروح
واذا تبي صيد حلو في العجير عندك الشاطىء الجديد اول ماتدخل على اليمين في مناطق حلوه من عند خفر السواحل/ تحته الين عشة الصياد المهجورة
بس ياحبيب قلبي يبيلك صبر والارزاق على الله والصيد صبيطي وشعري احجام Xl/xxl تلحق على السنارة ولا ماتلحق وانشاء الله احطلكم في موضوع منفصل صور صيد العجير في المنطة الي اقولك عنها
اول كنا نحط مصران الحين ماكو قمنا نحط ياطويل العمر سلس بس لازم يكون فرش/ طازج وحطلك سيم حديد وميدار بوثلاث صغير لان في احجام تظرب ما تطلع من البحر بس على العموم الحين برد ماكو صيد نشوفك في الربيع القادم انشاءالله