وش الحـــــــــــــــل يالربع ؟؟؟

[امير الرفيعه]

بسم الله الرحمن الرحيم

يالربع انا خذيت طير هالسنه وابشركم ذبح معي . لكن يوم جيت اربطه

جاه صياح اول مره اشوفه في الطير اذا فرعت عنه (( فكيت برقعه ))

لدرجه انه خلى الطيور اللي حوله تصايح كلها ..

عطونا الحل يالربع ؟؟

[أبو رداد]

السلام عليكم ورحمة الله وبركاته



اعتقد ان الطير صايبه شي ويتوقعه من بني ادام

ولهذا اول ما يشوف انسان يصيح

والحل هو اعادة الثقه مع الطير من جديد

تنقله ... واذا ماعندك وقت تربطه في مكان قربه بشر

حتى يرجع ويامن الى بني ادم

ويروح منه هذا الصياح

لاتربطه مع باقي الطيور

لان فعلا الطيور الاخرى ممكن تتعلم هذه الحاله السلبيه

هذا ماعندي

وان شاء الله باقي الاخوان يدلون بلوهم

[راع الابل]

هذا اسمه اجفال وطيرك جفول عليك انك تلاعبة بيدينك كل شوي وتمسحة وتنادية باسمه وتخفض الصوت له وترفع الصوت اذا طول بالصياح وتحاول تجلسه معك او قدامك عند اصحابك

تحياتي

[آبو غلآ]

الحل لاتربطه مع الطيور الي عندكـ عشان مايخربها :)
ويخليها تصيح مثله والسنه الجايه شفه له حل ،،


لك احلى التحيه ،،

[راعي الخلوي]

انا كان عندي طير من يشوف رجال حاسر (ماهو مغطين راسه) مفرع يصايح
اول مره شفته شكيت
وسويت تجربه وفعلا تاكدت انه يخاف من المفرعين
المهم شار على واحد من الربع اعشيه على صلعت خوي لنا بس شكلي باخذ بنصيحته :)

[امير الرفيعه]

مشكووور يااخوان ..

لكن الطير مافيه الا العافيه وهو معي في المقناص

مع الطيور الباقيه لكن يوم جا وقت الربطه هنا الكلام ؟؟

[حطاااااب]

السلام عليكم ورحمة الله وبركاته
امير الرفيعه 0000 مساء الخير
الصياح بالطيور لها اسباب ومراحل وتراه مثل المرض اذا ماعالجته يزيد الصياح
انا بجاوبك باللي اعرفه لان لو الطير مبطي عندك على الاقل عرفنا علته اذا هي عاده ولا
لان كان عندي طير اشرط لك انه مهو صياح واذا تركته يومين ماشاف احد تجي اليوم الثالث تكره وتعاف شوفته
صياح كنه قرناس وحش مطروح هذا اغرب طير مر علي وكنت اربطه لوحده لانه معدي لطيور الثانيه
من واقع تجربه اقصد معدي مهو مرض معدي الطيور الثانيه تاخذ العاده سبحان الله
اما اذا طيرك يكرك او صيحته لما تقرب عنده هذا حل بسيط جدا انا اقصد المقيض الخاص اللي يكون شخصي لك وباذن الله تروح صيحه طيرك ادخل غرفه المقيض خمس مرات يوميا وفي كل زياره تجلس قريب لطير الصياح وبدون ماتحاول يصيح اول ايامك اجلس بعيد لين يهداء صيحته ويستامن وبعدها قرب مسافتك لين يصير دخولك له عادي بس احرص عدم دخول الغير لان بيستنكر من جديد واذا عندك عامل خله يسوي الخطوات هذي وعلى العموم كل زياره تحس انك تمكنت من زرع الثقه لطير ابداء بدخول شخص ثاني معك بشرط انه يكون واقف على الباب والطير بيبداء بصياح واول مايبداء خله شوي ويطلع ويكون وقت عشاء الطير خل خويك يدخل يحذف العشاء له وعلى هذا الحال اسبوع بتلاحظ هدوء طيرك وقت العشاء مايفكر بشوفك ينتظر خويك وانت طبعا داخل الغرفه وان شاءلله بتروح صيحته
الطريقه متعبه لاكن لاجل الطير وخاصه اذا عزيز عليك وفعوله مونستك بتسوي اكثر
اما اذا طير عادي لك انصحك بطريقه ثانيه قيضه الحاله واول مايصفي الريش وقت النقله دهل الطير وخل وكر بالمجلس بشرط اول الايام مبرقع لين يتعود على الصوت وبعدها خل عيالك الصغار يمرون من حوله ولا كن في طير هو بيتعود لاني لاحظتك تقول ماصاح الا لما جاء المقيض والعلم عند الله انها عاده بطيرك
تحياتي لك واسف على الاطاله

[ابرق العزاف]

هلا اخونا امير الرفيعه == الطير حاصل له موقف

خوف من رجال هذا لسبب والحل دهله وماتقدم من الاخوان فيه
الكفايه خاصه مسالة المقيض00000000 تحياتى

[راعي زيدان]

اخوي امير الرفيعه اول شي يمكن الطير فيه روع من رجال لازم لاجيته وصاح معك رجل حمامه اول مايصيح تعطيه من الرجل وعقب تبرقعه على طول وعقب الدعو عقب ماتعشيه على طول برقعه وانشا الله تخف الصيحه

[امير الرفيعه]

ماقصرتو يالربع

لكن المساله ماهوب من الناس او جفال فيه لا

الطير اذا فرعت عنه وطلعت من الغرفه يصيح من الطيور الثانيه

مهوب من الناس المقصد من الطيور الثانيه لدرجه انه خلى طيوري الباقيه تصيح مثله

وعلى العموم لاهنتو وماقصرتو وبيض الله وجيهكم .

والظاهر باربطه لحاله والله يوفق ان شا الله ...