اصــعــب مــوقــف مــر عــلــيــك

[سبيع الغلباء]

السلام عليكم ورحمته االله وبركاته وبعد:





اخواني اعضاء منتديات مكشات
نبي منكم اصعب موقف مر عليك سواً بالبر ولا بسفر ونبي منكم التوضيح الجيد الله لايهينكم


:no2: وارجو الا تكتب الا موقف

[سبيع الغلباء]

افتتح واقول
اني طالع السنه الي راحت نتصيد وكنا داخلين 35كم ماحولن الا الضعوي لا بدو لا كشاته
الشاهد انفقع علينا الكفر معنا استبنه يوم نزلنا الاستبنه نبي نفك الكفر ولا المسامير مجيمه
كلهن ما افتح معنا الا واحد وحررررررررررررر وكنا الظهر ولانجلس يمكن 1.30 وحنا
نحرحر ايسنا حطينا زيت فرامل ومع دعوة الله فرجه الله وانفك والله الحمد


بعض الشي تهيون وهوكايد

[سرهيد]

انا من عادتي اضع لي عدة خفافي في السيارة بعد زوال موسم الربيع

يعني دلة وبريق وشاي وقهوة

اضعها وراء مرتبة الددسن

واذا اهتويت اصلح شاي والا قهوة ما تحتاج اجهز اي شيء القاها وراء المرتبة

في يوم من الايام وقفت قلت اصلح لي شاي ( خرمان ) بريق شاي

وقفت شبيت الضو قلت اجيب بريق الشاي ما لقيته ، قلت الشاي مصلح مصلح بإذن الله

فوحت الماء في الدلة وصلحت الشاي فيها :):)

http://www.mekshat.com/pix/upload/images26/mk22112_u.jpg

[سبيع الغلباء]

اخوي السرهيد شكراًعلى مرورك

ولابئس بموقفك بس نبي اصعب شوي

[خيال الغلبا]

من اصعب المواقف حدثت لي وكان عمري 17 سنه

فك لي ابوي سيارة جديدة ورحت اتعبث انا وخوياي

وكشتنا في نفود ما حول الرياض

واردنا التطعيس فبنشرنا الكفرات للتطعيس حتى تعبنا ونسينا نعبيها هواء

يوم اقبل الليل واظلمت وننتبه لوضعنا ندور حولنا ولا الناس كلها رايحة وما فيه الا حنا

ونشوف من بعيد خيمه فيها نور بسيط

ونتشاور بينا كلنا دقنا الرعب

والله اروح انا وانا خايف واقطع الزفلت وكان مرتفعا عن الأرض على رجليني طبعا

يوم وصلت للخيمة دخلت على نياتي

ولا الله لايوريك ... بشر مروحين كلهم سكارى .......

وارجع على ورى شوي شوي واعثر بباب الخيمة ...واقوم ماادري وين انا به ...واطير بين السماء والأرض لدرجة اني وصلت للزفلت وانا ماشفته واضرب فيه

المهم يوم وصلت لربعي ونفسي ثاير

واركب ماكلمتهم من الرعب واطير على الجنوط وكان الهوى في الكفرات عشره فقط

والله مااشك انه بسبب دعاء الوالده الله يمتع بعمرها

كل ماتذكرت هالموقف اقشعر جلدي

[نديم السهر]

يعطيكم العافيه جميعآ

هذا الموقف صار زمان على اول طلعاتنا للنفود كنا شلة شباب بثلاث سيارات منهن تايوتا غمارتين

المهم

اخر العصر من سوء الحظ ركبنا سبعه بالتايوتا زحمه على اساس شوي ونرجع

السياره مافيها اي شي من العزبه حتى البانزين شوي لانا مو موناوين نروح بعيد

تمشينا قريب من اخوايانا وحنا راجعين المغرب للقى خوينا حصني جلس يطارده شوي

انتهت المطارده

جلسنا ندور نبي خوايانا مافي امل والسياره مافيها بانزين اظطرينا نوقف بقينا بالسياره لأن الجو بارد

