متى تكون لك ومتى تكون لغيرك؟؟؟؟؟؟؟

[Abunaif]

السلام عليكم
اخواني تعلمون ما ذا يحدث عند الحباري فعندما تجدها يكون هنالك من يجدها معك وتبداء المأساه في من هو الاحق بالحبارى لذلك اردت ان اطرح هذا السؤال لتعم الفائده علما مني بان بعض الردود ستقول ان الشيمه تغلب في بعض الاحيان وهذا صحيح وقطع الله من لا شيمه فيه


ولكن سؤالي هنا اريد له جواب من باب السلوم والعرف عند الرجال بحيث نعرف متى تكون الحبارى لي ومتى تكون لغيري؟؟؟

والسلام ختـــــــــــــــام

[راع الابل]

الرجال يفهم ان اللي حصل الاثر هو الاحق او اللي حصل الحبارى هو الاحق اما الشخص الثاني عليه ان يطلب من اللي حصل الاثر او الحبار ان يمسك دور في الهداد واذا وافق لاقي الاثر فبها واذا لم يوافق فعلية احترام المبادء التي تعارف عليها اهل الطيور واذا سمح له وهد طيرة وعلقها فعلية تسليم الحبارى للي لقاهاااااااااا تحياتي

[أبو فيصل]

وش تقول في اللي يسترفعك من شقة النور (نور الصبح) :no:

يعني يقنص على نور السياره من نص الليل:no2: :confused:

[Abunaif]

اشكركم بس اذا اثنين يقصونها في نفس الوقت والثاني تفاجاء ان الحبارى تنقس مع وجهه علما انه من صبح يقصها يعني انا اقصها من عشره كيلو وانت طحت عليها بالعين وجيتك قبل ما تهد حلها ؟

[راع الابل]

يستاهلها من تعب عليها ولا لك حق انك تهد وانت تشوف الرجال يقص اثرها واللي عليك انك تنايه بالكنود وتتأكد هل هو يقص جرتها والا لا وااذا كان يقصها فخلها له ونا اعتقد انه لن يسمح لنفسه بان يهد قبلك اذا كان فاهم عرف الصقارة وانت ان هديت قبلة عليك انك تسلمه الحبارة وتحلف عليه ولك التحية

[حطاااااب]

السلام عليكم ورحمة الله وبركاته
مساء الخير للجميع

الموضوع يستاهل النقاش وخاصه لمنطقه الخليج لقله الحباري والصحيح لكثره القنوص كل سنه
اما بالنسبه من بداء بالطيب هو راعي الاوله دايم
لاكن نرجع لصحيح في نظري وان شاءلله مانختلف عليه
اذا لقيت الاثر او شوف العين يوقف على من هو امامك اذا شايب فنصيحتي لوجه الله اسمح منها واتركها له
وثق باذن الله بيرزقك اطيب منها ومهد ينومسك ان شاءلله وياما حصلت من الكثير او يعوضك الله بشي اطيب
هذا لشيبان
اما لنا وماادراك مالنا
نبداء بالاثر اذا والله واحد قاصها 4 كيلو والله رزقني بثرها تو وانا ماقصيتها بس وقفت والله من السلم انك تتركها لانك تدري عن التعب والنفسيه اللي مر عليها الرجال وهي ترجع لذمتك ولاكن ماله حق الرجال ينادي عليها احد غيرك لان انت لقيتها وقدمته بالطيب يرد لك الطيب مثل واللي يبي يطلع عن السلوم مالنا دخل فيه كل واحد ويمثل قبيلته او ديرته
وبالنسبه اذا الحبارى طيار خطمت من قدامي هذي لها باب وجواب
اذا والله ماشفت موتر او ناس حولك وشرط طيرك جاهز توكل على الله وسمي
ويفضل انك تسبر الحبارى لين تحط او تثبت مكان ماحطت وتشرف وتشوف اذا ماحولك احد لحفظ ماء وجهك من العيب واذا ماحولك احد ان شاءلله تكون مكتوبه لك وترى المساله ضمير لان بعض الناس يقول انا مالي شغل انا شاري موتر انا خسرت لاجل عيونها انا اصرفت هذا ولع والولع مايجي منه الا الخساير وكسب الرجال الي مثلكم وشرواكم
ملاحظه000 اذا احترمت الناس احترموك
وقدم الطيب تلقاه

[Abunaif]

الف سلام لك يا حطاب ومشكور
وولعلم اهل الطيب واجد بس فيه ناس سلمهم الحبارى لمن صادها وليس لمن حصلها :))))))) الله يكفينا شرهم

[مقداد]

اخوي ابو نابف
نقاش ممتاز

ماعندي زياده اخواني الاعزاء

لكن اللي يقص الحبارى وواحد ثاني طاح فيها بالعين هذا شي راجع للأثنين
على حسب اذا كان شايب فهو يعرف السلوم والعوايد
واذا كان توه متصيقر فكنها منزوعه من قلبه



ولا احد يلوم اللي اذا عين الحبارى يختلف
توقف العلوم و السلوم والعوايد


الله يعين انشاء الله

[الضو]

راعي الاثر هو صاحب الحق مافيها كلام

[أبو رداد]

مشكور اخوي ابو نايف على هذا الموضوع

وبصراحه انا عندي نقص معلومات في هالمسائل
لكثرت الحباري عندنا (نتعازم عليها في اكثر الاحيان)
وكذلك موضوع الجره والاثر
قلما نتبع الاثر نعتمد على الشوف اكثر شي في العراق
اما في الامارات فالسنه هذه حضرت مشاده على حباره
بين سوداني وبلوشي واحد يقول انا ثابتها ساعه 2 ليلا بالبروجكتر
والثاني يقله شوف الجره اول مانزلت انا ثابتها
والحباره هنا 10 الاف درهم
واذا اشتد الطلب والمنافسه ممكن توصل 25 الف درهم !!!
المهم
الحباره كان مشتريها خوي وكنت انا معه وماحصلناها هههههههه
طارت ولايدرون عنها ههههههههههه
فاتمنى بقية الاخوه يشاركون علشان احنا نستفاد من العلم الي عندكم
والسلام