الفزعة يالنشاما أبغا حّل لمشكلتي ( جرذي بالسياره )

[مكشاتي ون]

يوم الخميس الماضي رحنا كشته خفيفه لروضة التنهات طبعاً عن الغبار لاتسأل وقلنا ما دام اننا ضربنا مشوار وجينا فما حنا راجعين بالسهوله هاذي وجلسنا وفلينا الحجاج وطقينا الرواق ونثرنا العفش والأغراض وجلسنا حتي صلينا المغرب وحملنا أغراضنا وعزبتنا ورجعنا للرياض ويوم وصلت للبيت ونزلت الأغراض فوجئت بجرذى متوسط الحجم بين الأغراض مسنتر أبو الشباب يدور مزبن يزبن فيه :j وتم التعامل معاه بما يقتضيه الموقف وتم تقديمه وجبة عشاء دسمه لقطة بجوار البيت في الشارع والي الآلآلآلآلآلآلآلآلآن لا مشكله ولكن :

يوم جاء يوم الاثنين- بعد 4 ايام - وشغلت السياره - كامري 2003 - الفجر فبدأت أسمع اصوات بطبلون السياره خرفشه وطقطقه فلكي أتأكد أنه ليس خلل في السياره قمت باطفاء المحرك ولكن استمر الصوت فشككت مباشرة بان يكون هناك فار أو جرذي بالسياره وفعلاً فتحت الدرج الأمامي في السياره فاذا بي أرى أثاراً لجرائم هذا الجرذي الخبيث فقد كان في الدرج كيس فصفص ( حب ) صغير ويا للهول وجدت كيس الفصص مشقوق وحب الفصفص مقرضاً وتعجبت يأكل اللب ويترك القشور ورأيت بعضا من مخلفاته على أوراقي الخاصة ووبره في الدرج فتأكدت بما لايدع مجالاً للشك أن هناك جرذي في السياره
فقمت ببعض الحلول المباشره نبغى رايكم وان كان أحد عند اضافات يزودنا بها عاجلاً لأني كرهت السياره وتقرفت منها - فاللى سويته هو :

1- قمت صباح الأثنين ( أمس ) بشراء لاصق - غراء - الخاص بالفئران ووضعته على قطعتة كرتون ووضعت قطعة خبز عليه ووزعته بالدرج وتحت المراتب
النتيجه : بعد الكشف الدوري كل 3- 4 ساعات لا يوجد اى نتيجه ويوم جاء اليوم الثلاثاء - حصلت اثار وبر ( شعره )على قطعة الكرتون اللى بالدرج مما يعني انه جاء الى اللاصق ولكن لم يمسك به

وجاء اليوم الصباح الثلاثاء مريت البنشر وقلت باغير زيت السياره - مئيس ان بالقاه أو بيطلع ببساطه - وقام العامل ينفخ هواء داخل الكبوت وفتحت انا شنطة السياره فاذا بي أري ابو الشباب مسنتر بالشنطه ويطالعني ويقول ورني وش عندك :cool: وما يمديني اتحرك الا أبو الشباب متحرك بين الاغراض اللي في الشنطه ودخل بين التلبيسه الأصليه للسيارة وبدي السياره فقمت اليوم الظهر بـالخطوة الثانيه وهي :

2- شراء مصيده فئران ( حبّاله ) وقمت بوضع قطع من الجبن والخيار الطازج عليها - حرام ضيفي لازم اكرمه - ومنتظر النتيجة فجراً

فيا أخوان احد مرت به المشكلة وكيف تعامل معها لأني أخاف اذا طول في السيارة يقرض الأسلاك ويعدم على شئ واجد هذا بخلاف القذارة والروائح اللي يخلفها في السياره - صرت كلما استخدمت السيارة ورجعت البيت أغسل بصابون وديتول فافزعه يالنشاما

وآآآآآآآآآآآآآآآآآسف على الأطاله وآآآآآآآآآآآآسف على موضوع كهذا - ناس تجيب صور للربيع - وناس تسأل عن جرذان فكلي اسف ولكن لمعرفتي بحبكم الخير ومساعدة الآخرين طرحت موضوعي

[طارق]

الله يعينك على المصيبه
هل جربت ترش فليت او مبيد حشري فهو قاتل

[عبــادي]

ههههههههه . هذا وش كبره اللي عجز عنه اللاصق

المهم ياطارق لو رش المبيد يمكن يموت ومايعرف مكانه

وتطلع ريحته بالسيارة لمدة شهر او اكثر .