الاخلاق زفت ماحد له نفس يسولف

تخيلو نمنا بالسياره للصبح وأنواع التكسير

طلع الضوء ارتفعنا بالسياره شوي نترقب حد من اخوايانا او حد يفزع لنا ببانزين طال الانتظار فقدنا الامل

بالاخير قررنا نمشي بالسياره ندور اخويانا للين تقطع بانزين

جلسنا ندور شوي الا هذا محدارنا مع الطعس بدينا نستدل شوي خويانا ماهعم بعيد

شوي وطبينا عليهم اه يالفرحه يوم شفتهم مو عشان خششهم لاني ميت من الجوع

من وصلناهم طاحت عيني على كرتون حليب السعوديه الكبير وافتحه واشرب من الهلاك:D

مايستفاد من القصه

1 لاتروح بسياره مافيها اكل وبانزين حتى لو قريب

2 لاتركب بسياره زحمه لان ممكن تظطر تنام بها وبعدين تتوهق

3 لاتركب مع واحد مايدل

4 وهذا اهم شي لاتطرد حصني:D

وسلامتكم

[سبيع الغلباء]

خيال الغلباء....

شكراً على مرورك

وانصحك بمطور الهواء

ماينزل من السيارة

[سبيع الغلباء]

نديم السهر...

شكراً على مرورك

والبزعه شينه واهم شي الماء

[عاشقة الطير]

يالله يشين المواقف الحرجة ..
اقولكم مرة كاشتين في البر والفله والوناسه و فلة احجاج انا والجماعه الموهم كنا نتمشى انا والبنات ومادريت إلا البعير وراي وقمنا نتراكض قدام خلق الله وهجمة علينا وكانت بتوطاني لو مافكها الله عني جت مرة عمي وهشتهم بس بصراح كان موقف لا يوحسد عليه .....
مشكورة على الطرح الحلو

[كن كن]

أصعب المواقف اللي مرة علي في الصمان كان معنا جيب نيسان سفاري وحنا في الصمان انفجرت جميع الإطارات الأربعة من يصدق بس بينها وبين الأخرى فترات وآخر أطار انفقع وحنا طالعين على الزفلت وكانت رحلة جميلة سميناها رحلة الكفرات

[سبيع الغلباء]

عاشق الطير...

شكراً على مرورك

[سبيع الغلباء]

كن كن...
شكراً على مرورك
واحمد ربك على السلامه

[شاص محترق]

السلام عليكم
بالنسبة لي مر على موقفين لايمكن انساها الاول ايام الازمه كنا بمزرعة عمي بضواحي الرس وكان فيه واحد من عيال عمي يتعلم السواقه وكان راكب معه اخوه الكبير يعلمه ويلف له احيانا المهم انا كنت العب كوره مع باقي الشله طبعا كنا كلنا صغار كان عمري تقريبا 12 سنه مر السواق (ولد عمي اللي يتعلم) من قدامنا تعرفون كيف الشرافه عندنا حنا الصغار( الشرافه) التدقيق بالنظر
من يوم مر وينقزون الشباب بالصندوق باقي انا وواحد جينا من قدام الموتر نبي نطمر بالصندوق طبعا كان مهدي جدا خويي طمر مير واطمر وراه
لكن كنت انا الضحيه صرت بوسط الكبوت احاول اتمسك بالمساحات مير ازلق شوي شوي لين صارت ركبي على الصدام ويديني تصقع على الكبوت اقوله وقف وقف
واخونا في الله مبتل ووالله اطيح ذيك الطيحه اللي شفت فيها نجوم القايله طحت تخت السياره ودعستني الكفر الاول الامامي يسار على صدري ومع الدعسه على انقلبت على ظهري ودعستني الكفر الثاني على ظهري ثم تعدلت
مااستطيع اوصف لكم الموقف لانه مر ماادري شلون انه مر كتب الله لي حياه تخيلوا اخونا في الله يوم درى انه دعسني فتح باب السياره
وانحاش من السياره ماوقفها غير جدار البيت
الحمدلله ان الدعسه كانت على حصبى(حصى صغيرون) المهم دخلت المستشفى والحمدلله لم يكمن هناك كسور غير دخل هواء بصدري
من الشهقه وطلعت بعد اسبوع ولله الحمد طيب معافى.

