مكيف بارد بالبر ولا أحلى

[الوشيقري]

السلام عليكم, ذكر لي احد الاخوان مكيف صحراوي صغير يشبك على البطاريه بارد وخفيف ولا يصرف, ومثل مانتم عارفين ايام الضبان والنزل جايه, هل بالاماكن ياخوان احد يدلنا على نوعه واذا امكن صوره له, وهل محول البطاريه الصغير يقومه ؟
وجزاكم الله كل خير

[إعصار]

والله اول مره اسمع بذي الفكرة ,,

لكن ذا اليومين لاتستغرب شي
كل شي صلحوه ..


الي عنده خلفيه ياليت يفيدنا ,,

[حمدالعتيق]

مكيف وفي البر؟؟؟؟؟؟؟

أقول كل شي جائز..... بس الأفضل أن البر يبقى على طبيعته ه:j

أي بدون تكييف وإلا فإن المرض سيكون حليف من ينام أو يجلس:no2: تحت المكيف

حيث سيقوم بملاحقة الضبان أو الجرابيع أو ....... ثم يرجع وقد أنهكه التعب والحر الشديد

ف‘ذا جلس ؟؟؟؟ ف المرض والإنفلونزا حليفته:(

وأخيرا أذكر بقول النبي صلى الله عليه وعلى آله وصحبه وسلم ( إخشوشنو فإن النعم لا تدود.... أو كما قال عليه الصلاة والسلام

:eek: :j

[راعي الهـــدد]

أخوي الغالي ماسمعنا بهذا ابد

بس شف باقول لك امرين

الأمر الأول / حاول ماتكثر الشغلات في طلعتك وعزبتك

واقتصر على المهم وحاول مشابهة القدامى من الأجداد في مقانيصهم وعزبهم ورحلاتهم

فسترى سعادة بذلك وراحة

والكماليات الزائدة لانفع منها بل قد تضر وتعمل جنايات عضيمة غير متوقعة



الأمر الثاني /


افضل مكيف وبراد في البر وعلى اااالإطلالالالالاق

ولابه منافس ابد ابد ابد


ان تقوم بالتالي

اخلع او اشلع او افصخ ثوبك واغطسه وسط الماء ماء عادي

ثم اعصره بيدك الين يوقف مقطار الماء

والبسه مباشرة وشف البراد العجيب

وياحبذا بعد تعمل نفس الطريقة في الفنيلة والسروال تصير الدعوى اسبلت

وجرب وتشوف والله لاتحتاج مكيف صحراوي ولاحاجة

هذه الطريقة المتبعة

[ثقيل الرجلين]

^
^
ذكرتني طفولتي الله يجعلك دايم على ذكر الخير

اذكر ان لنا ناقه غاديه ونزلني ابو اسوقها في ارض وعر وعطاني المطاره وكان يقول وانا ابوك كل ما احتريت صب على عمرك ... الله يمد في عمره

عمري كان وقته بين الست والسبع سنين

من عقبها انا استخدم ذا الطريقه الى يومنا هذا حتى ولدي علمته عليها ويازينا واحنا في الموتر نرطرط بالمياه انا وياه

تحياتي

[جي اكس أر 3]

السلام عليكم
اول مره اسمع بمكيف خاص للبر
ولاكن اخي الكريم الاخ العزيز/ ابو حمد وظح لك اجمل طريقه لتقي جسمك من
حراره الصيف ،،،،،،،،،
وياما عملناها ولا اروع يشهد الله
تحــــــــــــــــــــــــــــياتي

[سهول نجد]

السلام عليكم, ذكر لي احد الاخوان مكيف صحراوي صغير يشبك على البطاريه بارد وخفيف ولا يصرف, ومثل مانتم عارفين ايام الضبان والنزل جايه, هل بالاماكن ياخوان احد يدلنا على نوعه واذا امكن صوره له, وهل محول البطاريه الصغير يقومه ؟

وجزاكم الله كل خير







اخوي الوشيقري





تجد في اسواق (( كارفور )) مكيفات صحراوية ارتفاعها مايتجاوز 60سم وعرضها مايتجاوز 40سم



ممتازة جداً وخفيفة



انا عندي واحد مشترية بحوالي 200 ريال تقريباً ان لم تخوني ذاكرتي



رفّه نفسك واستانس وكل انسان ينام على الجنب اللي يريحه







في أقرب فرصة راح انزل صورة له

[شامخ ألهيلا]

ياشباب شي طيب ان يكون مكيف معك في البر علماً ان درجة الحراره كل سنه في ارتفاع والبدو الان لايستغنون عن الغرف االجاهزه والمكيف فيها حتى الخيام يقومون بتشغيل المكيف الصحراوي فيها وقت الظهر بمواطير الكهرب وشفهم كلهم عند في منطقة سعُد شرق الرياض ورماح والحفنه
بس فكره حلوه وانا شفت قبل فتره واحد راعي باص صغير سواق مدرسات في الرياض مركب جنبه مكيف صحراوي
واعجبتي طريقته ونرجوا من عنده افكار ينفعنى فيها
وتقبلوا تحياتي محيميد الروقي