لذلك أنصحك يامكشاتي ون بعدم رش المبيد , حاول تمسكه

حي , او بطريقة المصيدة .

لكن انتبه لا يجوع ضيفك ويموت وتبتلش بريحه .

[الضاري]

هذي والله البلشه

أن تركته مشكله وأن مات داخل السياره مصيبه

طيب حاول تدخل السياره بحوش البيت وأفتح البيبان والشنطه

عسى ولعلا ينزل من السياره

[عبدالله العمرو]

أخوي مكشاتي ون / لاعدمتك

بصراحة قووووووية ومحرجة بقوة ... والله يكفيك شرّه ...

ترى لو أذيته ولا ذبحته بيلعب بسيارتك يعني بيقطع المراتب ويلعب بالأسلاك ... لكن خلنا نفكر وحدة وحدة :

1 - تشوف لك كراج مكتوم لو عند احد تعرفه وتحشره بالمبيدات وتطلع وتتركه لمدة نص ساعة على الأقل .
2 - التغريق ما ينفع فيه لأنه سباح ... مالك إلا تعرّضه للحر بقوة حتى ينتق غصب عليه ...


وعلى العموم حاول تعرف مكانه اول وبعدها تهون الأمور ....

تمنياتي لك بالخلاص من هالمشكلة ...

أخوك /

[القبلة]

السلام عليكم ..

احذر .. لاتحارش الجرذي .. أو تخليه يحس إحساس .. بس إحساس إنك ناوي تقتله ..
لأنه ابن الإيه .. يحقد .. ويخرّب ومثل ما تفضلت تراه يقطّع الأسلاك ولا شيء ..

ما حاولت تسولف معه .. <<<<<< واحد بايعها .. بسم الله ارحمن الرحيم .. :)
يمكنك شايله من عند أمه بالتنهاة .. وأهله يدورونه .. وين راح الوليد وين راح ..!!!؟!!! :d

أخي الفاضل .. لاتنسى تقرأ وتتعوذ وتسمي ..
حصّن نفسك أولاً .. بالأذكار والأوراد .. واتكل على رب العباد .. وعليك بالدعاء أن يزيل الله كربك ..

اسأل الله أن يحفظنا من بين أيدينا ومن خلفنا وعن أيماننا وعن شمائلنا ومن فوقنا ونعوذ به تعالى أن نغتال من تحتنا

أشكرك ..

[طخيمان]

والله يا اخوي غريبة لكن اقترح عليك

انك تحطله شيء ياكله على الكرتونة وتستمر بالمصيدة لعل وعسى والغرض من انك تحط له اكل هو انه ياكل الأكل ولا يقرض الاسلاك ويحوس السيارة عليك

والشيء الثاني انك في عز القايلة تفتح البيبان وتخلي هالهبايب الحاااااااااااارة تلعب في حسبته إلين يطلع

والله يعينك

[مرخ]

هههههههههههههايي
والله البلشة ووالله يا هو اب ايه الجرذي وخاصة اذا صار اسود

لكن انتبة تفتح له البيبان ويدخل البيت والله ان يلعب فيه لعب ............

واسال مجرب

واحسن طريقة انك تحجر له باي طريقة وتقبض عليه حيا لتقديمة للعدالة

[جفيل]

ليلكالله يعينك


اذكى كائن حي شفته الجرذي <تراه عزيز نفس> انتبه تحارشه

محاتسيك قد حارشته في السطح ويوم جيت من بكره لقيته حايسن عفشي وقشي :)

[(سكود)]

حط له الغرى وعلى مسئوليتي تجي الصباح وهو رافع رجله (80)درجه ولاتنسى تشيل استمارة السياره معك تراه ياكلها زي ماسوى معي
خلاني اراجع جميع الجهات الامنيه كلها

[مكشاتي ون]