الموقف الثاني / ولا اخليها مره ثانيه الظاهر اني طولت عليكم بس اصعب من الموقف الاول...

وسلامتكم.

[الجمرة]

والله مواقف واجد صعبه مرت علي وانا في البر وانا في البحر
بس باحكي لكم اللي في البحر
يوم من الايام طلعنا بالطراد البحر ومشينا العصر وبعد ماتوسطنا في وسط البحر عند المغرب طفينا مكينة الطراد عشان نصلي
وبعد ماخلصنا الصلاة اكلنا الفطاير وسندويشات وشربنا العصير
جينا نشغل الطراااااااااااااااد المكينه عيت ماتبي تشتغل وحاولنا فيها حتى تعبنا انا مع ولد خالي وعندنا خبره في شغل مكاين الطراد
وكان البوجي حرقان ولاعندنا بوجي بس عندنا عده وفكينا البوجي وصنفره وجت الليل تقريبا الساعه عشره ونص بالليل ولافي فايده
مااشتغلت المكينه قال ولد خالي مالنا الا نسبح وحنا نسحب الطرااد قلت اله والله لنموت في اول خمسه امتار سباحه
ومكان غزيررر مره وحتى المجداف مايسوي شي ولانقدر نصيد الارض من عمق البحر ولافي ارسال جوال ولانيله
جت الساعه تقريبا 12 بالليل وبدا السمك يلعب لعب
وبعدين خلاص قلنا مالنا الا ندعي الله تعالى والله تعالى لايخيب عبده الضعيف وشوي الا بمرور قارب صيد قمنا نعيط عليهم ولافي فايده بسبب كانوا مسرعين وصوت المكينه عندهم صوت عالي بحيث انهم مايسمعونا
وقمنا نضوي لهم بشعلة نار وبعدها انتبه اللي يقود الطراد ورجع لنا وقلنا الحمدلله
طلعوا الشباب صعيده من مصر والله وماقصروا سحبونا للبندر(مركز خفر السواحل)
وهذا من فضل الله تعالى علينا ومن دعوات الامهات لنا
بس لوماجانا احد ولاعندنا ماي ولا اكل وش نسوي يالله فكر معي؟؟؟؟!!!!
والشباب اللي جونا هذوله الله ساقهم سوق لنا
ويمكن دوريات البحريه ماتجي حولنا وش نسوي ولافي ارسال للجوال؟

[كاشت...كاشت]

اهلين شباب انا عندي موقف حبيت اوقف فيه:p قصدي اشارك فيهم باختصار


يوم كنت صغير كنا نلعب بالشارع انا وخواني وكان فيه شايب عندنا معه جيب حوض قديم للحين معه:D

طلع من بيته للشارع على الحوض وكانت اختي الصغيره بوسط الشارع ما شافها صدمها وما وقف

ونا اصوت له وقف وقف .......الرجال سمعه ثقيل ما وقف :eek:

اشوي الا الصغيره تطلع من خلف الحوض سليمه مافيها شي والحمد لله

الشايب بعد ما رجع بالليل علموه اهله وجاء يسئل وش صار عليها:)

[سلطان العوني]

عندي موقف وحبيت اقوله هو محرج ومضحك وكل شي المهم
كان عندنا ضيف وكنت صغير بوقتهاكان عمري 13 قبل 9سنوات
المهم القهوه على جمر والدله رسلان المهم اصب للرجال وارجع القهوه على الجمر والضيف اخذته السواليف مع الوالد
الله يحفظه المهم قالي الضيف تقهو وانقز واخذ الدله (خايف من الوالد ) ويمد عليه فنجانه ولدله ثقيله وحاره مره
والله واخذ الفنجان واصب شي بسيط ابي ازبن عن وضعي الا والدله تنكب الضيف طبعا على جزئ من ثوبه والباقي على الارض
والله يا طويل العمر واطالع فيه هو والوالد وانا احط رجلي ومن العصر الا الساعه 1ليلا ما طبيت البيت
ودمتم

