من المعجزات الشعريه

[فتى الرابيه]

داج الظلام انزاح والنور له ضوح

ونورالصباح مضيح والليل زايح


مالي هوى بمراح والقلب ملدوح

فكري من التلميح غا د شلايح

كني على لفاح غصن بلحلوح


قاعه حزوم وشيح وارضه كلايح


صفقت راح براح لحت النحر لوح


لوحت يتيم ليح دمعه سبايح


القصيدة طويله بالحيل ابي رايكم

[عيناوي]

معاناة شديده بصراحه
كلماتها قويه جدا

تكفى ان كان القصيده كامله عندك ..لا تبخل بها

فالك مايخيب ان شاء الله
:)

[الحايليـ93]

سبااايح

صح لسانك

وخووش ماشاءالله عزالله ان هذا القصيد لاقالو قصيد

تسلم يمينك اخوٍي فتى الرابيه

[فتى الرابيه]

الاخ عيناوي

السلام عليكم احاول اني اجيبلك القصيدة كامله باذن الله ابشر لعيناك ياعيناوي تستاهل
اذا تبيها رساله او على الايميل

[عاشق الضلعان]

سبااايح

صح لسانك

وخووش ماشاءالله عزالله ان هذا القصيد لاقالو قصيد

تسلم يمينك اخوٍي فتى الرابيه

صح لسانك أخوي ولسان الشاعر

لكن واضح إن الشاعر عايش قبل أكثر من 200 سنه !!!

نعم القصيده واضح إنها جميله لكن الله لايهينك نبي صفحه خاصه بمعاني الكلمات

نحن الآن في عصر تداخل الثقافات والشعر في هذا العصر يجب أن يفهمه من عاش

في الشمال والجنوب والشرق والغرب على حدٍ سواء

أنا لاأقلل من شأن هذه القصيده ولكن مافائدة قرائة قصيده غير مفهومة الكلمات ؟؟

هذي تذكرني بقول الشاعر محدى الهبداني في قصيده قويه في عصره وغير مفهومه في عصرنا :

الله من قلبن بدا فيه عمسي ** يميع لو باسه حجر قرطياني

يميع ميعة شمع من حر شمسي ** وإلا الشحم من فوق جمر اظهياني

نصبح مكاظيمن وبالهم نمسي ** كن الطعام ملوثن ديدماني

ياراكبن من عندنا فوق عنسي ** سحوان قطاع الفيافي عماني

عنسي سبرسي بالسواد الوغطسي ** قطاع دوٍ هوذلي سوسحاني

هزته بعود اللوز من دون لمسي ** وياما قبطع من خايع السهمداني

قطعي قطا ومذيرة حس ونسي ** من اللال ورد ديرة الريهجاني

فوقه دلالن نسج من كل جنسي ** القرمزان مخالطن باصفراني

يمد من خفرة خنيصر ويمسي ** 000000000000000000000000


هذا مايحضرني منها


وأرجو أن يكون المقصد واضح

دمت بود

[فتى الرابيه]

السلام عليكم الاخ العزيز عاشق الضلعان صح لسانك
بالنسبه للقصيدة هي للشاعر الكبير = مرشد البذال = وهو متوفي قبل 18 سنه الله يرحمه الله والقصيدة تقريبا اربع صفحات ولا احفضها كلها لكن احاول اجيبها لانها موجودة في كتابه وحتى معاني الكلمات موجودة وحاضرين للطيبن للي مثللك وشرواك واللي طلبها وانشاء الله اجيبها

[عاشق الضلعان]

السلام عليكم الاخ العزيز عاشق الضلعان صح لسانك
بالنسبه للقصيدة هي للشاعر الكبير = مرشد البذال = وهو متوفي قبل 18 سنه الله يرحمه الله والقصيدة تقريبا اربع صفحات ولا احفضها كلها لكن احاول اجيبها لانها موجودة في كتابه وحتى معاني الكلمات موجودة وحاضرين للطيبن للي مثللك وشرواك واللي طلبها وانشاء الله اجيبها

شرواك الطيب

[kh22net]

