مشاهدة النسخة كاملة : ربع النيسان وش هو من لحية
غضنفر
18/03/2007, 01:23 PM
سلامُ عليكم
لدي سؤالين عن الربع 2006 و لعلي اجد الاجابة عليهما
1- ما هي درجة برودة المكيف
هل هو افضل من مكيف الباث لان مكيف الباث يغدي في النهار صحراوي وهوا الدرايش ابرد منه
الركاب في المرتبة الثانية هل يصلهم تبريد المكيف.
2- هل عزمه قوي مثل ربع التويوتا
هل يقدر يرقى المراقي الي يرقاها ربع التويوتا.
باترول للأبد
18/03/2007, 01:32 PM
بالنسبة للتبريد بارد مرة ويوصل للي ورة .. وعزمة قوي مرة .. ويرقى المراقي اللي يرقاها ربع تويوتا وأكثر
غضنفر
18/03/2007, 01:35 PM
بيض الله وجهك
هذا الي ابي اسمعه
جزمتنا على الربع
بانتظار المزيد من الاراء
راعي الربع 97
18/03/2007, 01:35 PM
وعليكم السلام
من ناحية المكيف والله مادري لكنه زين
ومن ناحية المراقى كان معي ربع 93 ومغير فيه حاجات قليلة والله انه يرقى اللي يرقاه الربع تويوتا2002 وانت بتاخذ فتك ولا (والموتر ترا من سواقه)
غضنفر
18/03/2007, 01:39 PM
هلا بك
ما اختلفنا
لكن السيارة لها دور بعد
والربع ترى مكينته 4500 بخاخ مهب نفس مكينة الفتك 4800
راعي الربع 97
18/03/2007, 01:42 PM
مثل ماقلت السيارة لها دور والسواق لها دور والربع اللي كان معي مكينته 4200 مافرقت فيه لكن السواق له الدور الاكبر
غضنفر
18/03/2007, 01:48 PM
نيسان او تويوتا الي كان معك
راعي الربع 97
18/03/2007, 01:50 PM
وش رايك وانا اخوك لوكان الموضوع عن تويوتا كان مارديت او مادخلت اصلا
اللي كان معي نيسان سلقه
بيالة
18/03/2007, 01:51 PM
أخوي اسأل مجرب ولا تسأل طبيب ربع النيسان الآن معي أحسن مافيه مطبه خفيف والمكيف زين لكن والله أن التويوتا أفضل من ناحية القوة والصبر (مجرد رأي):no2:
باترول للأبد
18/03/2007, 06:49 PM
صدقني حتى من ناحية الصبر النيسان يصبر معاك واحد من الشباب معة باترول ربع 99 مكسرة تكسر تطعيس وتفحيط وسرعة ولا قال شي ماشاء الله وهذهو بياخذ لة 2007 هذا يدل على أنة مرتاح مع النيسان
حرقوص الشملد
18/03/2007, 07:07 PM
اخوي استخر وتوكل على الله تراه موتر مايحتاج ان بغيته قوة قوي وصبر يصبر وراحه موب مثل التويوتا يكسر ظهرك وانت تطعس وحتى وانت في الديرة وصرفية البنزين مثل التويوتا
ملبق غلـــــط
18/03/2007, 08:31 PM
اخوووي انا توني ماخذ 2006 جديد من عند نجد والله انه موتر والمكيف لا تسال عنه والله على 1 ويذبحك بالبرد
والله الموتر ماشاء للحين الى 1600 كيلو بس مرتاح منه ومريح وافخم من التويوتا واوسع وبعدين ياخي بطعس خفيف
ياخي لا تقول اقوى ومو اقوى الربع 240 حصان يعني قوة الجي اكس ار وبطعس اذا السواق صاحي ابشرك والله لا شاص
ولا في اكس ار بيصف جنبه
وهذا رائي
ملبق غلـــــط
18/03/2007, 08:40 PM