[sagan200]

يعطيكم العافيه موضوعي انه الوالد فك لي موتر جديد ددتسن واكشخ فيه شهر والوقت برد والا ربع لنا في البر قلت امر علي واحد واطلع انا وياه للبر قبل صلاة العصر وناصل لهم والاالغداء توه جاهز الي معي يتميلح قال انا اقلط أغرف الغداء وحطه في حوض الددسن حقي والمفتاح عليه وانحاش بالغداء يتميلح نحتريه شوي شويتين ثلاث شويات ماجي عقب فتره الا هو جايبه واحد مانعرفه ومعه الصحن والغداء بارد قلنا نحميه وناكله ونروح نجيب الددسن الي مغرز علي قولته اكلنا الغداء باقي علي المغرب شوي ونروح ندور وحنا في نفود بالثمامه يمين يسار شرق غرب ماحولك سياره الا 10 بالليل قالوا نسري ونجي بكرا الفجر ( الجمعه) قلت نسري بس نرجع الفجر ان دري الوالد وش اقوله ضاع الموتر بيعطيني المقسوم هذا موتر مهوب مفتاح والا 10 ريال والله ونرجع الفجر وعلي شقت النور نبدا ندور والارفيقنا الا مضيع الددسن راكب في الحوض وراء ومغير يلهث تقل سلوقي من الروعه رح شرق رح غرب الا الظهر الا العصر الا قبل المغرب مابين عيوني الا الوالد وش بيصير اذا قلت له الموتر ضاع نظام تعليق يستخدمه معي والا سحب والا هزاز والا ايش وكل شوي التفت علي الي مضيع الددسن واصره بعين يقوم يرجف والدنيا برد وقبل المغرب بشوي وقبل ماتغيب الشمس الا خوينا بالحوض بأعلي صوته يصرخ قووووووول والا الونيت تحت هاك الطعس مغرز وانزل احضن الونيت تقل امي والا ابوي جاي من سفر من الفرحه واشغله ويشتغل واطرد خوي يوم جاء يركب معي ونطلع الموتر من الغراز وسيده للبيت واحرم طلعات هاك السنه .

[T U R K I 0 9 0]

السلام عليكم

انا مررره في عرس طال عمركم عرس واحد من ربعنا المهم خذيت الطيب وسيده على المعرس باطيبه :D واطيبه المهم واسحب المجمر وهو سحب غترته:( وينثر الجمر على ثوبه واطمر المعرس واطمر انا والمعازيم تطامرو وحت حت حت حت:D
المعرس لين عجز والله سلمه ووسلمني معه من الطق كان الشايب يتفلت على بيطقني وقال المعرس ترااااه في وجهي ماتقول له شي وينقز ويغير ثيابه ويستمر العرس و كل ماشافني اكبر من بواجد قال تذكر اه ياليتني خليت ابوك يطقك لان العلم وصل زوجته وصارت تعلق عليه :D

مشكور ياسبيع الغلباء على الموضوع الحلو :)

[عروق الدهنا]

