من يبيله دعوة من شايب أخر الليل

[حمدولدسليمان]

يالربع يالنشاما السلام عليكم ورحمة الله وبركاته : ـ
عندي شايب عمره فوق الثمانين محلفني بالله ان أطلع أنا وياه نصيد له ضبين أو ثلاثة لأن ابو الجيران قايله تراها دواء وعلاج للركب ومقوية للنتم خابرينه 0
وأنا يالربع مالي بصيد الضبان ابيكم تدلوني على احداثية اروح انا والشيب واخليه يتفرج وهو في السيارة وإن حصل يصيد له غدا ذلك اليوم ما فيه مانع 0
ياهل الفزعات ترى مالكم إلا الدعاء من هالشايب آخر الليل 0
هو موجود في الرياض ويبي يعرس على شاميه على حسب قوله ويبي شي يرم عظمه 0
ابي احداثيات ان حصل في الصمان يكون احسن 0
بالرك الله فيكم ومد عمر شيبانكم 0

[المتبدوي]

ياحمد ياولد سليمان تبي نصيحتي خل عنك الضبان صدقني كلها اشاعات



لافيها دواء ولاشي مافيها الا رفع الكوليسترول وعلى فكرة ترى كلها



شغلة نفسية فقط .



هذا رايي وانت بكيفك



تقبل تحياتي وجعله مبروك عرس الشايب

[اسير الغربة 1]

السلام عليكم ورحمه الله وبركاته
اخي حمد ترا الضبان متوفره فى اى مكان فى البر بس شدحيلك وتوكل على الله وان شاء الله بتصيدها
وبعدين تراها مهى مثل الفقع الناس ماتعلم فى مكانه هداهم الله
مثل بعض الاخوان يقول جبت 12 كيلو وبعضهم يقول 15 كيلو
الضبان متوفره بكثره بين رماح وارفيعه وبعدين اسمان صحيح تشد اعضام العود وخاصه كان عنده نيه زواج
وعرس على ماقيل جعله مبارك0000 والى عطاه الكيف لله دره
ونتمناء له حياه سعيده فى زواجه ونتمناء له دوم الصحه والعافيه
ودر بالك علي العود ترى الشيبان هم اهل الاوله والله لايحرمنا منهم
ولك فايق احترامى وتقديري

[حمدولدسليمان]

اخوي المتبدوي وابن عمي ابو سعد اجعلي ما ابكيكم جزاكم الله الف خير والشايب يقول جعلي أرقص في عرسهم ويبعد عنهم شرور الدنيا ويسعدهم دنيا وآخره 0 يقول الفقع ما نبيه إن جا الجراد فكثر منه 0 اما الضب يقول اسأل مجرب ولا تسأل طبيب والخبر الأكيد هو يقول تلقاه عند أم حمد الله يرحمها 0
يقول إنها تقول في حياتها لا تقطع في اكل الضبان الله لايقطعنا من رحمته 0
احبائي ابي وصف والا احداثيات تراني اعرف الرياض زين بس 0 ترى الشايب يوم علمته بالعلوم أسفهل وشرب ثلاث دلال قهوة وسهر البارحة معي على غير عادة 0
الله لا يحرمكم الأجر ويجمعنا وإيكم وشيبانا في جنة الخلد آ ميـــــــــــــــــــــــــــــن 0

[اسير الغربة 1]

اخى حمد ابي اعطيك وصف بدو 00 احداثيات انا مااعرفها 00
اذا ماتبي تروح بعيد تطلع علي طريق رماح قبل ملف فيضة خريم على اليمين المنطقه هذى فيها كم واحد 00 والموقع الثانى على طريق سعد قصدى الدمام القديم يوجد فتحات في الشبك على يدك اليمين ادخل معها والارض فيها 00والموقع الثالث قبل تاصل منطقه سعد في حدود 10كيلو لف يمين ايضا المنطقه فيها000 واذا تبي شي جاهز يوم الجمعه فيه ناس يبيعونهن في سوق رماح 00
وتقبل تحياتي وحترامي

[المتبدوي]

لاصرت صامل الشكوى لله ...

فيه محل بس انه بعيد عليك شوي لاكن انا اظمن لك انك بتصيد من 10 الى 15 في نص ساعة

المكان طال عمرك وطال عمر من يقرا هو بر الخفجي صراحة فيه ضبان بشكل غير طبيعي

ولا هيب تجفل من السيارات واجد .

