ماذا تفعل مع الهوا والغبار الشديد ؟

[مخاوي اارجال]

يأخوان دايم نطلع للبر ونصادف اجواء غير طبيعية ( تقلبات جويه متنوعه وخاصه الايام هاذي ) والحمد لله علي مأراد وقضي ولكن عليكم بالدعاء والتعوذ من الريح وان يجعلها الله رياحا فالريح عذاب وقد نزلت بالامم السابقه وكما أوصانا حبيبنا رسول الله .
ولكن علي كثر مانطلع للكشتات تجينا الاجواء المتقلبه يوم الجمعه وهذا مهو أعتقاد ولكن ربما مصادفه وتحثنا علي المغادرة وادراك صلاة الجمعه بأقرب مسجد جامع :D
ابي ادخل بزبده الموضوع اني لاحضت ان أفضل مكان يخفف الهواء الشديد شجر السدروشجر العوشز حتي تقدر تصلح غداك مع ارواق يصبح الوضع طبيعي اذا عاكست الهواء واللي عنده اضافه يدخل نستفيد وشاكر لكم الدخول .

[أخو ريان]

واللي ماعنده شجر سدر
وش يسوي

وتمتلي عيونه غبار

انصحك بالابتعاد عن مذاري الشجر
والله اعلم
وشكرا على الموضوع

[kmsd]

اذا جاء غبار اركب سيارتك وريح
اذا ما خف ارجع
ومافاتكم اليوم تدركونه غدا

[نديم السهر]

يعطيكم العافيه جميعآ

اذا كان هواء ممكن تحصل ذرا بقرب شجره جبل قعر طعس :j

او معك شراع ذرا تحطه حول السياره او فرشه تحت السياره تقفل مدخل الهواء

لاكن اذا كان عجاج وغالبآ العجاج يطول بالساعات مالك الا السياره والديره

وخيرها بغيرها

بالتوفيق

[منتعش]

عادتاً الغبار يكون من الضحى وحتى منتصف العصر تقريباً
وكما أفادونا الأخوان
أن الذراء مناسب جداً
والأشجار
والجبال ممتازة أيضاً بس متى تواجد ربيع حوله جبال !!

[الضاري]

يقولون الشيبان

ذرى شجرة ولا ذرى حجره

أكتبه خيره ... واربط عفشك ولا تاقف الا عند باب بيتكم

ولو بيتكم له حوش وباب ريموت

يا سلام سلم على البنتليز يا معلم

أقصد على الطلعه يا معلم

[دغيم1]

السلام عليكم
حياك أخوي مخاوي اارجال
طبعا تكثر هبوب الرياح محملة بالأتربة والغبار في الفترات الإنتقالية - وهذه الأيام وقتها -
فإذا كانت الرياح معها غبار - فغالبا تطول مدة هبوبها اذا كان الغبار مرتفع في السماء .
اما اذا كانت الرياح لايوجد معها غبار - فغالبا اذا جاء الليل توقفت - امست - .
وعلى ضوء هذه الحالات يتم صنع القرار في البقاء او العودة
تحياتي - دغيم 1

[sohib]

اذا انت من مكان بعيد والارض ربيع سل نفسك بقولت تعشي تعشي وهونه تهون
واذا المكان قريب الا مامثل البيت

[مخاوي اارجال]

شاكر لكم مداخلاتكم ولو لاحضتوا الحيوانات البريه او حيوانات الرعي تجدها أثناء هبوب الرياح تعاكس الهواء خلف شجره صغيره أوكبيره حتي الهواء البارد وحنا أعقل منها :p وصراحه أعجبني الرد اللي يقول مافاتكم اليوم تدركونه غدا ، لكن بعض المرات تصير شفقان طلعه ولا ودك ترجع حتي تمل .

[* Storm *]

يأخي انا ذهبت أحد الايام وهو الخميس وكنت بالبر وكان الجو رياح نشطه مثيرة للاتربه والغبار وكان اخي قادم الينا فقلت له خذ معك خيمة البيرق وبنياها ولاكن كانت هناك صعوبه في بنيها ثم دخلناها وكأن لايوجد غبار

[راعي الهـــدد]

أمر الهواء محلول وبسيط كل مافي الأمر اذا كان حولك غار فتمام

أو اذا حولك حجر كبير مثل بعض المناطق في أطراف نجد يم الرين وحلوان الرين والوهوهي وذيك المناطق فتمام

أو تشوف لك شجر سدر بالخصوص لتشابكه بقوة

والحل المثالي للهواء وبلا منازع الرواق المعروف ياسلالالام وحده بوحده

بقينا في مسالة الغبار او العج او الشعف

فهذي مالها حل الا غار وتذري بوجه الغار

أو اجمع نفسك في موترك ولا تروح لبيتك بل اجلس فيه وضبط غداك او عشاك فيه وعين من الله خير الين يخف العج واحرص على عدم اطالة النار بقوة واحرص عل وجود منفس للهواء للضرورة ولو منفس صغير

في يوم من الأيام وفي الشهر الماضي ذيّا

كنت في رحلة لمناطق من أطراف الثويرات

وحقيقة واجهني عج وهواء اعوذ بالله وكان الذاري حتى مانفع

وش السوات والكاتم يدور بلفه الآن

قلت يابو محمد قل سم قلت مابه الا نطبخ عشانا في الموتر وشلنا الكاتم والدافور وطرحت مرتبة الجيب الربع

وحطيت الدافور في الزاوية وتحته الذراية الحديد ويوم خلص بقينا في مسألة كيف نآكله المكان ضيق جيب ربع باترول

قلت مابه الا ابو فلان نروح لمه والله يعين ونتعشى ونمسي وبكره نغبش

فلا يوجد حل اذا كان هواء قوي وعج مع بعض الا انك تجمع في موترك ومخمخ على وجبتك على كيف كيفك

شكرا لك

[الجافي]

انا اقول ان كان الهوا جنوب معناها ان الوضع يطول لان الجنوبيه الى هبت عاده تطول والواحد يرجح العوده للديار اما باقي الجهات فيحاول انه يحصل ذرى وعاده انه بعد العصر تخف الرياح ويحاول الواحد انه مايطلع للبر وقت دخول نجم جديد حيث وقت دخول النجم يكون هناك تقلبات في الجو وفي اوقات مراويح الصيف حيث ينقلب الجو فجئه من صحو وحر الى غيوم ورعود وامطار ينصح ان الواحد يكشت في المناطق القريبه من النفود حتى اذا انقلب الجو وصار مطر لينه يغير مكانه من الشعبان الى النفود ونفود ممتع وقت الامطار وسلامتكم