داج الظلام انزاح .. والنور له ضوح =نور الصباح مضيح .. والليل زايح
مالي هوى بمراح .. والقلب ملدوح =فكري من التلميح .. غادٍ شلايح
كني على لفّاح .. غصن ٍ بلحلوح =قاعه حزوم وشيح .. وارضه كلايح
يا مشغل المرتاح .. بسك من النوح = ورق ٍ على التطويح .. ما هي شحايح
يا من طربك انياح .. كدرت مجروح = طَرْبٍ وهو تفويح .. جوفه قدايح
صفقت راح براح .. لحت النحر لوح = لوحة يتيم ٍ ليح .. دمعه سبايح
يا القلب وطرك راح .. ما ظن له قروح = اليوم بالتشبيح .. مالك صلايح
يوم الدروب اسماح .. والدرب مفتوح = بديت في تفصيح .. قولٍ صحايح
اخذت لي مشواح .. باسرار وفروح = ركب الغرام مشيح .. هجنه طفايح
لي بالهوى ميلاح .. والهم مكسوح = وامْوَقعٍ تصحيح .. حب الملايح
قلبي كما الملواح .. بيدين طاروح = من كثر التلويح .. رزقه توايح
السد ما ينباح .. من غير ساموح =واللي زَرَى بقريح .. خله يصايح
يلومني من كاح .. شين اللغى كوح =خبلٍ عطي تسنيح .. جاك امتدايح
تسلي الارواح زاح .. الكدر زوح =حبٍ بلا تبريح .. ما به بجايح
لو الهوى ذبّاح .. له ميل ورجوح = ولا حدٍ يعيش امْريح .. والعمر رايح
واليوم لي مصفاح .. عن ورد وسروح =الجهل هو تلقيح .. غرس القبايح
يوم الموقر لاح .. انا وين اباروح = بديت بالتصليح .. والله يبايح
كيف الحوَل يا صاح .. في عذلة الروح =شف لي هدف يا شيح .. ذرب النصايح
ما كتب بالالواح .. ما هو بممسوح =اليوم هو توضيح .. عطب الجرايح
من عاش بالافراح .. لابد من النوح =ساس بلا تسليح .. خطر اللوايح
والعقل هو مفتاح .. بيبان مصلوح =وينّزِّحك تنزيح .. عن كل سايح
عن ربعة السفاح .. يا القلب ونصوح=لا تتبعه وتطيح .. ما به ربايح
مثلك ليا من طاح .. خلاه مسدوح =اترك ردي الكيح .. زين السنايح
زبن الرفيق شناح .. بالطيب له نوح =من ورد عين السيح .. عاف الضحايح
نفسه على الامداح .. قد شاحها شوح =ذكره مع اهل الفيح .. واهل البرايح
خله وراك سناح .. عن كل كاثوح =ينجِّحك تنجيح .. رجل المدايح
كنه بكرب شباح .. للضد ذرنوح =صميدع ٍ زحزيح .. عطب الجوايح
ليا عذي المياح .. في جانب الصوح =كان الروى تنشيح .. للدلو مايح
كسب الفخر بكفاح .. وان طرد الفوح =خيالة التصفيح .. راحوا قمايح
من جاكر الارياح .. والغزل منطوح =غلبت هبوب الريح .. في ضرب لايح
ترى القشر فضاح .. راعيه مفضوح =جعله معه تسريح .. لاقصى التنايح
دايم وهو نباح .. والجيب مسروح = ثوبه من التطبيح .. غادٍ سرايح
لا تستوي قداح .. لو كان بمزوح =ما فيه هبت ريح .. مزح الفضايح
من للملا جراح .. لا بد مجروح =جلده من التجريح .. غادٍ صفايح
واحذر من اللحاح .. تراه مشفوح =لو كثر التسبيح .. ما من فلايح
ناسٍ بثوب صحاح .. والفعل مكبوح =تنهى عن التوكيح .. وهي الوكايح

[kh22net]

من للملا جراح .. لا بد مجروح =جلده من التجريح .. غادٍ صفايح

[هبوب]

صح لسانك واللة

[asd6244]

يا شباب اعتقد ان من المعجزات الشعرية قصيدة الــعوني رحمه الله ( صاحب قصيدة الخلوج والتوبة ) يا الله يا والي على كل والي يا خير من يدعى لكشف الجليلة
والقصيدة الي اقصد تحديه لشعراء الشريف حيث قال قصيدة ما فيها حرف منقط

[هايجكس]

تسلم وماقصرت...

[شعيلان]

صح لســـــانك أخوي فتى الرابيه...
لاهنت ...:good:
القصيدة أكثر من رائعة ...
والأبيات اللي أعجبتني :


قلبي كما الملواح .. بيدين طاروح
من كثرة التلويح .. رزقه توايح
السد ما ينباح .. من غير ساموح
واللي زَرَى بقريح .. خله يصايح
لا تستوي قداح .. لو كان بمزوح
ما فيه هبت ريح .. مزح الفضايح
من للملا جراح .. لا بد مجروح
جلده من التجريح .. غادٍ صفايح
واحذر من اللحاح .. تراه مشفوح
لو كثرة التسبيح .. ما من فلايح
ناسٍ بثوب صحاح .. والفعل مكبوح
تنهى عن التوكيح .. وهي الوكايح


فجزاك الله ألف خير و سدد خطاك..

[مقند الكيف]

قصيده مسكته
تسلم يالغالي

[الادهس]

صح لسانك وبيض الله وجهك

[فتى الرابيه]

الله يجزاكم خير جميعا

[راشد ولد سعد]

صح لسانك و لا هنت

على ما نقلت

:)

[برج المعيدي]

الله يعطيك العافيه والله يرحم الشاعر مرشد
والله يرحم الشاعر والفارس محدى الهبداني

[ذيب الصبخه]

قووووووووووووو لااااااااااااااااااااااااااااااح
لااااااااااااااااح