وحلوووووووه الاخبر الاكيد تلقاه عند ام حمد :D .... جعلها في جنات النعيم ويغفرلها ويرحمها

وتقبل خالص تحياتي ....

[ابونايف الروقي]

السلام عليكم
الاخ حمد ولد سليمان الضبان طال عمرك باقي عليها من شهر الين شهر ونص على وقتها والحين طال عمرك ما تنصاد لانها ما ((التحمت ))
واذا على المكان راسلني على الخاص وانا ادلك على محل كنا فيه السنه الي فاتت كل خميس وجمعه نجيب 100 -150

[ابو راجي]

احداثيات للضبان

الله يهديك ما فيك تحوووووم لك شوي وينبسط الشايب ويسفهل
بعدين باقي عليها شهر ونصف على الاقل مثل ما قال الاخ بي 52

بس والله زعلني يقول نصيد 100 الى ميه وخمسين والله انها واجده شوي تكفون خلوها تكااااااثر وتنبسط

[دغيم1]

السلام عليكم

حياك أخوي حمد
الله يطول بعمر الشايب - ويوفقه
بالنسبة للضببه باقي عليها مثل ماقال الأخون بارك الله فيهم - وانا كنت الخميس في الصمان وشفت مجموعة ضببه ماعليها الا عظم وجلد .
وأفضل ضب اللي موجود في قرشع الشوكي - بس الأرض متعبة شوي - وضب الصمان ماعليه جيد - بس انتظر الوقت وابشر - ولايحتاج احداثيات - واماكن كثيرة بلقرب من الرياض موجود فيها ضب .
تقبل تحياتي - دغيم 1

[الضاري]

مساء الخير يابوسليمان

مثل ما قالوا بعض الشباب لاتغرك الضبان ترى الدعوى نفسيه

ويرفع الكليسترول وهناك الكثير من القصص التي تدل على ذلك

فيه واحد قلت له هالكلام قال غير صحيح والدليل الصبح يا قمت من النوم أحس بيديني متورمه شوي من العافيه

وبعد الكشف تبين أن االي مورمها ارتفاع الكليسترول

لكن عندي لشايبك علاج طبيعي 100 %

وراح أخليه يتوذى من نفسه من زود ( النشاط )

أذا بغيت الوصفه راسلن على الخاص مبدئياً

بس بشرط ... دعوه لي ولوالديي في ظهر الغيب

والله العظيم هذا اللي محتاجه فقط

[الأجودي]

اخوي الله يطول عمرك وين بتاخذ هالشايب في هالبران والحر الله يجزاك الجنة
انا اقول رح يم سوق الحمام ونق الضب الي بالمواصفات الي تبيها كبير صغير دب عصل وجبه للوالد الله يطول بعمره وقله جبنا لك الضبان ولايدري انهن من السوق

[المتبدوي]

اخوي الضاري الله يجزاك خير ويرحم والديك كلنا نبي الوصفه





دلنــــــــــــــا عليهـــــــــــا





وياكثر العجز اللي بيدعن لك ...:D

[الضاري]

وياكثر العجز اللي بيدعن لك ...:D


:D :D :D

أبشر يالمتبدوي اصبر علي شوي لأني ما كتبت الوصفه أنتظر رد الرجال

ولا أدري وش صار على شايبه ؟

[حمدولدسليمان]

والله إني ماتوقعت كل هالمحبة والردود 00 أنا أشهد إن معرفتكم معزة والله يجمعني وإياكم بجنة الخلد ويباعد بينا وبين نار جهنم 000
والله قلت للوالد على هذي الردود الطيبة وقال هذولا من صلب رجال فيهم رجية الماضي الله ربي يحرسهم آه ثم آه من يزرق وإياهم لم أحد هالريضان القريبة أنا أشهد إن معرفتهم تنشرى 000 لكن الله يخليهم لعييلهم ويرزقهم دنيا وآخره ويصلح لهم نيتهم وذريتهم ويبعد عنهم عيال الحرام 0
اجعل عيني ما تبكيكم ويطرح البركة في مالكم وعيالكم واجعل اللي يخدمونكم الف ( عذي دعوة الشايب ) 0
الشكر خاص ل p52

[اسير الغربة 1]

اخوي الضاري الله يجزاك خير ويرحم والديك كلنا نبي الوصفه
دلنــــــــــــــا عليهـــــــــــا
وياكثر العجز اللي بيدعن لك ...:D

[راعي النحل]

اذا ابوك ما فيه سكر اليك هذه الوصفه.....