أشكرالجميع مرورهم وتفاعلهم :

أخي طارق :
انا ابغا ه حيّ وما ني مرتاح حتى أتاكد % أني تخلصت منه ومثل ماقال أخونا عبادي ما ابغاه يموت بالسياره ويخيسنا بريحته لذلك استعمال المبيدات مستبعد الان
اخوي عبادي :
والله الجرذي الخبيث متوسط الحجم - حسب ما رئيته اليوم - كبر الجربوع تقريباً ,,, و شكر على النصيحة بعدم رش مبيدات ومحاولة امساكه حياً ,, والله انه ذابحني بريحته هالحين وهو حي كيف لو يموت ويصير فطيس
اخوي الضاري :
المشكله أني مستأجر دور علوي وما عندي حوش - تسلفني حوشكم - بس اذا دخل بيتكم ما ني مسؤول
وانا ما ودي انه ينزل وما اشوفه ودي به مقبوضاً عليه حتى ابرد كبدي منه واحطه تحت كفر السياره

اخي العمرود : لاعدمناك , وسلمت يمناك :
فكرة المبيدات مسبتعده الان وابخليها آخر الحلول ,, وتعريضه للحر ما فيه الا الشمس والشمس هاليومين ماهي حارة بالحيل

أخي القبله :
الى الان ما شاف مني محارش ولا محاولات قتل لأن اليوم يوم شفته بالشنطه ما أعطاني فرصه وعلى طول هرب

وبالنسبه للوصية باللأذكار والدعاء فاشكرك من اعماق قلبي على هذه النصيحة والتذكير واحب انني اخبرك انني ولله الحمد لم اتركهم منذو ان عرفت العلم ومحافظ عليهم ولله الحمد والفضل والمنه ليلاً ونهاراً وسفراً وحظراً
والله انه ترد علىّ خواطر وهواجيس ان اللي ذبحت في البيت لا يكون هو خوينا اللي في السياره - اذا كان من ... , ولاكن اللي مستعيذ بالله فلن يضره شئ في الأرض ولا في السموات ولن يصيبه الا ما كتب الله له

أخوي ابو الطواري :
شكراً على النصيحة باكرام الضيف , وابشرك اننا اضفنا طماط طازج على الصمغ بس هو يقلط بيلقى السفره مليانه

[ساحل الشمال]

اخونا المكشاتي ون الله يكون في عونك بصراحه عز الله انها بلشة والله ،لكن انصحك بالصمغ وعليك بالجبن ابو المثلثات وخاصة اذا كان لونه اصفر فاظنه بنفع معاه وانشاء الله بتقبض عليه متلبسا باكل الجبن .

[راع الصمان]

افضل حل وانى اخوك..


إنك ترجع لالتنهاة ..! وتفتح البيبان و بنفس المكان وتعوذ من الشيطان


الين ينزل بأمان


وجاك العلم...

[سندهم]

[QUOTE=راع الصمان]
افضل حل وانى اخوك..








إنك ترجع لالتنهاة ..! وتفتح البيبان و بنفس المكان وتعوذ من الشيطان


الين ينزل بأمان




وجاك العلم...
وانا مع اخوي راع الصمان

+بس شغل المكيف على الحار مع فتح البيبان وسم بالله وابعد عنه هههههههههههههه الله يطلعه

[طالب الحور]

آه آه آه




ذكرتني بتلك المصيبة التي مرت على سيارتي




حصلت مطاردة عنيفة بين قطو وجرذي




وطلب حق اللجوء السياسي في سيارتي




وطب السيارة ولاشاور أحد




حاولت بكل ما استطيع اخراجه




لكن الله يخلف




خسرت تقريبا ألف ريال



وآخر الأمر سواها وانتحر



وراحت السيارة في خبر كان


جلست شهر أدخل السيارة متلطم



تقول مروج مخدرات



******



الحل اترك أبواب السيارة مفتوحة

[برق و سحاب]

بحكم معاناتي من هالسلوقي ابن السلوقي هالجرذي:mad:

اليك بعض من خبراتي في هذا المخلوق اللي ماقد شفت اذكى والعن واخبث منه
فيه مصيده او حباله او حقه سمها اي شي تحصلها في البقالات اللي على الطرق السريعه وقيمتها من عشرين وحولها لها باب وهي شبك وفي النص نازل معلاق تعلق عليه يا قطعة (تونه او قطعة بصله) الشكوى لله عشان ريحتها قويه وسريعة المفعول وحطها في الشنطه وكلها ربع ساعة او نص بالكثير ساعه وهو جايك مدحدر لها وتمسكه حي وهي بمجرد دخوله للقفص ومحاولته لمس الغنيمه بتقفل عليه وان شاء الله ترتاح منه بس لا تكثر من الطعم خله قطعه متماسكه وصغيره وبالتوفيق اخوي:D
وعلمنا وش يصير عليك

[سيرفر]

السلام عليكم ورحمة الله وبركاته

الله يكون بعونك عنديلك حلين الاول
1--تجيب لك قطو مقاس s وتربطه بحبل وتجوعه يوم وتحطه بشنطه وبشر بالنتيجه
2--أ- سلاح الدمار الشامل والهجوم الكيميائي ويبيله رواق وكميرات فيديو تثبته داخل السياره لي رصد الحركه
ب--فصل البطاريه لكي لايكون فيه شراره ويحدث حريق ومد هوز ((لي )) غاز داخل السياره وشنطه وبعده ينكتم

ملاحظه الكميره لتحديد مكان الزبنه ولوفاة

وبعدين تبي تلقي مقتضي الصدر أقصد الجرذي ميت


ههههههههههههه

[إبن فيصل]

الحل عندي وهو إنك تجيب قط أليف يعني متربي وتحطه بالسيارة وطبعاً تحط الله يكرمك التراب(تراب بوجه العدو) الخاص بالقط لعملية التبول وغيره عشان ما يوسخ سيارتك وخله فترة ومع وجود القط الجرذي بيروح وطي وبيدور له مخرج ويطلع لأنه بيشم ريحة القط وتضيع علومه....حتى لو ما قدر يطلع من السيارة إذا أخذ فترة القط بالسيارة خل البيبان مفتوحة بعد ما يطلع القط وعقبها الجرذي بيقول الفكه إنحش.
وإنشاء الله بتنفع هذي الطريقة.
سلام.
وتقبل تحياتي...إبن فيصل،،،

[شـهـاب]

تبي تطيع شوري


تلطم وخذ معك عصااااا


وانفل السياره مافيه مكان الا تويق به


وطلعه بيدك من السياره حتى ماتخاف انه يموت بوسط السياره


ولا تنسى انه ونااسه دورته بوسط السيارهـ :)

[fajr]

الله يعينك في هالمصيبة

يا شينه شيناااااااااااه هالجرذي

والله أني حسيت أن في جرذي تو تحتي وفزيييييييييت :D

[العميد ابواروى]

بسم الله
اللهم لا سهل إلا ما جعلته
سهلاً، وأنت تجعل الحزن إذا شئت سهلاً


الحل بسيط جداً جداً

تروح لأقرب صيدليه
وتأخذ حبوب قوارض موجوده في كل الصيدليات
ومفعوله قوي
وهي له طعم يحبه الجرذي
وتقوم هي بتفكيك كريات الدم يعني (جلطه )
والعجيب انه لم يحس بالموت يبحث عن المكان الواسع الي فيه هواء
يعني ما يختفي !!!

وأسأل الله ان يعينك

اخوك ابو اروى

[ابو درع]

نصيحة


جيب مقرفون وقول سلم نفسك سلم نفسك



وخليك بعيد عن السيارة .. قد يكون مفخخ



:D



،،،،،،،،



والله المصيبة ..