هذا اقتباس من رد اخوووووووووي ابو حمد وانا استشيره قبل شهر
اذا عندك عائله واولاد وليس عندك غير الجيب الربع باترول
فلا انصحك لأنك بتنشب باولادك
أما اذا عندك موتر رديف له يحمل اولادك او اولادك واحد
فأقول لك
اشتر ولاتشاور والله انه موتر ماهو هين
ويطربك طرب في البر والجبل وقوي ومتين ومريح في الخط وخفيف بالنفود
ومناسب جداً جداً لصاحب المقناص
توكل على الله وخذه وانصحك تآخذ 2006 بيكون طايح عليك فيه كثير
واعطيك نصيحة واحد حايس السوق حوس حوس
افظل من تشتري منه وهو يعتبر اقل سعر في السوق
معرض نجد وهو موزع معتمد للحمراني
سعرهم اقل مافي السوق
والله يوفقك ياربي ويدلك ويهديك للصواب وللرأي الحسن
وللمعلوميه
أنا كنت ممن يسب الباترول وممكن بعض الأخوه هنا في المنتدى يتذكر كلامي عن الباترول وذمي له
لأنني كنت اسمع عنه ولم املكه اللهم فتره محدوده لاتعتبر شيء
وبعد أن جربت الموتر وملكته وقنصت عليه ومشيت عليه بر وديره
فوالله أني مالقيت افظل واجود واريح وارسى وأخف من الباترول الربع
وظع تحت اخف الف الف خط
انا لي تجربه متعبه جداً مع السيارات وارهقتني مادياً
فملكت عدة سيارات
GX الهدد 2006 جديد
الددسن دفرنسين 2003 أخو الجديد
الهايلكس غماره 2001 على وقته
الددسن غماره 2002 جديد
الشاص 99 شبه جديد
الفكس آر 95 شبه جديد
الشاص 94
الهايلكس غمارتين 91 اخو الجديد
الاند روفر شاص 91 مخزن
الجمس دفرنسين قير عادي 91
ونسيت والله الكثير الكثير مما جربت
أخوي والله كلها جربتها وملكتها وجلست معي فتره ليست هينه وفي الأخير اقرر بيعها واستبدالها بنوع آخر لعل وعسى يكون مناسب
وفي الأخير
وآخر ما اشتريت الجيب الربع بترول 2006
ويعلم الله انه موتر ولم املك افظل منه والى الآن لم ارى منه الا كل علم طيب
وتوني جاي من أطراف الرمله من شرق الأسبوع الماضي والله أطربني طرب ماقد اطربنيه موتر من الي ذكرت لك أعلاه
هذا ملخص تجربتي مع المواتر وتجربتي والله متعبه ومنهكه مادياً وخذ نتائج أخ تعب وفي الأخير ارتاح لموتر اسمه
الربع الباترول
اذا عزمت وشريت ارسل لي رساله بالخاص اقول لك عن بعض التجهيزات الي تخليه لك شي خيال وعملاق غير ماهو عملاق اصلاً
هذي نصيحتي اهديها لك محبة وتقديراً لشخصكم الكريم
أخوك ابو حمد
الربذي
18/03/2007, 08:50 PM
عليك فيه ترا صبور وعزمه مايحتاج
بس يالربع ماتلاحظون ندرته نادر مره مره مره الربع (شاهي ربيع ) بكل مكان وربع نيسان وخصوصا الجديد من 2005 وجاي ماشفته الا مره تخيل !!المتوفر من 91الى 97 وبعدها بدل يقل مره
عرش السفاري
18/03/2007, 09:57 PM
بالنسبة للتبريد بارد مرة ويوصل للي ورة .. وعزمة قوي مرة .. ويرقى المراقي اللي يرقاها ربع تويوتا وأكثر
ما قصر،،،،،،،،،،وكلام سليم وشو ربع التويوتا عند ربع الباترول ما يتقارن<<<<<لصالح الباترول طبعا!!!!!