عسل اصلي من مصدر موثوق ويفضل ان يكون عسل سدر وتخلطه مع 10 جرام غذا ملكات وكل يوم الصباح مع كاس حليب مفيوح مع زنجبيل طازج ....يحلى الحليب بملعقة اكل من العسل ....ولمدة اسبوع ...وانشاالله يدعولى الشايب والولد

[راع الابل]

اخي العزيز تحياتي لك ولي شايبك العزيز

ياخو ليه ما تنصح الشايب يرمم العجوز اللي عنده اكثر ما كثر الله في السعودية مراكز التجميع يرجع العجوز بنوته مهو احسن له خصوصاً انه يبحث عن اشياء تساعدة على موضوع الزواج يعنى انه غير مجدي للأستمرارية والا كل شوي يبي يشغلك ضب ضب ضب وان كان تبي نصحتي وان راع البل عليك بالخلفات تعال اشتر خلفة وخلة كل يوم ينشط نفسه بعملية الحلب ومعافر البل لانها رياضة وشرب الحليب الصافي من الناقة مباشرة لانه يقل مادة الدسم فيها .
والا سوله برنامج عذائي متوازن كالتالي .

القيام فجرا وبعد اداء الصلاة كاس ماء يميل للدفء وبعده قهوة سعودية مع سبع تمرات .

الا فطار بعد الساعة الثامنة بيض او كبدة أو لحم محموس أومقلقل بدون تماطم . مع جرجير وخس

الغداء الساعة الثانية عشرة مباشرة حتى ما يجوع الشايب وتمتلي المعدة غازات وبعدين يتعطل كل شي عنده انتبه
لا بد ان ياكل سلطة مع تكثير البصل فيها والخس لابعادة الرائحة ولا تنسى الجرجير ثم زبادي بالخيار لترييح المعدة وبعد ذلك بعشرة دقائة ياكل وجبة الغداء وبعد وجبت الغداء بحوالي نصف ساعة فواكة ولا تنسى الموز لما فيه من فوائد والكيوي

بعدين ترييحه ياخذله nap(قيليولة ) والمغرب قهوة وتمر وشاي ومكسرات ( لوز , فستق ,بندق, عين الجمل, كشمش أأألخ) ومعها سواليف وقصص وغيرها يعنى شي يطرب الشايب .

العشاء الساعة الثامنة إلى التاسعة متنوع ولا تتعداء ثلاثة اايام الا مارين على السمك بأنواعة ز

ملاحظة اللحم الحار بعد ذبح الذبيحة مباشرة يساعد بشكل طيبة .
يفضل لحم الحاشي بالنسبة للغداء لما فيه من فوائد وقلت كلسترول .
لا تنسى تلطخ الوجبات بالثوم .
بعدها يكون كل شي طبيعي مائة بالمئة ( لا تنسى الأفعال المساعة مثل الرياضة - العسل - تحديد نوع الاسماك - حليب الابل - ثروب الضب ( الشحم اللي في بطنة) تقلا قلي حتى تصير زيت وتؤكل مع تمر الاخلاص تراه وحدة بوحدة ومدها لنفس اليوم . طلعات البر لما لها من ترييحة للنفس .)

هذا مالدي واذا التزم شايبك بما جاء اعلاه والله ان ياخذ اربع شاميات مو وحدة ولايكفن .

تحياتي

[ابوفهد11]

رح عند قريه الجله عند المزارع وقريه العليا

[عاشق VXR]

طع شوري ... حول روضة ام المصران في الصمان ... فيه ضببه واااااااااااااااااااااجد ...

[حمدولدسليمان]

أرفع ايدي وأضرب تحية لكل من شارك بها الموضوع وأنشهد انه ينشد بكم الظهر 0
قولوا آميـــــــــــــــــــــــــــــــــن الله يجمعنا وإيكم بالجنة وشيبانا وشيبانكم والمسلمين 0
الله لايوريكم مكروه وجعل عيالكم يبرون بكم ويعاضدونكم وتشوفون فيهم اللي يقر عيونكم بهم وتشوفون ذريتهم وذرية ذريتهم 0
( سلامي للي في نفسي له معزه كل مقبلت هلا وفز من محله ) هذي من الشايب مهداه لكل من شارك