مافيه حل الا انك تترك ابواب السيارة مفتوحة وتحطله اكل برا السيارة يوم يومين مافي مشكل بس يطلع



وذكر قصة حقيقية جدتي تعوذت من جراذي في مستودع اكثر من مرة وخرجو كل اسراب



تعوذ منه وقله يبن الحلا اطلع وفكنا من شرك

[محب نجد]

مكشاتي ون فيه جهاز عند ساكو اسمه طارد الفئران وقيمته 49 ريال يصدر موجات فوق الصوتية لا تضر الانسان لانه لا يستطيع سماعها ولكنها مؤذية جدا جدا للفئران والجراذي تحطة في اي مكان ويطلع منه الجرذي والفار يبي لك توصيلة كهرب او التوصيلة اللي علي طفاية السيارة شغل الجهاز داخل السيارة وشف النتيجة واذا تبغي معلومات اضافية من فني ساكو هذا تلفونهم :


4829230

[ابونصور]

انتبه ... مرة تحرشت بجرذي ابغى اقضي عليه في الحوش .. وفي الصباح سيارتي ما اشتغلت ؟!!!
وجبت لها فني .. واخيراً وجدنا اسلاك البواجي واسلاك الكهرباء مقطعه بواسطة الجرذي !!!! تقاضا فيني !!

[الموقر 1]

اخوي . مكشاتي ون ..... ( لقيت لك حل بالساحات )

http://alsaha2.fares.net/sahat?128@255.qswDdHZvwEO.0@.3ba9db09 (http://alsaha2.fares.net/sahat?128@255.qswDdHZvwEO.0@.3ba9db09)

[بـــ نجد ـــرق]

شف اخوي

رح لمكان بعدي عن البيت وعن الحاره يعني بر قريب ياصله موترك

ونزل العزبه و صلحلك قهوه .

وبعدها شغل المكيييف عالحاار على اخر شي

واقعد تقهووو بعيد عن السياره اليين تشوفه ينزل من السياره

لانه لو سويت هذي الحركه حوول البيت يمكن يدخل في البييت وبعديين حلها عاااااد


اتمنى اني اكون افدتك ولو بالشي البسيط

تحياتي لك

[ابو درع]

شف اخوي

رح لمكان بعدي عن البيت وعن الحاره يعني بر قريب ياصله موترك

ونزل العزبه و صلحلك قهوه .

وبعدها شغل المكيييف عالحاار على اخر شي

واقعد تقهووو بعيد عن السياره اليين تشوفه ينزل من السياره

لانه لو سويت هذي الحركه حوول البيت يمكن يدخل في البييت وبعديين حلها عاااااد


اتمنى اني اكون افدتك ولو بالشي البسيط

تحياتي لك


فكرة ممتازة

[عابد]

أقول الله يفكك من بلوتك ولا يبلانا

[يـــ ع ـــــقوب]

عندي لك حل .. وان شاء الله مايخرش الميه!
اتصل على شركات مكافحة الحشرات واطلب الأستشارة وراح يساعدونك...
لأني جبتهم للبيت عندي وعالجوا بعض مشاكل الحشرات ... وقعدنا نسولف انا والمهندس عن طريقة المكافحة للفئران .. فقال شي عجيب وكثير من الناس مايعرفه!! وهو ببساطه انك تحاول تصيد فأرة واحدة وكل يوم بالليل ضعها في مكان يعني مرة عند باب المطبخ ومرة بالمستودع ومرة عند الدريشة.. فيظن باقي الفئران أن زملائهم بدأو يتساقطون فيهربون من المنزل!!! وهي مجربة على حسب قول المهندس..
وخذ رقم شركة ميس لأني جربتهم وماعليهم.
هاتف الشركة: 2266666
جوال: 0503236578

[الماجدي]

تبي الحل يامكشاتي شف مشاركة برق وسحاب ومشاركة ابو اروى كلامهم صحيح
وفيه حل ثالث
تباع عند حقين مواد البناء يمكن تحصلها عندهم اسمها شداخه مثل اللي بتوم وجيري هذي مسكته مع قطيعة جبن بقره الضاحكه على طول مع العلبات
بس شكلك ماحرصت تقتله

[ممتر البران]

الله يعينك انتبه تذبحه بموبيد حشري انتبه والله ان تمنى الف جرذي ولا الريحه والله يعينك
تحيتي لكم ابو سعد

[المتبدوي]

شف اخوي

رح لمكان بعدي عن البيت وعن الحاره يعني بر قريب ياصله موترك

ونزل العزبه و صلحلك قهوه .