غضنفر
18/03/2007, 11:03 PM
الله يعافيكم جميعا
يعجز لساني عن شكركم جميعا
المشكلة يا جماعة الخير انه كان معي باثفايندر 2003 معجبني مره لكن بعته قرادة وتسرع مني
ثم شريت شاص بخاخ ولا اعجبني عزمه ثقيل مره ولا يشيل عمره في النفود مثل الباث والهلي الغمارة البخاخ
والشاص نمرته قصيرة ويتفتف بسرعة لذلك مداه قصير ولا ينفع بالمراقي
واللحين ناوي على النيسان الربع البخاخ واخاف يطلع عزمه اقل من الباث والهلي الغمارة البخاخ
وانا رجال راعي نفود وألزم ما علي نشاط الموتر بالنفدان
راعي الهـــدد
19/03/2007, 12:40 AM
الغالي بلاك بلاث
اولاً لشكر اخوي ملبق غلط على اقتباس الرد الذي اضن انه يحل بعض ماعندك ياخوي بلاك باث
ثم ثانياً
يقولون خير الكلام ماقل ودل
انا خضت تجارب في سيارات البر
ولاخليت موتر الا وجربته على وجه العموم
ولكن نصيحة محب خذ الخلاصة
افضلها على الإطلاق
الربع الباترول
انصحك تآخذه ولاتشاور ابد ابد ابد
المكيف ماهوب بارد وبس الا صقيع
ويوصل للي ورى
ونشاطه انا اشوف انه اقوى من اي سيارة مكينته 4500 وبخاخ وخفيف بشكل ماتصور
والله انه يطربك طرب في النفود
انا معي واحد 2006 سلقه وهو آخر موتر شريته
ولاشفت منه الا كل علم طيب
وازيدك من الشعر بيت ترى صرفيته في البنزين قليلة جدا
اشور عليك خذه ولاتشاور
تصدق او ماتصدق عاد
كان معي 2006 جي اكس هــدد على قولتهم والله من الخرط
المهم بعته وشريت الربع هذا
حكمي على الأثنين ان الهـــدد اخراط فاضي والربع شيخ قوم ولا به كلام
الهــــدد أخذ سمعة ما ادري وين جاته معه
وبتشوف موضوعي الجاي عن الربع الباترول وفيه تجهيزات يحبها قلبك
تخليه ملك الصحراء وبلا منازع
اعقد النية ولاتشاور ابد
همسة
ترى واحد من أعضاء مكشات تو طلّع واحد 2006 وهو من معرض نجد
ومعرض نجد اقل سعر في السوق ولاتدور وتتعب هو اقل سعر
والي اعرفه ان صاحب المعرض يقول ماباقي الا حبتين وخذا اخونا وحده وبقى وحده
وسعره 75500 سعر خاص والا هو يبيعه 76500
اذا معزم عليه كلمته لك
وعسى ماتكون راحة الحبة لأن الكلام هذا قبل اسبوعين
لأنك اذا ما أخذت 2006 بتقع في مشكلة عويصة وهي ان 2007 بــ 86000 واوك نار
الله يوفقك ويسددك
وانا تحت الخدمة أنت آمر بس
وفقك الله
غضنفر
20/03/2007, 12:01 AM
الاخ الفاضل راعي الهـــدد
اشكرك بعنف على النصيحة
وكلامك صحيح بعض السيارات خذت اكبر من حجمها
بعد الاستخارة و نصائحكم قررت الذهاب اليوم الى معرض نجد وشراء الحبة الباقية من الربع 2006
بمبلغ وقدره 75500 بعد الاخذ والعطاء
لكن قبل لا اعربن عليه عليه قلت خل اجرب اشغل الموتر واشوف اذا فيه لمبات والعة او خلافه خاصة ان السيارة مخزنة لاشهر
اصحاب المعرض رفضوا في البداية لكن مع الحاحي انصاعوا للامر الواقع
ويوم شغلت الموتر تفاجات بان عداد الضغط لا يشتغل
طبعا كنسلت البيعة حاولت معهم يعطوني غيره لكن ما عندهم الا هو وفيه ربع اخر لكن مشكلته ان مراتبه متقابلة ما هي بالعرض
الله يكتب الي فيه الخير شكلنا بنصبرن شهرين الين ما يرخص 2007
علما بان ارخص من رايت يبيع الربع 2007 هو معرض الوديعة بمبلغ وقدره 82 الف
Abo Nader
20/03/2007, 12:17 AM
السلام عليكم...
الله يوفقك بالشرية الطيبه...
أنا معي باث...وركبت السلقه...موتر ممتاز لا داخليه ولا راحه ولا رساوه..ممتاز جدا..لكن تراه رفيع بكفرات البلد إذا بدلتها ينزل الموتر..أحسن ما فيه عزمه بدون تنسيم أفضل من الباث..الباث بالصيف و بدون تنسيم يخور..وتراه يصرف شوي..و الله واحد من الربع يقول أعبيه بنزين(95)ب50 ريال و يمشي430 وحولها بس تراه ما يسرع ولا يكرش...
لكن خيال...طقه ولا تشاور...
غضنفر
20/03/2007, 12:31 AM
وعليكم السلام و الرحمة
الله يعافيك
رأيك محل اهتمامنا
عبدالرحمن السالم
20/03/2007, 10:11 AM
هلا والله ومسهلا أخونا بلاك باث .. والله يابلاك قهر انك بعت الباثفندر والله انه خوش موتر ..