[ولـد الدوادمي]

اخوي سهول نجد ممكن صوره له وهل تقومه الطمره وهل هو 110 ولا 220

[سهول نجد]

اخوي سهول نجد ممكن صوره له وهل تقومه الطمره وهل هو 110 ولا 220





اخوي ولد الدوادمي





شغال على 220





وهذه صوره







على فكرة .......هناك أجهزة أصغر من هذا





هذا ارتفاعه 70سم تقريباً وعرضه 40سم تقريباً





ومعهاه ريموت كنترول





http://www.q8boy.com/uploads/09695acb39.jpg





http://www.q8boy.com/uploads/b562c32778.jpg





http://www.q8boy.com/uploads/8d7da750b1.jpg





http://www.q8boy.com/uploads/d4a593e7b2.jpg

[نهر العطاء]

ابشر والله بالمرض بس نصيحه ابعد عن النعومه الزايده
والله يوفقك

[ولـد الدوادمي]

الله يعافيك اخوي بس هو صحراوي يتعبا مويه ؟

[سهول نجد]

الله يعافيك اخوي بس هو صحراوي يتعبا مويه ؟



نعـــــــــــــــــــــــــــــــــــــــم

[ابن بدران]

الله يجزاكم خير جميعا

اخوي حمد


وأخيرا أذكر بقول النبي صلى الله عليه وعلى آله وصحبه وسلم ( إخشوشنو فإن النعم لا تدود.... أو كما قال عليه الصلاة والسلام
الكلام هذا من كلام عمر بن الخطاب رضي الله عنه وليس حديثا بارك الله فيك ..

[صبي غلباء]

ابشر والله بالمرض بس نصيحه ابعد عن النعومه الزايده
والله يوفقك
نصيحه من رجل منصح ان شاء الله لكن ياأخ نهر العطاء الرجل سأل ولا ندري عن ظروفه وليش يبغاه وانا شخصيا احتاج هالجهاز كثير وماراح ارد عن صاحب السؤال لكن قبل ماتصف الاخ بالنعومه يعلم الله اني اكثر شخص يحتاج للمكيف هذا وكنت ابحث عنه لاني اعاني من الصداع النصفي الشقيقه ومن اشد انواعه ومعروف ان النوع هذا من الصداع النصفي مايبي الحر الزايد ولي شوق للبر حتى بالصيف وعلى كلامك هذا وحده من ثنتين يااترك البر يا اصير ناعم وانا متأكد انه هذا مو قصدك وقصدك الوحيد النصيحه لكن خانك التعبير وشكرا للجميع

[ولـد الدوادمي]

انت ماتدري عن الرجال مقطعته العربجه اصلن اضاهر انه من قو العربجه مايعرف يرقد الا عند الشمس وبالقايله

[الوشيقري]

السلام عليكم, جزاكم الله كل خير ياشباب على الردودو والتفاعل, وخصوصا اخي الكريم سهول نجد على الصور والمعلومات, وان شاءالله اني ناوي اخذ لي واحد, لا بعد يقولون حط مع المويه شوي ثلج ويطلع لك هواء يهبل, ولكن تبقى شغله وحده: هل يشغله المحول الصغير الي يشبك على البطاريه؟ هذي يبغالها واحد مجرب.

وبال نسبه للاخوان الي يقولون مايحتاج مكيف وجهة نظرهم على العين والراس واحترمها, لكن اصبروا يجي اغسطس ونشوف.

[sameer_1798]

ولكن تبقى شغله وحده: هل يشغله المحول الصغير الي يشبك على البطاريه؟ هذي يبغالها واحد مجرب.

.
بالنسبة لي أنا مجربه على المحول الصغير اللي على البطارية قوته 300واط صناعته صيني
ولم أشغل معاه أي جهاز كهربائي .
والمكيف صناعة هندية قوته 160 واط .
والنتيجة أنه لم يشتغل ولكنه يتفتف .
احتمال يكون المحول ما يجيب قوته الثلاثمائة واط .

[weather]

أتركو عنكم المكيفات والجو مايحتاج مكيفات .
ثم الواحد هارب من جو المدينة وملوثتها .
أهم شيء مثل ماقال اللي قبلي الضروريات .

[Avalanche]

يعطيك العافية أخ (سهول نجد)

كفيت ووفيت

جزاك الله كل خير

[الوشيقري]

السلام عليكم, شكرا اخوي سمير ويعطيك العافيه, لكن غريب مايتحمل المحول؟! لان المكيف الصحراوي مجرد مروحه.
على العموم ان شاءالله اني اخذ لي واحد واجربه ثمن ارد لكم.
وشكرا.

[البركة]

السلام عليكم
هل المكيف عملي ينفع بالخيمة بعز الحر والا مايسوى نقله

[دايم البر]

جزاك الله كل خير