وبعدها شغل المكيييف عالحاار على اخر شي

واقعد تقهووو بعيد عن السياره اليين تشوفه ينزل من السياره





مالك الا ذا الطريقة اللي قالها اخونا مقطع البران واذا مافادت

مايبقى لك حل الا انك تبيعلي السيارة والله يعيني على 10000 ريال اتسلفها

احمد ربك بشريها وفيها جرذي .....

تقبل تحياتي ،،،،

[مكشاتي ون]

اخوي . مكشاتي ون ..... ( لقيت لك حل بالساحات )

http://alsaha2.fares.net/sahat?128@255.qswDdHZvwEO.0@.3ba9db09 (http://alsaha2.fares.net/sahat?128@255.qswDdHZvwEO.0@.3ba9db09)

أخي الموقر 1 :
فكما تشاهدون الموضوع بنصه قمت بنسخه وارساله الي بريد الأخ [ ربيع حائل ] في الساحات الخاصة بالسيارات وقام مشكوراً بانزاله وطرحه ولكن في الساحات المفتوحة , فله الشكر
فالمقصد أن الموضوع اللي في الساحات هو لي ايضاً ولكن لأنني لا أملك معرفاً بالساحات راسالت ربيع حائل وقام بطرحه

[خا1111111111ص]

الامر سهل قطو عررررررررري عتقي وخليه في السياره وقت الليل والصبح والمهمه منتهيه وبعدها ودي السياره المغسله وبسسسسس

[مكشاتي ون]

أشكر الجميع على تفاعلهم ومرورهم


آخر العلوم والأخبار ( موجز الساعة الواحده ) :

والله أنه دخلني الماء - على قولتهم من هالجرذي الخبيث ,,,,
طبعاً أنا قد أخبرتكم أنني قد نصبت لهذا الجرذي الخبيث داخل السيارة 3 حبّالات موزعة 2 تحت المراتب وآخرى في شنطة السيارة وبكل واحد قطعة جبن صغيره وقطعة خيّار صغيره كذلك
وقمت الساعه الثانية عشر ليلاً بتفقد السيارة واذا بي أراى المفاجأة اللي جعلتني اعيد حساباتي واعيد ترتيب افكاري فقد رايت :



قام الجرذي الخبيث بالتهام بعضاً من قطعة الخيار وترك الباقي ولم يمس الجبن والحباّاله ( المصيده ) لم تتحرك من مكانها ولم تعمل ,, فقمت باستخراجها من تحت مرتبة السائق وتفقدتها وأعدت ظبطها ووضعتها تحت المرتبه مره آخرى ,,, ولما قمت الفجر لأداء الصلاة مريت على السياره فاذا بي أري ان الجرذي الخبيث رجع الى نفس الحباله واكل الجبن والحباله على وضعها المحبول ولم تعمل ,,, فبدأت اسمّي واكثر من الدعاء ان الله يكفيني شره بما شاء ,, وذهبت الى عملي وفي الساعة العاشرة والنصف خرجت الي السيارة فاذا بي أرى أن الخبيث قد انتقل الى الحبا’له الآخرى الموضوعة تحت مرتبت السائق وقام بأكل قطعة الخيار فقط ولم يمس الجبن - اصابته تخمه - والحبالة محبوله ولم تعمل - ما ضربت ,, واما الحباله اللي تحت في شنطة السياره الخبيث ما مر عليها حتى الآن


فالرجاء من الأخوان الدعاء لي بظهر الغيب أن يكفيني شره هذا المخلوق بما يشاء سواء كان جرذياً حقيقياً أو متلبساً به جن ,,

فاللهم يا حيّ ياقيوم يا قوي يا عزيز اكفيني شر هذا المخلوق بما شئت انك على كل شئ قدير

[المؤمن كالغيث]

أخوي الله يعينك ويفرج لك من هالجرذي الأكشن

شوف أخوي صار معي موقف نفس موقفك بس هالمره جربوع دخل السياره منصاد اللي صار انه تالي الليل سمعت بواري

السياره طلعت ماشوف أحد الا سيلرتي تضرب بواري ومشغله تحدي تقل زفه ههههه المهم فتحته فتشتها لاحس ولاخبر

جاء الصبح فكيت البوري من عند الدركسون لقيته لاعب لعب في الأسلاك مقطعها تقطيع بس ربك ستر المهم فتشت بمين يسار

في السياره ماحصلت شئ في النهايه طلع من حاله وشافوا عيال الجيران وصادوه وشوه وكلوه ... من غير ضيافه ولا عزايم صدقني إذا

لقى الوناسه والعيش الرغد مراح يترك السياره

اتركه في النهايه يطلع وياليت ترجع للمكان اللي خذيته منه لأنه راح ينزل من حاله ويحن لأهله وربعه .