اخوي سبيع اشكرك على الطرح الجميل
وموقفي هو قبل ثلاث سنوات بعيد الاضحى كنا طالعين يم اعيوج لينه في شمال المملكه
وحنا 4 ومعنا موترين شاص لي وهيلوكس لولد خالي
الهيلوكس محمل كل اغراضنا من عزب فرش حافظات رواقات يعني كل اغراض الطلعه والشاص مافيه الاكلاب صيد وغاز
طلعنا من فيضة ام عمار الساعه 4 عصرا متجهين لم فيضة الزعبيه وحنا نمشي وقفونا كشاته شباب قالو تعرفون للقارمن قلت
الله الله قلت وش تبون بالضبط قالو فيضة الزعبيه قلت وراه ماتمشون ورانا حنا موجهين له قالو شورك وهداية الله
المهم بقى على الفيضه كيلو واللي يبننا وبين الفيضه قاع (ارض صبخه) الا هذا ولد خالي يسقط علي ويلعب بالموتر يمين يسار
وبديت ماشوفه من الغبار وشوي الا السما تمطر فرش,عزبه,حافظات,رواقات.......الخ
وانزل من موتري واركض لمهم الاوش اشوف موتر كان هيلوكس الموتر تغير من القلبات اللي بالهوى
وتطيح عيني على الراكب نص جسمه بالغماره والنص الثاني برا رحت احاول اشيله الرجال ثقيل واخوينا متلخبطين من المنظر
وطلعو الناس من الفيضه وعونونا
سالت راعي الموتر قلت انت بخير قال الله الله
المهم ركبناهم بجي كس ار موتر اللي حنا ندلهم للفيضه وتوجهنا للمشتفى رفحا اللي يبعد عنا100 كيلو
وخوينا المصاب يتشهد بالموتر وينصحنا ويقول حللون وانا تخنقن العبره من هالمشهد الرجال يتعور ويتوجع ويصارع اللم ويون
راعي الهيلوكس كان يسوق موتري الشاص وانا مع المصاب
وصلنا المستشفى وقلت لراعي الهيلوكس لازم تفحص سبحان الله يكون بك شي نزيف لاسمح الله قال ابشر
دخلو الاثنين لغرفة الاشعه وبعد 20دقيقه طلع الدكتور وهم معه وسالت الدكتور قلت بشر قال الرجال هذا سليم :اللي هو المصاب
وقال هذا لازم ينوم عندنا :اللي هو راعي الهيلوكس!!!!!!!!!!!!!!!!!!!!!!!!!
طارت عيوني وقلت :لا يادكتور هذا المصاب
قال :هذا سليم اما الثاني فيه خلع بالكتف ولازم ينوم .
خوينا المصاب يتوجع مايدري وش السالفه رحت لمه قلت :قم قامت عصبك مابك شي يله قم.
وتبهذلنا والشباب اهل حايل المسعفين ماقصرو معنا الله يجزاهم الجنه والله يخليهم لعينن ترجيهم والله يجعله بموازين حسناتهم

وهذا هو اصعب موقف مر علي والله لايعيده من موقف

وارجو اني ما اطلت عليكم
تقبلو تحياتي

والسلام ختام

[قوافي ( أم نهار )]

يرفع للقراءة وللمزيد من المشاركات

[راعي الصقلاوي]

مساكم الله بالخير الجميع
اتذكر في احد المرات طلعت مشوار بعيد عن الديره بسيارتي وكانت نوع جراند شيروكي
من العجله نسيت جوالي في البيت وما انتبهت عالبنزين وطفت السياره بالطريق في منطقه بريه كنت بعيد عن الديره واحتست ويش الراي
والتدبير خفت اترك السياره تنسرق واظل في مكاني ما هو بحل صرت اناظر حولي يجوز اشوف مرار طريق عابر سبيل
ما في احد واظلم الليل وجلست في السياره انتطر فرج رب العالمين قريب الساعه 9 بالليل شفت اضويه تتراقص قدامي من بعيد
وكانت مدرعه وفيها 4 جنود شغلت اضوية السياره وصرت اضوي واطفي فيها والحمدلله انتبهو الربع للاضويه شفت السياره تتوجه صوبي
حين وصلوني العساكر بعد طرح السلام والتحيه قلت لهم السالفه قالولي ابشر بالفزعه
قطرو سيارتي بالمدرعه وسحبوها لين وصلنا محطة الوقود شكرت النشامى على فزعتهم وراحو يكملون دوامهم عبيت تانكي السياره فل
ورجعت للديره سولفت للربع السالفه بعد ذيك المره قبل لا اطلع من البيت اتفقد بنزين السياره وجوالي يكون شحن البطاريه 100% 100
وسلامتكم يالربع