المهم انا كان معي باترول باب واحد " سلقه " مديل 2003 بخاخات طبعاً .. من اروع مايكون
ويمين بالله ماقد اشتكيت منه ابد وجلدته جلد بالبر من قوي الجلد تفقعت المساعدات بس هذا اللى اشتكيت منه
والا الباقي والله ماقد اشتكيت منه ابد ولا قد دخلت وجهيه الموتر الورشه ماهو الموتر بكبره اللهم
زيت وفلتر والا غيره ماحطيت به شى
الموتر ممتاز ممتاز ممتاز بمعنى الكلمه ويطربك طرب ماهو صاحي لابالنفود ولا بالبر
شى لدرجه ان اخوياي لما شافو ماسويت فيه كلهم طقوو مثلي
بس عاد بعته وشريت باث 2005 والحمد الله مرتاح اخر ارتياح ..
وبالتوفيق اخونا بلاك ..
غضنفر
20/03/2007, 10:30 AM
دحيم آخر لفه
الله يجزاك خير على النصيحة
وراعي النيسان بالاخير يرجع للنيسان
شفني انا شريت نيسان ثم تويوتا ولا صلحلي واللحين برجع للنيسان مرة اخرى
عرش السفاري
20/03/2007, 12:15 PM
كفو والله يالنياسين هذي المواتر ولا..........
بلاااااااااااااااااااااااااااااااااااااااشي.
عرش السفاري
20/03/2007, 12:22 PM
في فكره بلاك باث
اذا المسألة مسألت عداد ضغط فقط <<<<<<<ركز<<<<<<<<عداد ضغط فقط.
انا انصحك انك تاخذة ولا تشاور <<<<ليش<<<لأنة في فرق حوالي (7000) ،،،،،،هذا اولا.
أخذ الموتر أول ما تشترية ورح الوكالة وانشاء الله بتكون المسألة بسيطة<<<<<<هذا ثانيا.
وترى السيارة مخزنة يمكن سلك العداد ميبس شوي فقط لاغير<<<<<<<<<هذا ثالثا.
صدقني أنت الكسبان تراها مسألة بسيطة جدا جدا
ولا تنسى الفرق حوالي ((7000))!!!!!!!!!!!!!!!!!!!!!!!!!!!!!!!!!!!!!!!!!! !!!!.
ودمـــــــــــــــــــــــــــــــــــــتم
عرش السفاري
20/03/2007, 12:26 PM
أقصد بالوكالة<<<<<<<بتكون على حساب الضمان<<<<<ورى خشومهم!!!!!!!!!.
والمسألة راجعتلك!!.
ودمــــــــــــــــــــــــــــــتم
الدحبول
20/03/2007, 02:01 PM
بالنسبة لكبسولة تويوتا ستت
إما النيسان ربع يايات
كل موتر دبل يرق أي طلعة بس الدور الكبير على السواق
من وجهت نظري خذ النيسان ومبروك مقدم
شكله حلو مشهور يمسك سعرة عند البيع
إذا كانت صيانة وقطع غيار متوفره في المنطقة الي أنت فيه وشيك على أسعار القطع الاستهلكية
و رأي الاول و الاخير لك
الفاهي000
20/03/2007, 02:07 PM
وش ديزل والبنزين
غضنفر
20/03/2007, 07:45 PM
اشكر الجميع على الرد والتعقيب
عرش السفاري
لي تجربة مريرة مع السيارة المخزنة
لذلك ما ودي اعيد الكرة
بارود برنو
20/03/2007, 08:07 PM
.
2- هل عزمه قوي مثل ربع التويوتا
هل يقدر يرقى المراقي الي يرقاها ربع التويوتا
هذ الي الناس حاسده تويوتا عليه
اما الراحه تويوتا ماعندك
والشكل تويوتا مواترها نضره
ماشاء الله
ولك الاختيار
هاوي قصيده
25/03/2007, 12:33 AM
ياجماعه
الباترول ..
السلق..
هل الدرايش تماتيك او هندل
طيب هل يوجد قير عادي وقزاز كهرب ..ورفارف (ازياج) وجنوط
يعني مانبي سلق وكم سعره
باترول للأبد
25/03/2007, 12:38 AM
عن أذن راعي الموضوع .. هلابك أخوي هاوي قصيدة بالنسبة للباترول السلق في درايش تماتيك وفي هندل .. وفي فل وفية كل المواصفات الزينة جنوط ورفارف وثلاجة وفتحة وسيدي
Powered by vBulletin® Version 4.2.3 Copyright © 2024 vBulletin Solutions, Inc. All rights reserved, TranZ by Almuhajir