والله يفرج همك ويسسر أمرك وأمر الجرذي الأكشن.

وإذا شفت روحك عجزت تلقى حل للجرذي مالك الاالدعاء وتجيب راقي يرقى السياره يمكن يكون جن لاقدر الله .

[abdoallah]

الحل سهل جدا كل ما عليك هو انطل قطو بالسيارة وسيفر الجرذى ويولى الادبار وعند اخراج القطو من السيارة ؟؟؟؟؟؟؟؟؟؟؟؟؟؟؟؟؟

[نديم السهر]

يعطيكم العافيه جميعآ

ماشاء الله الشباب ماقصروا بالحلول

ان شاء الله تنفع اهم شي ما تتاخر حتى لو كلف تودي السياره الوكاله

والا شف فاره في قمة أنوثتها واربطها قريب من السياره يمكن يطلع المجرم يدور العرس وتسلم من شره:D

[كشته 111]

مرة كان عندي اختبار طبعا من مببببببطي والساعة وحدة با الليل وطيب الذكر الجرذي اللي كبر القطو الصغير رايح وجاي في دولاب المواعين اللي جنب غرفتي الين ازعجني بقربعته , وقفت المذاكرة واخذت الساكتون وجلست في وضع استعداد وحطيت النيشان في وسط الدالوب وثبت بدون حركة كلها ثلاث دقايق الا وهو قدامي يتميلح وبعد ان سميت طاااااااق الا الرصاصة شاقته من وجهه وطالعه من ذيلة من قو الضربة تقلب وسط الدالوب عشرين قلبة وطيح القدور اللي جنبه كلها ,,,,,,

[فاقد تبوك]

أخوي حل مكلف لكن حبينا ندلي بصوت معاكم لحل هذي المشكلة
الحل إنك توديها للتلميع الساطع منها إنه يفك لك المراتب ومنها تصير السيارة نظيفة!!!!

[هدام الطوابير]

اخي الحبيب هذا هو الحل :) :

http://www.mekshat.com/vb/showthread.php?p=743251#post743251

[صاحب الطير]

والله ياطويل العمر كان الحبيب اللي عندي نايم بجنبي يوم من الايم وقمت مثل المجنون وهو يقرط خشمي.. وطريدي أنا وإيا وضيعته.. واليوم الثاني,, نفس الكلام.. واليوم الثالث جلست طول اليل أرقبه.. ويم جا وما لا قاني أستنكر وجاك راجع لدربه.. وإلا أنا ,غياه وجها لوجه.. واقذعه بهاك الطريك ليييييييييييييييييييين قااااااااااااااااال أنا !!

فالأفضل إنك ترقبه.. لأأنها حيوانات ذكية وذات ساحة شم عالية.

[مكشاتي ون]

أبشــــــــــــــــــــــــــــــرررررررررركم يا أخوان ولله الفضل والمنه تم القبض على الجرذي المذكور وتم التخلص منه ولله الحمد

وذلك انني يوم فتحت شنطة السيارة عصر هذا اليوم ( الأربعاء ) وجدت المصيدة ( الحبّاله ) قد طبقت على رقبة الجرذي الخبيث وقد فارق الحياة ,, وقد قمت بتصويره في الكاميرا وسوف ادرج لكم صور الخبيث وهو بحبل المشنقه وعيناه فاغرتان ولكنني مشغول اليوم الاربعاء بسفري الى الأهل بالقصيم


والله ان سعادتي لا توصف يا أخوان بالتخلص من هذا الكابوس المزعج الذى اقلق مضجعي وصاحب تفكيري والعياذ بالله حتى بصلاتي

وقمت مباشرة بغسل السياره من الداخل بماء وديتول على السريع لأنشغالي بالسفر وسوف أقوم يوم السبت بالذهاب الي التلميع الساطع واترك السياره عندهم للتلميع والتنظيف من الداخل والخارج ومنهم على شارع الغرابي لتغيير التلبيسه الداخليه للسياره وفرشات ارضيه جديده وشراء افضل الروائح العطريه اللتي توضع داخل السياره

وفي الختام أسدي للأخوه اعضاء منتديات مكشات الذين تفاعلوا معي وقدموا اقتراحاتهم وتوجيهاتهم جزيل الشكر والامتنان فلا حرمكموا الله الأجر وأجزل لكم المثوبه

[المتامل]

مبرووك يامكشاتي ون نجاح عملية الاغتيال

بس ياخوي وراك تبي تغير كل شي بسيارتك علشان فار سكن فيها يومين :D
ضيف ورحل
وبعدين ترانا طول عمرنا مع الفئران نمسي ونصبح معها ايام بيوتنا القديمه واحياءنا القديمه والطفولة البريئة :rolleyes:
و هذا فار بري يعني انظف من فئران البلد
ومامنه ذاك الخوف من الامراض

بس غسل السيارة وكنسها ونظفها وعطرها من الداخل وخلاص

تحياتي

[ذيب الغداري]

أفظل حل


جب كمرة فديو

وحطها على الطبلون خلها تصور



ثمن جب قطو ملكع

وطببه عليها


وبتشوف مطارده

وتخشيش

وتنطيل

وزحف من قبل المطرود


هههههههههههههههههههههههه

وحط زيت على الوطايات
علشان إذا جا مقلع ويبي يلعب على القطو يسوي نفسه بيطلع ثمن يرجع للسياره ألى وهو يزلق برى





ههههههههههههههههههههههههههههههههههههههه

[كن كن]

الله يعينك إذا ما طلع الخياس بيجلس في موترك لو يموت لا قدر الله تبي العلم بع السيارة وافتك

[دكتور بر]

أحسن قصة قريتها في كشتات والحمد لله على موت هذا الخبيث
والله انك مريت بمحنة يا أخ/ مكشات ون
أعجبني أسلوبك جدا
إلى الأمام دوما
عقبال نسمع قصة الضب في السيارة


:p :p :p :p

[مكشاتي ون]

أحسن قصة قريتها في كشتات والحمد لله على موت هذا الخبيث
والله انك مريت بمحنة يا أخ/ مكشات ون
أعجبني أسلوبك جدا
إلى الأمام دوما
عقبال نسمع قصة الضب في السيارة


:p :p :p :p

والله محنة واوقات عصيبه فانا عشت بين نارين أو ثلاثة ان صح التعبير /
1- ان يكون هذا الجرذي متلبساً به جن خاصة انني ذبحت واحد في البيت اول ما وصلت البيت من التنهات
2- ان يكون جرذي حقيقي ويستمر بالسياره ويقرض على اسلاك داخليه يكلف اصلاحها الشئ الكثير
3- ما يخلفه داخل السيارة من قاذروات رأيتها بعيني ,, وروائح بوله - اعزكم الله - فتقرفت من السياره


وآآآآسف يا أخوه فلن أتمكن من ادراج الصور قريباً لأنني أخذت الكاميرا معاي وانا مسافر القصيم من أجل ادراج الصور ولكني يوم وصلت البيت بالقصيم لقيت اني نسيت وصلة usp الخاصه بالكاميرا بالرياض و اليوم الجمعه
مشيت مستعجل من القصيم ونسيت الكاميرا كلها بالقصيم

[بعير مدرعم]

مبروك الله فكك من شره

انا مره صارت لي بس قطو صغير وابلشني بوسط السيارة اسمعه يقول ميو ولا دري وين وتعبت معه لين بالاخير طلع وفكيت الباب وهج برا السيارة وشي عجيب كيف طمر اصلا بالسيارة كنت فاتح الباب وهو شكله خايف وجاي يركض وطمر بوسط السيارة

:j

[أروم]

حط قطو في السيارة ونا لك إذا ماطلع